ليه شريف عرفه هو الأستاذ؟
تعالوا نشوف يوسف شاهين طلع مين و شريف عرفه طلع مين
يوسف شاهين طلع يسري نصر الله و رضوان الكاشف و خالد يوسف
مش محتاج اتكلم عن أفلام الاتنين الاولانيين و خالد يوسف أفلامه بتنجح لنفس سبب نجاح "هي فوضي؟" فيلمه مع يوسف شاهين..الإسقاطات السياسية و الكبت عند الناس
من ناحية الممثلين فيوسف شاهين إكتشف عمرو عبدالجليل و هاني سلامة و أحمد يحيي و يسرا اللوزي
اللي نجح هاني سلامة..و نجاحه بيعتمد علي اعجاب بعض البنات بشكله
لكن تمثيليآ هاني سلامة تمثيله يشل
بينما شريف عرفه إكتشف عمرو عرفه و علي إدريس و أحمد صالح و أحمد مكي كمخرجين
و إكتشف كريم عبدالعزيز و أحمد حلمي و بسمة و محمود عبدالمغني و أعاد إكتشاف محمد سعد و رجع هشام سليم للسينما، ده غير انه فجر مواهب علاء ولي الدين و قدم معاه "الناظر" واحد من أفضل الأفلام الكوميديا في تاريخ السينما المصرية
بدون شك شريف عرفه هو الأستاذ
ده طبعآ من غير الخوض في مقارنة بين مايقدمه الإتنين من مستوي فني في افلامهم و صورة كل واحد منهم لدي المشاهد عاملة إزاى و مدي إحترام كل مخرج منهم لعقل المتلقي
و كل المقارنات دي برضه محسومة للأستاذ...شريف عرفه
2 comments:
ممممممممممم
بختلف معاك للمرة التانية :)
شريف عرفه طبعا من احسن المخرجين الموجودين حاليا
بس ماهواش العظيم اللي انت بتتكلم عنه خالص
تعالى نناقش نقطة نقطة
1- دا طلع مين ودا طلع مين
نسيت تذكر عند يوسف شاهين الاستاذ على بدرخان
ومش عارفه ايه اعتراضك على يسرى نصر الله
الراجل عمل افلام مهمه وذات قيمة اهمهم طبعا باب الشمس
خالد يوسف مدعي كبير ..رغم انه التلميذ النجيب للاستاذ بس هوا في سكة تانية خالص
وبردو مش هننكر انه مخرج كويس طبعا
اما بالنسبة لشريف عرفه
مش هوا اللي طلع احمد صالح ..شريف صبري هوا اول واحد اكتشف احمد صالح واحمد صالح اتعلم اخراج على ايد شريف صبري اللي انا بعتبره تكنيكيا احسن مخرج في مصر بلا منازع بس هوا دماغه بايظة
بالنسبة للمثلين
مش هنكر ان شريف عرفه اكتشف ممثلين نجحوا اكتر جماهيريا طبعا
ودا سببه ان يوسف شاهين ما بيعتمدش ابدا على جماهيرية الممثل او كونه في امل يكون نجم او لا
كل همه انه يحط الشخص المناسب في المكان المناسب
مش بيهتم بصناعه نجم زي اهتمام شريف عرفه بالنقطة دي دا اكيد
تكنيكيا مش هنكر ان شريف عرفه ممتاز وان كنت بتعب وانا بتفرج على افلامه من كتر حركة الكاميرا اللي مالهاش داعي بصراحة
وبحس انه احداااااااث
تكنيك شاهين اعلى بكتيييير
ودراميا شاهين يتفوق على شريف عرفه
شريف عرفه بيهمه المناظر اكتر من المضمون
وبيركز على الصورة وتقطيعات المشاهد اكتر من اهتمامه بالقصة
على فكرة انا قرأت سيناريو الجزيرة قبل ما يتعمل فيلم
والسيناريو كان احلى بكتير من النتيجة اللي طلعت !
الحاجة الوحيدة اللي بتميز شريف عرفه في نظري انه انسان محترم وغير مسف
وما بيعملش مشاهد خارجة
راجل فعلا محترم وبيتقي الله في اللي بيقدمه
ودي نقطة معدومة عند يوسف شاهين
ودا راجع لقناعات كل واحد وافكاره
وفي الاخر انا اتفق مع فكر شريف عرفه ولا اتفق مع فكر شاهين
ولكن بحس بشاهين وما بحسش خالص بشريف عرفه
في اعماق وابعاد في افلام شاهين مفقودة تماما في سطحية افلام شريف عرفه المباشرة بشكل ممل
تكنيك اخراج شاهين يتفوق بمراحل
في انتظار بقيت اجزاء موضوعك لانه شاددني جدا
مانقدرش نقول علي بدرخان تلميذ يوسف شاهين لان اعتقد وقت ما ابتدا اخراج كان يوسف شاهين لسه في نص الطريق
اما يسري نصرالله فأهمية الفيلم تختفي قصاد عدم إقبال الجمهور
بالنسبة لشريف عرفه .. من كام يوم و انا بشوف فيلم "اضحك الصورة تطلع حلوة" لقيت تتر البداية عليه 4 اسامي أحمد صالح ضمن المونتاج
عمرو عرفه ضمن الإنتاج
علي إدريس مساعد مخرج
يمكن مرحلة الإخراج الفعلي جت لأحمد صالح مع شريف صبري..معرفش
بس اللي اعرفه انهم شربوا الإخراج في ستوديو شريف عرفه
ايه الكلام الكبير اللي بقوله ده؟ :D
بالنسبة لحتة إهتمام شريف عرفه بالصورة عن المضمون فده مش دايمآ
يعني هو فعلآ الصورة في اولوياته لانه مخرج سينما و لو الصورة وحشة محدش هيبص لها
و كمان بيهتم برضه بالمنطق في السيناريو بعكس يوسف شاهين
بالنسبة للجزيرة انا سمعت محمد دياب بيتكلم عن السيناريو و قال انه كان دموي جدآ في الاول و شريف عرفه لحد اخر يوم كان بيطالبه بتعديلات
بس سواء السيناريو كان اقوي في الاول او لا..اعتقد ان الجزيرة من أفضل الأفلام في تاريخ السينما المصرية
بصراحة انا متحيز لشريف عرفه و ضد يوسف شاهين لان الاول بيحترمني جدآ كمشاهد و بيكون حريص انني اخرج من السينما راضي عن اللي شفته بعكس شاهين اللي شايف الجمهور حمير
Post a Comment