أين أشياء شوبير؟

في فيلم لا تراجع ولا استسلام بتاع مكي كان في شخصية محارب النينجا طول الفيلم بيظهر و يتقتل و يرجع يظهر تانى و يقول جملة واحدة بس هي
"اين أشيائي؟"

اهو شوبير عامل زي الرجل ده..كل ما نفتكر اننا خلصنا منه يرجع ولا كإن كان في اى حاجة

أحمد شوبير بدأ مشواره من تقديم الاخبار الرياضية في نشرة احداث 24 ساعة كل اسبوع مرتين علي القناة الثانية
بعدين اختفي فترة و رجع ببرنامج علي قناة دريم..كان اسلوبه دايمآ يهدف للإثارة و التخبيط
بيدور علي الاخبار اللي وراها مشاكل و قضايا و يسخن فيها لاغراض يعلمها جيدآ
مع كترة الاعلانات..البرنامج بقي برنامجين..و البرنامجين بقوا تلاتة
بعدين قرر يسيب دريم و يروح قناة مودرن
اول ما مضي العقد جاله عرض تانى من قناة الحياة..قبله علي طول
و طبعآ حصلت مشاكل بينه و بين وليد دعبس صاحب قناة مودرن اللي مضي معاه و مع الحياة في نفس الوقت قبل ما يظهر لمرة واحد علي شاشة مودرن
بشوية اتصالات و ضغوط وليد دعبس ساب شوبير يروح الحياة..و طلع قال تصريح من بتوع العلاقة بيننا اقوي من اى عقود و بابنا مفتوح له يرجع موردن في اى وقت

شوبير راح الحياة و قرر يعمل نفس اللي عمله في دريم..بدأ ببرنامج..بعدين يقوا برنامجين..و البرنامجين بقوا تلاتة
و عشان شوبير غالبآ مصاب بلعنة البرنامج التالت..حصلت بينه و بين مرتضي منصور المشاكل اللي عرفناها و تابعناها
و فسخ شوبير عقده مع الحياة
و بعد اختفاء شهرين راجع بمؤتمر صحفي ضخم مع "او تي في" يعلن فيه إنضمامه للقناة
و بكل سذاجة اعلن نيته تقديم تلات برامج مرة واحدة
فنشطت لعنة البرنامج الثالث من نفسها
و خلال ايام قدر مرتضي منصور ياخد حكم بمنع شوبير من الظهور
و في نفس اليوم قال شوبير تصريحه الغبي بتاع عضو اتحاد الكورة اللي سلط الجمهور يحدف اتوبيس الجزائر بالطوب
برنامجه الاذاعي اتلغي..و وزير الاعلام اصدر قرار بمنعه من الظهور في اى وسيلة اعلام مرئية او صوتية
و تم فسخ عقد شوبير مع "او تي في" قبل ما يظهر و لو لمرة واحدة علي شاشتها

مرة تانية غاب شهرين..و رجع إمبارح
رجع اثناء مداخلة هاتفية روتينية لوليد دعبس في احد برامج قناة مودرن..و للي مايعرفوش.. وليد دعبس بيعمل مداخلات هاتفية في قنواته يفتي فيها في كل حاجة و يرحب بالضيوف و يتمني لهم سهرة سعيدة في البرنامج

المهم..وليد دعبس صاحب مطعم مودرن سبورت بعد ما رحب بالضيوف و اتأكد ان الاكل نزل و السلطة تمام و الطحينة حلوة اعلن ان أحمد شوبير انضم لسلسلة مطاعم مودرن
و هيفتح له قناة مودرن كورة يبرطع فيها براحته
و ان علي الجميع توقع عودة شوبير القوية بعد شهر..مش في برنامح ولا اتنين..ولا حتى تلاتة...دي قناة كاملة


في فيلم لا تراجع ولا استسلام محارب النينجا كان بيرجع عشان يطالب باشيائه اللي محدش عرف طول الفيلم عرف ايه هي..و برضه مفيش حد هيفهم ايه سبب استمرار رجوع شوبير كل مرة..ولا ايه هي الاشياء اللي شوبير عايز يوصل لها طول برامجه

قالوا هذا الاسبوع

(1)

لن أعتزل الخماسي الحديث بسبب دقيقتين بالمايوه.سأتدرب بالحجاب وسأصعد به إلي منصات التتويج

اية مدني بطلة العالم في الخماسي الحديث هتتدرب بالحجاب و هتقلعه في المباريات عشان تلعب بالمايوه
و ده بعد قرار الاتحاد الدولي للخماسي بفرض المايوه كزي إجباري للعبة


(2)

أحببت الملذات فى لبنان وأدمنت حبوب الهلوسة

نور الشريف يتحدث عن احباط فترة الشباب


(3)

عطل فنى وراء عدم إذاعة حلقة "الطبعة الأولى" اليوم

احمد المسلماني معمول له عمل


(4)

الأمر قرب بنسبة 90 %، فأنا طلقتها فى لحظة جنون ندمان عليها وهنتصلح قريب وحتى واحنا منفصلين كانت بوسى أقرب الناس لى وواقفة جنبى فى كل الأزمات


نور الشريف يعترف لعمرو الليثي بقرب رجوعه لبوسي


(5)

أثناء تسجيلى الحوار مع عمرو الليثى سألنى عن احتمالية عودتى لزوجتى بوسى خلال الفترة المقبلة، فقلت له أتمنى أن يحدث ذلك، ولكن ليس هناك شىء رسمى يمكن الإعلان عنه حالياً

نور الشريف يواصل استغلال الخبر لاثارة جدل مضاد لجدل قضيته ضد جريدة البلاغ



(6)

لا أعلم أي شيء عن هذا الخبر الذي تم التنويه عنه في أحد البرامج التليفزيونية، ونور هو المسئول عن هذا الكلام


بوسي دخلت علي الخط عشان الموضوع يكبر
و ايا كانت النتيجة النهائية..بيلعبوها بذكاء


(7)

البطولة المطلقة لم تغيرنى

احمد شاكر عبد اللطيف عمل بطولة مطلقة؟؟

(8)

فالمعلومات الحقيقية التى تضمنتها قصة المسلسل لا تتعدى %20

إضافة إلى أن الملفات السرية ذاخرة بعمليات أكبر وأكثر خطورة من تلك العملية، وهذا لا يعد تقليل من شأنها بل هى كذلك بالفعل

الخبير الامني اللواء سامح سيف اليزل بيتكلم عن مسلسل حرب الجواسيس
بصراحة كلامه خلاني احس بنشوة و فخر انني مصري
ده احنا معلمين عليهم جامد

(9)

اقتطعت أجزاء من كل أغنية وقامت بتركيبهما كأغنية واحدة، ولم تعط لكاتبي وملحني الاغنيتين حقهما في تتر الأغنية، فجاء التيتر سريع وباللغة الإنجليزية

مصطفي كامل بيهاجم كليب هيفاء وهبي الجديد اللي فيه اغنيتين..اغنية بابا فين من كلماته و اغنية لما الشمس تروح من كلمات بهاء الدين محمد
مصطفي كامل اشتكي هيفاء في النقابة و هيرفع قضية
طبيعي واحد بيشتكي ان اسمه اتكتب بالانجليزي في التتر مايفهمش ان دول اغنيتين منفصلتين مش اغنية واحدة زي ما قال

(10)

يبدو أن ساندي دخلت بهذا الكليب منطقة جديدة بعيدة عنها تماما، قد تضعها في تصنيف مطربات العري كليب، بعد أن اختارت الظهور شبه عارية في عدد كبير من مشاهد الكليب


المتحدث الاعلامي باسم المغنية ساندى في تصريح عجيب للدعاية لها بعد الخبر بتاع رفض ميلودى عرض الكليب قبل تعديله لاحتوائه علي مشاهد خادشة كتير
الخبر كان مصحوب بصورتين من كواليس الكليب
يلا..الشتا دخل و بقينا في موسم حفلات الاثرياء..فرصتك يا ساندى

قالوا هذا الاسبوع

(1)

لا توجد أى ضغوط خارجية على إدارة القناة، وأى تدخل يكون من صاحب القناة د. أحمد بهجت، الذى يلاحظ خروج بعض الإعلاميين ومقدمى البرامج على الحياد والموضوعية فيكون تدخله بالمنع حتى يتم ضبط الإيقاع مرة أخرى

محمد خضر مدير قناة دريم اثناء نفيه لخبر وقف اذاعة برنامج الطبعة الاولي بعد قطع اخر حلقة اثناء بثها و عدم اذاعة البرنامج مرة اخرى

(2)

نادم علي عرض مسلسل يوميات ونيس في رمضان

تصريح محمد صبحى بعد عرض مسلسله في رمضان..حاليآ بنجاح ساحق للسنة الثامنة علي التوالي


(3)

أنا لسه قرفانة من هنا، وعلشان كده لازم أرجع علشان أغير. ثم أننى قرفانة أيضاً من المجتمع الأوروبى والأمريكى

أنا زهقت من الصحافة والإعلام. مافيش واحد عمل معايا حوار ونشر ما أقوله بصدق

أنا شاركت فى مظاهرات ضد بوش، وضد أوباما. و«السى إن إن» و«النيويورك تايمز» تقف ضدى، وتفرض رقابة على ما أقول، ويقصون من كلامى، مثلما يحدث فى مصر بالضبط. أمريكا لا يوجد بها حرية إعلام، والإعلام المصرى يقلدها

نوال السعداوى في اخر حوار لها قبل إنتقالها للعيش في المريخ

(4)

أنا استغفر ربنا أن يسامحني على ذلك، فلقد كان المشهد يتطلب شربي لطبق من الشوربة، وبعد ضغط شديد من المخرج الذي أجبرني على ذلك، وأقنعني بأن أعوضه بإفطار مساكين لأن الجهة الإنتاجية يمكن أن تتعرض لخسارة مبلغ 50 ألف جنيه عن هذا اليوم

عمر عبدالعزيز اجبر لوسي علي الافطار في رمضان عشان طبق شوربة
بالمناسبة كان ممكن المشهد يتصور بطبق فاضي و محدش هياخد باله
لان حسب معلوماتي الضئيلة طبق الشوربة مش شفاف

(5)

سأغني رغم انف النقاد
لن أجعل أحدا يحرمنى من الغناء بعد اليوم

سمية الخشاب هتغني غصب عن الكل مش بس النقاد

(6)

هناك مشروع تعاون بين جومانا والمطرب عبد الله بالخير
لتقديم أغنية خليجية، من كلمات حسام العبيدلي وألحان فايز السعيد

جومانا مراد تستعد لمنافسة سمية الخشاب في الاسواق الخليجية


(7)

تعقد زينة حاليا جلسات عمل مع الكاتب الصحفي وائل عبد الحميد للاتفاق على الشكل النهائي الذي ستظهر به في أول برامجها التليفزيونية، وهو فكرة وكتابة وائل، وسيحمل اسم زينة .. الحياة

فنانة جديدة تنضم لشاشة قناة الحياة في إنتظار تولي أشرف زكي لرئاسة القناة

(8)

هفضل عروسة على طول.. وهفضل مبينة رجلي ما هى حلوة وملفوفة

إيناس الدغيدي في حالة مراهقة متأخرة

(9)

طوني خليفة معلوماته محدودة، وزاهي وهبي برقبته، و(ضفر) أي إعلامي مصري بعشرة منه إطلالة وثقافة

مفيد فوزي بعد ظهوره في برنامج طوني خليفة لماذا

(10)

أنا من عشاق أفلام المبدع خالد يوسف، وكنت أتمنى أن تكون بدايتي في السينما في أحد أفلامه

تصريح لميريام فارس خلاني اتخيل لقاءها الاول بخالد يوسف في مكتبه..ايوه كده يا وديع اخيرا ابتديت تفهم

رمضانيات

(1)

مش لاقي كارتون سوبر هنيدي علي اى قناة..محدش عنده خبر عنه؟

(2)

حماسي لمسلسل بوجى و طمطم لن يتخطي مشاهدة تتر البداية بعد ما شفت مشهد واحد من حلقة امبارح

كنت متوقع ان المشكلة تبقي في دوبلاج بوجي..خصوصآ ان صوت يونس شلبي كان مميز

لكن المشكلة طلعت في دوبلاج طمطم

إيمي سمير غانم عامله صوت طماطمايه مفعصه

(3)

في رمضان الشياطين بتتسلسل و تتحبس

و يبقي شهر من غير وسوسة

يعني اى حاجة وحشة بيعملها اى حد..بتكون نتيجة لوسوسة النفس

لكن سؤال يحيرني..هو الموضوع بتاع سلسلة الشياطين ده مع المسلمين بس ولا بيشمل كل الناس؟

(4)

كابوس سيد ابو حفيظة مسخرة بكل معني الكلمة

قصة حب علام ابو حفيظة و إلزا ألبرتو قمة في الرومانسية

(5)

رمضان بيكون فرصة للناس انهم يغيروا نفسهم و يعدلوا طريقة حياتهم

كل سنة بيظهر لي شخص عنده قناعة ان رمضان هيكون فرصة حلوة له عشان يغير حياته للاسوأ

تعدد الاشخاص و العرض واحد..انا و انت و مزتين بكرة بعد الفطار و البلد فاضية و عيش يا معلم

تقول لهم حرام ده إحنا في رمضان..يقولوا ماهو حرام بعد رمضان كمان..يبقي عادى

(6)

المنافسة شرسة علي لقب اكتر حملة إعلانات مستفزة..و لحد دلوقتى هي محصورة بين حملة إعلانات موبينيل المعمولة علي اغانى عبد الحليم حافظ..و حملة إعلانات عبد القوي بتاع الضرائب اللي اكيد مخترعها طفل عمره مايزيدش عن 12سنة

(7)

إعلانات الحاجة الساقعة جامدة جدآ..و كالعادة بيبسي و كوكاكولا بيتباروا في مين يعمل اعلانات كوميديه اكتر

بس السنة دي بتظهر حملة إعلانات شويبس لاول مرة

الفكرة مجنونة جدآ..انك تعمل حملة إعلانات تسخر فيها من الاخرين و تقول احنا منتجاتنا مش محتاجة اعلانات

(8)

نص مسلسلات رمضان اللي بتتذاع قبل الفطار..لا تصلح للعرض قبل الفطار

(9)

مع اول ايام رمضان بيتباري المطربين في الادعية و الكليبات المصحوبة بصور للطبيعة من طيور و زهور و جبال و بحور

بس صناع فيلم "اخر ايام الارض" قاموا بتجربة مختلفة..نزلوا اغنية الفيلم

و الحكاية كلها غريبة جدآ..اول مرة اسمع عن الفيلم رغم انه من بطولة خالد صالح و حنان ترك

الاغنية مناسبة لرمضان

لكن لما نفكر فيها كأغنية فيلم و نشوف الكليب اللي اخرجه عمرو سلامة..حالة مختلفة جدآ

ده غير ان اسم الفيلم نفسه جديد

الاغنية هي "قلب فارس" و هي الاغنية الشغالة في البلوج دلوقتى

و نظرآ لإن الاغنية مانزلتش علي سايتات الاغاني

صنعت نسختي الخاصة بإستخدام التقنيات العالية المتوافرة علي حاسوبي الخارق

و هي متاحة لكم عشان تعملوا لها داونلود

قلب فارس - هاني عادل - Right click & save target as

و ده فيديو الاغنية علي يوتيوب

Watch

(10)

طوال الفترة اللي فاتت كان كل الناس بينتقدوا اعلانات قناة القاهرة و الناس لانها مسروقة من اعلانات اجنبية كلها موجودة علي اليوتيوب

لحد ما قناة القاهرة و الناس اعلنت قبل رمضان بيوم عن برنامج يوتيوب بالمصري احلي

و هو قائم علي تقليد فيديوهات مشهورة علي اليوتيوب..و منها الاعلانات اللي الناس هاجموا القناة بسببها

قهوة ساده في فرح العالمي

الاسبوع اللي فات مريت بحالة نشاط فنى زائدة

و كنت محظوظ انني في 3 ايام متتاليين اشوف 3 عروض فنية رائعة

السبت

فيلم الفرح

نزلته من ع النت
الصوت ممتاز و الصورة مش وحشة
القصة تدور في حي عشوائي بجد -مش من بتوع خالد يوسف- عن مجموعة ابطال مطحونين
الابطال دول كلهم بيجمعهم شيء واحد..الفرح

خالد الصاوى بيخترع فرح وهمي لاخته الوهمية بهدف انه يلم النقطة و بفلوسها يشتري الميكروباص اللي بيحلم به
و الافراح دي معروفة باسم "الجمعية" نسبة للجمعيات اللي الناس بيعملوها و كل شهر شخص يقبضها
اللي بينظم الجمعية دي متعهد افراح و كل شهر واحد بيعمل فرح و يلم فلوس
و العريس و العروسة بيكونوا متأجرين

الشخصيات اللي جوه الفرح ورا كل واحد منهم قصة..و بيحصل اثناء الفرح ان ام صاحب الفرح اللي قاعدة في البيت بتتعب..فمراته بتروح له و تاخده علي البيت و يروحوا يلاقوها ماتت
فبيطلب ان الفرح يقف و بيجتمع في بيته مع متعهد الفرح..و النباطشي اللي بيحيي الفرح و العريس و بيقرروا انهم يخبوا الخبر و الفرح يكمل عشان يلم فلوسه
و بيرجعوا للفرح و يكملوه فبتحصل احداث و صدمات كتير متصاعدة و متتالية
لحد ما يخلص الفرح
و ينتهي الفيلم بمشاهد بتعرض النهاية اللي كان ممكن تحصل لو البطل رفض يكمل الفرح بعد موت امه

الفيلم قالب احداثه متشابه بشدة مع كباريه و ان اختلفت التفاصيل
و في المجمل هو فيلم مختلف و ممتع


الأحد
فيلم العالمي

كان في دماغي افلام اجنبي كتير شفتها عن الكورة بما فيها فيلم "جول" اللي مؤلف الفيلم صرح انه تأثر به فقرر يكتب فيلم مصري مشابه بس بملامح انسانية اكتر
و الحقيقة الراجل ماكدبش

الفيلم بيحكي قصة صعود لاعب كرة قدم بس بمنظور انساني و بنشوف حياته الشخصية من ايام الطفولة
لحد ما وصل لانه يبقي لاعب عالمي بيوصل بمصر لكاس العالم

الفكرة نفسها جديدة.."انسنة" البطل..و دي حاجة احنا مش متعودين عليها
البطل شخص غير مثالي نشأ في مناخ غير مثالي
طريقة السرد و المزج بين الواقع و الفلاش باك كانت ممتعة
حياته كلاعب اتعملت بطريقة حلوة و كعادة اللاعب المصري..حياته ماشية بالعواطف و الحظ
و زي اى لاعب كرة بيلاقي حواليه معجبات و شهرة...بيصاحب ابراهيم سعيد و يسهر معاه ليلة معسكر المنتخب
قصة صعوده كلاعب كرة قدم متاخدة من قصص مهاجمين منتخب مصر
حتة من محمد زيدان علي حتة من ابوتريكة علي حتة من ميدو علي حتة من عماد متعب علي حتة من عمرو زكى
تم تغليف ده كله بظهور عدد مهول من الشخصيات الكروية المحلية و العالمية
مع واقعية شديدة في الاحداث خلت في مصداقية للفيلم

قبل الفيلم كنت متخوف ان اداء الممثلين يفسد الفيلم..بس احمد مدحت قدر يختار ممثلين صح و يتحكم في اداءهم
خالد حماد كان في منتهي التألق في الموسيقي التصويرية و من اول ثانية في تتر البداية قدر يشدني

ياسين كامل نجح في انه يكتب فيلم تراجيدي مبهج و اهم حاجة انه مفيهوش ابطال مثاليين
بإختصار..انا معجب بالتجربة اللي في الفيلم ده

و دي تالت تجربة مختلفة علي السينما بيقدمها محمد حفظي في سنتين

الإتنين
قهوة سادة..مكتبة الاسكندرية

المسرحية كانت بتعرض ليلتين بس في الاسكندرية
قريت عنها كتير جدآ و كان عندي حماس انني اشوفها
العرض مدته ساعة و نص..و كانوا ساعة و نص من الابداع و الابهار المتواصلين
و كمية تصفيق و ضحك عالية جدآ

المسرحية بتتكلم عن السلبيات اللي بقت موجودة في حياتنا..و قبل كل مشهد بيظهر الابطال قاعدين يشربوا قهوة سادة كإنهم في عزاء

و كإنهم بيشربوا قهوة سادة علي السلبية اللي هيناقشوها في المشهد اللى جاى

المسرحية مفيهاش حاجة وحشة
الموسيقي التصويرية و الإعداد الموسيقي رائعين
الإضاءة و استخدامها في العرض ممتاز
الممثلين موهوبين جدآ
و خالد جلال كتب و اخرج عرض مسرحي عبقري..و كفاية ان الابطال كان بيبقي قدامهم 30 ثانية في الظلام قبل كل مشهد يحضروا نفسهم

قهوة سادة حالية فنية تخلي الواحد بعد العرض له نفس يشرب شربات فرح رجوع العروض المسرحية المحترمة

ملحوظة: يوم الاربعاء شفت فيلم 1000 مبروك

بس اظن ان الكتابة عن فيلم لاحمد حلمي بقي مفيهاش شيء جديد ممكن يتقال

كالعادة...أحلي أفلام الصيف

قالوا الاسبوع ده

(1)

تردد أن هذه المشاهد ضايقت الفنان أحمد حلمي، وهذا غير صحيح على الإطلاق، لأن المشاهد موظفة جيدا في السياق الدرامي، كما أنها جاءت خفيفة

حسن الرداد بيدافع عن مشاهده مع مني زكي في فيلم إحكي يا شهرزاد..بس هو يعني ايه موظفة في السياق و خفيفة؟؟

و التصريح ده جاى بعد اسبوع من تصريح لحلمي انه مش زعلان و ان مني ادت المشاهد كويس بإحترافية

(2)

أقول للجمهور الذي يتأثر بشكلي وملابسي، أنني عانيت كثيرا في حياتي كي أصل لما أنا فيه الآن، ومن يريد التأثر بي فليتأثر أولا بصبري ومعاناتي والمجهود الذي بذلته لأحقق النجاح

المناضل تامر حسني بينصح الجيل اللي بيحكمه..الكارثة ان في ناس بدأوا تقليد شكله فعلا..و البرنيطة بقت تتباع

تخيلوا منظر واحد طالع من البحر بفانلة و شورت و برنيطة تامر يبقي عامل إزاى؟

(3)

سيتم قتل "الأستاذة ليلى" في حادث مأساوي مدبر من جانب أحد رجال الأعمال، الذي ظل يطاردها طوال أحداث المسلسل
عمر الشيخ مخرج مسلسل ميرفت امين الجديد بيقول لنا نهاية المسلسل عشان مانضيعش 30 يوم في الفرجة علي الفاضي

(4)

الناس بتقارن مابين وحياتى خليكى وخليها تاكلك...طب ازاى بس؟

عاطف المختار بيتكلم عن المقارنة بين عمرو دياب و تامر حسني

(5)

ناس منسية ..مرمية ..مهملة..تفتقر لأبسط حقوق العيش والآدمية .. لما يحبوا ياكلوا ..يقعدوا يفتشوا على بقايا الأكل في اكياس الزبالة !! ولما يجوا يسجلوا ولادهم في المدرسة .. يكتبوا اسم منطقتهم في ورقة التسجيل جنب خانة عنوان المنزل..فتعتذر المدرسة عن قبول ابنهم لأن المكان مش موجود على الخريطة

ساره بتتكلم عن سكان العشوائيات - مش موجود علي الخريطة

(6)

قالت لي وهي تبكي
" يارب اموت وترتاحوا مني "
فرددت في صمتٍ
" مش هنرتاح بس هو هيرتاح "
أليس هذا كفيلاً بأن تبقي على قيد الحياة ؟!

ساره في واحدة أخرى من ابداعاتها - همسة


(7)

الموديلز اللبنانيات احسن من المصريات

حاتم فهمي في تصريح عجيب قال فيه ان اللبنانيات كفائتهم اكبر..بس ماوضحش إزاى؟

(8)

وافقت على الفيلم بعد تأكيدات بشرى لي أن مخرج الفيلم قادر على أن يقدم فيلما جيدا، وللأسف اتضح لي أن رؤيتها ضعيفة، وصدمت عندما وجدت اسمها على الأفيش وتتر الفيلم كمخرج منفذ، وهو يضعها موضع المسئولية ويجعلها تتحاسب وتشيل الليلة

عمرو واكد بيتبرأ من فيلمه الجديد المشتبه بعد ما بشري و المخرج ضحكوا عليه و حطوه قدام الامر الواقع

(9)

ارتباطي مؤخرا بمحمد زيدان لا يعني أنني سأتوقف عن المشاركة مع تامر حسني في أفلام مرة أخرى، فنحن مستمران في الدويتو القائم بيننا سينمائيا

التصريخ رقم 5000 لمي عز الدين عن خطوبتها لمحمد زيدان..و مش فاهم ايه العلاقة بين خطوبتها لزيدان و شغلها مع تامر!؟


(10)

مفاجأة تنتظر كل عشاق الساحرة المستديرة بظهور النجوم العالميين توتى و ديفيد بيا ومورينتس فى الفيلم

محمد حفظي في تصريح عن فيلم العالمي فكرني بالراجل بتاع إعلان إتصالات اللي بيقول
معايا يا جماعة فانلات رجالي قطن 100% صافي

(11)

بدورى فى دكان شحاتة اخترقت منطقة محظورة يخشاها الممثلون وهى أدوار الشر، ولكننى دخلتها بتحد حتى يتأكد المشاهد أنى أقدم كل الأدوار ولا أستهلك نفسى فى أدوار بعينها

تصريح قنبلي صاروخي للفنان الأسطوري محمد كريم اول من يقدم دور شر في السينما المصرية

(12)

الفيلم يقدم صورة عارية عن فساد رسمى وفساد اجتماعى يتجاوران جنباً إلى جنب ويتحالفان يدا بيد للانقضاض على شرف وعذرية وطن كامل، فى دولة لا يعلو فيها إلا حملة المباخر ومحترفو التزلف إلى السلطة

خالد صلاح - اليوم السابع
دي اخف جملة في مقال تطبيلي محزلق مفزلك عن فيلم إحكي يا شهرزاد

(13)

حين أيقنت من أنه لا يداعبني، وافقت مباشرة

مايكل أوين بعد صدمته برغبة اليكس فيرجسون مدرب نادى مانشستر يونايتد في التعاقد معاه بعد ما اتصل به في التليفون و طلب منه يزوره في النادى و فاجئه بطلبه بعد ما كان بيتفاوض مع اندية القاع عشان يلاقي نادى يلعب فيه

(14)

العقد مدته ثلاث سنوات..وسوف نقوم ببث كل مباريات الدوري الإنجليزي حتى وإن كانت في نفس التوقيت..لأننا بصدد إنشاء قنوات إضافية لنقل هذا الدوري الكبير

محمد نجيب مدير قناة ابوظبي الرياضية بيغيظ كل الناس اللي بيتابعوا الدوري الانجليزي علي شوتايم و بيقول لهم ان الموسم الجاى اخر موسم هتذيع فيه الشوتايم الدوري قبل ما يلطشه هو

(15)

من المؤكد أنني سأقدم أدوار إغراء مستقبلا، ولكن إذا وجدت الدور الذي أبحث عنه، مثل تلك الأدوار التي أدتها الفنانة هند رستم، والتي حملت بعدا فنيا وإنسانيا كبيرا

تصريح لدنيا سمير غانم بتطمن محبيها انها هتقدم لهم ادوار إغراء..بس هو ايه البعد الإنساني الكبير اللي هي تقصده في الإغراء؟

قالوا هذا الاسبوع

(1)

عرفت بعد ذلك ان العروسة اكتفت بفستان اختها الصغيرة
بعد اجراء بعض التعديلات عليه توفيرا على ابيها
و بانها وافقت على العريس توفيرا على نفسها
من نظرات و اتهامات و ادانات و مصمصات شفايف
مجتمع لا يرى فى اميرتها سوى انها "دبدوبة"..انه يوم التوفير اذا

انا حرة - حواديت نساء من الشرق

(2)

أوحش حاجة .. أن الواحد يكون عبرة و عظة للى بعده

Kabbary - مارينا رايح جاى

(3)

إنه لاعب يحتاج لمساعدة نفسه والابتعاد عن الإصابات، إن كان راغبا فعلا في خدمة مصر

حسن شحاتة متحدثآ عن ميدو

(4)

الشجرة المثمرة تقذف بالحجارة، وهؤلاء النقاد يعتقدون أنهم يستطيعون تحقيق نتائج أفضل منا

شوقي غريب متحدثآ عن التحامل في انتقاد المنتخب بسبب او بدون

(5)

مجدي عبد الغني يتباهى ويتفاخر في كل مكان يذهب إليه حتى الأن بهدفه الذي سجله في مرمى هولندا في كأس العالم رغم أنه لم يكن هدف فوز وكان من ضربة جزاء وذلك على الرغم من مرور 19 عاما على هذا الهدف، فماذا سيفعل زيدان الذي سجل هدفين رائعين في مرمى البرازيل؟ وماذا يفعل محمد حمص الذي سجل هدف الفوز التاريخي على إيطاليا؟

خالد طلعت - Filgoal.com

(6)

هؤلاء المنتقدين إما كارهين للسينما أو لمنى أو لأنفسهم

وحيد حامد متحدثآ عن حملات انتقاد مني زكي علي الفيس بوك فور عرض إعلان فيلم احكي يا شهرزاد

(7)

لقد قررنا هذا بعد أن وجدنا أن هناك عددا كبيرا من الأفلام العام الماضي كانت تستحق الترشيح، مثل فيلم
The Dark Knight
لكننا كنا ملتزمين بترشيح خمسة أفلام فقط

سد جانيس رئيس أكاديمية الفنون الامريكية بعد قرار زيادة عدد الافلام المرشحة لأوسكار افضل فيلم سنيمائي الي 10 افلام

(8)

بكل غرور أنا صانع أفلام مهمة

عمرو سعد متحدثآ عن نفسه

(9)

من الكلام الذي عجبني جدا في هذه النقطة كلمة الممثل الكبير ممدوح عبد العليم عندما قال عني "إني جاي من الماسورة اللي جيه منها أحمد زكي"، وكان هو أول واحد يشير لهذه النقطة

عمرو سعد متحدثآ عن مقارنته بأحمد زكي -شكليآ- في فيلم دكان شحاتة

(10)

أنتم هتودونا فى داهية

شريف عرفة متحدثآ للصحفيين عقب سؤاله عن شائعة وقف تصوير فيلم "اولاد العم" بناء علي طلب من إسرائيل

(11)

تقارب صوتى مع سميرة سعيد لا يزعجنى

تصريح لمطربة ناشئة اسمها مي في محاولة للفت الأنظار الي البومها الذي صدر في هدوء

(12)

صورة بوستر أم إعلان بوكسر؟

محمد صالح - Filfan.com
و بالتأكيد الحديث عن بوستر البوم عمرو دياب الجديد

(13)

الفيلم يضم 24 دقيقة إفيهات جنسية، و10 دقائق يعلم فيها عادل إمام الفنان أشرف عبدالباقى كيف يقيم علاقة حميمة مع زوجته، و4 دقائق يتأمل فيها الزعيم جسد يسرا

علا الشافعي - اليوم السابع
متحدثة عن "بوبوس" فيلم عادل امام الاخير

(14)

صحافة جنوب أفريقيا ومنها أنا لدينا معايير أخلاقية عالية في الصحافة، فكان بإمكاننا بدلا من اختلاق قصة أن لا ننشر القصة بالأصل

ايليجا موهولولا الصحفي الجنوب أفريقي صاحب شائعة فتيات ليل منتخب مصر مدافعآ عن نفسه و متجاهلآ نفي حكومة بلده لصحة الخبر

(15)

هي بالنسبة لي قصة عادية وهذه جريمة تحدث في كل أرجاء العالم وأنا عانيث منها عندما كنت في أثيوبيا

نفس الصحفي الغبي يستنكر الضجة التي أثارتها القصة مدافعآ عن بلده بإدعاء انها جريمة عادية، مفتخرآ بتعرضه للسرقة من فتيات الليل في أثيوبيا

بدل فاقد..فيلم ماتفوتوش

الفيلم بإختصار ممتع

الفكرة بسيطة..بس التنفيذ رائع

مش هتكلم عن القصة ولا الاحداث عشان محرقش عليكم حاجة

لكن الفيلم من أكتر الافلام اللي بتحترم عقل المشاهد

لازمه تركيز في كل لقطة و جملة

كل الممثلين كانوا في احسن حالاتهم

محمد لطفي نضج اوى كممثل

لكن اكتر حد وقفت قدامه في الفيلم ده هو المخرج..أحمد علاء

الاسم كنت لاول مرة اسمعه..حتي ما اتذكرش انني شفته كمساعد مخرج في تتر فيلم الفترة اللي فاتت

الافلام اللي من النوعية دي بتعتمد علي المخرج

و في بدل فاقد..في مخرج عبقري و له رؤية مميزة و خاصة

أنصحكم بعدم تفويت متعة المشاهدة

إبراهيم الأبيض المتوسط

مساكين أهل العشق..حتي قبورهم عليها تراب الذل بين المقابر

لحد دلوقتي مش فاهم السبب اللي خلي صناع الفيلم يكتبوا كلمة "شاعر مجهول" جنب بيت الشعر اللي في بداية إعلان الفيلم..و بداية الفيلم نفسه

البيت من كتاب "روضة المحبين" للإمام ابن القيم الجوزيه

بس عامة إختيارهم للبيت كان موفق..لانه بيلخص قصة الفيلم

فيلم إبراهيم الأبيض هو بإختصار قصة امرأة عشقها هلاك

حورية اللي بتلعب دورها هند صبري هي محور القصة

و الأحداث بتدور في احدي المناطق المهمشة اللي بيعيش فيها عصابات البلطجية

كل منطقة لها كبير..و رجالة المنطقة..هم رجالة الكبير و صبيانه

أم حورية كانت ست مسيطرة علي جوزها..عشانها قتل و إتقتل

أبو حورية قتل أبو إبراهيم بالخطأ لإن أم ابراهيم (حنان ترك) ضربت أم حورية (سوسن بدر) بالقلم

فأبو حورية راح و معاه بلطجي (باسم سمرة) و قعدوا يضربوا الراجل لحد ما مات منهم

إبراهيم قتل أبو حورية بالخطأ لإن أم حورية لقت حورية و إبراهيم ( الاطفال) نايمين جنب بعض

فأبو حورية قعد يضرب إبراهيم لحد ما ابراهيم اخد سكينة و ضربه و هرب

بعد سنين إبراهيم (السقا) بيشوف حورية (هند صبري) و بيعرفها بس ما بتعرفوش

في اليوم ده كان عبد المالك زرزور ( محمود عبد العزيز) قرر يشغله معاه

إبراهيم بيتفق مع حورية علي ميعاد

و في الميعاد ده بيبهرها لدرجة انه خلي عشري صاحبه (عمرو واكد) يكتف عمال امن الملاهي و يخليهم يشغلوا عربيات الملاهي عشان حورية و إبراهيم يلعبوا

و بتنتهي الليلة بأبراهيم و حورية سكرانين في عربية من عربيات القطار المهجورة..في مشهد وضح ان حورية طالعة لأمها

هي اللي بتسيطر

في اول عملية لإبراهيم مع عبد المالك..بيعرف من واحد من رجالته (نضال الشافعي) ان كل ستات العالم كوم عند عبد المالك..و حورية كوم تانى

هي الوحيدة اللي عبد المالك عشقها و مقدرش يحصل عليها

و إن اى حد يتقدم لها و توافق عليه..تاني يوم يلاقوه مقتول

في يوم في حفلة سبوع حفيد عبد المالك..إبراهيم بيكون موجود و حورية واقفة في البلكونة بتتفرج..و بتخرج ام حورية تتفرج و بتلمح إبراهيم..و بتعرفه

و هنا حورية بتنقلب علي إبراهيم بعد ما تعرف ان حبيبها هو اللي قتل ابوها

و بصرف النظر عن عدم منطقية انها ماعرفتوش من البداية خاصة انه حب طفولتها و هو اللي قتل ابوها و اسمه إبراهيم

يعني مش محتاج تفكير..بس ده اللي صناع الفيلم كانوا شايفينه

و قبل ما إبراهيم يحاول يصلح علاقته بها.. بيكون عبد المالك بيبلغ عن إبراهيم

و بيتقبض علي إبراهيم و هو رايح يقابل حورية عشان تسمعه لاخر مرة

و بتفضل حورية قاعدة مستنياه..في حين ان إبراهيم كل اللي شاغله في القسم هو حورية

و بيهرب من القسم و بيجري علي المكان اللي هي مستنياه فيه..بس بيكون بعد فوات الاوان..حورية مشت

و بيستسلم للعساكر اللي بيطاردوه..و بيروح السجن

و بتقرر حورية الإنتقام

بتروح لعبد المالك و تشترط عليه انها تعيش معاه بدون ما يفكر يلمسها

و بيديها وعد بده علي امل ان ييجي اليوم اللي هي توافق فيه انها تتجوزه

و عشان تزيد انتقامها بتختار يوم خروج إبراهيم من السجن عشان يكون يوم جوازها من عبد المالك

و زي ما كانت امها...بتبقي هي المتحكمة في عبد المالك..و برغبتها في الانتقام بتخليه يبلغ عن إبراهيم و يتقبض عليه لتاني مرة

و رغم رغبتها في الانتقام بنشوف انها لسه بتحب إبراهيم

و بيبان ده في مشهد هروبها من بيتها..لما بتروح تنام في اوضة إبراهيم

و في الليلة دي عشري بيشوف نور الاوضة..و بيطلع و هو سكران و يحاول يعتدي عليها و هي نايمة..فبتضربه و تسرق الفلوس اللي إبراهيم مخبيها..و فيها العقد الذهب اللي ورثه عن امه

بيخرج إبراهيم من السجن..و بيعرف من عشري ان حورية سرقت الفلوس و العقد..بس عشري مابيحكيلوش سرقتهم ازاى ولا إيه اللي حصل ليلتها

فبيروح ابراهيم و عشري يهجموا علي بيت عبد المالك..و ياخدوا العقد و يولعوا النار في البيت و يمشوا

حورية بتطلب تقابل عشري

لما بيروح بيقابلها بتديله فلوس إبراهيم

و بتديله 5 الاف جنيه مقابل انه يستدرج إبراهيم للقهوة و هناك رجالة عبد المالك يضربوه عشان يأدبوه

طبعآ عشري بيرفض..فبتهدده انه تحكي لإبراهيم عن اللي حصل ليلة ما كان سكران و تسيب إبراهيم يقتله

و فعلآ..عشري بيرضخ لطلبها..و في الليلة دي عبد المالك بيقرر يروح بنفسه عشان يقتل إبراهيم

وسط محايلات من حورية انهم ماياذوش إبراهيم..و بتهدده لو إبراهيم جراله حاجة مش هيشوف وشها تانى

و بيروح مع رجالته و بيبدأوا في الضرب مجموعة بتضرب عشري و مجموعة بتضرب إبراهيم

لحد ما بيموت عشري و بيجتمع كل رجالة عبد المالك و يبدأ كل واحد يطعن ابراهيم بنفس الطريقة اللي عملها معاهم في اول الفيلم..عور بس ما تقتلش

بعدين بيولعوا فيه النار بنفس الطريقة اللي هو ولع بيها بيت عبد المالك

و في الوقت ده حورية بتروح القهوة و عبد المالك بيطلع المسدس و يضربها بنفسه

فبيشيلها إبراهيم اللي محروق و كل حتة في جسمه بتنزف

و بيقعد علي جنب..و بيموتوا الاتنين في نفس اللحظة

و يخلص الفيلم

الفيلم في مجمله متوسط و فيه كمية لا بأس به من اللامنطقية في احداثه

زي مثلا اننا مش هنفهم ازاى عشري كان هو الراوى في الفيلم..و مات في الأخر

ولا هنفهم ازاى حورية ما اتعرفتش علي إبراهيم و امها شافته من مسافة اكتر من 20 متر و في ثواني اتعرفت عليه رغم مرور السنين

ولا هنفهم سر القوة الخارقة لكل أبطال الفيلم اللي تخليهم بيتضربوا 50 مطوة و يكملوا بدون ما يعرجوا

و برضه مش هنفهم ازاى رغم إن إبراهيم مصاب بالعرج..بس كان بيجري بسرعة خارقة اثناء مطارده الشرطة له و بدون ما يعرج

مشهد المطاردة في اول الفيلم منقول بدرجة اقرب الي نقل المسطرة من فيلم

Slumdog millionaire

و النقل يشمل ديكورات الحي العشوائي كمان

الفيلم كعادة كل أفلام جود نيوز..ناقصه حاجات كتير

و التصريحات اللي اطلقها السقا علي الفيلم تخلينا نقدر نحكم علي مدي قناعته بالفيلم اللي قدمه

"تجربة مهمة..و ان شاء الله الديلر يبقي خطوة أفضل"

"الفيلم رومانسي"

"سعيد انني إشتغلت مع محمود عبد العزيز"

"شيء مهم ان يبقي في مندوبين عن شركات توزيع الافلام من كل الدول بيشوفوا فيلمي"

السقا شايفه تجربة مهمة و اكيد مقتنع انه خطوة اقل من اللي قبله

بس انا شايف ان التجربة دي خطوة سيئة جدآ بعد فيلم "الجزيرة" و اعتقد برضه انها خطوة سيئة قبل فيلم "الديلر" اللي اتمني مايكونش تجربة أخري

لان الجمهور مش مستني تجارب

أخيرآ..زي ما صناع الفيلم اضافوا جملة في اخر الفيلم تعبر عن فيلمهم..احب انا اضيف جملة من عندي اعبر بها عن الفيلم

امرأة واحدة تستطيع أن تغوي ألف رجل - شيخ مجهول سمعته في التاكسي

دليلك للفيلم الهابط في 10 خطوات

بما ان موسم افلام الصيف ابتدي..و دخلنا مرحلة نزول فيلم كل اسبوع

قررت ادي شوية نصايح للناس اللي يحبوا يضيعوا 3 ساعات في السينما يشوفوا فيهم فيلم تافه

و علي غرار علامات جودة المنتجات

دي علامات سوء الفيلم اللي لازم محبي الافلام الهايفة يحرصوا علي وجود اكبر كم منها في الفيلم

(1)

يتصدر الافيش صورة لفنان من نجوم الصف التاني يبدو فيها انه علي وشك التقيؤ او مصاب بإسهال شديد

(2)

ان تكون احدى بطلات الفيلم هي علا غانم او ميرنا المهندس

(3)

بجوار البطل و البطلة ستجد حسن حسني يقف راسمآ علي وجهه تعبير ساذج من المفترض ان يضحكك

(4)

الفيلم من إخراج اكرم فريد او احمد البدري في حالة سخاء الانتاج
او مخرج مجهول في حالة وجود منتجين من نوعية نافع عبد الهادى

(5)

تأكد من سماعك لاغنية شعبية اشتهرت في الفترة الاخيرة في اعلان الفيلم

(6)

تأكد من وجود مطرب يمثل لأول و اخر مرة بالفيلم

(7)

يوجد علي الافيش صورة لشاب وسيم أو فتاة مزة لا يعرف اسمهما احد

(8)

تستطيع ان تجد في الاعلان او الافيش او كلاهما ما يكفي من لحوم لجذب الجمهور الغير نباتى

(9)

ممثل قديم و مكروه ابتعد عن شاشة السينما و يبدو من الاعلان و الافيش انه قرر ان يعود رغم انوف المشاهدين

(10)

المنتج و المؤلف و المونتير و مدير التصوير و واضع الموسيقي التصويرية مجهولون

اطيب التمنيات بمشاهدة طيبة و وقت ضايع ممتع

ملحوظة: لو مستعجل و مش فاضي تدور علي العلامات دي..ادخل فيلم لتامر حسني

أجمد 10 الساعة 8

(1)

هو أبوهشيمة إتجوز هيفا ليه؟

(2)

نظرية: في ناس مابيعملوش حاجة في حياتهم إلا لما يكونوا مستعدين لها
دى حاجة حلوة أكيد..بس مين قال إن العالم بيستني حد يستعد؟

(3)

ايه اللي يخطر علي بالك لو شفت 3 شباب قاعدين قدام كارفور
حواليهم اكياس مرمية واضح انهم خلصوا اللي فيها
اللي بيشرب حاجة حمرا..و اللي بيشرب في قزازة خضرا و اللي شكله خلص شرب و واقف يحط قطرة لعينه عشان مايتفضحش
علني..في وسط الناس و عز الزحمة


(4)


الزمالك بيفاوض عمرو سماكة للإنضمام لصفوفه بداية من الموسم الجاى
تفاصيل العقد مليون جنيه في الموسم و قرش حشيش علي كل ماتش يلعبه و باكتة بانجو علي كل جول و جرام هيروين مكافأة إجادة


(5)

الطبيعي ان لما حد يتصل بك ترد تقول الو

بس في ناس لما بيتصلوا بابقي عايز أرد اقول
"بتتصل تطلب ايه؟"
مابحبش الناس بتوع انت حبيبي عشان عايز منك خدمة

(6)

وزير الصحة بيقول ان مفيش حاجة اسمها انفلونزا الخنازير
و إن الاسم الصحيح لها هو الانفلونزا المكسيكي..نظرآ لإنها جاية من المكسيك
وزير الصحة نسي يقول ان بداية الشكوك في وجود الأنفلونزا المكسيكي داخل مصر
كانت لما الاهلي خسر من نادى با..بااا..اااااتشووووو..كا المكسيكي في كاس العالم للأندية

(7)

الترواكار و التوب "اللي بيتزحلق" هم نجوم الموسم الصيف ده لغير المحجبات
و العباية اللي تحتها جينز هم موضة المحجبات
إبتسم انت في الاسكندرية


(8)

بقي لي 3 شهور مادخلتش السينما
و ده معناه ان بقي لنا 3 شهور بينزل عندنا افلام مستواها وحش
اما نشوف الصيف ده إن شاء الله هيبقي عامل إزاى؟


(9)

قريبآ إن شاء الله هستعرض موسم الصيف الجاى حسب ملامحه اللي ظاهرة
كل اللي اقدر اقوله دلوقتي..ان في عك كتير هيحصل

(10)

بعد موجة السيتكوم اللي غرقنا فيها بقي لنا 3 سنين

الموجة الجديدة هتكون في عروض

stand up comedyالـ

و ده بيثبت اننا فعلا شعب بيحب الضحك

أجمد 10 الساعة 8

(1)

أغنية فيلم "دكتور سليكون" اللي قام بغناءها عبد الله الكاتب

و هو بالمناسبة منتج و بطل الفيلم كمان

هي نموذج للإبتذال الأخلاقي اللي ممكن يلجأ له شخص عشان يلفت نظر الناس

عبد الله الكاتب بيقوم بدور دكتور السليكون اللي هيحقن مروي

و مش عارف ايه دخل نانسي عجرم في الموضوع..بس هو بيحاول يتسول دعاية علي حسابها

و بيقول انه وجه لها دعوة لحضور العرض الخاص و هي ماجتش

و بينفي كمان خبر ان نانسي عجرم زعلانة من الفيلم

نوعية الاخبار المتخلفة دي شيء طبيعي نسمعه عن فيلم اخراج احمد البدري و بطولة نيرمين الفقي

(2)

مفيش حاجة هتمنعني من مواصلة حملة "هيا بنا نفكس" طالما في عدد لا بأس به من الناس الفاكسين المحيطين بي

(3)

"و كلامها ده هز قلبه و فرحه..و نساه انها في الايام دي نسيته"

صدق اللي قال..يا مأمن لهم يا شارب من مرهم

(4)

اول ما إنتشر الفيس بوك كانت الموضة هي صور المايوهات

بعدين طلعت موضة صورة حملة حماية بتاعة صناع الحاجات

الموضة الجديدة علي الفيس بوك اليومين دول صورة الكاس

يعني الواحد يبقي واقف ماسك الكاس في ايد و السيجارة أو المزة او كلاهما في الايد التانية

تسأله ايه ده يا عم؟

يقول ريد بول طبعآ

و عينك حمرا و بتلمع من الريد بول؟

لا ده عشان أنا مطبق

مطبق؟ وماله

طبعآ مفيش داعي اسئله عن المزة اللي محضونة أحسن تطلع أخته في الرضاعة

(5)

حكمة أجمد 10: شد اللحاف علي وشك..غيره ما يفيدك

(6)

فلسفة أجمد 10: زمان قالوا لنا اللي يتلسع من الشوربة ينفخ في الزبادي

بس ولا حد فكر يقول لنا هنعمل ايه مع الشوربة بعد ما إتلسعنا منها؟

هنسيب الطبق و نجيب الزبادي و ننسي موضوع الشوربة

ولا نمسك الشوربة تاني بعد 5 دقايق و ندوقها..و إحنا و حظنا..يا نتلسع تاني يا نشربها

(7)

إذاعة موزاييك التونسية و دي إذاعة جامدة زي نجوم اف ام في تونس

إختارت الممثلة درة كأجمل امرأة تونسية لعام 2009 بمناسبة يوم المرأة

تعليق درة كان انها اتفاجئت خاصة ان تونس مليانة بنات جميلات

و انها تتمني ان الاختيار ده يكون لجمال روحها و شخصيتها مش جمال شكلها

طبعآ نجوم اف ام لو قررت تقلد الفكرة و يعملوا بنصيحة درة..هيتم إختيار كريمة مختار

علي اساس انها "حد جميل" و روحها حلوة في اللوكيشن

(8)

علي الفيس بوك و قبله هاى 5

الواحد كان بيشوف حاجات صادمة..بروفايلات لبنات عرب متصورين صور فاضحة

لي واحد صاحبي عنده هواية العثور علي البروفايلات دي و التبليغ عنها

و بيسميهم زي ما معظمنا بيسميهم..بروفايلات مضروبة

بس السؤال..البنات دول إتصوروا الصور دي إزاى؟

و الصور دي إزاى برضه وصلت علي النت و شخص تعبان نفسيآ عمل بها بروفايل مضروب؟

(9)

الشيء بالشيء يذكر..شكل الفيس بوك الجديد متخلف جدآ

و واضح ان ماتمش إختباره قبل طرحه لانه مليان عيوب تقنية

و ده غير إنه بيفتقد لابسط قاعدة اساسية في تصميم المواقع

friendly user interface

يعني يكون شكله يشد و استخدامه سهل

و لحد النهاردة لا حبيت الشكل..ولا عارف اتعامل مع الاعطال

(10)

و انا بكتب الفيلم الهابط بتاعي..كنت فاكر انني بطرح قصة عجيبة شفتها

بس إكتشفت انها عادية جدآ مقارنة بالقصص اللي قريتها في الردود

يعرض حاليآ : الحب الذي فقس

(1)

سهي : خليك جنبه يا مدحت..كان نفسي انا اللي اكون جانبه..بس هو مش عايزني جانبه دلوقتي
هو إنسان كويس أوى..حاول تكسبه كصديق و تساعده يعدي محنته
و أرجوك..طمنني عليه

و ياريت مايعرفش انني طلبت منك كده

مدحت : ماتخافيش..هلزق له من غير ما يعرف انك زقاني

(2)

سهي: اهو طلع من محنته..حاولت أقوله نرجع تاني

بس طلع أقسي من ما كنت أتصور يا مدحت

تخيل وصل بي الحال كل يوم الصبح أبعت له إيميل في ميعاد صحيانه و اقوله انا بحبك

إسبوعين علي الحال ده..و لما لقيت انه مابيردش

بعت له إيميل تاني..و قعدت أتأسف له..بس هو تجاهل كل كلامي

عارف قال لي ايه؟

مدحت: قالك ايه يا أختي؟

سهي: قال لي بتتكلمي عن ايه؟ انتي ماعملتيش حاجة عشان تتأسفي..خدي بالك من نفسك و بلاش نفتح السيرة دي تاني..متخيل؟

مدحت: لا مش متخيل بصراحة..بس واضح انه بيحبك

سهي: بيحبني؟ بجد؟ هو قال لك؟

مدحت: جري ايه؟ لا ماقاليش..بس مش قالك خدي بالك من نفسك؟ يبقي بيحبك

سهي: حسبي الله و نعم الوكيل فيك يا مدحت..غور من وشي

(3)

سهي: علي فكرة انا خايفة يكون بيهمل في حياته..ارجوكم راقبوه و خلوه تحت عينيكم

صديقاتها: ماتخافيش..هنكلمه و نحاول نصحصحه كل ما نحس انه هيهمل في نفسه

صديقة 1: اول امبارح كنت شايفاه و دقنه مش محلوقة..يبقي بيهمل؟

صديقة 2: لا يا غبية..يهمل يعني مايعملش الواجب

صديقة 1: خلاص هقوله يبطل مايعملش الواجب و مايهملش..فاهماها..مايهملش و مايعملش..نفس الوزن

صديقة 2: هيهيهيهي..جامدة دي

سهي و دمعة نازلة علي خدها: حتي صديقاتي الانتيم مش حاسين بمعاناتي..إهي إهي

صديقة 2: خلاص انا اسفة يا روحي كنت بهزر معاكي

صديقة 1: إمسكي المنديل ده و نفي..مناخيرك سايحة

فجأة تشتغل موسيقي راقصة و يقوم الاتنين يشدوا سهي و يرقصوا رقصة جماعية لمدة 5 دقايق وسط تجمهر الناس حواليهم في دايرة و تصقيف

(4)

سهي: انا مسافرة الشهر الجاى..مش عايزاه يعرف ده
هو كان معارض لسفري من اول يوم إتكلمنا في الموضوع
هو في اكتر من انني اقول له نتجوز و نسافر سوا؟
ده انا اللي بعرض عليه الجواز..بس هو بيقولي ان طموحه هنا..في مصر و انه يكمل مشواره
و بقي كل ما يقابلني يتجاهلني..ده بقي بيذلني مش بس بيتجاهلني
انا قدام اصحابه قلت له انت ليه بتتجاهلني كإنك ماتعرفنيش؟

واضح انه اتغير بعد اللي حصل له..بس ارجوكم..مش عايزاه ييجي حفلة التوديع

مدحت: ماشي..ماتقلقيش..إحنا اًصلآ مش عاملين حسابه في الجاتوه

صديقة 1: انت دفعت الـ18 جنيه بتوع الجاتوه لوحدك؟

مدحت بصوت واطي: بس يا هبلة ماتسيحيش قدامها

صديقة 1: ما انت لازم تقولي جبتهم منين

مدحت: طبقتهم من شنطتها و هي بتتكلم في التليفون

صديقة2: يا ندل..طب انا هاتوهها و انت شوف لي صباع روج ولا اي لاينر

سهي: انتم بتتوشوشوا تقولوا ايه؟

مدحت: ولا حاجة..ده احنا بنتكلم عن قد ايه هتوحشينا

فجاة تشتغل أغنية و تقوم سهي لترقص بينما يغني مدحت و تنظر الصديقة بغيرة بدون مانفهم سبب

(5)

لقطات متتالية لمدحت جالسآ في احد مقاهي الانترنت و امامه شاشة هلامية لملف وورد مكتوب فيه

You've got mail

لكي يفهم المشاهدون انه يقرأ رسالة

إيميل 1: انا عايشة في بيت عيلة هندية..هاعمل الماجيستير و أرجع مصر

إيميل 2: انا مقدرتش أقابلك الاجازة اللي فاتت زي ما وعدتك..أصلي إتخطبت لما نزلت..و علي فكرة خطيبي عايزني أرجع مصر

إيميل 3: أنا فسخت خطوبتي..و رجعت تاني أعيش بره..بس جالي شغل في مدينة غير اللي انا عايشة فيها

إيميل 4: انا إستقلت من الشغل..جالي عرض أحسن في دبي

كفاية انني هرجع أتكلم عربي من تاني..ماتعرفش الدرهم يعمل كام اليومين دول؟

(6)

صديقة 1: خير يا مدحت..طلبت تشوفني ليه؟

مدحت: سهي جننتني

صديقة1: مش فاهمة..مالها سهي؟

مدحت: انتي عارفة قصة الحب اللي كان بينها هي و

صديقة 1 مقاطعة: ايوه عارفة..انت ناسي انها كانت بتحكي لي كل حاجة؟

مدحت: هي كانت بتحكي لي كل ده برضه..حبينا بعض شوية
بس شكلها حبتني مكافأة عشان إهتميت باللي هي حبته و سابها
رحت سألته و حكيت له..حكالي عن واحدة تانية غير اللي عرفتها
مازعلتش منه ولا منها
هو كويس انه تجاهل فكرة انني حبيت اللي كانت في يوم حبيبته..و هي كانت بتحبه هو و كانت فاكرة انني اللي هوصلها له

بعد خطوبتها ما اتفسخت فرحت..قلت لها مستنيكي في مصر

بس بقي لي 3 سنين مستني..و حتي و انا رايح أقضي الأجازة في دبي هيبقي عندي أمل اقابلها هناك

صديقة1: مدحت..أرجوك طلع سهي من دماغك..حس بي..انا بحبك

مدحت: بتحبيني انا؟ و حياة ابوكي؟

صديقة1: ايوه بحبك..بحبك

فجاة تشتغل موسيقي و اغنية و يقوم مدحت بالغناء بينما هي ترقص..و يلتف حولهم الناس في دايرة

بينما نري سهي تفتح باب الكافيه و تدخل شايلة شنطتها و علي خدها دموع الندم

الـنــهــايـــة

تم التصوير بتقنيات فوتوشوب لتحسين صورة المواقف الفاكسة

تم الطبع و التحميض في البلكونة..سبنا الفيلم يحمض يومين و قررنا ننزله

جميع أبطال هذه القصة من الواقع..و يولعوا مالهمش حقوق عندنا

مع تحيات

المؤلف و المنتج و المخرج و الدكتور اللي هيقيس الضغط

يعرض قريبآ : الحب الذي فقس

في تاني أفلام مقاولاتكو فيديو فيلم

و عودة لأمجاد السينما الهابطة

يعرض قريبآ بجميع دور العرض الفيلم الهابط

"الحب الذي فقس"

و هو يعرض ضمن حملة "هيا بنا نفكس" التي ترعاها الشركة

و توفيرآ علي السادة الصحفيين الفضوليين نصدر لكم هذا البيان

الفيلم مستوحي من قصة رومانسية واقعية هتخليكم تعيطوا بشدة

اسم الفيلم الاصلي كان "الحب الذي فكس" ..و لكن رأى المخرج ان الاسم الجديد جذاب اكتر

ينصح بتوخي الحذر لمرضي الضغط و الكوليسترول من المشاهدين

يوجد علي مدخل كل قاعة سينما باعة مناديل..الكيس بخمسة و سبعين قرش..نص للصبي و الربع للسينما

محدش يرمي المناديل علي الارض حرصآ علي السينما النظيفة

الفيلم إستغلال سافر و وقح لنجاح سلسلة هو و هي في رمضان اللي فات

الفيلم فيه تأثر شديد بروائع أحمد البدري و أكرم فريد

حرصنا علي ان يكون الفيلم به إستخدام الابطال لجميع وسائل التكنولوجيا لكي ننافس السينما في بولندا و النرويج التي يمتلك ابطال افلامها موبايل بوليفونيك

الفيلم حائز علي لعنات و سباب جميع أعضاء لجان تحكيم المهرجانات اللي اتعرض فيها

الشركة مازالت تبحث عن فتيات موهوبات للقيام بأدوار إغراء تعيد أمجاد هند رستم ضمن مشروعنا للهبوط بالسينما