(1)
أغنية فيلم "دكتور سليكون" اللي قام بغناءها عبد الله الكاتب
و هو بالمناسبة منتج و بطل الفيلم كمان
هي نموذج للإبتذال الأخلاقي اللي ممكن يلجأ له شخص عشان يلفت نظر الناس
عبد الله الكاتب بيقوم بدور دكتور السليكون اللي هيحقن مروي
و مش عارف ايه دخل نانسي عجرم في الموضوع..بس هو بيحاول يتسول دعاية علي حسابها
و بيقول انه وجه لها دعوة لحضور العرض الخاص و هي ماجتش
و بينفي كمان خبر ان نانسي عجرم زعلانة من الفيلم
نوعية الاخبار المتخلفة دي شيء طبيعي نسمعه عن فيلم اخراج احمد البدري و بطولة نيرمين الفقي
(2)
مفيش حاجة هتمنعني من مواصلة حملة "هيا بنا نفكس" طالما في عدد لا بأس به من الناس الفاكسين المحيطين بي
(3)
"و كلامها ده هز قلبه و فرحه..و نساه انها في الايام دي نسيته"
صدق اللي قال..يا مأمن لهم يا شارب من مرهم
(4)
اول ما إنتشر الفيس بوك كانت الموضة هي صور المايوهات
بعدين طلعت موضة صورة حملة حماية بتاعة صناع الحاجات
الموضة الجديدة علي الفيس بوك اليومين دول صورة الكاس
يعني الواحد يبقي واقف ماسك الكاس في ايد و السيجارة أو المزة او كلاهما في الايد التانية
تسأله ايه ده يا عم؟
يقول ريد بول طبعآ
و عينك حمرا و بتلمع من الريد بول؟
لا ده عشان أنا مطبق
مطبق؟ وماله
طبعآ مفيش داعي اسئله عن المزة اللي محضونة أحسن تطلع أخته في الرضاعة
(5)
حكمة أجمد 10: شد اللحاف علي وشك..غيره ما يفيدك
(6)
فلسفة أجمد 10: زمان قالوا لنا اللي يتلسع من الشوربة ينفخ في الزبادي
بس ولا حد فكر يقول لنا هنعمل ايه مع الشوربة بعد ما إتلسعنا منها؟
هنسيب الطبق و نجيب الزبادي و ننسي موضوع الشوربة
ولا نمسك الشوربة تاني بعد 5 دقايق و ندوقها..و إحنا و حظنا..يا نتلسع تاني يا نشربها
(7)
إذاعة موزاييك التونسية و دي إذاعة جامدة زي نجوم اف ام في تونس
إختارت الممثلة درة كأجمل امرأة تونسية لعام 2009 بمناسبة يوم المرأة
تعليق درة كان انها اتفاجئت خاصة ان تونس مليانة بنات جميلات
و انها تتمني ان الاختيار ده يكون لجمال روحها و شخصيتها مش جمال شكلها
طبعآ نجوم اف ام لو قررت تقلد الفكرة و يعملوا بنصيحة درة..هيتم إختيار كريمة مختار
علي اساس انها "حد جميل" و روحها حلوة في اللوكيشن
(8)
علي الفيس بوك و قبله هاى 5
الواحد كان بيشوف حاجات صادمة..بروفايلات لبنات عرب متصورين صور فاضحة
لي واحد صاحبي عنده هواية العثور علي البروفايلات دي و التبليغ عنها
و بيسميهم زي ما معظمنا بيسميهم..بروفايلات مضروبة
بس السؤال..البنات دول إتصوروا الصور دي إزاى؟
و الصور دي إزاى برضه وصلت علي النت و شخص تعبان نفسيآ عمل بها بروفايل مضروب؟
(9)
الشيء بالشيء يذكر..شكل الفيس بوك الجديد متخلف جدآ
و واضح ان ماتمش إختباره قبل طرحه لانه مليان عيوب تقنية
و ده غير إنه بيفتقد لابسط قاعدة اساسية في تصميم المواقع
friendly user interface
يعني يكون شكله يشد و استخدامه سهل
و لحد النهاردة لا حبيت الشكل..ولا عارف اتعامل مع الاعطال
(10)
و انا بكتب الفيلم الهابط بتاعي..كنت فاكر انني بطرح قصة عجيبة شفتها
بس إكتشفت انها عادية جدآ مقارنة بالقصص اللي قريتها في الردود
8 comments:
الفيلم ده انا مش فاهمة منه اي حاجة اصلا غير بوش بوم طاخ طراخ وخلاص
-------
مجملا الفيس بوك عند العرب بحس فيه كمية انفجار عربي للعرب اللي مش قادرين يطلعو كل حاجة في مجتمعه فيطولعو في الفيس بوك
--------
و يا مأمنة للرجال يا مأمنة للمية في الغربال برضو
عيد أم سعيد على كل أمهاتكم إن شاء الله :)
هنا ليكم وللكل :)
أستاذ محمد,ولين ,وريم,وفاطمة,ونانسي,وماري,وياسمين,,و......و.......و........ إلخ إلخ إلخ إلخ :)
عيد سعيد على كل أمهاتكم إن شاء الله :)
ريـم
ده هدف السينما الهابطة..انها ماتوصلش اى شيء للمشاهد :D
الفيس بوك بقي فعلا مرأة بتعكس واقع المجتمع..في ناس بينفجروا و ناس بيعلنوا اكتر عن شخصيتهم
يمكن اكتر شيء يحضرني يلخص وضع الفيس بوك
هو الحوار اللي كان بيتكرر بين احمد مكي و احمد الفيشاوى في مسلسل تامر و شوقية..لو ماسكتتش هعملك تاج في صور شرم الشيخ
بالنسبة لـ "يا مأمنة للرجال"..فده مثل قديم
ايام ما كان في رجالة وحشين بيضحكوا علي الستات
لكن دلوقتي بقي البنت عندها وعي و دراية و كل البلاوي اللي تخليها تخدع مليون بني ادم بكل براءة :D
أستاذة إيمان
(مادمتي مصممة تقولي أستاذ)
و حضرتك طيبة و عيد سعيد عليكي و علي والدتك و كل الامهات إن شاء الله :)
أنا مش أستاذة لأ :)
التهنئة بعيد الأم..قلتها في مدونتين..مدونة فنون..ومدونة محمد سلطان
للكل :)
لكل المدونات :)
ربنا يكرمك :)
هو التاج..يخلي الصور كدة حتى لو لها خصوصية...تظهر في ملفات أي حد؟
يعني ممكن يتشال ولا ساعتها مش يتشال
أنا قصدي..علشان مدونتك الكل هيقراها كتير..ومدونة فنون..فقلت أقول للكل هنا وهناك هتوصل للكل إن شاء الله :)
كل سنة وانتم طيبين جميعا..انا اتكلمت كتير في المدونة برة الموضوع معلهش
كل سنة وانتم طيبين بجد,كلكم يارب
إيمان
إن شاء الله يكون كل الناس قروا تهنئتك :)
التاج بيعرف اصحابك ان في صورة لكي ممكن يشوفوها
يعني نفرض انك متصورة مع واحدة صاحبتك..صاحبتك نزلت الصورة عندها..و عملت لك تاج
الناس اللي في قائمة اصحابك هيظهر لهم ان انتي معمول لك تاج في صورة عند صاحبتك
و ممكن انتي تشيلي التاج بنفسك..تحت الصورة بيكون مكتوب
Remove tag
Post a Comment