المجموعة الاولي: أسئلة قصيرة إجابتها طويلة
س1: مين أحسن شاعر غنائي؟
بهاء الدين محمد - أيمن بهجت قمر - هاني عبد الكريم - شخص أخر
س2: مين أحسن مطرب في لبنان؟
فضل شاكر-وائل كفوري-راغب علامة - شخص أخر
س3: إيه أحسن ستوديو تحليل كروي؟
بتاع مدحت شلبي - بتاع خالد الغندور - بتاع خالد توحيد - شخص أخر
س4: مين أحسن مهاجم جنب فلافيو؟
أحمد بلال - أسامة حسني - هاني العجيزي - شخص أخر
س5: مين يحرس مرمي منتخب مصر بعد الحضري؟
عبدالواحد السيد - أمير عبد الحميد - شريف إكرامي - شخص أخر
س6: مين اسوأ بطلة سنيمائية قديمة؟
إلهام شاهين - نادية الجندي - نبيلة عبيد - شخص أخر
س7: مين اسوأ بطلة سنيمائية حالية؟
نيللي كريم - داليا البحيري - علا غانم - شخص أخر
المجموعة التانية: أسئلة طويلة و هبلة
س8: ليه كل الممثلين اللي اخدوا فرصة البطولة و النجومية في أفلام يوسف شاهين الاخيرة بقوا فاشلين؟
مابيعرفوش يمثلوا اصلآ -
المتفرجين حمير و مش بيقدروهم -
هم متعمدين يفشلوا عشان يخزوا العين -
سبب أخر -
س9: ليه كل الصحف بتكتب خبر ان الممثلة المعتزلة بتعمل مسلسل و هي معتزلة؟
تمويه عشان تصدم المتفرجين -
جهل من الصحفي اللي بيكتب الخبر -
عشان العدد الجاى تقول انا اتحجبت بس لسه ما اعتزلتش -
سبب أخر -
س 10: ليه أجر الممثلة المعتزلة اللي بتعمل مسلسل و هي معتزلة أعلي من أجرها قبل ما تعتزل؟
فرق فلوس الكوافير -
عشان المنتج فاكرها هتتبرع بالفلوس للمستشفيات -
عشان هي معتزلة و لازمها قرشين تتسند عليهم -
سبب أخر -
س11: ليه مذيعات برامج الاطفال زمان كانوا بيسموا نفسهم "ماما"؟
اتحرموا من الانجاب و بيعوضوا -
الام هي اللي قدمت برامج و حكت حودايت مش اللي خلفت -
عشان الاطفال بيسمعوا كلام ماما و كده هيسمعوا كلام المذيعة -
سبب أخر -
س12: ليه النقاد بيشتموا هيفاء وهبي و مابيعبروش سمية الخشاب؟
سمية بتعمل افلام ساعتين تثبت فيهم مواهبها كلها و هيفاء كليباتها 5 دقايق -
عشان عري سمية تمثيل..لكن عري هيفاء بجد -
عشان الناس بيشوفوا سمية بفلوس لكن هيفاء تتشاف ببلاش..رخيصة -
سبب أخر -
س 13: ليه النقاد بينتقدوا فستان هيفاء وهبي و مابيعبروش فستان إليسا؟
خلافات شخصية مع مصمم أزياء هيفاء -
أصل النقاد بيسرحوا مع صوت إليسا و مابياخدوش بالهم من الفستان -
إليسا لسه صغيرة و حقها تعيش سنها و تلبس اللي هي عايزاه..لكن هيفاء كبيرة -
سبب أخر -
س14: ليه الصحف عندنا لما تيجي تكتب عن فنان أجنبي و صاحبته يقولوا "فلان و زوجته" او "فلان و خطيبته"؟
عشان مايفتحوش عنين الفنانين بتوعنا ع الحاجات الوحشة دي -
عشان يستروا علي البنت بدل ما اهلها يعرفوا انهم عايشين في الحرام -
عشان دي خصوصيات ناس و ماتهمش القاريء اللي هنا -
سبب أخر -
13 comments:
الاسئلة القصيرة اللي اجابتها طويلة ممكن يترد عليها بكلمة واحدة
ما اسخم من سيدي الا ستي الا من رحم ربي
الاسئلة الطويلة موتتني من الضحك بجد
بس انت متحامل زيادة عن اللزم على هيفا وهبي الست حلوة خليك حقاني
:)
هيفاء وهبي حلوة إزاى بس؟
دي بتحرق دمي بكل حاجة فيها
لبسها
شكلها
ضحكتها المصطنعةاللي بتدل علي هبل
طريقة كلامها اللي بتبذل مجهود عشان ترقق نفسها فيها
دي بتعاني من حالة مراهقة متأخر بشعة
ده غير انها عارفة ان كلها 4 او 5 سنين و اجدع جراح تجميل مش هيقدر يخليها تفرق عن نبيلة عبيد
فبتمشي سوقها و تلم قرشين بالحركتين بتوعها من ناس غاويين شهرة
لكن بحس ان الرجالةاللي هيفا فتاة احلامهم زيهم زي اللي كانوا بيعتبروا نادية الجندي نجمة إغراء ايام افلامها العظيمة
ياسلاااااام.. أول مرة حد يتكلم عن الهايفة كده..
اول مرة ألاقي حد شايفها زي مانا شايفاها
وكمان راجل..
أشكرك بصراحة..
تحياتي
تعرف اغلب مواضيعك بتخليني اتسأل هو
ليه احنا مش بنقابل عقليات شباب كدة
زيك ما شاء اله في الواقع و الله بتكلم بجد
ليه في شح رهيب في الدنيا على الشباب اللي كدة؟!
الاء & ريم
اخجلتم تواضعي :)
متشكر جدآ لذوقكم..و ده من بعض ما عندكم يعني :D
هقول لحضرتك
ردي مش عن الموضوع ده خالص :)
ردي عن حاجة تانية تماما :)
هو الواحد بيرد على حاجة تانية خالص :D أنا عارفة :D
لاء,هو كان فيه موضوع قديم لحضرتك
بس أنا بأمانة,اتكسفت أرد ساعتها
بس أنا دلوقتي مش فاكراه..
بس مش هدور عليه
بس فاكرة..
إن حضرتك تقريبا
كنت عامل في موضوع,مقارنة,بين نجوم زمان..ونجوم دلوقتي
أنا ساعتها..اتضايقت
أنا مش فاكرة
بس..حطيت نجوم زمان..جنب نجوم دلوقتي
وقلت,,إن نجوم دلوقتي..أحسن من نجوم زمان
وحطيت مقارنات
يمكن انت حطيت خالد صالح مثلا..جنب محمود المليجي
وشرين..جنب أم كلثوم..وصنفتها إنها أفضل
أنا مش فاكرة..بقول أي حاجة معلهش كدة :D
أنا مش فاكرة فعلا..
بس..أنا مش عارفة ليه من ساعتها..كنت عاوزة أرد..وأقول دول جنب دول..مينفعوش
..
مش فاكرة
بس هو أنا رديت دلوقتي ليه
علشان تقريبا
كان فيه باين..حلقة..ومش شفتها كلها..بس باين..كان فرح بنت عبد الناصر..وأم كلثوم كانت واقفة تغني
صوتها زي ما هو
المهم
هو يمكن مفيش علاقة أصلا
هو ردي عامة ملهوش لازمة :)
بس..
أصلا أصلا يعني
أي واحدة بتغني دلوقتي
لو جابوها تغني...أول ما تعلي صوتها
مينفعش..مينفعش خالص
مفيش مقارنة مع زمان أبدا
..
والممثلين..
مينفعش يتقارنوا صح
......
الرد برة الموضوع وملوش علاقة بحاجة أصلا
بس أنا عاوزة أرد كدة..مش عارفة بقى
يعني عادي:)
حضرتك متتضايقش من رد
ويمكن أنا برد رد حاجة تانية خالص
ويمكن مفيش موضوع كدة
أنا مش عارفة أصلا برد رد إيه
بس كنت عاوزة أرد رد كدة :)
من غير تريقة,آسفة:)
عادي عادي عادي :D
ايمان
فعلا كنت من فترة عن سينما زمان
بس كنت بتكلم عن نقطة اننا ماينفعش نعمل من فنانين زمان اساطير لمجرد انهم كبروا في السن
لان زمان كان التمثيل مهنة مش سهل حد يشتغلها بسبب نظرة المجتمع و الكلام ده
فكان في ناس كتير من انصاف و عديمي الموهبة
محمود المليجي كويس..بس خالد صالح رائع
لكن 90% من ممثلين زمان موهبتهم كانت شبه معدومة..و اصبحوا نجوم عشان كان مفيش غيرهم
موضوع شيرين و ام كلثوم ده ذكرته في مرة تانية
كنت بتكلم عن طرب شيرين
ام كلثوم ميختلفش عليها اتنين
بس انا بحب شيرين اكتر
اكيد هي مش اكتر موهبة من ام كلثوم
ولا دورها في مساعدة مصر وقت الشدة اهم من دور ام كلثوم
بس شيرين اكتر إحساس من ام كلثوم
و اكتر تواضع و قرب للناس من ام كلثوم اللي كانت عايشة في برج عاجي
ام كلثوم مطربة كويسة و كل حاجة..بس انا مابحبش فكرة الرمز اللي لا يجب الاقتراب منه
لان دول بشر عاديين زينا :)
هما لازم يكونوا أساطير
بس إللي زمان
مش إللي زمان قوي
آخرهم إللي اتولدوا سنة 1935
زمان..الدنيا كانت فاضية
دلوقتي..بيمثلوا وحواليهم زحمة قوي
دلوقتي
الأخلاق..راحت حتى في تمثيلهم
آسفة..بس ممكن أقول حاجة
حضرتك بتسمع راديو؟
كان فيه مرة في برنامج..راديو سينما
جايبين..ابن الله يرحمه علي الكسار
كان جاي يتكلم عن فيلم قديم له
وبيمثل معاه..محمد فوزي..وأعتقد..أحلام..مطربة وومثلة زمان
كان اسمه
المرأة شيطان
في بداية الفيلم
أصحاب الفيلم عاملين تنويه واعتذار
عن اسم الفيلم
وقالوا..نعتذر..ولكن المرأة بحق ملاك..ولكن يجب أن تشاهدوا الفيلم..حتى تعرفوا..متى أيمكن أن تكون شيطانا
مش نفس الجملة
لكن ده معنى الكلام :)
كاناو بيتكلموا عن مثال
ومع كدة
بعتذروا
يبقوا زمان
لازم يكونوا أساطير
حتى لو كانوا عايشين في برج عاجي
لكنهم
عمرهم ما هيتكرروا :)
مش عاوزة أذكر نموذج معين دلوقتي
لكن في كل شيء..حتى إنساني..مش هيقارنوا أو يقارنوا بيهم :)
فيه ممثلين كتير دلوقتي..شايفاهم..متواضعين..وناس بسطية جدا وكل حاجة
لكن في وسط الزحمة
بحسهم بيمثلوا
في وسط زحمة الدنيا دي..والممثلين دول
زمان..أخلاقهم كانت غير
دلوقتي..معظم الممثلين..وأنا آسفة قوي..بيقاوحوا..بيقاوحوا كمان في تقاليد وحااجات كتيرة
ويقولوا..إيه التخلف ده :)
ردا على موضوع حضرتك.الللي فات وده وزي اللي جاي :)
الممثل إللي لسة أخضر حاليا في كل الناس..أخضر وأبيض..ويارب يفضل كدة
هو سامح حسين :D
فعلا بجد..وبقول أي كلام وخلاص :)
أصلي لسة قارئة موضوع حضرتك التاني..وجه إعلان سامح حسين بتاع الأرجنتين في التليفزيون :D
قلت..هو ده الإنسان..الأخضر من برة..والأبيض من جوة
حاجة كويسة والله :D
أي كلام معلهش :D
بسم الله مشااء الله طبعا يعني,علشان غرور النفس..ربنا يحفظه ويخليه كدة :D
.....
رد غبي معلهش تماما ..أقصد ردي آسفة:)
إمم.مش قصدي غلط خالص
له..مش قصدي خالص
مش مشكلة معلهش :)
رد ملوش أي لازمة معلهش
أنا آسفة لو غلطت..وبجد والله مش قصدي أقول كدة لحاجة..أنا فعلا آسفة لو غلطت
بدون قصد
مش في الرد..عن حد..
مفيش
معلهش اصلا ده رد خارج الموضوع..ملهوش لازمة أرد كتير كدة..بلبخ الدنيا جدا
:)
عادي
سلام عليكم:)
ايمان
انا مش مقتنع بالاساطير و الكلام ده
مفيش اساطير..دول مجرد ناس طلعوا في زمن مكنش فيه حد بيفكر فيه في التمثيل
و بالنسبة للتنويه بتاع الفيلم فده مش اخلاق ولا حاجة
ده بس توعية للمشاهدين لانهم ماكنوش بيميزوا ان السينما تمثيل
زي ما كان في بعض الافلام فيها تنويه ان الممثلات اللي بيعملوا شخصيات سيئة السمعة مش كده في الحقيقة
و زي ما زمان كان الناس في العالم كله مندهشين ان في ناس بيتحركوا في القماشة البيضا المنورة اللي قدامهم
لكن لو هنتكلم عن الاخلاقيات..فأخلاق فنانين دلوقتي افضل بكتير
رغم ان الاضواء مسلطة عليهم اكتر بس عارفين يلموا نفسهم
مش زي فنانين زمان اللي كان حياتهم كلها بوظان و علاقات مشبوهة و انحراف و قمار
لو فنانين دلوقتي شايفاهم مغرورين و مزيفين في علاقاتهم فعادى..الشهرة بتغر
بس ع الاقل فنانين دلوقتي من وسط الناس..مش زي فنانين زمان في ابراج عاجية
اما عن سامح حسين..فده إنسان طيب فعلا
و في كل الحوارات اللي شفتها له او قريتها حسيت قد ايه هو انسان مثقف و محترم
ربنا يبارك له و يوفقه هو و كل اللي زيه:)
Post a Comment