رغم ان كل أفلام جيم كاري بتدور في نفس الفكرة
الراجل اللي بتحصل له حاجة غريبة تقلب حياته طول الفيلم و بعدين ينتهي الفيلم به هو و حبيبته
الا انني بحب أفلام جيم كاري و كل ما تتاح لي الفرصة انني اشوف فيلم له بستغلها
و أخر فيلم شفته له كان الفيلم اللي بيحمل نفس عنوان البوست
Yes Man
الفيلم اللي هحاول احكي فكرته بإختصار و بدون الوقوف عند التفاصيل هي ان الواحد لازم يقبل علي الحياة بروح مغامرة
بنشوف البطل اللي بيخشي انه يرتبط بعلاقات مع اى حد سواء اصدقاء او زملاء عمل بيحاول يصلح حياته
فبيسمع نصيحة احد اصدقاءه و بيحضر محاضرة عن الفكرة بتاعة الفيلم
و في المحاضرة بيحصل موقف بينه و بين المحاضر فيقرر ياخد عهد علي نفسه انه يلغي كلمة "لأ" من قاموسه
و بيخرج و هو ناوى يقول "نعم" لكل حاجة تواجهه و بيبقي متأكد انه لو قال "لأ" هتحصل له مشكلة
و فعلا من اول ما بيخرج بيفضل يقول "نعم" و اول ما يفكر يقول "لأ" بيقع من علي السلم
فيقتنع ان فعلا "لأ" لها لعنة و بيجبر نفسه علي كل الحاجات و مابيرفضش شيء
و بيفضل كده لحد ما بيقول "لأ" و بيتعرض لحادثة مع نفس الراجل اللي اقنعه بالفكرة
و بيعرف منه في المستشفي ان مفيش حاجة اسمها لعنة "لأ" ولا قوة "نعم"..الفكرة كلها نابعة من ان الواحد يعمل الحاجة من قلبه
يعني لو هو عايزها فعلا يقول "نعم" و مايرفضهاش
خلص الفيلم و فضلت مع نفسي أفكر في الفكرة
طبيعي ان الواحد لازم يكون مقبل علي الحياة
بس هل ممكن يقول "نعم" لكل حاجة يواجهها و يكون عايزها؟
بتحب الجيتار..طيب ايه اللي يمنعك تروح تاخد دروس جيتار؟
بتحب إيطاليا و نفسك تزورها..فيها ايه لو اخدت كورس في اللغة الايطالية؟
إيه اللي يمنعك لما تشوف بنت عاجباك تروح تكلمها..مش تعاكسها..لا..تتعرفوا علي بعض
إيه اللي يمنعك تبقي فاكك مع زمايلك في الشغل حتي لو حسيتهم شخصيات مختلفة عنك؟
و حاجات كتير اعمق او ابسط..اكيد كلنا نفسنا في مليون حاجة بس مابنعملش المليون حاجة
بس طالما انت عايز الحاجة و مفيهاش حاجة غلط او ضد مبادئك..ليه ما تعملهاش؟
انا شايف ان الفكرة بالإختصار هي ان الواحد ياخد الدنيا بدراعات مفتوحة
و جملة دراعات مفتوحة لها معنيين هنا
المعني الاول ان الواحد يبقي طاير و سايب ايديه
و المعني التاني إن الواحد ياخد الدنيا بالحضن
و مازال تفكيري مستمر في الفكرة..و لسه بسأل نفسي
إيه اللي يمنعني أخوض تجربة الفيلم؟
ياتري حد فيكم فكر فيها..او عنده حاجة تبلور الفكرة دي اكتر؟
قولوا "نعم" و إكتبوا كومنت..ايه اللي يمنع؟
7 comments:
انا شفت الفيلم الشهر اللي فات دخلته لوحدي وكنت محتاج اشوف فيلم مختلف يغير الموود بتاعي
رغم ان فيه بعض نقط الضعف لكن مانكرش اني طلعت مبسووط جدا من الفيلم ومن الروح الايجابيه المتفائله جوااه
جيم كاري صحيح هو كبر لكنه مازال قادر انه ينتزع الضحكات منك ويمكن بقاله كتيير ماعملش فيلم كوميدي بالشكل ده بعد ماتجه لتمثيل الادوار الصعبه والدراميه زي eternal sunshine of spottless mind
فعلا..الفيلم بيغير المود بشدة
انا شفته علي الكمبيوتر
جميل ان الواحد يشوف فيلم و يطلع منه بفكرة حلوة :)
مش دايما الإختيار yes متاح
أحيانا..yes لمرفهين :)
هقول لحضرتك :)
الله أعلم,يمكن وجهة نظري غلط :)
كمثال انت قلته
اللي عاوز او كان نفسه يسافر ايطاليا
Yes يتعلم لغة تانية
اللي يقدر يقول yes
يمكن يكون شخص مرفه
فيه أشخاص تانية
الإختيار التاني
لأا..No هو الحل وهو اللي في ايديهم
وهو لا لحاجات كتيرة,أو الزهد عنها
بس برضه..بيقولوا yes لحاجات تانية,يمكن مش عاوزينها.لكن يمكن..بيرضوا :) yes للوضع اللي هما عليه
ويمكن yes عكس no و no عكس yes
في أمور,وأمور تانية..بلبخ صح
قصدي..
أنا ممكن دايما أقول yes
وممكن دايما أقول no
بس آخد ضد الأشياء اللي اقصد لها الاختيار التاني
ولا..مش عارفة.يعني يمكن بقول أي حاجة أو أي كلام :)
..
عموما yes للتفاؤل..حتى في أسوأ الظروف ومش قادر
بس yes لحلول تانية
فيه حاجات بتمناها الإنسان..يمكن هو يقولها No
حل آخر أفضل.., yesله..yes عكس no و No عكس yes..حسب كل أمر يقدر عليه أو لا
عموما برضه..حضرتك قلت..لو مش غلط :)
أي كلام..:) معلـ..ش
حلو اوى انك اخترتي المثال بتاع اللغة الايطالية :)
انتي بتقولي انها رفاهية؟
طيب إيه رأيك ان تعليم اللغة الايطالية مش هيكلفك اكتر من 20 جنيه بس :)
و معتقدش ان التعليم رفاهية
دي لغة بتساعد اى واحد و بتضيف له
و الكلام ده ينطبق علي كل اللغات الاجنبية بداية من الانجليزي لحد الروسي :)
طيب مهو يمكن..ناس تانية متقدرش :)
اللي اقصده..الإختيار yes
لازم يكون على قد المتاح,فبالتالي,يمكن مش كل الناس دايما تقدر تقول yes
ده مثال..لكن حاجات تانية..بتضطر تزهد عنها وتقولها NO
يمكن..يعني أي كلام :)
بس عموما
Yes للدنيا
دي حاجة كويسة جدا:)
...
يعني مثلا..
ممكن أكون غلطت اني دخلت كلية معينة
مرة مذيعة في الراديو..بتقول,,كدة تمام برضه
طيب مثلا إللي مكنش درس اللي بيحبه..إيه المانع يبدأ من أول وجديد..ويكمل حياته تاني كدة :D
هقوم أنا مثلا..
أقول
Yes
من تاني..أجرب من تاني وأدرس تخصص جديد من أول وجديد..
وأدفع لمدة خمس سنين..كل سنة مثلا 3 آلاف جنيه
مانا مش هقدر
مش هيكون الإختيار ده ليا..أقدر عليه..وأسمع كلام المذيعة..وأقول Yesss
....
إللي أقصده..
حاجات كتيرة مش سهلة..وحاجات كتيرة تستحق نقول لها Yes
وتستحق نعيشها
لكنها مكلفة لناس كتيرة
فساعتها..الإختيار Yes رفاهية شوية :)
فبيقولوا No
وأهلا و Yes بإختيارات تانية :)
مش اللغة الإيطالية يعني,,ولا العشرين جنيه يعني :)
حاجات كتيرة في الدنيا :)
.......
وساعات No عكس Yes
و Yes عكس No
لما نعكس الأمور..يعني بيؤدوا نفس المعنى
ضد الضد :)
أي حاجة يعني وأي كلام :) مني أنا أقصد :)
Yes على قدها..وعلى قد الأمور البسيطة..نقدر نقولها
في الحاجات الكبيرة..هنزهد عنها ونقول..طيب لأ معلهش :) على قدي هقول يس لحاجات بسيطة أقدر عليها :)
يعني..على قدها وعلى قدي :)
ولا كأني قلت حاجة أصلا
أنا عارفة إن الإنسان والله بيقول أي كلام..في لحظة بيكون شايف كدة :D وبيلاقي كلامه يمكن غلط وبس :)
ما انا بقول لو حاجة الواحد يقدر يعملها و مش هتبقي صعبة عليه
لان أكيد كل انسان له طاقة و امكانيات
والحاجات اللي داخلة في مجال اللي فوق امكانيات الواحد مش محسوبة لانه
مستحيل يقدر يعملها :)
أوكي,يبقى تمام:)
Post a Comment