شوية تفكير بالصيني

في حاجة بقت غريبة في الكام سنة اللي فاتوا

إرتفاع عدد الصينيين في البلد

تمشي في الشارع تلاقي صينيين كتير..تقعد ع القهوة تلاقي راجل جاى يبيع لك ساعات صيني..تخش محل موبايلات تشوف موبايل نوكيا بـ4000 جنيه و تلاقي البياع يميل عليك و يقولك عندي اخوه الصيني بـ600 جنيه بس

حتي فوانيس رمضان بقت صيني..و ياميش رمضان بقي صيني

و سوق العربيات تم غزوه بالعربيات الصيني اللي سعر انضف عربية فيهم أرخص من الـ128



الصينيين بقوا كمان بيتكلموا عربي..و بقي في بياعين صينيين بيلفوا علي البيوت يبيعوا بيجامات و مفارش و بطاطين..غالبآ الصين إستعمرت مصر من غير ما يبعتوا ولا عسكري



بعتوا لنا شوية مواطنين كانوا زايدين عن حاجتهم بشوية بضايع زايدة عن حاجتهم..و قلبوا السوق عندنا



الصينيين بقوا عارفين إحنا عايزين إيه اكتر مما إحنا نفسنا عارفين

تليفون البيت عندي صيني و نغماته من ضمنها أغنية لإيهاب توفيق و كمان فيه منبه لمواقيت الصلاة بصوت أذان الحرم المكي، بذمتكم حد هنا فكر يعملها؟

حاسس ان ماعدش ناقصني غير عروسة صيني و دي أكيد مش هتكلفني كتير و هتشتغل بكفاءة اكتر من الموجودين في السوق حتي لو كانت فترة ضمانها أقل.

الحــب..بين الغباء و الهبل

الولد لما يحب بيبقي غبي..و البنت لما تحب بتبقي هبلة

الغبي بيدي كل حاجة عنده من اول لحظة و بيحب بكل طاقته..و الهبلة بتبقي مش متأقلمة مع ده و بتخليه يحرق مشاعر في الهوا..لحد ما هو يضعف و يبتدي يمل..هنا تبتدي تتغابي علي اهله و تقوله "انت متغير من ناحيتي ليه؟" و الدموع مغرقة عينيها

غباء الولد بيخلي خلقه ضيق و بيغير عليها من كل الناس حتي أبوها و أخوها، و هبل البنت بيخليها تتفنن في إنها تعمل كل الحاجات اللي تخليه يغير.

غباء الولد بيخليه يسأل أصحابه إزاى يعمل حاجات تسعدها، و هبل البنت بيخليها تسمع لنصايح صاحباتها إزاى تتقل عليه و تطلع عينه عشان مايخونهاش.

غباء الولد بيخليه متمسك بالبنت لأخر لحظة ممكن يحافظ فيها علي العلاقة، و هبل البنت بيخليها تبوظ العلاقة لمجرد انها تحس بمشاعر قصة الحب الفاشلة و تسمع اغنية شيرين الأخيرة زي صاحبتها الانتيم.

غباء الولد بيخليه بعد إنتهاء العلاقة مش لاقط أي إشارة إرسال منها، و هبل البنت بيخليها فاكرة الولد فردة شراب ممكن ترجعه لها في أي لحظة.

غباء الولد بيخليه لما يحب يتطمن عليها يسأل صاحبتها اللي خربت لهم العلاقة، و هبل البنت بيخليها تقول لصاحبتها و هي بتبكي قولي له انني زي الفل و ان انتهاء العلاقة دي كان في مصلحتي.

ع البحر..بحر الحياة

و إيه في الدنيا دي دايم

سنين عايم مشفتش بر

الجملتين دول قالهم بهاء سلطان في أغنيته "قلبك يا حول الله" ، و بيلخصوا كلام كتير الواحد بيبقي نفسه يقوله

أنا شايف الحياة عاملة زي البحر بالظبط، موجة هادية و موجة عالية و دوامات ممكن تقع فيها..ممكن نبقي إحنا المراكب اللي في البحر و يمكن نكون إحنا السمك او حتي مجرد ناس بيسبحوا..كل واحد بيشوف وضعه في البحر زي ما يحب..المهم إن الحياة دي بحر كبير

أنا دايما متوقع الموج العالي و الموج الهادى بس بعمل 1000 حساب للدوامات..اللي يقع في الدوامة هيقع في لعبة مفيهاش فوز..و في الحالتين بيطلع خسران..

لو نجا من الدوامة هيكون عايش منهك و مرهق و مش هيقدر يكمل عوم..و لو غرق هيكون خسر كتير في الحياة..

بحر حياتي مليان سمك و مراكب و موانيء و صيادين..

مليان ناس حموني من دوامات..و ناس حاولوا يدخلوني في دوامات

مليان ناس وقفت جنبهم من غير ما يطلبوا ده..و ناس لما حبيت يقفوا جانبي رفضوا..

و ناس لما كنت تايه و بدور علي شط دلوني عليه..و ناس إستمتعوا بإنهم يتوهوني في البحر

بحر مليان جزر جميلة و أسماك زينة و قروش مفترسة و طحالب و محار لؤلؤ

ربنا يكفينا شر تقلبات البحر و الطحالب و الدوامات و القروش المفترسة