ما فعلته بهم سوزان بويل

إنجلترا فيها برنامج مواهب اسمه

Britain's got talent
و هو النسخة البريطانية منها اللي تم اخذ البرنامج الامريكي

America's got talent

و

Australia's got talent

والتلاتة بينتجهم سيمون كاول

و هو عضو لجنة تحكيم النسختين بتوع بريطانيا و أمريكا
و في الوطن العربي هيكون عندنا النسخة العربية قريبآ إن شاء الله علي شاشة

LBC


المهم..في الحلقة الاولي من موسم 2009 من برنامج

Britain's got talent

ظهرت متسابقة اسمها سوزان بويل

عمرها 47 سنة..قروية ساذجة..فستانها قديم و شعرها منكوش

مزارعة بريطانية تقليدية و بسيطة جايه من قرية في مدينة

جابوها في الكواليس قبل ما تظهر علي المسرح قاعدة تاكل بنهم و منظرها غير مألوف وسط المتسابقين

لما طلعت علي المسرح كانت مرتبكة شوية في كلامها

لجنة التحكيم و تحديدآ سايمون كاول اتكلموا معاها حوالي دقيقة و كان الكل مستغرب الست دي بتعمل ايه علي المسرح

الراجل سألها نفسك في ايه يا سوزان؟

تقوله عايزة ابقي مطربة محترفة

و الجمهور بيضحك كل ما تتكلم و الكاميرا بتجيب ردود افعال لجنة التحكيم و جمهور المسرح
طبعآ محدش مستوعب الست دي ايه اللي جابها

و نظرات السخرية و الإستهجان علي وشوش الكل

سألها تانى هتغني ايه؟

قالت هغني اغنية

I dreamed a dream
من فيلم البؤساء

و إشتغلت الموسيقي و غنت سوزان بويل..و صدمت الكل بأداء مبهر

الست القروية الساذجة طلعت بتتمتع بموهبة و صوت ساحر خلت المسرح كله يبقي في حالة تصقيف مع كل جملة تغنيها

و إدت للناس درس كبير في عدم الحكم علي الاشخاص بمظهرهم ولا الإستهانة ببساطة اى حد

و ادت للكل درس ان طالما عندك حلم انت مؤمن به و مصدق نفسك..مفيش حاجة ممكن تمنعك تحققه
خلصت الاغنية و رجعت تاني القروية الساذجة

بس وقتها كانت نظرات الإحترام و الإعجاب هي المسيطرة علي كل اللي موجودين حواليها

ده لينك الفيديو ع اليوتيوب

مدونات مجمدة

في مشكلة غريبة اوى بتواجهني بقي لي يومين

و بتحصل كل ما احاول ادخل المدونات اللي فيهم

traffic meter

اللي بيقول بلاد الزوار ايه

اللي بيحصل ان بعد 20 ثانية الصفحة بتتجمد بس الاكسبلورر مابيهنجش

و بيبقي مكتوب تحت خالص في الانترنت اكسبلورر

downloading data from 0.0.0.0

و بعد شوية الصفحة تتقلب بياض تام

و ماينفعش معاها ريفريش خالص

معني 0.0.0.0 ان الكمبيوتر بيحاول يقرا شيء

و معني ان الصفحة تتقلب بياض تام..ان الكمبيوتر فشل انه يقراها

و قبل ما حد يقول لي العيب في الكمبيوتر

انا عملت كل حاجة تؤكد لي ان الكمبيوتر بتاعي سليم

اخر نسخة فلاش..اخر نسخة اكسبلورر

كل المدونات التانية اللي فيهم فلاشات اخري شغالين كويس

ماعدا المدونات بتاعة فلاشات بلدك ايه

معرفش لو حد غيري بيواجه المشكلة دي ولا لأ

بس ياريت تحاولوا تشوفوا حل معايا

لنتعلم العنجليزية يا ولد

الموضوع بسيط جدآ

اتكلمت مع بعض من اصحابي في موضوع و لقيت اننا متفقين علي اهميته

الموضوع ده بينقسم لنصين

النص الاولاني كلمات بالانجليزي محيرة الناس نظرآ لاسباب قد تتعلق بلاتينية الكلمات او انها كلمات غير شائعة الاستخدام

النص التاني كلمات بالإنجليزي واضحة و صريحة و مع ذلك الناس بيفتكسوا فيها

طبعآ تجاهلت موضوع نطق

P/B و B/P

و فلسفة البي الخفيفة و البي التقيلة اللي إخترعها عباقرة التعليم العربي

اولا: الكلمات اللي دوخت الناس

status

الكلمة دي دوخت و مدوخة ناس كتير

لانها كلمة لاتينية فمحدش لاقي لها نطق سليم..و لذلك اجتمع علماء الامريكتين علي نطقين كلاهما صحيح

statyos و staytos

تاني كلمة هي

skype

كلنا عارفين البرنامج ده..و هو بالمناسبة أفضل برنامج من ناحية الصوت

و بيتنطق

skyep

زي كلمات مشابهة عارفينها زي

type - pipe

تالت كلمة هي

idle

و دي يتدارك اهميتها كل اللي بيتعاملوا مع ياهو ماسنجر و الماسنجر بلاس كمان

و بتتنطق

idel

زي كلمات مشابهة معروفة اكتر زي

icon - item - ipod

الجزء التاني كلمات محيرني ليه الناس يغلطوا فيها

الكلمات دي معظمها كلمات خاصة بمجتمعنا و هي غالبآ اسماء شركات

بس في ناس اخترعوا لها نطق خاص مش مفهوم سببه

اول حاجة

T E Data

تلات ارباعنا بيتعامل معاها عشان النت

..بتتنطق غلط ككلمة واحدة

tedata

رغم ان الاسم واضح و مميزينه بالالوان لسهولة النطق

T-E-Data

تاني كلمة

vodafone

واضحة و سهلة..بس في ناس لهم نطق مختلف لها

fodafone

و ده طبعآ ناتج لانهم بيقروا الاسم العربي

و دي مشكلة بيقع فيها ناس كتير في كلمات تانية

خصوصآ الصيادلة..بيكسلوا يقروا الاسم الاجنبي و بيقروا العربي

mobinil

اول ما ظهرت كان في افتكاسات هايلة في نطق اسمها

mobi-nile

mobi-nell

بالمناسبة..في ناس لسه بيكتبوها غلط

CV

اثناء رحلة البحث عن وظيفة..قابلت سيكرتيرة في شركة سألتني لو كنت جايب معايا السيفيه

و نطقتها كده

cefeh

و لما حاولت اكدب ودني..سالتها بتقول ايه

فتكرمت و ترجمت لي انها السيرة الذاتية..و اكيد في سرها قالت جااااهل

انا و إيناس في شرم الشيخ

إمبارح كان 1 إبريل

رغم إنني مش من هواة مقالب اليوم ده..بس من 3 أسابيع حسمت امري و قررت انني العب شوية

مقلبي الكبير بدأت تحضيره يوم 9 مارس اللي فات و هو اليوم الموافق لعيد المقالب في كرواتيا وطني الام

يمكن بعضكم يعرف معلومة انني مذيع في راديو شلة أحد محطات الراديو علي النت

المهم..الراديو له جروب علي الفيس بوك..و دي كانت مدخل المقلب

بدأت الخطوة الاولي في المقلب علي الفيس بوك و عملت الإيفينت التالي نصه

Sharm Elsheikh 1st Train Trip

أول قطار من أسوان لشرم الشيخ هينطلق خلال 3 أسابيع مع بداية الشهر الجديد
القطار يحتوي علي 10 عربيات فاخرةو بيبدأ من أسوان و بيتوقف في 5 محطات رئيسية
الرحلة هتستغرق حوالي 24 ساعة

مذيعين راديو شلة هيكونوا موجودين في القطر

و هنبث بث حي طول الرحلة و أكيد هنستضيفك لو انت معانا في الرحلة

التذاكر هتكون متوافرة في مكاتب السكك الحديد ابتداءآ من يوم 9 مارس 2009

من 9 مارس لحد إمبارح كان في 70 اكدوا انهم طالعين الرحلة

و 37 قالوا ان احتمال ييجوا

يعني الإجمالي 107 ضحية مصدقين ان شرم الشيخ بتتراح بالقطر

و طبعآ كنت متفق مع بدر و يوسف أدمينز الجروب معايا علي التفاصيل

عشان لو حد إستفسر

بس يبدو ان الرقم كان قليل و ما أرضاش غروري

فرفضت أستسلم لنهاية اليوم بدون مقلب أطلع فيه طاقاتي

دخلت علي الماسنجر الساعة 11:45 مساءآ

nicknameو كنت كاتب اساسيات المقلب الجديد في الـ

أعلنت خطوبتي..و ان ميعادها يوم 9 إبريل الجاى..و مانستش طبعآ اقول انني بحب حبيبتي

طبعآ في ناس كانوا فاهمين انها كدبة إبريل زي يوسف و نانسي

يوسف شارك معايا في المقلب

personal messageو كتب مبروك يا سلتو في الـ

و بكده الخبر ابتدا يبقي له مصادر

أول ضحية كانت أنغام..سألتني و اكدت لها الخبر

و هنا جه دور نانسي..ابتدت تقنع أنغام ان الموضوع بجد

و فعلا أنغام صدقت انني هخطب

personal messageو كتبت هي كمان في الـ

و بعد شوية قالت لي إن هبة و مها بيبلغوني تهانئهم

في الوقت ده كنت انا ابتديت اظبط علي الفيس بوك اللوكيشن اللي هعمل فيه الفيلم

اول حاجة..رحت معدل في البروفايل و قلت انني مخطوب

status غيرت الـ

و كتبت نفس اللي كنت كاتبه علي الماسنجر

كان ناقص حاجة واحدة و هي اهم حاجة

الـــعـــروســــة

رحت مخترع أكونت باسم إيناس عمر..خطيبتي الوهمية و عملت لها ادد و ابتدا الفيلم

بدون سابق تخطيط طلعنا انا و نانسي بفكرة الخناقة بينها و بين إيناس

دخلت نانسي تتريق علي الاسم

و ايناس ترد عليها و يشدوا مع بعض

و انا اتدخل..و اطلب من أنغام تتصرف

الاتنين بيتخانقوا علي الفيس بوك

أنغام تجاوبت و دخلت تهدي الموقف و تطلب منهم يهدوا شوية

بس أنا قررت اتخذ موقف..و قلت لنانسي انها مش لازم تحطني في موقف الإختيار و هي عارفة كويس قصدي

نانسي انفعلت..و قالت لي من غير ما تختار..نايس تو ميت يو انتوا الاتنين

و زيادة في الحبكة الدرامية..نانسي عملت لي ريموف علي الفيس بوك

قمت انا كاتب اهدي ايناس انني عملت ريموف لنانسي

و بكده نقلنا المعركة علي الماسنجر

أنغام محتاسة..ايه اللي بيحصل..ازاى اتخانق مع نانسي عشان ارضي إيناس

و طبعآ أنغام قررت تقول لي ان نية نانسي كانت الهزار و هي متأكدة من ده..بس إيناس قفشت

لكنني كنت متمسك برأيي و مصمم انني مش هسمح لحد يغلط في خطيبتي

و هنا أنغام قررت تكره إيناس..دخلت كلمتها بطريقة رسمية و قالت لها

Miss Omar

لكن يبدو ان إسلوب الكلام ماعجبش إيناس فردت و قالت لها

Miss/Mr Nagoum (sorry msh 3arfa a2ra el2esm)

و كان ده كافي جدآ علي انغام..دخلت انا رديت و قلت لها خلاص يا انغام خلينا في المهم

و برد فعل يضاهي سينما الستينات..دخلت انغام تقول سوري مش هقدر استمر و اشارك في المهم

أحمد المصري دخل فجأة و رذع الكومنت اللي كشف المقلب كله

و بالتالي إبتديت انزل بتتر النهاية..و دخل بعض اصدقائي علقوا و خلص فيلم الفيس بوك

كانت وقتها انغام استوت و توعدتنا - انا و نانسي - بالانتقام لو اكتشفت انه مقلب..و قامت تنام

يا تري المقلب خلص كده؟

لأ

إبتدا اصحابي يدخلوا علي الماسنجر يباركوا لي

و انهالت تهاني كتير و إستفسارات اكتر عن التفاصيل

كنت بستسلم مع بعضهم بعد 5 دقايق و اقول للشخص لا ده مقلب

لكن بعد بضعة اصدقاء مخدوعين..دخلت سـاره

و في ثواني راجعت مع نانسي السيناريو اللي ممكن نعمله

سـاره مش علي الفيس بوك..و بالتالي كان سهل خداعها بقصة الماسنجر

و ان انا و نانسي اتخانقنا و عملنا لبعض بلوك و ديليت

و اسباب بسيطة زي ان إيناس دي قليلة الادب و الذوق و شخصية غريبة الاطوار

مفيش دقيقتين و سـاره قالت لي ثواني هعمل حاجة مهمة

و بدأت تتكلم مع نانسي في الحكاية

كانت بتحاول إقناعها ان خناقتها مع خطيبتي إيناس مش مستاهلة اننا نخسر بعض كأصحاب

و طبعآ نانسي مصممة و رافضة تتناقش

و لكن ردود فعل سـاره خلتنا إحنا الاتنين ضميرنا يوجعنا

و قررنا بعد اقل من نص ساعة نقول لها انه كان مقلب و إنها الضحية الاخيرة للمقلب ده

بس ياتري سـاره كانت فعلآ هي الضحية الأخيرة؟

كنوع من التعاون أخويا أقنع بنت خالتي ان انا بحب إيناس و اننا مش مخطوبين

بس علاقتنا جدية لدرجة خلتني اقول اننا مخطوبين و ان دي مش كدبة إبريل ولا حاجة

دي كانت مجرد وسيلة مني للتعبير عن حبي لإيناس

و لحد اللحظة دي..بنت خالتي مقتنعة انني مرتبط بإيناس

كنت فاكر ان دي النهاية و ان النهاردة يوم جديد

لكن أثناء كتابتي للبوست ده..لقيت ألاء اونلاين

و قلت العب للمرة الاخيرة..لعبة سريعة

كلمتها و خلال اقل من دقيقة..ألاء كانت إقتنعت تمامآ

و زي معظم الناس رد فعلها كان يشوبه الاندهاش..باركت لي و خرجت اوفلاين

و مشفتهاش لحد دلوقتي عشان أقول لها ان دي كدبة إبريل

و دي كانت تجربتي البريئة الصغيرة اللي ضحكت فيها علي حوالي 120 شخص بس

و اتمني ما يكونش حد من الضحايا الحلوين زعل

حد عمل حاجة إمبارح؟

_____________________

فاصل غنائي

إمشي ورا كدبهم من تاني و روح لهم"

"بس ياريتك تلاقي الطيبة في قلبهم

ديانا حداد - أغنية إمشي ورا كدبهم

"عيل صغير عمل صوابعه كده هو مسدس و قال لصاحبه طريخ طراخ"

إيمان يونس - فيلم رشة جريئه

__________________

علي الهامش

واحد من اصحابي المقربين دخل علي الماسنجر و بيكلمني و تجاهل تمامآ اللي مكتوب
قلت له مش تباركلي؟
قال لي علي ايه..اشتغلت ولا خطبت؟
صرفت نظر عن غباء السؤال و سألته..انت شايف ايه مكتوب قدامك؟
قال لي اه..ما انا إستغربت برضه..و هو انت خطبت؟
حسيت بالغباء بيزيد..فقلت له لا..ده مقلب و كدبة إبريل
قال لي ما علينا..خلينا في المهم..الإرجنتين خسرت 6/1
و هنا يأست منه هو و مارادونا في يوم واحد