فيلم الفالانتاين: High Voltage Love

(1)

نيفين و مروان بيتكلموا في التليفون



نيفين: كلمتك امبارح و كنستلني

مروان: ما انا عارف

نيفين: ليه؟

مروان: عادى..كنت بتعشا


نيفين: و مارجعتش كلمتني ليه؟

مروان: عشان كنت تعبان و نمت
نيفين ترتبك: ايه؟

مروان ببرود: ايه مالك؟ بقولك كنت تعبان
نيفين تدمع: مش قصدي..أ..أ..سلامتك
مروان: و مالك بتقوليها من غير نفس كده؟ علي العموم الله يسلمك..متشكر يا ستي
نيفين: من غير نفس ازاى بس؟
مروان: ما تشوفي طريقتك يا نيفين..علي العموم اقفلي دلوقتي عشان بالبس و نازل..يلا مع السلامة
نيفين: مع السلامة
و تقفل الخط و تكمل: يا حبيبي



(2)


في الجامعة


مروان: صباح الخير

نيفين: صباح النور

مروان: ايه مش في المحاضرة ليه؟

نيفين: اه ما انا طالعه اهو

مروان: احجزي لي مكان جنبك

نيفين: لأ..ريم هتقعد جنبي

مروان: ماشي..عن اذنك


(3)

بعد المحاضرة


نيفين واقفة مع سلمي و علي بيتكلموا و يهزروا

مروان عدي من جنبهم و راح قعد بعيد مع شريف

في الوقت ده نيفين كانت بتسرق نظرات علي مروان اللي كان باين علي وشه الضيق

بعد لحظات شريف قام و عدي جنب نيفين و سلمي و علي


نيفين: شريف..عايزاك ثانية

شريف: نعم يا نيفين؟

نيفين: هو مروان ماله مكشر كده؟

شريف: لا ابدآ..اصل و هو جاى عربيته اتاخدت مخالفة عشان الحزام

نيفين: اها..طيب ميرسي يا شريف
علي: طيب هروح انا اشوف ايه حكاية مخالفة مروان
نيفين: اه..ياريت يا علي

و بعد ما شريف و علي بعدوا عنهم نيفين كملت كلامها مع سلمي

نيفين:شايفة يا سلمي؟ ولا حتي اهتم يعتذر عن اللي عمله معايا امبارح
سلمي: معلش..انتي عارفه ان دماغه غريبة
نيفين: عارفه..بس بحبه بجد..هو مش حاسس خالص؟
سلمي: خلاص اسكتي عشان جاى ناحيتنا اهو
مروان: سلمي..عايزك لحظة لو سمحتي
سلمي تبص لنيفين: طيب يا نيفين..عن اذنك
نيفين واقفة في مكانها مصدومة و حاسة بجرح و دمعة نازلة علي خدها..بيقرب منها علي
علي: معلش..اصله مش فاهم

(4)

نيفين بتكلم سلمي علي التليفون بالليل

سلمي: انا اسفة اوى يا نيفين..هو جه و قالي تعالي
نيفين و هو بتعيط: كنتي اتحججي له بأى حاجة..بس ماكنتيش تحطيني في الموقف
سلمي: انا بصراحة معرفتش اعمل ايه
نيفين : انا عارفه ان ملكيش ذنب ... بس مش بس كلامه معاكى اللى تاعبنى ... كل حاجه بيعملها بتموتنىكلامه الواقف معايا و اهتمامه ببنات تانيه ... حتى اهتمامه و حنيته عليا انا بتموتنى
سلمي:حنيته بتموتك ليه؟
نيفين: لان الحنية دي بتروح في الهوا بعد شوية و بيرجع لطبعه البارد و كلامه الواقف و عدم الإهتمام..بيعذبني لما يبقي حنين عليا..و بيعذبني لما يهملني
سلمي: عندك حق..الوضع ده صعب اوىنيفين: مش قادرة استحمل يا سلمي..تعبت اوى..انا مش فاهمه ازاى بقيت بحبه كده؟

سلمي: بس انتي كنتي بتهزري و تضحكي معانا انا و علي عادى..ايه اللي خلاكي تعيطي اول ما مشينا؟

نيفين: مش اي ضحكة علي الوش تبقي سعادة..ساعات اكبر ضحكة بتخفي اكبر الم..

و تبدآ نيفين في بكاء هستيري

سلمي: حاولي تهدي يا نيفين..كده مش هتعرفي تفكري
نيفين: مش قادرة..هموت يا سلمي
سلمي: انتي بتحبيه اوى كده؟

نيفين: بحبه ... بحبه دى كلمه بسيطه اوى على اللى انا حاسه بيه .. انتى ممكن تحبى حد و تتمنى تبقي معاه ... او تحبى حد و تزعلى منه وتسامحيه... او حتى تحبى حد لدرجه انك متقدريش تعيشي من غيرهبس مكنتش اعرف انك ممكن تحبى حد لدرجه ان مهما عمل فيكى مبيهمكيش نفسك مش بيهمك اللى بيجرالك ... بتسامحيه قبل ما تزعلى .... قلبك فيه حب و مغفره لاى غلطه مهما كانبس من كتر الحب ده ... اى غلطه تانيه هتبقي بموت

سلمي: و ايه اللي جابرك علي كده..لازم تقفي لحد هنا

نيفين: قلبي مش هيستحملها... لو حصلت قلبى هيقف ... هيبطل بس يدق قبل ما يفكر يبطل يحبه
لازم ابعد...مش عشان زعلانه من تصرفاته ولا عشان بس مننفعش لبعض
بس عشان كل حاجه تخصه بتاثر فيا اوى اوى ... بتهز كيانى كله
حبه ملكنى و ملك كيانى.. و حبه فيه هلاكى.. و هو مش حاسس
من غير ما ياخد باله هيكسرنى ... و لو حصلت هموت

سلمي: و هتعملي ايه؟ انتي اهو منهارة..و هو مش حاسس

نيفين: الحب مش بإختياري..بس الإرتباط ده إختياري..انا هبعد و مش هربط نفسي تاني بمروان..مفيش غير البعد ينسيني يا سلمي

(5)

شريف و علي بيتكلموا في التليفون

شريف: مروان ده عبيط..100 مرة فهمته يبطل حركات العيال دي
علي: نفسي مرة اشوفه بيتصرف بعقل مع نيفين..البنت واضح و كل الناس ملاحظين انها بتحبه
شريف: و هو مش بعيد يكون فاهم بس بيستهبل
علي: حرام عليه بجد البنت دي خسارة فيه
شريف: مروان ده عايز بنت بتاعة حوارات تطلع عينه عشان يعرف قيمة نيفين
علي: طيب ما تتكلم معاه في الموضوع
شريف: لا طبعا و اوعي انت تفكر تعملها..حاجة زي دي ممكن تجرح نيفين اوى
علي: عندك حق..بلاش نحطها في موقف زي ده

جميع الحقوق محفوظة لشركة سلتو للإنتاج الفني

بالإشتراك مع

NaNoZ Productions
© 2010

مجرد ورقة أخرى بها بعض المشاعر الغبية

عزيزتي فلانة

تحية طيبة و بعد

ابعث اليكي برسالتى تلك لأعترف لكي بما كتمت من مشاعر طيلة الاشهر الماضية

مشاعر قدر لها ان تزداد رغمآ عن إرادتى..و رغمآ عن الظروف المحيطة بكلآ منا، و رغمآ عن الظروف التى نمر بها

اكتب لكى من أجل انقاذ مستقبلنا و ترميم حاضرنا و محو ما فات من ماضينا

عزيزتي..مرت اربع سنوات منذ ان التقيتكي للمرة الاولي في ذلك المقهي المزدحم برفقة اصدقائنا

يومها تلاقت روحانا و حلقنا سويآ في حقول الانجذاب الي بعضنا البعض

و ها قد مرت تلك السنوات القليلة

مرت و قد تشاطرنا العديد من الذكريات..المبهج منها و المؤسف أيضآ

إكتسبنا العديد من تلك اللحظات التي يمر بها اى حبيبان..لحظات قد تبقي المرء دافئآ بمجرد تذكرها في احدى ليالي شتاء يناير القارس

عزيزتي..ها قد جاءت اللحظة التى فكرت فيها لعدة أشهر..اللحظة التى يجب علي علاقتنا ان تأخذ فيها منحني أخر

عزيزتي..ادرك انني كررت تلك الكلمة كثيرآ في رسالتى و لكنني لن اتوقف ابدآ عن تكرار مناداتك بها

إعترافي لكي يتلخص في كلمات بسيطة و لكنها تحوى كل ما في داخلي تجاهك من مشاعر و أفكار

عزيزتي..انا مابقتش أحبك زي الاول..و ما اظنش هقدر احبك اكتر من كده..سامحيني

المخلص دائمآ

فلان الفلاني

ليـلة عـيـد

انها احدي تلك الليالي التي احب ان تكون فيها إلي جواري
مستلقية بجواري علي الاريكة في غرفة المعيشة نشاهد هذا الفيلم الرومانسي اللطيف
لا ادرك سر سعادتي الشديدة..هل لانها مستلقية بين ذراعاى ام لأنها ليلة العيد
كل ما اعرفه انني سعيد..سعيد جدآ

اداعب خصلات شعرها السوداء المنسابة علي كتفيها و اتأملها
انها اشبه بطفلة بريئة إستيقظت لتوها من واحد من تلك الاحلام الطفولية البسيطة
علي شفتاها إبتسامة توحي بذلك

تنساب من عيناها دمعة من رقة المشاعر المتبادلة بين الحبيبان في الفيلم..لكم احببت رقة مشاعرها و دفئها
امسك بيديها و اقبل هذا الكف الصغير الرقيق..انها تدرك كم احبها
فأنا لم اتوقف يومآ عن مناداتها بلقب أميرتي
انها الاميرة المتوجة علي عرش قلبي. انها من تشيد معي قصور أحلامي
وحدها تحكم عالمي

تمتلك كل حواسي و جوارحي حين تنطق بكلمة واحدة..حبيبي
كم أعشق شفتاها عندما تلفظ تلك الكلمة
رقة و عذوبة صوتها يضيفان الي الكلام سحر انثوي غامض يحوي بعض من دلالها الطفولي الذي طالما احبتته

اعلم إنها ليلة العيد..و لكنني ادركت الان انني احتضن بين ذراعاى عيدي الدائم..احبها

دائرة جدل الماضي اللامتناهية

بقي لي 3ايام في جدل و مناظرات مع بعض اصدقائي حول احد المواضيع

الماضي العاطفي

كلنا حبينا قبل كده بدل المرة 10..و لما نرتبط كتير مننا بيحاولوا يدفنوا الماضي

يحصل ايه لو انت قاعد مع حبيبتك و اصحابكم..و جه واحد سلم عليكم..و بعد دقيقتين واحد من القاعدين مال علي ودنك و قال لك

"انت عارف ده يبقي مين؟"

فتسأله مين..يقوم قايل لك

"ده حسام..كان بينه و بينها قصة حب جامدة اوى زمان"

في لحظتها هتبص لحبيبتك..و هتبص لحسام

و هيبتدي شيء ما يدور في عقلك

ايه هو الشيء ده...دي النقطة اللي كنت بتناقش فيها مع اصحابي

في ناس قالوا انهم هيعتبروه ماضي و مات و إحنا ولاد النهاردة

و ناس تانيين شايفين فكرة ان ده يعتبر نوع من الخيانة..البنت ما قالتش حاجة عن الموضوع ده قبل كده..و حبيبها القديم لسه له وجود في حياتها

و دخلنا في جدل فرعي حوالين طيب لو كان عرف بقصة حصلت قبل كده..بس الشخص خرج من حياتها..هل هيبقي نفس رد الفعل؟

و واحد فجر نقطة تانية..طيب اللي مرتبط بواحدة كانت بتحب صاحبه زمان..موقفه ايه؟ و موقفها هي ايه؟

و فضلنا مختلفين في جوانب كتير للموضوع ما عدا حاجة بقت ثابتة

بالنسبة للرجل او الست..الحكاية هي نفسها

الماضي المقبول هو الماضي المعروف..يعني انت عارف انها كانت بتحب حسام و هي خرجته من حياتها و مش بتتكلم عنه..فمش منطقي انه يكون موضوع يفسد الاجواء

و الماضي المجهول لازم يفضل مجهول و مايتعرفش عشان مايفسدش الواقع

حبيت اشرككم معايا في دائرة الجدل اللامتناهي..و انا واثق اننا هندخل في نقاط متفرعة جديدة في الموضوع

ايه الماضي المقبول و ايه اللي مش مقبول؟

حلم ليلة صيف

المشهد الاول

(علي أحد الشواطيء)

هي: الجو حلو اوى النهاردة..الموج رايق..الشمس جميلة..نسمة الهوا

هو: و إنتي

هي: ايه..انا مالي؟

هو: بقول البحر..الشمس..النسمة..و انتي

انتي احلي من كل دول اصلآ

هي: أنا؟

هو: ايوه..إنتى اول عروسة بحر تعيش علي البر

هي: يا سلام؟ بطل تريقة

هو: و هو انا لو كنت ناوى اتريق كنت جبتك هنا؟

هي: إنت عارف انني بموت في البحر و إننا نمشي سوا علي الشط

هو: بس دلوقتي هنعمل حاجة مختلفة

هي: ايه ده؟ إحنا لسه جايين..عايزنا نروح فين؟

هو:مش هنروح بعيد..شايفة اليخت الصغير ده؟

هي: ايوه..ماله؟

هو: إحنا بقي جايين له النهاردة..انا اجرته

هي: لا أرجوك..إنت عارف انني بخاف ادخل جوه الميه

هو: ماتبقيش غلسة بقي..انا عايز أصطاد

هي: عشان خاطري..خلينا هنا..إصطاد يوم تاني

هو: خلاص بقي..انا حضرت عدة الصيد و اجرت اليخت..بعدين انتى خايفة من ايه؟

هي: بخاف من الميه..ما انت عارف

هو: ماتخافيش..بعدين حتى لو اليخت غرق..عادى..مش انتى عروسة البحر؟

هي: بطل غلاسة بقي..انا مابعرفش أعوم

هو: بطلي انتي جبن و يلا بينا

المشهد الثاني

(علي سطح اليخت)

هو: ايه رأيك في البحر من جوه؟

هي: حلو أوى..مكنتش أعرف ان المنظر حلو كده..دي اول مرة في حياتي أدخل جوه البحر علي يخت

هو: عشان تبقي تصدقيني..و لسه خايفة؟

هي: عمري ما بخاف و انا معاك..بس الموضوع كان قالقني في الاول..بس دلوقتي لأ

هو: عارفة انا ليه أجرت اليخت ده؟

هي: ايوه..عشان تصطاد سمك..جايبني اتفرج عليك ولا فاكرني هشويهولك؟

هو: لأ..مش عشان السمك..انا حتي مابعرفش أصطاد

هي: امال احنا هنا ليه؟

هو: عشان عايز اتكلم معاكي..و المكان ده اكتر مكان برتاح فيه..قلب البحر

هي: للدرجة دي الكلام اللي حتقوله موترك؟..عايز تقول ايه يا حبيبي؟

هو: انا عايز اتكلم و انتي تسمعيني..و بس

هي: يا سلام؟ اتفضل..انا سامعاك اهو

هو: عارفة انا بحبك اوى..اكتر مما تتصوري..بقيت احسك حتة مني..جزء من روحي

نظرة عينيكي دايمآ بتقول حاجات..براءة طفلة..كبرياء انثي..دلع بنوته شقية

ساعات كتير بابقي نفسي احضنك..و ماتفهمينيش غلط

بس بابقي حاسس انني نفسي احتويكي..نفسي اطبطب علي كتفك و العب لك في شعرك و اطمنك انني مش هسمح لحاجة تأذيكي ولا تزعلك

كل ما بلمح في عينك نظرة قلق او تصرف فيه خوف عليا بحس انني ملكت العالم لانني ملكت احن و ارق قلب في العالم

انتي جيتي وريتيني الحياة من جديد..عرفتيني الوان مكنتش اعرفها

حسستيني ان ممكن الانسان يعيش مع الفراشات و الورد

رغم ان الحياة حوالينا مادية و عملية..الا انك قدرتي تصنعي عالمنا الوردي الخاص

لامسين برجلينا ارض الواقع بس طايرين بقلوبنا فوق في السما مع العصافير

معاكي مابتكسفش اعبر عن كل اللي جوايا..لانني حاسه بجد و لان مهما بعبر لك مش بوصلك ربع اللي انا حاسه

معاكي بس عرفت معني ان واحد ينادي حبيبته و يقولها يا حياتي

ايوه انتي حياتي..شايف فيكي احلي حاضر و نفسي اعيش معاكي اجمل مستقبل

حبيبتي..انتي اجمل حاجة حصلت لي

هي: ممكن اقاطعك ثانية بس؟

هو: إتفضلي

هي: صنارتك غمزت

هو: تتجوزيني؟

جميع الحقوق محفوظة لشركة سلتو للإنتاج الفني
© 2009

يابن اللذينه يا محظوظ

(1)

اول حب في حياته..كانت حبيبه صاحبه السابقة بتحاول تغيظ صاحبه

و لما صاحبه نفض لها و ما اهتمش بالموضوع..راحت صارحت صاحبه يوم الفالانتاين انها بتحبه هو..فنفض لها

سابت صاحبه و راحت تقابله عشان يحتفلوا بالفالانتاين

(2)

إحساسه بإنه أصغر واحد في المكتب خلي عنده إحساس إنه لازم يثبت نفسه لمديرته المفترية

فقرر مع أول صدام يقول لها لو مش عاجبك شغلي انا كاتب إستقالتي

و كان ردها و أنا قبلتها و اخدت منه الورقة و غابت 5 دقايق بعد ما اعتمدتها من رئيس مجلس الإدارة

(3)

مستني ميعاد مع حبيبته القديمة من 3 سنين

هي إدتله الميعاد و لسه ماجاتش..و هو لسه مستني

(4)

أول يوم إستلم فيه عربيته الجديدة قرر يروح بها مشوار بعيد عن بيته بـ300 متر

عمل في الـ300 متر دول حادثتين

(5)

يوم لما لقي أخيرآ فتاة أحلامه اللي تنسيه حبيبته القديمة جتله فرصة عمره بالسفر للخارج عشان يعمل رسالة الماجيستير

و بما ان ايامه في بلده بقت معدودة..قرر يصارح البنت بمشاعره

قعد يتصل بها يومين و ماتردش

و هو في المطار إتصلت هي به و قعدت تعتذر له نص ساعة كاملة بسبب عدم قدرتها علي الرد علي مكالماته بسبب ظروف حصلت لها

و رغم رومانسيتهم في المكالمة مقدرش يكمل الكلام و يبوح لها بمشاعره..اصلهم نادوا علي طيارته

وحدي في الفالانتاين

الناس كلهم بيتكلموا عن الفالانتاين و حلاوة و اهمية اليوم و قد ايه كل الـcouples بيكونوا زي العصافير

بس انا واحد من الناس اللي بالنسبة لهم يوم 14 فبراير مابيمثلش حاجة غير الإزعاج..و اللعب علي وتر القلب الفاضي..

إحنا الناس اللي مش بنحب و ماجربناش فكرة اننا نجيب هدية او يتجاب لنا هدية في الفالانتاين..
الكلام ده بينطبق علي و علي مجموعة من أصدقائي و بطبيعة الحال علي عدد لا يستهان به من الناس..

عشان كده حابب اكلمكم عننا بما اننا فئة من المجتمع لها حق دستوري و لنا نفس الاهلية اللي بيتمتع بها أى couple يوم 14 فبراير

رغم إن موضوع الحب من عدمه بيكون شيء إختياري ، لان اسهل حاجة دلوقتي انك تظبط و تصاحب

بس برضه فكرة ان الواحد يكون مختلف عن باقي اللي حواليه بتضعف ثقة الواحد مننا بنفسه و تخليه يحاول يخترع مبررات تخلي الناس ماينظروش له علي أساس انه حالته صعبة.
رغم إن من جوانا بنكون راضيين و مقتنعين بحالاتنا العاطفية و معندناش مشاكل نفضل علي موقفنا طول السنة...ماعدا يوم 14 فبراير!

عشان كده إحنا بنستعد للفالانتاين زينا زي باقي الناس قبلها بإسبوع، لكنه بيكون إستعداد من نوع مختلف!

بنبدأ بخطط دفاعية تتركز علي إنتقاد الفالانتاين و الهجوم علي الناس اللي بيشتروا هدايا مع إلحاق صفات مهينة بهم زي الهبل و السفه!

و المبررات المحفوظة عندنا هي جمل لولبيه من عينة:

- "يعني هو الحب بيبقي يوم واحد في السنة؟ انا بحب طول السنة و اليوم ده مايمثليش أى حاجة..عشان كده مش هحتفل به!"
و طبعآ محدش بيسأل لما انت بتحب طول السنة، فين اللي بتحبه؟

- "ده عيد بتاع الاجانب زيه زي الهالوين..ايه الهبل اللي يجبرني ألبس أحمر و اشيل هدية تكلفني الشيء الفلاني؟"
و ده سبب قوي جدآ مبني علي أساس ثقافي و إقتصادي في الوقت ذاته و هو من الحجج القوية اللي احيانا بيستلفها مننا اصحابنا المفلسين اللي بيحبوا بس مش عايزين يكلفوا نفسهم في الفالانتاين..


- "انا الفالانتاين ده هقضيه مع صاحبتي الانتيم..اصلها محبطة لانها زي ما انتم عارفين مش مرتبطة و كل اصحابنا بيحتفلوا."
و طبعآ مابتشيرش لنقطة إنها ماتتخيرش عن صاحبتها..محبطة و مش مرتبطة..و المبرر ده بيضفي علي اللي يقوله لمحة الإنسانية و الشهامة

- "انا هجيب هدية لماما..ما الفالانتاين مش مقتصر بس علي الناس الحبيبة..ممكن يبقي عيد انك تحب اهلك و تعبر لهم عن ده. و ماما دي عسل..انا بحبها قوي"
طبعآ مفيش أي سيرة عن خناقات الاهل باقي الـ365 يوم، مع تجاهل تام ليوم 21 مارس بتاع عيد الأم..
بس ده بيكون مبرر لطيف للإدعاء اننا بنحتفل برضه و مش فارق معانا الموضوع..

- "أنا عيان و الدكتور مانعني من الخروج، كان نفسي أحتفل بالفالانتاين السنة دي"
و ده مبرر بنستخدمه مع الناس المتطفلين اللي مايعرفوناش كويس و بيسألونا هنحتفل بالفالانتاين إزاى..

الكلام ده كله بيكون طول الاسبوع اللي قبل الفالانتاين..لكن ييجي يوم 14 فبراير بيكون في تغير في الاوضاع..
علي سبيل المثال لا الحصر انا بعمل كل ما يلي..

- بيكون أطول يوم في السنة أنام فيه..ماتتوقعش انني أصحي قبل الساعة 3 العصر..

- بريح بطارية الموبايل طول اليوم، فمحدش يستغرب لما يتصل و يلاقي الموبايل مقفول..

- بفضل أونلاين علي الماسنجر طول النهار و غالبآ بستخدم nicknames كلها رومانسية و حب تنفي عني أى شكوك عند الناس انني قاعد في البيت عشان مش لاقي حد يعبرني في الفالانتاين!

- أى حد يتصل بي علي تليفون البيت لما يلاقي الموبايل مقفول ، هيلاقي حد بيرد عليه يقول له إنني مش موجود و خرجت من بدري..
و طبعآ محدش هيسأل أهلي خرج يحتفل بالفالانتاين ولا راح فين، ولا حتي هيفكر يسألهم موبايلي مقفول ليه..

- بستغل اليوم ده للكلام مع اصحابي اللي بيشاركوني نفس الحالة عن قد ايه الجو برد و إننا محظوظين اننا قاعدين في البيت بالبيجامات و ربما بالزعابيط الصوف كمان!

- أول لما أحس ان اصحابي اللي خرجوا يحتفلوا بالفالانتاين بدأوا يرجعوا بيوتهم بيكون ده وقت التكتيك المخادع اللي بتبعه انا و معشر قبيلتي..
بقفل الماسنجر و أفتح الموبايل و بعد ساعة أرجع تاني أفتح الماسنجر..و ده بيضفي إنطباع إنني كنت بره و لسه راجع..و اللي هيسألني عن الموبايل هقول له مفتوح من بدري!

أنا عارف إن كل دي أسباب و حجج مالهاش مبرر ولا لازمة..بس زي ما قلت في أول كلامي..
الإحساس إننا مختلفين عن باقي الناس بيخلينا نتبع منطق "مجبر أخاك لا بطل"..

علي الجانب الأخر..إحنا بنتمتع بحياة سعيدة باقي أيام السنة..و عندنا مميزات بيحسدنا عليها باقي الناس اللي بيحبوا..

أذكر منها مثلآ:

- فلوسي في جيبي، في كل الخروجات مع اصحابي بدفع لنفسي بس.

- نادرآ لما بسمع جملة "رصيدك الحالي لا يسمح بإتمام المكالمة"، لانني مابقضيش الليل أوشوش في الموبايل عن أهمية خناقة سوسو مع داليا و انا هقف في صف مين فيهم!

بالعكس ده انا بتطلب أكتر من ما باطلب و الكارت اللي بـ100 بيقعد معايا بالشهرين و أكتر!

- انا مش مجبر في أى وقت اتعامل مع مكالمات من نوعية "إنت فين؟" أو "ماكلمتنيش إمبارح ليه؟" أو "انا زهقانة و مش جايلي نوم ممكن اتكلم معاك".
بخرج براحتي..اكلم الناس براحتي و وقت ما أحب..و مش مجبر أسهر لحد الفجر بسبب معاناة واحدة من الأرق!

- كل أصحابي المرتبطين بيعتبروني أسامة منير، مقتنعين إنني مادمت عشت تجارب و دلوقتي مش مرتبط..يبقي أكيد عندي خلاصة تجارب أنصحهم بها في مشاكلهم العاطفية!

- أخيرآ و اهم سبب..بكتب الكلام ده و أنا مش خايف إن واحدة تقراه و تشكك في مدي رومانسيتي، بل بالعكس أنا سعيد إنني بعبر عن فئة كبيرة من الناس تخجل من الإعتراف بحالتهم السنجلية!

لما تحب واحدة..إتجوز صاحبتها

تبدأ الحكاية بشاب و فتاة, "شريف" و "نيفين"..الاتنين بيحبوا بعض

في يوم شريف حس ان نيفين وحشته..مسك التليفون و كلمها

نص ساعة و هو قاعد يسمع..و بعدين قفل من غير ما يقول لها اللي كلمها عشانه

رجع كلمها تاني قالت له "ايوه.." قال لها "بحبك" و قفل السكة

ستووووووووب...ايه المشهد الرومانسي ده؟

!رومانسي؟؟..طيب استنوا لما نكمل

نيفين ماحستش باي حاجة غير القلق..هو عايز مني ايه؟ و ليه قال لي كده؟

نطت علي التليفون و كلمت إنجي صاحبتها..و حكت لها كل حاجة

و الغريب إن إنجي بدل ما تقول لها حاجة كويسة قالت لها

"خدي بالك يا عبيطة..ده شكله نيته مش سليمة و بيلعب بيكي, اوعي تروحي معاه مكان لوحدكم, و ابقي طمنيني بالتليفون"

و لان نيفين زي ما إنجي قالت "عبيطة" كلمت شريف و قالت له

"انت قصدك ايه؟ إنجي وعتني و فهمتني..انت غرضك مش سليم"

طبعا شريف قعد يومين مصدوم..ايه الهبل اللي هي فيه ده؟ اقول لها بحبك تقول لي غرضك مش سليم؟

مرت الايام و شريف بقي كل مايحاول يقول حاجة لنيفين تجري علي طول تحكيها لإنجي

اللي مابتبخلش عليها بنصايحها الذهبية

!لحد ما الحكاية خربت و شريف كره نيفين و الحب نفسه

إنتهت الحدوتة المقتبسة عن قصة حدثت بالفعل و نبدأ الكلام عن الموضوع نفسه

ليه البنت دايما في اي مسألة تخص علاقتها بالناس بتعين واحدة من صاحباتها المستشار الخاص بها؟

اللي بتفتي لها في كل امور الحياة كإنها عاشت 100 سنة و جربت كل شيء

طيب صاحبتها اللي بتنصحها جابت خبرتها منين؟

!لا..و اللطيف فعلا ان صاحبتها لما بتقع في مشكلة بتلجأ لها..يعني الاتنين مش عارفين حاجة بس بينصحوا بعض

و بما ان الحكاية كده فأنا قررت اتجوز صاحبة البنت اللي هاحبها

يناير 2006

تسعة عشر فكرة و فكرة

(1)

بأفكر أعمل بلوج بالإنجليزي..واثق ان مش بس اللغة اللي هتتغير

(2)

بأفكر أعمل بوست للكبار فقط..هكتب الكلام بفونت ابيض و اللي يحب يقراه يعلم عليه بالماوس

(3)

بأفكر في اللي جاى..و اللي راح..بس مش بأفكر في دلوقتي

(4)

بأفكر ألغي إشتراك النادي..فات 7 شهور و مافكرتش حتي اجدد الكارنيه

(5)

بأفكر في قيمة اللي بامتلكه و قيمة اللي بفتقده..حاجات قيمتها زادت و حاجات قيمتها قلت و حاجات ماعدش ليها قيمة

(6)

بأفكر أشجع الأهلي..برضه شيء مزعج لما اقول لحد اصلي مش بشجع كرة محلية..بيفتكروني بتعوج

(7)

بأفكر إزاى أقضي أمتع وقت ممكن من النهاردة لحد يوم 27 يناير إن شاء الله

(8)

بأفكر في الخطوات اللي فاتت و الخطوة دي و الخطوة الجاية

(9)

بأفكر إزاى أرجع حاجات راحت و إزاى الحاجات اللي هتروح هتيجي

(10)

بأفكر أشتري مايك جديد للكمبيوتر..هحتاجه جدآ الفترة الجاية إن شاء الله

(11)

بأفكر في شخصيات ثانوية مرت في حياتي و قد ايه كان لهم تأثير أكبر بكتير من شخصيات رئيسية و ناس اخدوا ادوار بطولة

(12)

بأفكر اقف مكاني و اواجه حاجات هربت و بهرب منها

(13)

بأفكر في أحلام و وعود قديمة..الحاجات دي هي اللي الواحد بيعيش لها

(14)

بأفكر أغير مركزي في الملعب و ادي شارة الكابتنة للعيب تاني

(15)

بأفكر في البوست اللي جاى رغم انني لسه باكتب في ده

(16)

بأفكر مقراش البوست ده بعد ما ابعته..عشان هيفكرني بحاجات مش عايز أفكر فيها

(17)

بأفكر أكتب مجموعة معينة من البوستات..عن مجموعة معينة من الناس

(18)

بأفكر في عدد الدكاترة اللي محتاج أروح لهم

(19)

بأفكر فيك..بأفكر فيكي..بس مش هأفكر فيها

(20)

بأفكر ان علي قد ما البوست ده فيه حاجات مش مفهومة..علي قد ما انا متوقع ردود

لانني حاسس ان 19 فكرة علي الاقل هيكون فيهم واحدة بيفكر فيها غيري

!حب..ولكن

(1)


كريم: ايوه يا ملك..انتي فين؟

ملك: انا في التاكسي..مروحة

كريم بغضب: الساعة 11 و نص ..ازاى تبقي لسه في الشارع؟

ملك: الدنيا زحمة موت و الطريق واقف

كريم: ما علينا..مش ده وقت الكلام..قدامك قد ايه و توصلي؟

ملك: انا خلاص تقريبآ تحت البيت..علي جنب هنا يا اسطي..خلاص وصلت يا كريم

كريم: طيب..إقفلي دلوقتي و هنتكلم بعدين تكوني طلعتي و ارتحتي شوية

ملك: كريم..انا متأخرتش

كريم بحدة: إطلعي دلوقتي يا ملك..هنتكلم بعدين

(2)


كريم: الو
ملك: ايوه يا كريم..كنت لسه هكلمك
كريم: اتعشيتي ولا لسه؟
ملك: لا..قلت اكلمك الاول بعدين اتعشا
كريم: طيب فهميني ازاى تبقي راجعة البيت 11 و نص و إحنا متفقين انك 10 بالكتير تبقي في البيت
ملك: ما انا قلت لك الطريق كان زحمة يا كريم
كريم: عارف انه نيله زحمة..و انا مروح في 3 ساعات
ملك: طيب في ايه معصبك؟
كريم: في يا هانم ان مادمتي لقيتي الطريق زحمة كنتي ماتنزليش من البيت اصلا..و لو كنتي شايفة انك هتتأخري في الرجوع يبقي لكي خطيب تتصلي به ييجي يوصلك..لكن ما اكلمكيش 11 و نص تقوليلي انا في تاكسي

ملك: انت متعصب كده ليه؟ ما انت نفسك قلت انه زحمة..بعدين انا كنت هعرف منين ان الزحمة هتحصل؟

كريم: بطلي مقاوحة يا ملك..انتي غلطانة
ملك بحدة: لا مش غلطانة يا كريم..و مش كل حاجة اعملها تتلكك لي كده

كريم: ايه اتلكك لك دي؟
ملك: امال تسمي اللي انت بتعمله ده ايه؟
كريم: اسميه انني خطيبك و المفروض كلمتي تتسمع..لكن انتي تسمي ايه انك تكسري كلمتي و تتأخري ساعة و نص بره؟
ملك: كريم..انت مصمم تزعق و خلاص..انا متأخرتش بمزاجي..9 و نص كنت راكبة التاكسي..مش ذنبي ان الطريق وقف
كريم: خلاص يا ملك..قومي اتعشي دلوقتي و نامي..تصبحي علي خير
ملك: و انت من اهله

(3)

كريم: الو

ملك ببرود مصطنع: ايوه يا كريم
كريم: ايه ايوه يا كريم دي
ملك: امال عايزني اقول ايه؟ ايوه يا إبراهيم؟
كريم: تقوليلي ايوه يا حبيبي
ملك: يا سلاام بقي..ما انت مزعقلي امبارح و منيمني معيطة
كريم: ما انتي زعلتيني يا ملوكه..و بعدين انا مش قلت لك قبل كده ماتناميش و انتي معيطة؟
ملك: ما انا اعمل ايه يعني..انت زعقت لي جامد
كريم: اخس عليا..لا مش هزعق لك تاني
ملك: إتريق إتريق..انا اقولك نايمة معيطة و انت تقولي اخس عليا و تتريق
كريم: لا مش بتريق..و عشان تصدقيني..جهزي نفسك الساعة 7 هعدي عليكي نتعشا و ندخل سينما كمان
ملك: لأ
كريم: لأ ايه؟
ملك: بلاش النهاردة..جايلنا ضيوف و لازم اقعد مع ماما عشان اساعدها
كريم: ضيوف مين دول يعني؟
ملك: طنط دولت و انكل عماد
كريم: يادي دولت و عماد..مابطيقهمش الراجل و الست دول
ملك: ماتتكلمش علي خالتي و جوزها بالطريقة دي..تحب انا اتكلم علي حد من اهلك بالطريقة دي يعني؟
كريم: لو زي دول يبقي انا اللي هتكلم قبلك اصلا..و بعدين من امتى بتقعدي في البيت لما خالتك تبقي جاية لكم؟
ملك: ما هم مش جايين لوحدهم..نزيه ابن خالتي جه من السفر و جاى معاهم..مش هسيبه يقعد لوحده في قعدة العواجيز دي
كريم: نزيه؟ سايبة خطيبك عشان تقعدي مع واحد اسمه نزيه..و بتقوليهالي كده يا هانم؟
ملك: قلت لك بطل تتريق علي عيلتي..اه اسمه نزيه..زي ما نص اسامي عيلتك يضحك
كريم: يا سلام..اسامي تضحك ازاى؟
ملك: بقي مش مكسوف عمتك يبقي اسمها رضا و جوزها يبقي اسمه عصمت؟
و خالك برضه اسمه رضا..يعني عمتك رضا و خالك رضا..ناقص لكم رضا تالت في العيلة و تعملوا فيلم كده رضا

كريم: لا انتي بتعكي كده..بلاش غلط يا ملك
ملك: انت اللي ابتديت يا حبيبي
كريم: بلاش جو حبيبي و الدلع ده..ماتغلطيش في عيلتي
ملك: كريم..لو عايز تتخانق قولي و وفر علي نفسك المبررات دي..لكن ماتهزرش هزار سخيف و تزعل لما اردهولك
كريم: لا اهزر ولا تهزري..انا فاضي من بعد 7..هتنزلي؟
ملك: لأ..انا مش خارجة النهاردة حتي لو مفيش حد جاى..إرتحت؟
كريم: يعني ده اخر كلام عندك يا ملك..خلاص براحتك..مع السلامه

(4)

كريم: ايوه يا عمرو
عمرو: ايه الاخبار يا كريم؟
كريم: زفت..اتخانقت مع ملك بالليل..اتصلت بها الصبح اصالحها..يادوب اتصالحنا 5 دقايق و رجعنا اتخانقنا خناقة اكبر
عمرو: ايه القرف ده..اتخانقتم ليه المرة دي؟
كريم: كلمتها ..الاول كانت قافشة..بعدين اول ما فكت بقولها نخرج قالت لي علي طول لأ..مابحبش انا كده
و اللي يشل انني اسألها ليه تقولي عشان ابن خالتها جاى و مش عايزه تسيبه قاعد لوحده مع العواجيز..بتتعمد تستفزني و هي عارفة ان الطريقة دي بتعصبني و مابتجيبش نتيجة معايا

عمرو: طيب مافوتلهاش ليه زي ما قلت لي امبارح؟

كريم: ما الانيل انني حاولت افوت..و هزرت معاها شوية..لقيتها سخنت و ليه تتكلم عن عيلتي..و قامت فاقعاني رد غبي من بتوعها..مابتفكرش قبل ما تتكلم

عمرو: يا ابني انتم تقريبآ مابتفوتوش يوم ماتتخانقوش فيه
كريم: عارف..و كل شوية بحس انها قافلة معايا..و اقول شكلنا هنسيب بعض قريب..بس بنرجع تاني نبقي كويسين و ابقي مبسوط

عمرو: ما انتم كده بتعذبوا نفسكم..خناق و مصالحة طول الوقت..مش عارفين تعيشوا حياتكم طبيعي

كريم: عارف..بس مقدرش اسيبها..رغم كل حاجة انا بحب ملك..بحبها..اكدب عليك لو قلت لك مابحبهاش

عمرو: بتحبها و بتعملوا في بعض كده؟

كريم: ما هو سيبك من دماغها الغريبة و عصبيتها المبالغ فيها..بس هي حنينة..و بتفهمني لما اكون متضايق و بتبقي حنينة و حاسة بي..و بتهون عليا حاجات كتير
يعني لو سألتني انت عايزها ولا لأ..اقولك دلوقتي بالخناقات دي لأ
بس لما افكر في الموضوع كله..الاقي انني فعلا عايزها..هي اكتر واحدة في الدنيا حسستني بالسعادة..مش بقولك بحبها

عمرو: طيب و هتعمل ايه؟

كريم: مش عارف..بجد مش عارف..بس الموضوع بقي مكلكع اوى..سنتين خطوبة منهم سنتين الا اسبوع خناق

عمرو: طيب ما تقعدوا مع بعض و تتفاهموا في النقط اللي بتسبب لكم مشاكل و تحاولوا تحلوها

كريم: ما احنا دايمآ بنعمل كده..و كل مرة نتفق اننا هنتغير بس مفيش فايدة..يومين كل حاجة تمشي زي ما انا عايز..بعدين نرجع زي ما كنا
لا انا قادر ابطل عصبيتي ولا هي قادرة تبطل إستفزازها

عمرو: ما انت لما بتقفش بتضلم الدنيا يا كريم

كريم: عارف..انا عصبي و بتعصب علي حاجات تافهة كمان..و ساعات بابقي مش عارف عملت كده ليه
بس هي كمان مابتفوتش..و بتستني انني اعمل حاجة غلط عشان تقولي شفت انت كمان بتغلط اهو

عمرو: و اخرة اللفة دي كلها ايه؟

كريم: مش عارف..انا عايزها..بس اللي بيحصل ده فوق طاقتي..و هي مش حاسة بحاجة

(5)

ملك: ايوه يا سلمي..انا اتخانقت تاني مع كريم

سلمي: ليه كده بس ؟

ملك و هي بتعيط: مش عارفة انا اتصرفت بغباء معاه كده ليه..كان بيكلمني النهاردة الصبح يصالحني..و كان هيعزمني علي العشا بعدين نروح السينما

سلمي: طيب ده جميل اوى..ايه اللي حصل بقي؟

ملك: مش عارفة..فجأة بقيت غبية..قلت له لا مش هنزل..و اتحججت له ان طنط دولت و جوزها جايين..و ده اول ما سمع كده اتعصب و ابتدا يتريق عليهم..و انتي عارفة انني مابحبش هزاره علي عيلتي

سلمي: ها و بعدين؟

ملك: رديت له الإستفزاز بإستفزاز و قلت له ابن خالتي جاى و لازم اقعد معاه..اتعصب اكتر و ده استفزني..قمت رادة له الهزار..بس شكلي زودتها اوى و عكيت في الكلام..اتعصب عليا..مقدرتش استحمل و قلت له مش خارجة حتي لو محدش جه..قام قايلي سلام

سلمي: و بعدين في عصبيتك دي يا ملك..انتي بتتعصبي عليه بسرعة اوى..و مش بتراعي انك بتعملي حاجات تضايقه

ملك: ما انا مابقصدش اضايقه ولا استفزه..بس هو كمان بيستفزني و بيتعصب عليا علي طول

سلمي: انتي مش بتحبيه..يبقي لازم تستحملي طباعه

ملك: ما هو كمان لازم يستحمل طباعي و يقبلني زي ما انا..كل شوية يقولي نتغير و نبطل عصبيتنا..بس مابعرفش امسك نفسي

سلمي: ماينفعش يا ملك..مفيش ولد هيقبل ان البنت تكون ند له في العلاقة..محاولتك انك تبيني له شخصيتك مالهاش مبرر..ده خطيبك و بيحبك..يعني مش لازم تبقي في موقف دفاعي علي طول و متحفزة كده

ملك: مش عارفة بقي..انا بحبه..بقي لنا 4 سنين مع بعض منهم سنتين خطوبة..بحس معاه بأحلي المشاعر..بحسه حنين اوى و بيخاف عليا بجد و يبقي عايز يحميني طول الوقت..مابينامش الا لما يتطمن عليا و ان كل حاجة ماشية كويس معايا..عارفة انه لما بيتعصب بيبقي خايف عليا..و بيبقي الزعيق ده من ورا قلبه

بس انا مابحبش حد يزعق لي و اسكت..و بعدين بقي له فترة كل ما اقوله حاجة يقولي لأ ماتعمليهاش..و بيعترض علي حاجات غريبة..و يقفش من غير سبب

سلمي: ما هو انتي لو بطلتي انك تقاوحي معاه في كل حاجة يقولها لك هتكسبي دماغه..و كمية الـ "لأ" اللي بيقولهالك هتقل..بس انتي جربي تقولي له حاضر و خلاص..مش هتخسري حاجة لو رخيتي انتي الحبل شوية..و هو اكيد هيحس بده و يبتدي هو كمان يقلل الرفض و العصبية

ملك: مش عارفة بقي..انا علي قد ما بحبه علي قد ما بقيت تعبانة من انني كل يوم انام معيطة..و هو مابيهموش

ماما قالت لي بطلوا لعب عيال او سيبوا بعض

بس انا مقدرش اعيش من غيره..هو بالنسبة لي بقي كل حاجة في الدنيا

مش بشوف غيره ولا عايزه اشوف غيره

بس قلبي بقي واجعني من كتر الخناق..نفسي احس انني مخطوبة بجد

سلمي: و هتعملي ايه دلوقتي؟

ملك: مش عارفة..انا لازم اقعد يومين مع نفسي افكر في الحياة اللي انا عايشاها دي..يمكن اشوف الحل اللي احنا الاتنين بندور عليه

.... رسالة إلي

عزيزتي

وحشتيني

فات وقت طويل علي بعدنا

تقريبآ كنت محتاج الوقت ده كله عشان اقدر الاقي الرد علي رسالتك الأخيرة

بس برضه لسه عاجز انني الاقي رد علي كلامك..رد علي إحساسك

اللي اعرفه انني كمان حبيتك..و كنت بحب كل لحظة انتي فيها جانبي

بس زي ما انتي قلتي..وجودك جانبي كان هو اللي بيزقني لقدام

كنتي دايما جانبي في كل لحظة صعبة و كل لحظة حلوة

كنتي بتفرحيلي اكتر ما كنت بفرح لنفسي

كنتي دافع كبير اوى..و كنت بحبك اوى اوى

و زي ما انتي كنتي بتحلمي يكون لي صفة في حياتك

انا كمان كان نفسي اشاور عليكي للناس و اقولهم دي حبيبتي اللي ساعدتني اوصل للنجاح ده

بس كنت عايش في دوامة..اقولك انني بحبك و اخاطر انني اخسر الدافع اللي وصلني لكل اللي انا فيه

كانت دي المشكلة الدايمة..و المشكلة الوحيدة اللي مقدرش احكي لك عنها عشان تساعديني في حلها زي كل مرة

مشكلتي..انتي

كنت بخاف من اللحظة اللي احس انك هتبعدي عني فيها

و كنت ناوى ان اللحظة اللي احس فيها انك ممكن تبعدي اخد المخاطرة و اصارحك بحبي

بس انتي فاجئتيني..و الاصعب انك فاجئتيني في لحظة انا كنت ضعيف فيها

كنت اضعف من انني حتي ارد علي كلامك

مش عارف انتي عامله ايه في حياتك..بس اللي عارفه ان مش حاسس بطعم كل الحاجات الحلوة اللي بحققها في حياتي

نظرة السعادة في عيونك و صوتك و هو بيقولي مبروك..كانوا هم طعم النجاح بالنسبة لي

و حتي لما بدأتي تنجحي ما إديتنيش فرصة افرح بنجاحك

كنتي دايمآ تقولي لي خلينا فيك انت..انت المهم

معتقدش ان اللي بيننا سهل تنسيه..حتي لو قالوا ان البعد و الايام بينسوا

حاولت انساكي..بس مع كل لحظة حلوة بتعدي عليا بفتكرك

و مع كل لحظة صعبة بتعدي عليا بحتاج لك

انا بحبك

بقولها متأخر و بقولها و انا مش عارف لو ينفع اقولها دلوقتي ولا لأ

بس كل اللي علي بالي اقوله هو اللي انغام بتقوله

بحبك..وحشتيني..انا اسف علي التأخير..ماليش بعدك يا نور عيني

ياتري انا فعلا جاى متأخر؟

اتمني ان الاجابة تكون لأ

مستني ردك..و ارجوكي متتأخريش زيي في الرد

إمضاء

........

_______________________________________

من يوم فراقنا و انا بشتاق إليك

جربت بعدي إزاى قدرت تفوتني

إليسا

...رسالة من

عزيزي

انا مشيت معاك مشوار طويل

عارفة اننا مهما فرقتنا مشاغل كنا دايمآ مع بعض..حتي لو مش بنسأل علي بعض

بس انا كنت دايمآ حاسة بك كإنني معاك..كان نفسي دايما اشوفك احسن واحد

كنت اقرب واحدة ليك..بتصرف بمنطق انني بحبك

و انت بتاخد افعالي بمنطق اننا اصحاب

بس انا حبيتك..ايوه حبيتك و كان نفسي انت كمان تحبني

بس انت ماكنتش حاسس

دماغك دايمآ كانت مشغولة في احلامك و الحاجات اللي بتعملها

و انا كنت جانبك راضية و فرحانة انني اشوف احلامك بدأت تتحقق و انك بدأت تنجح و تكبر

الاحلام اللي عشتها معاك من ايام ما كانت افكار بقي واقع يخليني فخورة

بس في وسط فخري و سعادتي كنت مش عارفة اقول للناس انا فخورة بمين

كنت بقول للناس اعرفه..مكنتش بقدر اقولهم قد ايه انت مهم عندي

كان نفسي يبقي لك صفة افتخر بها قدام اصحابي

مش مهم تكون خطيبي او مرتبط بي رسمي

عايزة اقولهم ده حبيبي..ده الانسان اللي بحبه و بيحبني

بس مكنتش اقدر ابقي انانية

و كان مستحيل اقولك قد ايه نفسي تحس بي

حاولت المح لك..بس خجلي كبنت كان بيصدني بعد جملتين تلاتة

كتمت ده كله جوايا فترة طويلة

حاولت ابعد عنك فجأة..بس قلبي تعب من البعد و رجعتلك

و انت استقبلتني بإبتسامة..و رجعت انا و في بالي اسيطر علي قلبي

بس قلبي خانني و فضل يحبك اكتر من الاول

لحد ما جت اللحظة اللي قدرت اخرج فيها لعالم تاني

و حياتي ابتدي يبقي فيها شغلي و ابتدي يبقي لي انا كمان نجاحاتي

و انت كنت بتشجعني زي ما شجعتك بس كبرياءك كرجل كان بيمنعك انك تعبر عن سعادتك بنجاحي زي ما كنت بعمل معاك

انا بقيت ناجحة..و بقي لي كيان

و فخورة و سعيدة بكل لحظة قضيناها سوا

ماتعرفش بقولك ده و قلبي موجوع ازاى..و مش عارفة جتلي الشجاعة اقولك اللي عايزه اقوله ده ازاى

بس جه الوقت اللي اسيبك تكمل مشوارك لوحدك

اتمني تلاقي واحدة تقف جنبك زيي..بس ياريت تحبها المرة دي

لانك ماتعرفش احساسي عامل ايه

ربنا يوفقك في حياتك الجاية

و أرجوك..سامحني

إمضاء

......

___________________________________

كان نفسي اعرف قد ايه حبيتني

و فاكرني ولا خلاص يا غالي نسيتني

إليسا

قلب امرأة

هي: عارفة..انا بحب القصص و الاغاني الرومانسية جدآ

صديقتها: كلنا بنحبها

هي: لا..بس انا حالة مختلفة

صديقتها: إزاى؟

هي: انا اتجوزت جوازة تقليدية جدآ..عريس جابوه اهلي اتجوزنا و ادينا عايشين

صديقتها بإندهاش: و اديكم عايشين؟ ده جوزك راجل بتحسدك عليه كل صاحباتنا..و بعدين واضح انكم سعداء و الا ماكنش بقي عندكم تلات اولاد

هي: عارفه كل ده..و الحمدلله مبسوطة..بس كان نفسي اعيش قصة حب زي اللي بقراها في القصص

صديقتها: هو انتي مابتحبيش جوزك؟

هي: بحبه طبعآ..بس الحب جه بعد الجواز مش قبله

صديقتها: و تفرق ايه ؟

هي: تفرق كتير..الحب قبل الجواز فيه بعد و اشتياق و سهر ليالي و تليفونات بالليل و فسح و خروجات

صديقتها: و بعد الجواز؟ انا شايفة ان جوزك عمره ما حرمك من حاجة ولا قعدك في البيت في يوم اجازة

هي: مابقولش انني مش سعيدة..انا قلت لك انني مبسوطة..بس كان نفسي اخوض التجربة

صديقتها: مش شرط انك لما تعيشي قصة حب عنيفة قبل الجواز تعيشي بعد الجواز اسعد انسانة..الحاجات دي نصيب

هي: بس انك برضه تعيشي قصة حب زي بتوع اغاني كاظم ولا عمرو حاجة اي واحدة تتمناها

صديقتها: علي فكرة..كاظم الرومانسي اللي طالعة لي به السما مطلق مراته من زمان..و عمرو انتي عارفه انه اتجوز مرتين..يعني حتي دول في حبهم ممكن يفشلوا..دي كلها اغاني و خيال مش واقع هم عايشينه

هي: انتي غلسة اوى علي فكرة و محطمة للاحلام الوردية

صديقتها: احسن ما ابقي مش قنوعة زيك..قال احلام وردية قال

جميع الحقوق محفوظة لشركة سلتو للإنتاج الفني
© 2008

لحظة مواجهة

هو: عايزك في كلمة

هي: مش فاضية دلوقتي

هو: خلاص..هتصل بيكي بالليل

هي: بلاش نتكلم الليلة

هو: و هو انتي ايه ضمنك ان دي مش اخر ليلة في عمر حد فينا ولا حتي احنا الاتنين

هي: ايه بس التشاؤم ده..عايز ايه؟

هو: انتي اللي عايزة ايه؟ مالك اليومين دول بتتعاملي ع الواقف كده؟

هي: عادى..هي دي معاملتي دايمآ

هو: مش معايا..انتي عارفة كويس ان الكلام ده مايجيبش معايا سكة

هي: و مين قالك انني بدور علي سكة معاك..انا كده و اللي مش عاجبه

هو: اللي مش عاجبه ايه؟ ماتقولي

هي: في ايه؟ انت بتعمل مشكلة و خلاص؟

هو: لا..انا بس فاض بي من انني استحمل معاملتك دي

هي: محدش جابرك تستحملها من الاول اصلا

هو: يا سلام؟ يعني هي بقت كده؟

هي: مش عارفة..ارجوك ممكن مانتكلمش دلوقتي؟

هو: لا..مش ممكن..الا لو قلتي لي مالك

هي بضعف: أرجوك..سيبني في حالي

هو: قلت لك لا..لازم افهم

هي بعد ما بدأت دموعها في النزول: تفهم ايه بس؟

هو بصوت هادى: طيب ماتعيطيش..في ايه حصل دلوقتي؟

هي بصوت باكي: سيبني لوحدي شوية

هو بحنية: لا مش هسيبك..مش هينفع..مالك؟

هي: انت بالذات مقدرش اقولك

هو بضيق: و ده من امتى؟

هي: ماتقفشش و تعملي فيها كرامتك ناقحة عليك..جرب مرة تفهمني

هو بخجل: مش القصد انني اقفش..انا بس متضايق انك مش عايزاني اسمعك

هي بإنهيار اكتر: اسكت بقي

هو يمسح دموعها بكفه: مش هقدر اسكت..فهميني بقي بتعيطي ليه؟

هي بصوت مخنوق بالدموع: بعيط عشان بحبك..بحبك و انت مش مهتم حتي بكل اللي باعمله عشان ابين لك ده..إرتحت؟ خلتني اعترفت لك و انجرحت اكتر؟ سيبني بقي

هو: يا عبيطة..بقي كل ده عشان بتحبيني؟ و كمان عايزاني اسيبك؟

هي: اه..سيبني لوحدي دلوقتي

هو: لا..مش هسيبك..لا دلوقتي ولا بعدين

هي: يعني ايه يعني؟

هو: يعني انا كمان بحبك يا اهبل و اطيب و احلي بنت قابلتها في حياتي..و نفسي اقولك ده من سنة

هي بصوت ممزوج بالضحك و بقايا العياط: يا سلام..و سكتت ليه كل ده؟

هو: سكتت عشان مفيش حاجة..خلاص خلصت فيك الحب

هي بضحكة طفولية: انت غلس بجد

هو: و انا بحبك اوى..بجد

جميع الحقوق محفوظة لشركة سلتو للإنتاج الفني
© 2008

مكالمة قبل النوم

هي: ممكن طلب؟

هو: طبعآ ممكن..إطلبي

هي: قبل ما تنام صلي الفجر و ادعي لي. و فكر فيا قبل ما تنام و انا كمان هفكر فيك و بكده نعوض الكلام اللي مالحقناش نقوله

هو بعد صمت لحظات: بجد؟

هي: سوري انا حاسة انها فاكرة طفولية و مراهقة..انا اسفه..مقصدش بجد

هو: لالا..بالعكس..دي احلي حاجة سمعتها

هي: انت بتقولي كده عشان تاخدني علي قد عقلي؟

هو: لا طبعآ..الفكرة حلوة جدآ..هصلي و ادعيلك..و افكر فيكي قبل ما انام

هي: هيهيهيهي

هو: طيب تحبي نتكلم في ايه في الحلم؟ ايه رأيك اخدك فيلم لاحمد السقا؟

هي: رجعت تتريق تاني ولا بتتكلم جد؟ ساعات مابفهمكش

هو: اكيد بتكلم جد..الفكرة حلوة و عاجباني..انتي مش مصدقاني ليه؟

هي: مش عارفة..ساعات بحس انك بتتريق علي كل حاجة بقولها

هو: ابدآ ايه اللي خلاكي تحسي كده اصلا؟

هي: مش عارفة بقي

هو: صدقيني..الفكرة حلوة..انا اصلا من غير ما تقولي كنت هفكر فيكي قبل ما تنامي

هي في خجل محاولة تغيير الموضوع: علي فكرة انا كل صلاة بدعيلك

هو: بتدعيلي بإيه؟

هي: بادعيلك تبقي احسن واحد زي ما نفسي اشوفك دايمآ..و تحقق حلمك اللي انا واثقة انك تستاهل توصل له

هو: بجد؟ بتدعيلي؟

هي: بدعي لكل اصحابي عمومآ يعني..دي حاجة بعملها انا و صاحباتي

بعد لحظات صمت و تأمل

هي: تعرف ان انت الولد الوحيد اللي اعرفه رغم انني فاضل لي سنة و اخلص جامعة

هو: اه..من و انتي 15 سنة و احنا نعرف بعض

هي: اه..شوف كام سنة فاتوا و انت الوحيد اللي معمول لك استثناء في كل حاجة..عمري ما كلمت ولد غيرك

هو: ماقابلتيش ولاد في الدروس ولا الجامعة؟

هي: ايه الذكاوة دي؟ ما انت عارف انني مابروحش غير في الامتحانات..بخش ع الامتحان و اروح علي طول

هو بسخرية: دايمآ بتحسسيني انني متميز

هي: يعني هو انت في زيك اصلا؟

هو: مش عارف

هي: لا مفيش..يلا بقي..قوم صلي الفجر و نام

هو: و افكر فيكي؟

هي: لا ماتفكرش..و مش هفكر فيك..ماتزودهاش بقي

هو: في ايه؟

هي: مفيش..يلا ماما صحيت كمان..هتهزقني لو لقتني لسه صاحية..تصبح علي خير

هو: بس إسمـعي

تررك..توت توت توت

جميع الحقوق محفوظة لشركة سلتو للإنتاج الفني

© 2008

حب ميئوس منه بشدة

المشهد الاول

هي: سمعت اغنية "بعدك عني انتحار" يا برعي؟

هو: لا..ايه دي؟

هي: اغنية كويسة بتاعة واحدة اسمها لميا

هو: اه..طيب

هي: طيب يعني هتسمعها ولا طيب ايه؟

هو: هشوف..هبقي انزلها..بس مابحبش انا الناس الجداد دول

هي: بس انا عايزاك تسمع الاغنية دي

هو: ليه يعني؟

هي: مش عارفة..اول ما سمعتها افتكرتك

هو: يا ساتر..افتكرتيني بسيرة الانتحار

هي: انت علي طول كده بتقف لي علي الكلمة..اسمعها لو حبيت

هو: طيب

المشهد التاني

هي: سمعت اغنية "كدبت عيني" بتاعة سوار؟

هو: مش دي البنت اللي لابسة اخضر في الكليب؟

هي: ايوه هي دي

هو: اه البنت دي زي القمر

هي: مش حلوة..بس الاغنية جميلة

هو: فعلا..الاتنين حلوين..هي و الاغنية و الكليب كمان

هي: اكتر جملة معلمة معايا..انا زي ما انا و انت بتتغير

هو: اه فعلا..الجملة دي عاجباني اوى

هي: بجد؟ طيب كويس..ابقي اسمع الاغنية بقي

المشهد التالت

هي: انا بعت لك ايميل علي فكرة

هو: ما فتحتش الكمبيوتر بقي لي يومين

هي: طيب ممكن تبقي تشوف إيميلي؟

هو: أكيد يعني لما اقعد هشوف كل الإيميلات

هي: طيب

هو: طيب ايه؟ في حاجة؟

هي: لأ

هو: طيب الإيميل فيه؟

هي: أغنية

هو: اغنية ايه دي؟

هي: اغنية حماقي الجديدة

هو: دي غير بحبك كل يوم اكتر؟

هي: لا هي دي..جامدة اوى..سمعتها؟

هو: ايوه طبعآ..كويس انك قلتي لي..كنت متلهف اشوف الايميل

هي: بس برضه نزلها

هو: ماهي عندي..انزلها ليه؟

هي: النسخة اللي باعتهالك صوتها نضيف

هو: طيب..لما ارجع البيت انزلها و اقولك رأيي في كواليتي الصوت

هي: لا مش مهم رأيك..انا واثقة انها هتبقي احلي نسخة تلاقيها للأغنية

بعد ما روح البيت و نزل الاغنية

هو لنفسه: الصوت زي النسخة اللي عندي..ايه ده..دي حاطة اسمها في خانة المغني

"بحبك كل يوم اكتر - سوسن المليجي"

تكونش بتحاول تلمح لي انها بتحبني؟

لالا..تحب مين بس؟ دي اعقل من كده..تلاقيها بتستخف دمها بس

جميع الحقوق محفوظة لشركة سلتو للإنتاج الفني
© 2008