المشهد الاول
(علي أحد الشواطيء)
هي: الجو حلو اوى النهاردة..الموج رايق..الشمس جميلة..نسمة الهوا
هو: و إنتي
هي: ايه..انا مالي؟
هو: بقول البحر..الشمس..النسمة..و انتي
انتي احلي من كل دول اصلآ
هي: أنا؟
هو: ايوه..إنتى اول عروسة بحر تعيش علي البر
هي: يا سلام؟ بطل تريقة
هو: و هو انا لو كنت ناوى اتريق كنت جبتك هنا؟
هي: إنت عارف انني بموت في البحر و إننا نمشي سوا علي الشط
هو: بس دلوقتي هنعمل حاجة مختلفة
هي: ايه ده؟ إحنا لسه جايين..عايزنا نروح فين؟
هو:مش هنروح بعيد..شايفة اليخت الصغير ده؟
هي: ايوه..ماله؟
هو: إحنا بقي جايين له النهاردة..انا اجرته
هي: لا أرجوك..إنت عارف انني بخاف ادخل جوه الميه
هو: ماتبقيش غلسة بقي..انا عايز أصطاد
هي: عشان خاطري..خلينا هنا..إصطاد يوم تاني
هو: خلاص بقي..انا حضرت عدة الصيد و اجرت اليخت..بعدين انتى خايفة من ايه؟
هي: بخاف من الميه..ما انت عارف
هو: ماتخافيش..بعدين حتى لو اليخت غرق..عادى..مش انتى عروسة البحر؟
هي: بطل غلاسة بقي..انا مابعرفش أعوم
هو: بطلي انتي جبن و يلا بينا
المشهد الثاني
(علي سطح اليخت)
هو: ايه رأيك في البحر من جوه؟
هي: حلو أوى..مكنتش أعرف ان المنظر حلو كده..دي اول مرة في حياتي أدخل جوه البحر علي يخت
هو: عشان تبقي تصدقيني..و لسه خايفة؟
هي: عمري ما بخاف و انا معاك..بس الموضوع كان قالقني في الاول..بس دلوقتي لأ
هو: عارفة انا ليه أجرت اليخت ده؟
هي: ايوه..عشان تصطاد سمك..جايبني اتفرج عليك ولا فاكرني هشويهولك؟
هو: لأ..مش عشان السمك..انا حتي مابعرفش أصطاد
هي: امال احنا هنا ليه؟
هو: عشان عايز اتكلم معاكي..و المكان ده اكتر مكان برتاح فيه..قلب البحر
هي: للدرجة دي الكلام اللي حتقوله موترك؟..عايز تقول ايه يا حبيبي؟
هو: انا عايز اتكلم و انتي تسمعيني..و بس
هي: يا سلام؟ اتفضل..انا سامعاك اهو
هو: عارفة انا بحبك اوى..اكتر مما تتصوري..بقيت احسك حتة مني..جزء من روحي
نظرة عينيكي دايمآ بتقول حاجات..براءة طفلة..كبرياء انثي..دلع بنوته شقية
ساعات كتير بابقي نفسي احضنك..و ماتفهمينيش غلط
بس بابقي حاسس انني نفسي احتويكي..نفسي اطبطب علي كتفك و العب لك في شعرك و اطمنك انني مش هسمح لحاجة تأذيكي ولا تزعلك
كل ما بلمح في عينك نظرة قلق او تصرف فيه خوف عليا بحس انني ملكت العالم لانني ملكت احن و ارق قلب في العالم
انتي جيتي وريتيني الحياة من جديد..عرفتيني الوان مكنتش اعرفها
حسستيني ان ممكن الانسان يعيش مع الفراشات و الورد
رغم ان الحياة حوالينا مادية و عملية..الا انك قدرتي تصنعي عالمنا الوردي الخاص
لامسين برجلينا ارض الواقع بس طايرين بقلوبنا فوق في السما مع العصافير
معاكي مابتكسفش اعبر عن كل اللي جوايا..لانني حاسه بجد و لان مهما بعبر لك مش بوصلك ربع اللي انا حاسه
معاكي بس عرفت معني ان واحد ينادي حبيبته و يقولها يا حياتي
ايوه انتي حياتي..شايف فيكي احلي حاضر و نفسي اعيش معاكي اجمل مستقبل
حبيبتي..انتي اجمل حاجة حصلت لي
هي: ممكن اقاطعك ثانية بس؟
هو: إتفضلي
هي: صنارتك غمزت
هو: تتجوزيني؟
جميع الحقوق محفوظة لشركة سلتو للإنتاج الفني
© 2009
© 2009
28 comments:
هو بعيدا عن انه دلوقت اللي بياخد وحدة في يخت بيبقى ناوي حاجة تانية غير تتجوزيني
بس حلوة الحالة او الحلم ده بيبقى ده هو حلم اي بنت ودي الحاجات اللي بتحب البنت تحسها من الشاب اللي بيحبها و اللي احلى جزء فيها بجد بجد
تتجوزيني
احلى حاجة في حب صادق و قصة عشق زي دي لما توصل لحلال
بس انت قولت انه حلم
الله عليك يا محمد :)
ياريت كل الشباب يبصوا للحب بنفس الطريقة اللي بتبص بيها ..صحيح انت قلت حلم بس والله في احلام كتير بتتحقق لكن محتاجه طرفين ..كل طرف فيهم يكون على نفس القدر من المسؤولية اتجاه التاني عشان العلاقة دي تستمر زي مابيتمنوها
حقيقي يابخت بطلتك بحبيبها وان كان مجرد حلم :)
مش عارفه ليه عايزه اضحك:)
مش سخرية علي كلامك لإني مقدرش طبعا
لكن قليل القليل اوي اللي بيحب كدا وقصة حبهم تستمر رغم الظروف اللي بتقابلهم
مش هعمم اكيد واقولك الواقع بقى صعب والحب حاجه والجواز شيء تاني لأن اكيد في بني أدمين يعني قصة حبهم بتستمر ويليها جوازهم
بس نفسي بجد يبقى فيه صدق كدا في العلاقة رغم صعوبة الواقع اللي عايشينه
وان بمجرد مشكله توقف قصادهم يجي طرف منهم يقولك
احنا اتسرعنا
احنا لسه في البداية وادامنا كل المشاكل دي اومال شويه كمان هنعمل
ايه يبقى كل واحد مننا في طريق
واحنا لسه قدامنا مشواااار
واحنا ...
دا غير ان فعلا الظروف بيتبقى قويه جدا وبتنتهي العلاقه وكل قلب من الطرفين بيعشق التاني!
ياريت فعلا كل حواديت الحب اللي بتبدي بالجواز (مش بتنتهي زي مابيقولوا)
كنا ساعتها فعلا مش هنقول
(الله حلم جميل اوي)
تحياتي ليك بجد عالبوست رااائع :)
احلى حاجة بالواد ده انه بيعرف يعبر كويس
جميل والله المشاعر الصغيرة دي
مش عارفه اشرحلك يعني ايه بس هحاول
يعني مشاعر فريش
مشاعر لسه طازة
مشاعر صغنونة باندفاعها وبرائتها وجنانها
الحاجات دي موجودة على فكرة
بس في سن معين
بعد كدا شكل الحب والارتباط وطلب الجواز
كل الحاجات دي بتتغير مع السن
دا حب اوائل العشرينات بالكتير نص العشرينات
على مشارف التلاتين شكل الحب بيتغير اوي للاسف :)
تعبيراتك حلوة اوي
ريـم
لا مش كل الولاد نيتهم سيئة كده في موضوع اليخوت :D
الحاجات دي هي نفسها اللي انا كشاب شايف ان البنت تبقي حاساها من ناحية حبيبها..شايف انها لازم تبقي فاهمة و متطمنة لكل حاجة
لان البنت بطبعها كائن شكاك قلوق يجيد إشتغال نفسه :D
هو فعلا أحلي حاجة ان الحب ده يتوج بالجواز
يمكن القصة تكون حالمة شوية..بس مش بعيدة عن انها تكون واقع :)
سـاره
ربنا يخليكي
زي ما قلتي..الحلم ممكن يكون واقع و يتحقق
بس الحكاية محتاجة طرفين علي نفس القدر من المسئولية تجاه الطرف التاني
و يكون عندهم كمان ثقة في ان الطرف التاني بيبادلهم نفس الاحساس
لازم يكونوا حاسين بالامان مع بعض لاقصي درجة
القلق من اغبي الحاجات اللي تفسد الحب
و يا بختي انا لو لقيت بطلة قصتي :D
رومايا
شكرآ :)
عارف انا موضوع الضحك ده..ساعات بيحصل معايا :D
الصورة مش وحشة اوى زي ما انتي شايفاها كده
اللي بيحبوا بجد و إخلاص موجودين
يمكن مايكونوش كتير فعلآ
بس القصة مش حالمة لدرجة الخيالية
كل علاقة بيكون فيها مشاكل..الحكاية مش متعلقة بالحب بتاع الجواز
ما احنا بنواجه مشاكل مع اهلنا و مع اصحابنا
الدنيا لو مفيهاش مشاكل تبقي مش دنيا اصلآ :)
حلوة جملة الحب يبدأ بالجواز..بس انا شايف ان الجواز تتويج للحب..سواء الحب ده حصل قبل او بعد الجواز
مرمريتوس
شفتيني و انا معبر و بقول كلام جامد؟ :D
فاطمة
انا فاهم قصدك :)
انتي حاسة ان المشاعر دي فيها براءة لسه ما اتصدمتش بالدنيا و قرفها
بس الحكاية مش مضلمة كده ولا مرتبطة بالسن..علي قد ما هي مرتبطة بالطرفين و ازاى بيمشوا العلاقة ما بينهم مهما كانت مدتها
يعني ساعات في حب بيفضل بالـ7 و الـ8 سنين قبل ما الاتنين يتجوزوا
و مشاعرهم بتفضل بنفس النضارة و البراءة..لانهم من جواهم نضيف و مخلصين لبعض
فيروز بتقول في اغنية حبوا بعضهن
بيقولوا الحب بيقتل الوقت..بيقولوا الوقت بيقتل الحب
يعني الوقت بيقتل الحب يوم لما الحب مايبقاش فريش..و الحاجات اللي بتفسد الحب اللي كننا بنتناقش فيها في موضوع الحب الاخضر تظهر
تجديد الحب ده موضوع مهم..لان الملل و مرحلة الركود تقتل بني ادمين مش بس الحب
و ده كله مش مرتبط بسن الطرفين..ما انا دلوقتي 25 سنة..يعني لما احب و كده هبقي دخلت مرحلة النص التاني من العشرينات و علي مشارف التلاتينات..و لسه بكتب القصص بالمشاعرالبريئة دي ولا كإنني طالب في اعدادية :D
المشكلة كلها في الوقت و عوامل الافساد
لما الواحد بيكبر شوية في السن بيحس ان الحياة ومسؤولياتها اكبر بكتير من المشاعر البريئة دي
بيبتدي يفكر كويس ان في عوامل تانية لا تقل اهمية عن المشاعر
زي التفاهم
زي ان الطرفين يبقوا على موجة واحدة مش كل واحد بيتكلم لغة اتاني مش فاهمها ولا حاسسها
زي ان الطرفين يحتوا بعض
زي ان الطرفين يصلحوا يكونوا امهات واباء
زي الحد الادنى من الامكانيات المادية اللي تضمن عيشة كريمة ليهم ولاولادهم
زي التقدير
زي الاحترام
زي الاخلاص
كل الحاجات دي مش مرتبطة بالحب على فكرة
ممكن جدا الواحد يحب بجد من قلبه ويبقى ناقصه حاجة او اكتر من الحاجات دي واللي في الواقع ماتقلش أهمية أبدا
الحب بيتغير شكله مع الوقت
بيحتاج الحاجات دي عشان تخليه يعيش
في سن صغير الواحد ما بيدركش
بس مع الوقت الواحد خلقه بيضيق وبيبقى مش مستحمل بقى حد ينكد عليه حياته
عايز يعيش بهدوء
مغامرات السن الصغير دي ما بتبقاش بتستهويه بعد مرور الزمن
مش مناسبة لفكرة الاسرة والطفل
انا كمثال كان حلم حياتي من صغري ان اول ما اشوف واحد لاول مرة في حياتي واول مرة هو كمان يشوفني ومن غير اي كلمة يجي يقولي تتجوزيني
دا كان حلم حياتي بجد
وكنت مقررة ان دا لو حصل اوافق
دلوقتي والله في سماه لو جالي حد وعمل كدا لاطلبه مستشفى الامراض العقلية
وهقول عليه تافه وعبيط وازاي يختار واحدة تكون زوجة من مجرد النظرة الاولى
وان انسان سطحي
وان وان وان
زمان ماكنتش شايفة كدا
كنت حاسة ان اللي هيطلب مني الطلب دا هيبقى انسان عنده نظره خارقة قدر يشوفني من جوايا ويحسني من نظرة واحدة في عنيا
شفت الهطل :)
ما المشاعر البريئة مش لازم تتعارض مع ان الواحد يكون فاهم و مدرك لكل الحاجات دي
مفيش تعارض بين ان الانسان يكون ناضج و بيحب بطريقة فيها براءة
يعني انا مدرك ان الجواز مسئولية و لازم اختار واحدة تصلح تبقي ام و انا لازم ابقي مؤهل للأبوة و انني اشيل مسئولية بيت..و إن الجواز لازمه اختيار مناسب
يعني انا لو هختار دلوقتي عروسة (علي اساس انني سلطان متوج و بنقي من جميلات المملكة يعني) هختار واحدة اتفاهم معاها و يكون بيني و بينها قبول
بس لما احبها هحبها بالطريقة دي
و علي فكرة..دلوقتي في ناس في اوائل العشرينات و متجوزين و مخلفين كمان
انا الشهر اللي فات قعدت كام يوم مع زملاء لي
من فروع تانية..كلنا من نفس الفئة العمرية و انا الوحيد اللي مش متجوز
اللي تطلع لي صورة بنتها..و اللي يقولي عن ثواني اكلم مراتي عشان حامل و علي وش ولادة
و كلهم كانوا مستنكرين انني 25 سنة و حتي مش مرتبط :D
ماينفعش الواحد يربط السن بالعلاقة و النضج
لان في المقابل في ناس قربوا علي الأربعين و لسه مش محددين هم عايزين ايه ولا في دماغهم يرتبطوا
زي مفاطمه قالتلك
بيبقي فريش في سن معينه
غالبا قبل سن 25
بيبقي فيه احلام حلوه وجميله وبريئه لاتنين اول مره بيحبوا وبيعيشوا الحب بكل مافيه
بعد 25 بيبقي ماسخ وعملي وتقليدي وواقعي وممل وخنيق ومالوش امل وفاشل
انا كنت هرد رد طويل عريض لد ما قريت رد فاطمة..ليه يا ماما كدا:D
اكيد فى ناس بتقدر تحتفظ ببرائة مشاعرها للى يستاهل و بيتهيالى هى ملهاش دعوة بالسن..هى مرتبطة اكتر بقدرة كل واحد على انه يوفق بين عقله و احساسه بالنسبة الصح لكل حاجة فيهم..بمعنى انه ما دام البديهيات اللى اتكلمت عنها فاطمة دى متوفرة ليه ما يبقاش فى مجال للاحاسيس النضيفة دى عشان تظهر..نكدتى عليا يا فاطمة حرام عليكى :(
انا بس عايزه ارد على دكتور محمد
ليه بس كمية الاحباط دي
يعني بعد سن ال 25 اروح ادفن مشاعري واقرا عليها الفاتحة!
انا معاك ان الحياه بقيت عملية اكتر واوقات الحب او المشاعر دي بتتخنق
لكن عمري ما اقيدها بوقت
منكرش ان في وقت بحياة البنى ادم مشاعره بتبقى لسه بكر ولسه بخيرها
ولما بتدي بتعطي بكثرة
لكن برده ماجيش احدد المشاعر دي بوقت حتى لو قلّت
دي الحاجه الوحيدة اللي لسه باقية في الانسان
أستاذ محمدأنا,كنت بعت رسالة إعتذار,في إيجي فيلم
عن حاجة مش مهمة
بس,حضرتك مش قريتها
أتمنى حضرتك تقراها:)
آسفة جدا :)
هي,رسالة إعتذار:)عن حاجة أو تعليق صدر مني,إعتذرت عنه من فترة,تعلييقي ده,بس مش وصل لحضرتك الإعتذار
آسفة,رسالة إعتذار متأخرة,أتمنى حضرتك تقراها:)
شكرا,السلام عليكم ورحمة الله وبركاته:)
ليكتر
انا شايف ان مفيش حاحة اسمها 25 و 30 و 35..الحب مالوش سن
ولا المشاعر لها تاريخ صلاحية نقدر نستخدمها فيه
بس هي العوامل التانية اللي بتخلي الحب ماسخ و مالوش طعم
لكن في القصة دي هو قال لحبيبته انها خلقت لهم عالمهم الخاص رغم الحياة المادية و الضغوط
انت تقدر تحافظ علي براءة مشاعرك طالما حبيبتك تقدر تحافظ علي براءة مشاعرك
بعد كلامك يا فاطمة انتي ولكتر
أنا بقول ربنا يطمنكم يعني :)
فليحيـا الزواج التقليدي بلا مشاعر بلا زفت :D
ياسمين
هو ده الكلام السلين..اخيرآ في حد جه يساندني :D
متفق معاكي جدآ ان الحكاية بترجع للشخص نفسه..طالما الانسان يقدر يحافظ علي مشاعره هيحافظ عليها حتي بعد الـ40 و بعد ما يتجوز و يبقي عنده جيش اولاد
لان دي قناعات و طريقة تعبير عن مشاعر..مابتختلفش بإختلاف الوقت
رومايا
بالظبط..الواحد مش لازم يبص للموضوع بنظرة غامقة و إستسلام كده
انا ممكن احب و افشل 20 مرة..بس اقدر احافظ برضه علي مشاعري دي طالما صادقة و طالعة من القلب
إيمان
من غير ما اقرأ..مفيش داعي للإعتذار :)
انا مش فاكر انك قلتي اى حاجة غلط في ارائك اصلا..انتي من حقك يبقي لك رأى مختلف عن الناس
و لو قصدك عن الرد بتاع هيفاء وهبي..فرأيك انا كنت متقبله كوجهة نظر مختلفة عن اللي بتكلم عنه :)
و معتقدش ان قباري ممكن يكون اتضايق من كلامك
The Seagull
و ليه اقتنعتي بوجهة نظر فاطمة و ليكتر؟
ما عندك ناس مخليين الدنيا فيها امل اهو :D
أصل أنا واقعية وعملية جدًا
عشـان كدة أؤيد النظريات الواقعية والعملية :D
لا هي مش حكاية اقتنعت برأيهم أو لأ :) لأني فاهمة هما يقصدوا ايه بكلامهم .. هما شايفين إنه كل ما الواحد بيكبر في السن بتختلف نظرته للواقع فبتبقى أشمل وأعم .. بيتبين لهم أولويات أهم من فكرة المشاعر دي لوحدهـا .. زي الحاجات اللي قالت عليها فاطمة التفاهم والاحترام والاحتواء وتحمل المسئوولية وتوفير الحد الأدنى من المعيشة الكريمة ليهم ولأولادهم :)
بس أنا برضه هاقولهم على حاجة .. إنه ممكن العوامل دي كلها تتوفر زي ما انتم عايزين وأكتر ومع ذلك برضه بيبقى في حاجة ناقصة :) وبيبقى في إحساس من جواكم بعدم الراحة أو السعادة .. الطبخة ناقصة ملح :) .. وبالتالي تتحول الحيـاة لمجرد روتين ممل وخنيق ويقرف :) يبقى احنا اللي بنعمل في نفسنا كده والا لأ؟
بإيدك تخلي حياتك سعيدة ومالهاش مثيل زي ما انت حابب .. وبإيدك برضه تخليها أتعس من التعاسة :)))
وبعدين الحمد لله أنا متفاءلة يعني وبدون الأمل يبقى ما نستاهلش نعيش أصلاً!!
موضوعك جميل أوي وطريقة سردك ممتعة وشيقة جدًا بجد
شكــرًا :)
كل الحاجات اللي فاطمة و ليكتر قالوا عليها ممكن تتوافر في اى سن من اول 20 سنة
النضج و التأقلم مع الحياة مالهاش وقت و ميعاد
و فعلآ زي ما قلتي..ممكن اوى بعد توافر كل الحاجات اللي قالوها يبقي في نقص للسعادة و الحكاية تبقي مش مظبوطة برضه
لان الحكاية دي بتبقي موزونة و محكومة بعقل الشخص نفسه
بحب فيك ياض .. انك قصصك ينفع تشاهدها كل أفراد الأسراة :D
أنا بحب قوى قصص الحب اللذيذة دى .. بتعجبنى الحقيقة .. و أهو الواحد بيعيش فيها حالة حلوة حيتعب انه يلاقيها فى الواقع .. بس انا بقول حيتعب انه يلاقيها .. يعنى موجودة بس عايزة اللى يلاقيها
أما بالنسبة لمشاعر الحب و انها بتموت مع الوقت .. على ما اعتقد انها بتموت .. لما يكون البطل او البطلة كل يوم فى علاقة شكل .. النهاردة بيحب فوزية .. بكرا بيحب زبيدة .. و بعده بقى بيحب حسنية .. لازم مشاعره تموت .. و ينتقل من الحبيب إلى الممثل الرائع فلان الفلانى
أما اللى لسه عايز تكون البنت الاولى و الاخيرة .. و انه عايزاها لما يقولها حاجة ميبقاش بيمثل ولا بيكررها و يقولها بهبله .. مش أحسن ما يقولها بتمثيل .. يمكن الظروف متساعدهوش بس فى النفس الوقت مشاعره موجودة
قباري
بالظبط..موجودة بس الواحد بيتعب يلاقيها
اصل مفيش حاجة مستحيلة كده..ولا الحب و الإرتباط معادلة حسابية لازم تتعمل بطريقة معينة
و اساسي طبعآ متفق معاك في الحتة بتاعة موت المشاعر و الإخلاص..بتقول درر انت النهاردة :D
حلم جميل وفي الصيف في عز الحر :)
احساس جميل بين الاثنين
اولا ليها هيا بالرغم من خوفها من البحر الا انها واثقه فيه ركبت معاه لليخت
هو قدر خوفها وكسر خوفها لانه واثق انه يقدر يغلب علي خوفها
وتعبيروه الجميل والرقيق
واللي عمل حاجه رومانس ويطلب منها الجواز
فيه ناس كده اكيد :)
طريقه الكتابه حلووه اوي وبتشد وخلتني اقراها كلها :)
شكولاتة
متشكر جدآ و سعيد ان القصة عجبتك..و سعيد اكتر انك مقتنعة انها واقعية :)
Post a Comment