عزيزي
انا مشيت معاك مشوار طويل
عارفة اننا مهما فرقتنا مشاغل كنا دايمآ مع بعض..حتي لو مش بنسأل علي بعض
بس انا كنت دايمآ حاسة بك كإنني معاك..كان نفسي دايما اشوفك احسن واحد
كنت اقرب واحدة ليك..بتصرف بمنطق انني بحبك
و انت بتاخد افعالي بمنطق اننا اصحاب
بس انا حبيتك..ايوه حبيتك و كان نفسي انت كمان تحبني
بس انت ماكنتش حاسس
دماغك دايمآ كانت مشغولة في احلامك و الحاجات اللي بتعملها
و انا كنت جانبك راضية و فرحانة انني اشوف احلامك بدأت تتحقق و انك بدأت تنجح و تكبر
الاحلام اللي عشتها معاك من ايام ما كانت افكار بقي واقع يخليني فخورة
بس في وسط فخري و سعادتي كنت مش عارفة اقول للناس انا فخورة بمين
كنت بقول للناس اعرفه..مكنتش بقدر اقولهم قد ايه انت مهم عندي
كان نفسي يبقي لك صفة افتخر بها قدام اصحابي
مش مهم تكون خطيبي او مرتبط بي رسمي
عايزة اقولهم ده حبيبي..ده الانسان اللي بحبه و بيحبني
بس مكنتش اقدر ابقي انانية
و كان مستحيل اقولك قد ايه نفسي تحس بي
حاولت المح لك..بس خجلي كبنت كان بيصدني بعد جملتين تلاتة
كتمت ده كله جوايا فترة طويلة
حاولت ابعد عنك فجأة..بس قلبي تعب من البعد و رجعتلك
و انت استقبلتني بإبتسامة..و رجعت انا و في بالي اسيطر علي قلبي
بس قلبي خانني و فضل يحبك اكتر من الاول
لحد ما جت اللحظة اللي قدرت اخرج فيها لعالم تاني
و حياتي ابتدي يبقي فيها شغلي و ابتدي يبقي لي انا كمان نجاحاتي
و انت كنت بتشجعني زي ما شجعتك بس كبرياءك كرجل كان بيمنعك انك تعبر عن سعادتك بنجاحي زي ما كنت بعمل معاك
انا بقيت ناجحة..و بقي لي كيان
و فخورة و سعيدة بكل لحظة قضيناها سوا
ماتعرفش بقولك ده و قلبي موجوع ازاى..و مش عارفة جتلي الشجاعة اقولك اللي عايزه اقوله ده ازاى
بس جه الوقت اللي اسيبك تكمل مشوارك لوحدك
اتمني تلاقي واحدة تقف جنبك زيي..بس ياريت تحبها المرة دي
لانك ماتعرفش احساسي عامل ايه
ربنا يوفقك في حياتك الجاية
و أرجوك..سامحني
إمضاء
......
___________________________________
كان نفسي اعرف قد ايه حبيتني
و فاكرني ولا خلاص يا غالي نسيتني
إليسا
7 comments:
الجواب كان ماشى فل قوى ..
لغاية الاخر .. مفهمتش بصراحة هيا ليه فجاة طلبت معاها تخلع ..
و لا هيا كانت معاه علشان هوا ناجح و هيا لسه و لما نجحت زيه قلبته ؟؟
و هوا أزاى مكنش حاسس .. الراجل بيحس أكتر من البنت و الله ..
ياريت تفهمنى حيثيات بعدها فى الأخر .. حلوة حيثيات دى :D
حرام والله يا محمد
ليش خليتها تسيبه في الآخر
مهو كان ممكن تبينله إحساسها
بمليون طريقة مش لازم الكلام..
أنا مع Here i`m ماهي أسباب بعدها؟
بس عموما القصة حلوة والأغنية عاملة جو معاها..
وبعدين أنت كتاباتك زي السكر
وأدائك لم ينخفض مستواه إطلاقا..
تحياتي
بأمانة
بحس بغيرة قوي
لما كلكم بتكتبوا عن الحب :)
حتى لو فيه فراق
لكن..حالة الحب..
بكل أمانة..فعلا بحس بغيرة..وانتم بتكتبوا عنه
أو بقرأ عنه
بقول..بيكتبوا عن ايه
وليه..اشمعنى بيكتبوا عنه؟!
الحالة دي !!
........
بس متفهموهاش غلط
لكن بسأل
هي دي حالة السعادة؟!
الحب..بفراقه..وقصصه..ورومانسيته مثلا
......
ولا الحياة..
فيها حالات تانية..
مش حب الفراق
.......
ولا ايه الوهم اللي بيكتبوا عنه
كلام ملخبط اصلا جداا
....
وبعدين افكر
يعني هي الحالة دي..اكتر حالة تأثر في الانسان لعمره كله بالشكل ده
زي ما بقرأ..أو ألاقي حواليه الأفلام..والقصص والروايات..
.......
أنا آسفة والله
بس متكتبوش مواضيع حب تاني :D
بتضايقني :D
.......
مش تفهموا غلط أرجوكم :)
مجرد تهريج وتفكير :)
بصراحةانا شايفة انه هي صح و كفاية اوي اللي ضاع من وقتها و هي بتستناه يحبها
و من حقها دلوقت تبني حياتها و تعملها
عالم خاص زي ماهو بنى حياته و عمل عالمه
صعب اوي القرار اللي هي خدته بس الاصعب انها تعيش عمرها و هي ظل لحد مش قادر يحسها رغم انه قلبها اكيد هيفضل مفتوح ليه في الوقت اللي فعلا هيحبها
و انا شكلي بعدت ولبخت كتير في الكلام كفاية فلسفة لحد كدة
عزيزي اللورد قباري..زي ما قلت لك هتفهم الحيثيات في الشوط التاني :D
الاء..تسلمي
هي وصلت لمرحلة كان لازم تختار فيها..و حبها له كان بيوجعها..فقررت تبعد
إيمان..ماله الحب؟
مش لازم تكوني مجرباه عشان تكتبي عنه
كل حاجة في حياتنا اساسها كلمة حب
انتي مش بتحبي اهلك؟ مش بتحبي مدينتك؟ مش بتحبي الكمبيوتر بتاعك؟
الحب هو كلمة السر
ريم..مابعدتيش ولا لبختي خالص
كلامك منطقي و سليم
بس يمكن تغيري رأيك لما تقرأى الجزء التاني :)
لا..مانا عارفة ان فيه اكتر من نوع من الحب :)
بس اعذرني
معظم اللي بقراه عن الحب :)
حب...الفراق :)
دي نهاية أي قصة حب..دايما بشوفها في اللي حواليا
وزي دي..
روايات وأفلام و و
كلها عن الحب
ونهاية معظمها
فراق..
يبقى عادي..بس :)
آسفة بقى :)
دي كل قصص الحب..قصة نهايتها فراق
ولو تمت
مش بتكون زي الاول..
سعادة في بدايتها
وبرضه اخرها لو مش فراق
مفيش سعادة دايمة
علشان كدة..
يمكن بقول..إيه قصص الحب دي !؟
مش مشكلة الرد
آسفة :)
وعادي..رأيي غلط.مش مهم والله :)
بس..انا يمكن بستغرب من كل قصص الحب اللي حواليا وبشوفها..أو يمكن مشفتش كتير..سمعت أكتر...وبشوف نهايتها في الواقع بس :)
ده حتى الأفلام والمسلسلات..
المسلسل..ممكن تكون نهايته سعيدة في الحب..بس بعد ايه..ما يقرفوا :D من العيشة وكل الصعوبات :D
والأفلام
زمان نهايات الحب..حاجة كدة..رومانسية قوي..ونقول في الآخر..فيلم عربي
ونضحك عليه دلوقتي
والأفلام الجديدة..كلها أكشن..أو حب كوميدي..
بقيت مش مقتنعة..باللي بقراه..أو بشوفه في التليفزيون..
من كل قصص الحب دي
لأني مقتنعة..انها لو تمت..بتنتهي على فراق..أو مش تستمر بنفس السعادة اللي متصورينها..مش عارفة ليه
ناس بتضطر تعذب نفسها..
أي كلام..حضرتك طنش..آسفة جدا..لأنه أي كلام..أوله وآخره مش زي نصه..آسفة على الاي كلام ده بجد معلهش :)
ايه التشاؤم ده يا إيمان :)
لا الحكاية مش وحشة كده
لو علي المسلسلات و القصص اللي بتتكتب فده لازم لان اي قصة لازم يبقي فيها مشكلة او حدث مهم و الا مش هيبقي في جدوي اننا نتفرج عليهم لو حياتهم ماشية طبيعي
بس قصص الواقع اللي سمعتيها..اكيد سمعتي قصادهم عن قصص حب انتهت بجواز
بس لاحظي ان لو اتنين بيحبوا ببعض و واجهوا مشاكل في فترة ما قبل الجواز ده مش معناه ان الحب قل
بالعكس حبهم هو اللي بيخليهم يكملوا و يعدوها لحد ما يتجوزوا
و طبيعي اي اتنين بيحبوا بعض يتخانقوا..في شيء ما متعلق ما بين حبك لشخص و انك تغضبي منه اسرع مما تغضبي من حد غريب
Post a Comment