أجمد 10 الساعة 12

(1)

قرأت في احد المنتديات تهنئة للشاعر مصطفي كامل بمناسبة فوزه بالميوزك اوورد للمرة التانية
الحكاية ان مصطفي كامل كان كاتب اغنية في البوم "نور العين" بتاع عمرو دياب اللي اخد الجايزة قبل كده
و كتب اغنية في البوم "بتفكر في ايه" بتاع نانسي عجرم اللي اخد الجايزة السنة دي
و بكده يبقي مصطفي كامل اخدها مرتين
او علي الاقل جمهوره شايف كده
صباح الناس اللي بتتلزق في اي حاجة

(2)

واحد صاحبي علامة الصلاة واكله نص قورته..خطب من شهر

بالصدفة دخلت علي بروفايله في الفيس بوك لقيت الباشا بقي

Fan of kisses page

الراجل بقي يحب البوس

!طيب استني يا عم لحد الجواز

(3)

"حامد رجع جامد"
دي فكرة إعلان لمنتج شبيه بالفياجراالإعلان في منتهي السذاجة و الإستفزاز و من صورته و الناس اللي بيعملوه واضح انه موجه لطبقة شعبية
!نهايته اتنين ستات مسخسخين من الضحك..اعتقد ان ده كان حال كل المشاهدين برضه

(4)

قرأت ان في رجل متخصص الف كتاب اسمه "الفيس بوك عدو ام صديق" و استضافوه في برنامج صباح الخير يا مصر كمان

و حسب ما قرأت الراجل قال كلام غريب جدآ نابع من ثقافة نظرية المؤامرة

و الغريب ان كلامه كله طلع غلط و اتضح لي انه فاهم حاجات غلط عن الفيس بوك

امال الف الكتاب ازاى؟ و ياتري قال ايه فيه و هو مش فاهمه؟

اتمني يكون اللي كتب هو اللي مفهمش كلام الراجل لانها تبقي كارثة لو ثبت العكس

(5)

علي سيرة الفيس بوك

في هوجة جديدة ان اي واحد عدي قدام كاميرا يعملوا له جروب

العجيب ان في ناس بيخشوا يشيدوا بالشخصيات دي و موهبتها..و مش واحد ولا اتنين..لا دول كتير

و الاعجب ان الواحد ده يخش يشكر جمهوره..اللي بضغطة واحدة علي صفحة اصدقاءه بتكتشف ان الكل الهيصة دي كان عاملها اصحابه و ناس دخلوا وسط الزيطة

(6)

بما ان كل الفنانين تقريبآ موجودين علي الفيس بوك

محدش يعرف اجيب منين بروفايل ساندي؟

مش عشاني..عشان خاطر أمجد

(7)

الراجل الظريف اللي ابتكر فكرة إعلانات "بيريل..إسترجل" لازم يلتقي بمعجبينه اللي اكيد هيسترجلوا معاه

الكلمة فجة..و الاكيد انه حاول يمشي علي خطي حملات مشروبات قبل كده من عينة

"مونتين ديو..جمد قلبك"

"بيبسي..خليك قدها"

"بيبسي ماكس..عيشها للماكس"

فقعد افتكس و طلع لنا بحملة

"بيريل..إسترجل"

(8)

قرأت في احد المنتديات العربية تعليق من بعض الاعضاء العرب بيقولوا ان العرب هم الوحيدين اللي بيقولوا كلمة حسين اثناء ذكر اسم الرئيس الامريكي الجديد باراك اوباما

قفلت الصفحة و اكملت قراءة مقال في النيويورك تايمز كان بيتكلم عن باراك حسين اوباما رئيسهم الجديد

اكيد كاتب النيويورك تايمز جوز خالته عربي

(9)

لو عرفت من هو رئيس نادي الزمالك في مباراة بتروجيت اللي بعد يومين اتصل بـ09006161

(10)

إحنا في زمن الفتي