(1)
نيفين و مروان بيتكلموا في التليفون
نيفين: كلمتك امبارح و كنستلني
مروان: ما انا عارف
نيفين: ليه؟
مروان: عادى..كنت بتعشا
نيفين: و مارجعتش كلمتني ليه؟
مروان: عشان كنت تعبان و نمت
نيفين ترتبك: ايه؟
نيفين و مروان بيتكلموا في التليفون
نيفين: كلمتك امبارح و كنستلني
مروان: ما انا عارف
نيفين: ليه؟
مروان: عادى..كنت بتعشا
نيفين: و مارجعتش كلمتني ليه؟
مروان: عشان كنت تعبان و نمت
نيفين ترتبك: ايه؟
مروان ببرود: ايه مالك؟ بقولك كنت تعبان
نيفين تدمع: مش قصدي..أ..أ..سلامتك
مروان: و مالك بتقوليها من غير نفس كده؟ علي العموم الله يسلمك..متشكر يا ستي
نيفين: من غير نفس ازاى بس؟
مروان: ما تشوفي طريقتك يا نيفين..علي العموم اقفلي دلوقتي عشان بالبس و نازل..يلا مع السلامة
نيفين: مع السلامة
و تقفل الخط و تكمل: يا حبيبي
(2)
في الجامعة
مروان: صباح الخير
نيفين: صباح النور
مروان: ايه مش في المحاضرة ليه؟
نيفين: اه ما انا طالعه اهو
مروان: احجزي لي مكان جنبك
نيفين: لأ..ريم هتقعد جنبي
مروان: ماشي..عن اذنك
(3)
بعد المحاضرة
نيفين واقفة مع سلمي و علي بيتكلموا و يهزروا
مروان عدي من جنبهم و راح قعد بعيد مع شريف
في الوقت ده نيفين كانت بتسرق نظرات علي مروان اللي كان باين علي وشه الضيق
بعد لحظات شريف قام و عدي جنب نيفين و سلمي و علي
نيفين: شريف..عايزاك ثانية
شريف: نعم يا نيفين؟
نيفين: هو مروان ماله مكشر كده؟
شريف: لا ابدآ..اصل و هو جاى عربيته اتاخدت مخالفة عشان الحزام
نيفين: اها..طيب ميرسي يا شريف
علي: طيب هروح انا اشوف ايه حكاية مخالفة مروان
نيفين: اه..ياريت يا علي
و بعد ما شريف و علي بعدوا عنهم نيفين كملت كلامها مع سلمي
نيفين:شايفة يا سلمي؟ ولا حتي اهتم يعتذر عن اللي عمله معايا امبارح
سلمي: معلش..انتي عارفه ان دماغه غريبة
نيفين: عارفه..بس بحبه بجد..هو مش حاسس خالص؟
سلمي: خلاص اسكتي عشان جاى ناحيتنا اهو
مروان: سلمي..عايزك لحظة لو سمحتي
سلمي تبص لنيفين: طيب يا نيفين..عن اذنك
نيفين واقفة في مكانها مصدومة و حاسة بجرح و دمعة نازلة علي خدها..بيقرب منها علي
علي: معلش..اصله مش فاهم
(4)
نيفين بتكلم سلمي علي التليفون بالليل
سلمي: انا اسفة اوى يا نيفين..هو جه و قالي تعالي
نيفين و هو بتعيط: كنتي اتحججي له بأى حاجة..بس ماكنتيش تحطيني في الموقف
سلمي: انا بصراحة معرفتش اعمل ايه
نيفين : انا عارفه ان ملكيش ذنب ... بس مش بس كلامه معاكى اللى تاعبنى ... كل حاجه بيعملها بتموتنىكلامه الواقف معايا و اهتمامه ببنات تانيه ... حتى اهتمامه و حنيته عليا انا بتموتنى
سلمي:حنيته بتموتك ليه؟
نيفين: لان الحنية دي بتروح في الهوا بعد شوية و بيرجع لطبعه البارد و كلامه الواقف و عدم الإهتمام..بيعذبني لما يبقي حنين عليا..و بيعذبني لما يهملني
سلمي: عندك حق..الوضع ده صعب اوىنيفين: مش قادرة استحمل يا سلمي..تعبت اوى..انا مش فاهمه ازاى بقيت بحبه كده؟
سلمي: بس انتي كنتي بتهزري و تضحكي معانا انا و علي عادى..ايه اللي خلاكي تعيطي اول ما مشينا؟
نيفين: مش اي ضحكة علي الوش تبقي سعادة..ساعات اكبر ضحكة بتخفي اكبر الم..
و تبدآ نيفين في بكاء هستيري
سلمي: حاولي تهدي يا نيفين..كده مش هتعرفي تفكري
نيفين: مش قادرة..هموت يا سلمي
سلمي: انتي بتحبيه اوى كده؟
نيفين: بحبه ... بحبه دى كلمه بسيطه اوى على اللى انا حاسه بيه .. انتى ممكن تحبى حد و تتمنى تبقي معاه ... او تحبى حد و تزعلى منه وتسامحيه... او حتى تحبى حد لدرجه انك متقدريش تعيشي من غيرهبس مكنتش اعرف انك ممكن تحبى حد لدرجه ان مهما عمل فيكى مبيهمكيش نفسك مش بيهمك اللى بيجرالك ... بتسامحيه قبل ما تزعلى .... قلبك فيه حب و مغفره لاى غلطه مهما كانبس من كتر الحب ده ... اى غلطه تانيه هتبقي بموت
سلمي: و ايه اللي جابرك علي كده..لازم تقفي لحد هنا
نيفين: قلبي مش هيستحملها... لو حصلت قلبى هيقف ... هيبطل بس يدق قبل ما يفكر يبطل يحبه
لازم ابعد...مش عشان زعلانه من تصرفاته ولا عشان بس مننفعش لبعض
بس عشان كل حاجه تخصه بتاثر فيا اوى اوى ... بتهز كيانى كله
حبه ملكنى و ملك كيانى.. و حبه فيه هلاكى.. و هو مش حاسس
من غير ما ياخد باله هيكسرنى ... و لو حصلت هموت
سلمي: و هتعملي ايه؟ انتي اهو منهارة..و هو مش حاسس
نيفين: الحب مش بإختياري..بس الإرتباط ده إختياري..انا هبعد و مش هربط نفسي تاني بمروان..مفيش غير البعد ينسيني يا سلمي
شريف و علي بيتكلموا في التليفون
شريف: مروان ده عبيط..100 مرة فهمته يبطل حركات العيال دي
علي: نفسي مرة اشوفه بيتصرف بعقل مع نيفين..البنت واضح و كل الناس ملاحظين انها بتحبه
شريف: و هو مش بعيد يكون فاهم بس بيستهبل
علي: حرام عليه بجد البنت دي خسارة فيه
شريف: مروان ده عايز بنت بتاعة حوارات تطلع عينه عشان يعرف قيمة نيفين
علي: طيب ما تتكلم معاه في الموضوع
شريف: لا طبعا و اوعي انت تفكر تعملها..حاجة زي دي ممكن تجرح نيفين اوى
علي: عندك حق..بلاش نحطها في موقف زي ده
جميع الحقوق محفوظة لشركة سلتو للإنتاج الفني
بالإشتراك مع
NaNoZ Productions
© 2010
© 2010
4 comments:
مروان ونيفين قصة حقيقية لإثنين اعرفهم مع فرق بسيط ان مروان ونيفين المفروض انهم بيحبوا بعض اوووي ليهم حوالي كذا سنة مرتبطين بعلاقة حب مع بعض ..
بس مروان بيعشق حاجه اسمها بنات عطشان بنات طول الوقت وفي المقابل بيقول لنيفين انه بيحبها هي !!
هي مغفلة لأنها دايما بتصدقه وتسامحه عشان كده بتاخد على دماغها كتير اوووي منه ..
مروان انسان عايز وقته يبقى مليان بنات طول الوقت وحده الظهر ووحده المغرب ووحده بعد نص الليل وهكذا .. وفوق ده كله مش عايز يخسر نيفين وبيقول انه بيحبها اوووي
نيفين تعبت اوووي منه وبعدت عنه لأنها حست انه مافيش امل يتغير.. غلطه بيتكرر بإستمرار .. إحساسها ان مالهاش اي قيمة عنده دمرها بجد لأنها عملت عشانه حاجات كتير للأسف انه بتصرفاته دي اثبت انه ماقدرهاش!!
تفتكر ده حب بجد والإنسان ده بيحبها فعلا بس هو لعبي بطبعه؟
ولا هو مجرد اتعود على وجودها في حياته بالتالي حاسس انه مش قادر يبعد عنها ؟
يا الله...
ودتني لـ/ عالم تاني يا محمد..
بجد القصة أثرت فيا..
وكنت أنتظر النهاآآية :)
هل معقولة الانسان دايما ..
بيحب اللي يطلع عينه على بال ما يوصله ؟؟؟
اول ما قريت الحوار دا او الفيلم اللي بيتكرر كتير في حياتنا :)
افتكرت فيلم السلم والتعبان
تقريبآ مروان هنا قريب من شخصية حازم في الفيلم
عجبتني اوي جملة نيفين عشان حقيقة اوي اللي هي ..
مش اي ضحكة علي الوش تبقي سعادة..ساعات اكبر ضحكة بتخفي اكبر الم
شخصية مروان انا بعتبرها من الشخصيات اللي يشفق عليها !
عشان هو نفسه مبيبقاش عارف اللي جواه ايه؟.. زي التايه ما بين حب حقيقي ويستاهل يعيش ويكمل عمره معاه وخوفه وندمه انه يخسر الحب دا في لحظة!
وبين قلقه وحيرته وتشتيته في انه يعيش حياة عادية مفيهاش تجديد سخيفه , انطلاقه واحساسه انه يبقى حر في محيطها محدود !
والنوع اللي زي دا اشفاقي عليه هو انه في لحظة بيفد فيها حب عمره ما هيعوضه لانه وقتها بيبقى مغيب تمامآ
بيبقى عاجبه حاله على كدا
وللأسف مبيفوقش الا لما كل حاجه ابتداها هو انتهت على ايديه هو برده !!
سـاره ، الاء ، مروة
اشكركم علي ارائكم
القصة احداثها تدور من كل الجوانب ما عدا جانب مروان
سعيد انني قدرت اخليكم تتخيلوا مروان حسب ما تحسوا القصة بنهايتها المفتوحة
:)
Post a Comment