المشهد الاول
هي: سمعت اغنية "بعدك عني انتحار" يا برعي؟
هو: لا..ايه دي؟
هي: اغنية كويسة بتاعة واحدة اسمها لميا
هو: اه..طيب
هي: طيب يعني هتسمعها ولا طيب ايه؟
هو: هشوف..هبقي انزلها..بس مابحبش انا الناس الجداد دول
هي: بس انا عايزاك تسمع الاغنية دي
هو: ليه يعني؟
هي: مش عارفة..اول ما سمعتها افتكرتك
هو: يا ساتر..افتكرتيني بسيرة الانتحار
هي: انت علي طول كده بتقف لي علي الكلمة..اسمعها لو حبيت
هو: طيب
المشهد التاني
هي: سمعت اغنية "كدبت عيني" بتاعة سوار؟
هو: مش دي البنت اللي لابسة اخضر في الكليب؟
هي: ايوه هي دي
هو: اه البنت دي زي القمر
هي: مش حلوة..بس الاغنية جميلة
هو: فعلا..الاتنين حلوين..هي و الاغنية و الكليب كمان
هي: اكتر جملة معلمة معايا..انا زي ما انا و انت بتتغير
هو: اه فعلا..الجملة دي عاجباني اوى
هي: بجد؟ طيب كويس..ابقي اسمع الاغنية بقي
المشهد التالت
هي: انا بعت لك ايميل علي فكرة
هو: ما فتحتش الكمبيوتر بقي لي يومين
هي: طيب ممكن تبقي تشوف إيميلي؟
هو: أكيد يعني لما اقعد هشوف كل الإيميلات
هي: طيب
هو: طيب ايه؟ في حاجة؟
هي: لأ
هو: طيب الإيميل فيه؟
هي: أغنية
هو: اغنية ايه دي؟
هي: اغنية حماقي الجديدة
هو: دي غير بحبك كل يوم اكتر؟
هي: لا هي دي..جامدة اوى..سمعتها؟
هو: ايوه طبعآ..كويس انك قلتي لي..كنت متلهف اشوف الايميل
هي: بس برضه نزلها
هو: ماهي عندي..انزلها ليه؟
هي: النسخة اللي باعتهالك صوتها نضيف
هو: طيب..لما ارجع البيت انزلها و اقولك رأيي في كواليتي الصوت
هي: لا مش مهم رأيك..انا واثقة انها هتبقي احلي نسخة تلاقيها للأغنية
بعد ما روح البيت و نزل الاغنية
هو لنفسه: الصوت زي النسخة اللي عندي..ايه ده..دي حاطة اسمها في خانة المغني
"بحبك كل يوم اكتر - سوسن المليجي"
تكونش بتحاول تلمح لي انها بتحبني؟
لالا..تحب مين بس؟ دي اعقل من كده..تلاقيها بتستخف دمها بس
جميع الحقوق محفوظة لشركة سلتو للإنتاج الفني
© 2008
© 2008
2 comments:
اول مرة اسمع عن اي حد عارف اغنية انا زي مانا وانت بتتغير :)
انا سمعت الاغنية دي اول مرة من 6 سنين ع العود من الملحن بتاعها قبل ما يديها لاي حد يغنيها
مش قادرة اقولك الاغنية الاصلية بصوت الملحن حلوة قد ايه ما سلطان
الاغنية اتشوهت بالبتاعة اللي بتغنيها دي
والتوزيع وحش الاغنية جدا جدا جدا
انا من كتر الاغنية ماهي عاجباني بقعد اغنيها بس بنفس الاسلوب اللي سمعتها بيه واللي مختلف جدا عن اللي نزل
بالنوسبة بقى للموضوع ..ابقى اسمع الاغاني اللي البنت بتبعتهالك يا سولتو وبطل غلاسة بقى :)
دايمآ الملحن بيبقي احسن واحد يغني اغانيه..غالبآ لانه بيبقي حاسسها
في حين ان المطربة بتبقي واخدها اكل عيش
بالنسبة لموضوع انني اسمع الاغاني..انا بريء من هذا الاتهام..انا مش هو :D
Post a Comment