هي اللي كانت الشمس ماتطلعش قبل ما تفتح شباكها
هي النسمة اللي بتصحي الورود في الجناين مع اول زقزقة للعصافير
هي سندوتش الفول من عربية عم علي اللي بيفطر سيد افندي موظف الارشيف في هيئة الإستعلامات
هي كاوتش اتوبيس 74 اللي بيوصل عم جرجس لدكانته في السيدة
هي الجزمة الجديدة اللي بتفرح علياء ليلة دخولها المدرسة
هي ضحكة عالية من ام مجدي علي مشهد للكسار
هي شراب صوف بيدفي رجلين جدتي البردانة في عز الصيف
هي فانلة حمادة ابن الجيران اللي بيقف بها طول النهار في البلكونة لعل و عسي يلفت نظر واحدة من بنات الجيران
هي شنطة سحر اللي شايلة البوم منير الجديد بكل فرحة و هي رايحة تقابل وليد في جنينة الاسماك
هي موتوسيكل سمير اللي بيوصل به الفطير لزباينه الطيبين
هي إبتسامة عم أيوب و هو بيوزع اللبن علي سكان حارته البسطاء
هي مج النيسكافيه في ايدين رانيا الرقيقة و هي لسه صاحية من النوم
هي بيجامة علاء اللي لسه متنشرة علي الحبل في يوم تلات مشرق
هي ولعة الشيشة اللي قدام ابو حسام علي القهوة
هي وشوشة سعاد لصاحبتها في حصة جغرافيا
هي فرحة أشرف لما عملها لاول مرة في القصرية
هي صاجات لولا اللي بتشخلل بها في الكباريه
هي مرجيحة في مولد مليان زحمة عيال
هي محفظة سامي الدفيانة اول الشهر
هي جيبة مزة في شارع جامعة الدول الساعة 12 بالليل
هي كوتشي بينور لابسه بيسو في المنشية
هي رقصة عبير في اوضتها علي اغنية لشيرين
هي إبتسامة مخلوطة ويا دمعة فراق علي رصيف 8 في محطة مصر
هي جنوط عربية كريم اللي لسه جاية من الصيانة
هي بوسة علي جبين حبيبتك في ليلة ماطلعلهاش قمر
هي اللي و اللي
اللي حبها في قلبك تمللي
.... هذا البوست إهداء الي الصديق المبدع المدعي
جميع الحقوق محفوظة لشركة سلتو للإنتاج الفني - بإستثناء اول سطر
© 2008
9 comments:
والله انت ماحصلتش :)
كل سنة وانت طيب يا سلطان
عيد سعيد عليك يارب
و انتي طيبة و بصحة و سلامة يا فاطمة :)
عروستى :D
عيب عليك..يا تعرفه يا ماتعرفوش :D
ليه هي مصدر سعادة :D
>>>>>>هي إبتسامة مخلوطة ويا دمعة فراق علي رصيف 8 في محطة مصر
ودمعة وقت اللزوم ولا ايه :D
>>>>>>>>هي جنوط عربية كريم اللي لسه جاية من الصيانة
ويعني ايه..جنوط؟
الجنوط حسب قاموس فورد: جزء ما من إطارات السيارة :)
هو فيه قاموس اسمه قاموس فورد !
آسفة اني مش عارفة كل الحاجات دي :)
معلهش لدخولي كل مرة :)
هي اللي كانت الشمس ماتطلعش قبل ما تفتح شباكها
هي النسمة اللي بتصحي الورود في الجناين مع اول زقزقة للعصافير
هي إبتسامة مخلوطة ويا دمعة فراق علي رصيف 8 في محطة مصر
هي مج النيسكافيه في ايدين رانيا الرقيقة و هي لسه صاحية من النوم
هي وشوشة سعاد لصاحبتها في حصة جغرافيا
معانى جميلة أوى, أكبر من أى كلام ممكن يتقال عليها :)
شكلى كده هاجى عندكوا كتير :D
شكرآ يا رقية
هو بوست فزلكه خلطت فيه شوية تعبيرات بجد مع شوية تعبيرات تريقة بغرض القلش :D
ياريت تفضلي منورانا علي طول
Post a Comment