عمر: يا عم انا مش فاهم البنات دول..ساعات بيبقي عليهم حوارات غريبة
شادى:انت هتقولي علي حوارات البنات..بس زي ايه يعني؟
عمر: امبارح نيفين نشفت راسها لازم اقولها انا ليه بحبها عشان هاني خطيب لبني صاحبتها عمل كده
شادى: ايه الجنان ده؟ هاني قال لنيفين انه بيحبها و قال لها اسباب كمان؟
عمر: يا ذكييي..هاني قال لـ لبني هو بيحبها ليه..فلما نيفين عرفت من لبني صممت انا كمان اقولها بحبها ليه
شادى: ايه الوقعة دي..و اتصرفت ازاى؟
عمر: قلت لها معرفش و معنديش اجابة..قامت اتقمصت و فضلت مكشرة طول ما احنا قاعدين
شادى: طيب ما كنت تمشي امورك و تقولها اي حاجة
عمر: لأ..انا عايز لما اعبرلها عن مشاعري كل كلمة تكون صادقة و طالعة من قلبي
شادى: يا عم الرومانسي..طيب ما هي المفروض تقدر ده
عمر: ولا بيفرق معاها..عايزة تسمع اجابة السؤال
شادى: و هو انت بتحبها ليه صحيح؟
عمر: ما انا لو كنت عارف الاجابة كنت قلت لها..كل اللي اعرفه انني بحبها و مقدرش استغني عنها في حياتي
شادى: طيب ماجربتش تسألها هي بتحبك ليه؟
عمر: ابقي كداب لو قلت لك انني مش عايز اعرف..انا عايز اعرف طبعآ هي بتحبني ليه..بس خفت اسألها تقوم مجاوبة السؤال و ده يصعب عليا الموقف اكتر
شادي: الحقيقة موقف لا تحسد عليه..عندك حق تقول ان البنات عليهم حوارات غريبة
عمر: قمة الغرابة بجد..تبقي مظبط كل حاجة في الخروجة و فجأة تبوظ الخروجة عشان اجابة سؤال
شادى: ماهو مش سؤال عادى
عمر: ولا نيفين بنت عادية..شوف احنا بنحب بعض بقي لنا قد ايه..بس كل يوم بكتشف فيها حاجات تحببني فيها اكتر..حكاية السؤال دي غريبة بجد
شادى: هو ادهم صبري قالها زمان..ياللنساء
عمر: شوف هم ساعات بيكون عليهم حوارات تجن..بس دايما بيبقوا احلي حاجة في حياتنا
شادى و هو بيبص علي بنت قاعدة لوحدها علي الترابيزة اللي جنبه: اه هم حلوين و بس؟ دول حلوين و جامدين جدآ
عمر يبتسم و هو ينظر الي صورته مع نيفين في خلفيه موبايله: مش كده برضه؟
جميع الحقوق محفوظة لشركة سلتو للإنتاج الفني
© 2008
2 comments:
تصدق عمري ما فكرت اسأل سؤال شبه دا ابدا
الظاهر دي ثقة زيادة في النفس على اساس انه شيئ بديهي اني اتحب ومش محتاجة اعرف اسباب
ههههههههههههههههههههههههههههههه
ضحكتني على نفسي اوي يا سلتو :)
كويس انك مافكرتيش تسألي السؤال ده:D
ده اكتر سؤال الراجل مايحبش يسمعه..تلخيص اسباب حبك لشخص بتعني ان الحب ده قابل لانه يروح لو راحت الاسباب
ده حتي كان في ايميل منتشر فيه نفس الفكرة بتاع الراجل اللي مراته ولعت :D
Post a Comment