هو: امبارح خدت كل اصحابي و طلعنا العجمي
هي: اه..و اتبسطت؟
هو: اه كان يوم لذيذ..الاول روحنا للميكانيكي صلحت العربية بعدين طلعنا علي العجمي و رجعنا الفجر
هي: طيب كويس
هو في إرتباك: اه
هي: ايه مالك؟
هو: أصلي قابلت نهي بالصدفة و انا
هي مقاطعة: و انت ايه؟ ايه اللي حصل بالظبط؟ قابلتها امتى و فين و قلتوا ايه؟
هو: طب بالراحة يعني..انا مش فاهم ليه بتضايقي لما اقولك انني قابلت نهي
هي: انت عارف انها كانت دايما و احنا في الجامعة حاطة عينها عليك و حاولت ياما توقع بيننا..و دلوقتي انت متوتر و انت بتقولي انك قابلتها امبارح..يبقي حصل بينكم حاجة..احكيلي احسنلك
هو: ما هو انتي اسمعيني و هتعرفي ايه اللي موترني في الموضوع
هي: ها..احكي يلا
هو: انا قابلت نهي في السوبر ماركت..كنت داخل اجيب بيبسي و لقيتها جوه بتجيب حاجات
هي: و طبعآ انت لما صدقت و وقفت اتكلمت معاها
هو بضيق: اسكتي و اسمعي
هي: اوكي..سامعاك
هو: هي اللي لمحتني و نادتني..وقفنا اتكلمنا شوية فعلا..و سألتني عنك..بعدين رحنا نحاسب علي الحاجات اللي جبناها
هي: و طبعآ انت صممت تدفع لها
هو: لا يا هانم..هي اللي صممت تدفعلي و قالت لي مش علي تمن البيبسي
هي: و طبعآ انت لما صدقت انها تعزمك عشان تبقي عزومة لازم تترد في حاجة كبيرة
هو:لو عايزاني اكمل يستحسن ماتفتحيش بقك تاني لحد ما اخلص
هي: خلاص هسكت..كمل
هو: انا رفضت العزومة و خرجنا سوا
هي: خرجتوا؟ رحتوا فين؟
هو: ماتبطلي شكوكك دي..قصدي خرجنا من السوبر ماركت
هي:اه قلت لي.. و طبعآ عرضت عليها توصلها ما انت جنتل مان
هو بضيق: يوووه..ماتسمعي و انتي ساكتة.. لا..كان معاها عربية
هي: و دي جابت عربية امتى؟
هو بإبتسامة خفيفة: لا مش عربيتها..كان في حد مستنيها في عربية
هي: اه قلت لي
هو: يا سلام؟ يعني الحشرية و الزن بتوعك وقفوا هنا؟ مش عايزة تعرفي مين كان مستنيها؟
هي: لا عادى..هي حرة في حياتها
هو بسخرية: لا واضح
هي بشك: في ايه انت بتضحك ليه؟
هو مصطنعآ البراءة: لا ابدآ
هي: بعدين تعالي هنا..لما الحكاية كده..كنت مرتبك ليه و انت بتحاول تحكي لي في الاول؟
هو بعد ما اصبح غير قادر علي كتمان الضحك: اصل..اللي كان مستنيها في العربية يبقي حسام اخوكي
هي بصدمة: ميييييين؟
هو: ايوه و يوم الجمعة الجاى اخوكي الكبير هياخد باباكي و مامتك و يروحوا يخطبوا نهي..نياهاها
جميع الحقوق محفوظة لشركة سلتو للإنتاج الفني
© 2008
3 comments:
ههههههههههههههههههههههههههه
من الدخلة افتكرت القصة هتبقى حاجة تانية
حلوة
جامدة قوي ياسولتو :D
أسف ع التأخير في الرد
فاطمة و هبة: متشكر ربنا يخليكم و تفضلوا دايما منوريني بردودكم :D
Post a Comment