الحب الذي غرق - الجزء الاول

هو: انتي كلمتي هشام امبارح؟
هي: ايوه..ليه؟
هو: مش انا طلبت منك ماتكلميش البني ادم ده؟
هي: انت خطيبي اه..بس كلمتك ماتمشيش عليا
هو: نعم؟؟ ايه اللي بتقوليه ده؟
هي: اللي سمعته..لما ابقي مراتك و في بيتك تبقي وقتها تناقشني في علاقاتي مع الناس
هو: انتي اكيد بتهزري
هي: لا مابهزرش..انت مش سي السيد ولا انا عمري هكون امينة
هو: علشان بمنعك تكلمي ولد انا نفسي مقاطعه ابقي بتحكم فيكي و سي السيد؟
هي: انت حر تقاطع اللي يعجبك..انا مش هقاطع حد..و طول ما انا في بيت اهلي محدش غير ابويا يمشي كلمته عليا

هو: انتي بتبوظي كل حاجة كده

هي: ده اللي عندي

هو: انا بحبك و باقي عليكي..بلاش تركبي دماغك و تبوظي كل حاجة

هي: مابركبش دماغي

هو: انتي فاهمة انتي بتعملي ايه؟ لو الحكاية هتمشي كده.. يبقي احنا مش هننفع لبعض

هي: فعلا..انا كمان شايفة كده

هو: اخزي الشيطان و اسكتي دلوقتي..ماتضيعيش سنين في لحظة

هي: اظن قلت لك ماتعملش سي السيد عليا..ماتقوليش اسكتي

هو: لاااا..كده خلصت فعلا..انتي دماغك جرالها حاجة اكيد

هي: دي دماغي بقي

هو: خلاص..انا اسف بجد..بس انسي ان بيننا خطوبة و كل واحد يروح لطريق

هي: من غير ماتقول..انا طلعت الموضوع ده من دماغي بالفعل

..يتبع

جميع الحقوق محفوظة لشركة سلتو للإنتاج الفني
© 2008