قهوة ساده في فرح العالمي

الاسبوع اللي فات مريت بحالة نشاط فنى زائدة

و كنت محظوظ انني في 3 ايام متتاليين اشوف 3 عروض فنية رائعة

السبت

فيلم الفرح

نزلته من ع النت
الصوت ممتاز و الصورة مش وحشة
القصة تدور في حي عشوائي بجد -مش من بتوع خالد يوسف- عن مجموعة ابطال مطحونين
الابطال دول كلهم بيجمعهم شيء واحد..الفرح

خالد الصاوى بيخترع فرح وهمي لاخته الوهمية بهدف انه يلم النقطة و بفلوسها يشتري الميكروباص اللي بيحلم به
و الافراح دي معروفة باسم "الجمعية" نسبة للجمعيات اللي الناس بيعملوها و كل شهر شخص يقبضها
اللي بينظم الجمعية دي متعهد افراح و كل شهر واحد بيعمل فرح و يلم فلوس
و العريس و العروسة بيكونوا متأجرين

الشخصيات اللي جوه الفرح ورا كل واحد منهم قصة..و بيحصل اثناء الفرح ان ام صاحب الفرح اللي قاعدة في البيت بتتعب..فمراته بتروح له و تاخده علي البيت و يروحوا يلاقوها ماتت
فبيطلب ان الفرح يقف و بيجتمع في بيته مع متعهد الفرح..و النباطشي اللي بيحيي الفرح و العريس و بيقرروا انهم يخبوا الخبر و الفرح يكمل عشان يلم فلوسه
و بيرجعوا للفرح و يكملوه فبتحصل احداث و صدمات كتير متصاعدة و متتالية
لحد ما يخلص الفرح
و ينتهي الفيلم بمشاهد بتعرض النهاية اللي كان ممكن تحصل لو البطل رفض يكمل الفرح بعد موت امه

الفيلم قالب احداثه متشابه بشدة مع كباريه و ان اختلفت التفاصيل
و في المجمل هو فيلم مختلف و ممتع


الأحد
فيلم العالمي

كان في دماغي افلام اجنبي كتير شفتها عن الكورة بما فيها فيلم "جول" اللي مؤلف الفيلم صرح انه تأثر به فقرر يكتب فيلم مصري مشابه بس بملامح انسانية اكتر
و الحقيقة الراجل ماكدبش

الفيلم بيحكي قصة صعود لاعب كرة قدم بس بمنظور انساني و بنشوف حياته الشخصية من ايام الطفولة
لحد ما وصل لانه يبقي لاعب عالمي بيوصل بمصر لكاس العالم

الفكرة نفسها جديدة.."انسنة" البطل..و دي حاجة احنا مش متعودين عليها
البطل شخص غير مثالي نشأ في مناخ غير مثالي
طريقة السرد و المزج بين الواقع و الفلاش باك كانت ممتعة
حياته كلاعب اتعملت بطريقة حلوة و كعادة اللاعب المصري..حياته ماشية بالعواطف و الحظ
و زي اى لاعب كرة بيلاقي حواليه معجبات و شهرة...بيصاحب ابراهيم سعيد و يسهر معاه ليلة معسكر المنتخب
قصة صعوده كلاعب كرة قدم متاخدة من قصص مهاجمين منتخب مصر
حتة من محمد زيدان علي حتة من ابوتريكة علي حتة من ميدو علي حتة من عماد متعب علي حتة من عمرو زكى
تم تغليف ده كله بظهور عدد مهول من الشخصيات الكروية المحلية و العالمية
مع واقعية شديدة في الاحداث خلت في مصداقية للفيلم

قبل الفيلم كنت متخوف ان اداء الممثلين يفسد الفيلم..بس احمد مدحت قدر يختار ممثلين صح و يتحكم في اداءهم
خالد حماد كان في منتهي التألق في الموسيقي التصويرية و من اول ثانية في تتر البداية قدر يشدني

ياسين كامل نجح في انه يكتب فيلم تراجيدي مبهج و اهم حاجة انه مفيهوش ابطال مثاليين
بإختصار..انا معجب بالتجربة اللي في الفيلم ده

و دي تالت تجربة مختلفة علي السينما بيقدمها محمد حفظي في سنتين

الإتنين
قهوة سادة..مكتبة الاسكندرية

المسرحية كانت بتعرض ليلتين بس في الاسكندرية
قريت عنها كتير جدآ و كان عندي حماس انني اشوفها
العرض مدته ساعة و نص..و كانوا ساعة و نص من الابداع و الابهار المتواصلين
و كمية تصفيق و ضحك عالية جدآ

المسرحية بتتكلم عن السلبيات اللي بقت موجودة في حياتنا..و قبل كل مشهد بيظهر الابطال قاعدين يشربوا قهوة سادة كإنهم في عزاء

و كإنهم بيشربوا قهوة سادة علي السلبية اللي هيناقشوها في المشهد اللى جاى

المسرحية مفيهاش حاجة وحشة
الموسيقي التصويرية و الإعداد الموسيقي رائعين
الإضاءة و استخدامها في العرض ممتاز
الممثلين موهوبين جدآ
و خالد جلال كتب و اخرج عرض مسرحي عبقري..و كفاية ان الابطال كان بيبقي قدامهم 30 ثانية في الظلام قبل كل مشهد يحضروا نفسهم

قهوة سادة حالية فنية تخلي الواحد بعد العرض له نفس يشرب شربات فرح رجوع العروض المسرحية المحترمة

ملحوظة: يوم الاربعاء شفت فيلم 1000 مبروك

بس اظن ان الكتابة عن فيلم لاحمد حلمي بقي مفيهاش شيء جديد ممكن يتقال

كالعادة...أحلي أفلام الصيف

يابن اللذينه يا محظوظ

(1)

اول حب في حياته..كانت حبيبه صاحبه السابقة بتحاول تغيظ صاحبه

و لما صاحبه نفض لها و ما اهتمش بالموضوع..راحت صارحت صاحبه يوم الفالانتاين انها بتحبه هو..فنفض لها

سابت صاحبه و راحت تقابله عشان يحتفلوا بالفالانتاين

(2)

إحساسه بإنه أصغر واحد في المكتب خلي عنده إحساس إنه لازم يثبت نفسه لمديرته المفترية

فقرر مع أول صدام يقول لها لو مش عاجبك شغلي انا كاتب إستقالتي

و كان ردها و أنا قبلتها و اخدت منه الورقة و غابت 5 دقايق بعد ما اعتمدتها من رئيس مجلس الإدارة

(3)

مستني ميعاد مع حبيبته القديمة من 3 سنين

هي إدتله الميعاد و لسه ماجاتش..و هو لسه مستني

(4)

أول يوم إستلم فيه عربيته الجديدة قرر يروح بها مشوار بعيد عن بيته بـ300 متر

عمل في الـ300 متر دول حادثتين

(5)

يوم لما لقي أخيرآ فتاة أحلامه اللي تنسيه حبيبته القديمة جتله فرصة عمره بالسفر للخارج عشان يعمل رسالة الماجيستير

و بما ان ايامه في بلده بقت معدودة..قرر يصارح البنت بمشاعره

قعد يتصل بها يومين و ماتردش

و هو في المطار إتصلت هي به و قعدت تعتذر له نص ساعة كاملة بسبب عدم قدرتها علي الرد علي مكالماته بسبب ظروف حصلت لها

و رغم رومانسيتهم في المكالمة مقدرش يكمل الكلام و يبوح لها بمشاعره..اصلهم نادوا علي طيارته

فيلم 45 يوم

الفيلم رائع..اول مرة اشوف فيلم مصري بيقدم تراجيدي بجد

سيناريو محمد حفظي شديد التماسك و الحوار كان فيه جمل بتلخص حاجات كتير.. و احمد يسري سيطر علي الفيلم ببراعة في اول اعماله السنيمائية

جلال الذكي قدم مع احمد يسرى صورة جديدة و جميلة

عمرو اسماعيل..فقدم جمل موسيقية قليلة تكررت كتير..بس كانت حلوة و مهمة للفيلم..احسن من انه كان ينوع الجمل الموسيقية طول الفيلم

الإنتاج ماكنش فيه اي بخل..و ان كان ميعاد العرض و قلة دور العرض المتوفرة للفيلم هيضروه بالتأكيد

التمثيل.. عزت ابو عوف لعب دوره ببراعة شديدة .. لازم تكرهه .. مفيش حد يقدر يلعب الدور بنفس براعته

أحمد الفيشاوى..نضج تمثيليآ..بيقدم تاني افلامه كبطل بعد الحاسة السابعة..و 45 يوم فيه خطوة كبيرة للأمام..مش شايفه اقل من اي واحد من نجوم الصف الاول.. بالعكس انا شايفه احسن من بعض ممثلين الصف الاول..لانه بيعتمد علي موهبته مش علي شكلة ولا الهرتلة اللي بقت متواجدة في بعض الافلام مؤخرآ

غادة عبدالرازق..نضجت حتي الاستواء..طول ما هي بعيدة عن البطولة المطلقة هتبقي متألقة اوى

هشام سليم..اضاف لنفسه دور في فيلم مهم..كان له فيلم خاص جوه الفيلم..اجاد فيه كعادته في ادواره الاخيرة

ماريانا..نسيت انها لبنانية طول الفيلم

لانا سعيد..مشاهدها مع احمد الفيشاوى كانت مهمة جدآ..دورها اضاف للفيلم و لها

الممثل اللي لعب دور كريم..لازمه تدريب كتير اوى و الممثلة اللي لعبت دور زوجة هشام سليم..ممثلة جامدة جدآ لازمها ادوار اكبر.. صلاح سرحان..حسيت انه مثل عشان هو كاتب القصة مش اكتر

تقييمي للفيلم: 9.5/10...الـ0.5 دي عشان الحتة بتاعة 2006 اللي كانت في خلفية المدرسة

الأغنية الدعائية للفيلم بصوت محمد عدوية...اكثر من ممتازة

أخيرآ..45 يوم فيلم من الأفلام القليلة اللي بتتعمل صح..اتمني ان الفيلم يحقق إيرادات تدل علي مدي نجاح صناعه في عمله

http://www.45daysmovie.com/