قالوا هذا الاسبوع

(1)

لن أعتزل الخماسي الحديث بسبب دقيقتين بالمايوه.سأتدرب بالحجاب وسأصعد به إلي منصات التتويج

اية مدني بطلة العالم في الخماسي الحديث هتتدرب بالحجاب و هتقلعه في المباريات عشان تلعب بالمايوه
و ده بعد قرار الاتحاد الدولي للخماسي بفرض المايوه كزي إجباري للعبة


(2)

أحببت الملذات فى لبنان وأدمنت حبوب الهلوسة

نور الشريف يتحدث عن احباط فترة الشباب


(3)

عطل فنى وراء عدم إذاعة حلقة "الطبعة الأولى" اليوم

احمد المسلماني معمول له عمل


(4)

الأمر قرب بنسبة 90 %، فأنا طلقتها فى لحظة جنون ندمان عليها وهنتصلح قريب وحتى واحنا منفصلين كانت بوسى أقرب الناس لى وواقفة جنبى فى كل الأزمات


نور الشريف يعترف لعمرو الليثي بقرب رجوعه لبوسي


(5)

أثناء تسجيلى الحوار مع عمرو الليثى سألنى عن احتمالية عودتى لزوجتى بوسى خلال الفترة المقبلة، فقلت له أتمنى أن يحدث ذلك، ولكن ليس هناك شىء رسمى يمكن الإعلان عنه حالياً

نور الشريف يواصل استغلال الخبر لاثارة جدل مضاد لجدل قضيته ضد جريدة البلاغ



(6)

لا أعلم أي شيء عن هذا الخبر الذي تم التنويه عنه في أحد البرامج التليفزيونية، ونور هو المسئول عن هذا الكلام


بوسي دخلت علي الخط عشان الموضوع يكبر
و ايا كانت النتيجة النهائية..بيلعبوها بذكاء


(7)

البطولة المطلقة لم تغيرنى

احمد شاكر عبد اللطيف عمل بطولة مطلقة؟؟

(8)

فالمعلومات الحقيقية التى تضمنتها قصة المسلسل لا تتعدى %20

إضافة إلى أن الملفات السرية ذاخرة بعمليات أكبر وأكثر خطورة من تلك العملية، وهذا لا يعد تقليل من شأنها بل هى كذلك بالفعل

الخبير الامني اللواء سامح سيف اليزل بيتكلم عن مسلسل حرب الجواسيس
بصراحة كلامه خلاني احس بنشوة و فخر انني مصري
ده احنا معلمين عليهم جامد

(9)

اقتطعت أجزاء من كل أغنية وقامت بتركيبهما كأغنية واحدة، ولم تعط لكاتبي وملحني الاغنيتين حقهما في تتر الأغنية، فجاء التيتر سريع وباللغة الإنجليزية

مصطفي كامل بيهاجم كليب هيفاء وهبي الجديد اللي فيه اغنيتين..اغنية بابا فين من كلماته و اغنية لما الشمس تروح من كلمات بهاء الدين محمد
مصطفي كامل اشتكي هيفاء في النقابة و هيرفع قضية
طبيعي واحد بيشتكي ان اسمه اتكتب بالانجليزي في التتر مايفهمش ان دول اغنيتين منفصلتين مش اغنية واحدة زي ما قال

(10)

يبدو أن ساندي دخلت بهذا الكليب منطقة جديدة بعيدة عنها تماما، قد تضعها في تصنيف مطربات العري كليب، بعد أن اختارت الظهور شبه عارية في عدد كبير من مشاهد الكليب


المتحدث الاعلامي باسم المغنية ساندى في تصريح عجيب للدعاية لها بعد الخبر بتاع رفض ميلودى عرض الكليب قبل تعديله لاحتوائه علي مشاهد خادشة كتير
الخبر كان مصحوب بصورتين من كواليس الكليب
يلا..الشتا دخل و بقينا في موسم حفلات الاثرياء..فرصتك يا ساندى

قالوا هذا الاسبوع

(1)

لا توجد أى ضغوط خارجية على إدارة القناة، وأى تدخل يكون من صاحب القناة د. أحمد بهجت، الذى يلاحظ خروج بعض الإعلاميين ومقدمى البرامج على الحياد والموضوعية فيكون تدخله بالمنع حتى يتم ضبط الإيقاع مرة أخرى

محمد خضر مدير قناة دريم اثناء نفيه لخبر وقف اذاعة برنامج الطبعة الاولي بعد قطع اخر حلقة اثناء بثها و عدم اذاعة البرنامج مرة اخرى

(2)

نادم علي عرض مسلسل يوميات ونيس في رمضان

تصريح محمد صبحى بعد عرض مسلسله في رمضان..حاليآ بنجاح ساحق للسنة الثامنة علي التوالي


(3)

أنا لسه قرفانة من هنا، وعلشان كده لازم أرجع علشان أغير. ثم أننى قرفانة أيضاً من المجتمع الأوروبى والأمريكى

أنا زهقت من الصحافة والإعلام. مافيش واحد عمل معايا حوار ونشر ما أقوله بصدق

أنا شاركت فى مظاهرات ضد بوش، وضد أوباما. و«السى إن إن» و«النيويورك تايمز» تقف ضدى، وتفرض رقابة على ما أقول، ويقصون من كلامى، مثلما يحدث فى مصر بالضبط. أمريكا لا يوجد بها حرية إعلام، والإعلام المصرى يقلدها

نوال السعداوى في اخر حوار لها قبل إنتقالها للعيش في المريخ

(4)

أنا استغفر ربنا أن يسامحني على ذلك، فلقد كان المشهد يتطلب شربي لطبق من الشوربة، وبعد ضغط شديد من المخرج الذي أجبرني على ذلك، وأقنعني بأن أعوضه بإفطار مساكين لأن الجهة الإنتاجية يمكن أن تتعرض لخسارة مبلغ 50 ألف جنيه عن هذا اليوم

عمر عبدالعزيز اجبر لوسي علي الافطار في رمضان عشان طبق شوربة
بالمناسبة كان ممكن المشهد يتصور بطبق فاضي و محدش هياخد باله
لان حسب معلوماتي الضئيلة طبق الشوربة مش شفاف

(5)

سأغني رغم انف النقاد
لن أجعل أحدا يحرمنى من الغناء بعد اليوم

سمية الخشاب هتغني غصب عن الكل مش بس النقاد

(6)

هناك مشروع تعاون بين جومانا والمطرب عبد الله بالخير
لتقديم أغنية خليجية، من كلمات حسام العبيدلي وألحان فايز السعيد

جومانا مراد تستعد لمنافسة سمية الخشاب في الاسواق الخليجية


(7)

تعقد زينة حاليا جلسات عمل مع الكاتب الصحفي وائل عبد الحميد للاتفاق على الشكل النهائي الذي ستظهر به في أول برامجها التليفزيونية، وهو فكرة وكتابة وائل، وسيحمل اسم زينة .. الحياة

فنانة جديدة تنضم لشاشة قناة الحياة في إنتظار تولي أشرف زكي لرئاسة القناة

(8)

هفضل عروسة على طول.. وهفضل مبينة رجلي ما هى حلوة وملفوفة

إيناس الدغيدي في حالة مراهقة متأخرة

(9)

طوني خليفة معلوماته محدودة، وزاهي وهبي برقبته، و(ضفر) أي إعلامي مصري بعشرة منه إطلالة وثقافة

مفيد فوزي بعد ظهوره في برنامج طوني خليفة لماذا

(10)

أنا من عشاق أفلام المبدع خالد يوسف، وكنت أتمنى أن تكون بدايتي في السينما في أحد أفلامه

تصريح لميريام فارس خلاني اتخيل لقاءها الاول بخالد يوسف في مكتبه..ايوه كده يا وديع اخيرا ابتديت تفهم

رمضانيات 2

(1)

سامح حسين بيقوم ببطولة 3 اعمال السنة دى
كارتون "القبطان عزوز" و مسلسلين هم "عبودة ماركة مسجلة" و "راجل و 6 ستات" مع اشرف عبد الباقي
و تعليقي الوحيد هو ان الطمع يقل ما جمع
عزوز و عبودة تجارب لا قدمت ولا اخرت معاه

(2)

رغم انني من جمهور افلام تامر حبيب..اللي كان بطل اول 4 حلقات من المسلسل
ده بالإضافة الي ان العمل بيشهد عودة خالد حماد للدراما التليفزيونية
إلا ان وجود يسرا و محمود قابيل في مسلسل واحد خلاني ابتعد عن مسلسل خاص جدآ

(3)

نور الشريف قعد يصدعني كل يوم
"ما تخافووووش..ماتخافوووش"
لحد ما خفت علي نفسي من إرتفاع الضغط و قررت ابطل اشوف المسلسل


(4)

كابوس سيد ابو حفيظة كل حلقة يزيد كوميديا
مش عارف ازاى أكرم حسني اقنع كل الضيوف دول يشاركوه الجنان اللي بيعمله

(5)

قرأت في جريدة الفجر ان إعلان كريم عبد العزيز بتاع كوكاكولا اللي بيظهر فيه اوزو و موزو
و كريم في اخر الاعلان يشد باروكة واحد منهم و يقول اصلع؟
ما هو الا تريقة علي أحمد مكى

الحكاية حسب ما حكاها الصحفي هي ان بعد رفض مكى تصوير تامر و شوقية الجزء التالت..كريم و السقا ظهروا ضيوف شرف في حلقة من المسلسل و قعدوا يتريقوا علي شخصية هيثم

و مكي رد علي السقا بإنه اتريق علي إبراهيم الابيض في فيلم طير انت
فكريم السنة دي اتريق علي مكى في الإعلان اللي اخرجه شريف عرفة
اللي هو اصلا منتج مسلسل تامر و شوقية..اللي انسحب منه مكى

قصة عجيبة ما اعلمش مدي صحتها ولا فاهم سبب للإقحام السقا و كريم لنفسهم في اى خلاف بين مكي و شريف عرفة
و ده إن وجد الخلاف فعلآ

(6)

علي جانب اخر..مكى كان ضيف برنامج نجيب ساويرس يحاور
و قال ان فيلم مرجان احمد مرجان هو سبب شهرته و شهرة شخصية هيثم دبور مش مسلسل تامر و شوقية

(7)

لأول مرة من سنين يختفي محمود سعد عن الشاشة الرمضانية..رغم وجوده في البيت بيتك

(8)

مسلسل كلام نسوان هو اول محاولة لإنتاج مسلسل تركي عربي

(9)

تابعت اخر 5 دقايق من حلقة ونيس و احفاده النهاردة
فإكتشفت ان الـ5 حلقات اللي فاتوني مالهمش لازمة
واضح اننا قدام مسلسل تشوفه من اول او من اخره هتطلع بنفس النتيجة

(10)

من كل نجوم السينما اللي قرروا يعملوا مسلسلات السنة دي مفيش غير منة شلبي اللي قدرت تشد الناس
أحمد عز بيحاول
و محمد رجب فشل من قبل ما يبدأ
و زينة و اللي معاها ماقدروش يشدوا الناس رغم كل الترويج اللي عملوه بتشابه قصتها مع قصة سوزان تميم

(حتة من بره)

لماذا يصر الفخراني علي التركيبة الدرامية التي نجح فيها مع الكاتب يوسف معاطي؟! ولماذا عندما ينفصل عنه لا يقدم شيئًا مختلفًا عن هذه التركيبة (رجل ناجح وعاشق للحريم وخفيف الدم وداهية)؟! كنت أتوقع أن يكون الأرندلي مختلفًا لكنه يلعب علي التركيبة نفسها لدرجة أنني اعتقدت أن مؤلف المسلسل وليد يوسف معاطي

عمر طاهر - الدستور

قهوة ساده في فرح العالمي

الاسبوع اللي فات مريت بحالة نشاط فنى زائدة

و كنت محظوظ انني في 3 ايام متتاليين اشوف 3 عروض فنية رائعة

السبت

فيلم الفرح

نزلته من ع النت
الصوت ممتاز و الصورة مش وحشة
القصة تدور في حي عشوائي بجد -مش من بتوع خالد يوسف- عن مجموعة ابطال مطحونين
الابطال دول كلهم بيجمعهم شيء واحد..الفرح

خالد الصاوى بيخترع فرح وهمي لاخته الوهمية بهدف انه يلم النقطة و بفلوسها يشتري الميكروباص اللي بيحلم به
و الافراح دي معروفة باسم "الجمعية" نسبة للجمعيات اللي الناس بيعملوها و كل شهر شخص يقبضها
اللي بينظم الجمعية دي متعهد افراح و كل شهر واحد بيعمل فرح و يلم فلوس
و العريس و العروسة بيكونوا متأجرين

الشخصيات اللي جوه الفرح ورا كل واحد منهم قصة..و بيحصل اثناء الفرح ان ام صاحب الفرح اللي قاعدة في البيت بتتعب..فمراته بتروح له و تاخده علي البيت و يروحوا يلاقوها ماتت
فبيطلب ان الفرح يقف و بيجتمع في بيته مع متعهد الفرح..و النباطشي اللي بيحيي الفرح و العريس و بيقرروا انهم يخبوا الخبر و الفرح يكمل عشان يلم فلوسه
و بيرجعوا للفرح و يكملوه فبتحصل احداث و صدمات كتير متصاعدة و متتالية
لحد ما يخلص الفرح
و ينتهي الفيلم بمشاهد بتعرض النهاية اللي كان ممكن تحصل لو البطل رفض يكمل الفرح بعد موت امه

الفيلم قالب احداثه متشابه بشدة مع كباريه و ان اختلفت التفاصيل
و في المجمل هو فيلم مختلف و ممتع


الأحد
فيلم العالمي

كان في دماغي افلام اجنبي كتير شفتها عن الكورة بما فيها فيلم "جول" اللي مؤلف الفيلم صرح انه تأثر به فقرر يكتب فيلم مصري مشابه بس بملامح انسانية اكتر
و الحقيقة الراجل ماكدبش

الفيلم بيحكي قصة صعود لاعب كرة قدم بس بمنظور انساني و بنشوف حياته الشخصية من ايام الطفولة
لحد ما وصل لانه يبقي لاعب عالمي بيوصل بمصر لكاس العالم

الفكرة نفسها جديدة.."انسنة" البطل..و دي حاجة احنا مش متعودين عليها
البطل شخص غير مثالي نشأ في مناخ غير مثالي
طريقة السرد و المزج بين الواقع و الفلاش باك كانت ممتعة
حياته كلاعب اتعملت بطريقة حلوة و كعادة اللاعب المصري..حياته ماشية بالعواطف و الحظ
و زي اى لاعب كرة بيلاقي حواليه معجبات و شهرة...بيصاحب ابراهيم سعيد و يسهر معاه ليلة معسكر المنتخب
قصة صعوده كلاعب كرة قدم متاخدة من قصص مهاجمين منتخب مصر
حتة من محمد زيدان علي حتة من ابوتريكة علي حتة من ميدو علي حتة من عماد متعب علي حتة من عمرو زكى
تم تغليف ده كله بظهور عدد مهول من الشخصيات الكروية المحلية و العالمية
مع واقعية شديدة في الاحداث خلت في مصداقية للفيلم

قبل الفيلم كنت متخوف ان اداء الممثلين يفسد الفيلم..بس احمد مدحت قدر يختار ممثلين صح و يتحكم في اداءهم
خالد حماد كان في منتهي التألق في الموسيقي التصويرية و من اول ثانية في تتر البداية قدر يشدني

ياسين كامل نجح في انه يكتب فيلم تراجيدي مبهج و اهم حاجة انه مفيهوش ابطال مثاليين
بإختصار..انا معجب بالتجربة اللي في الفيلم ده

و دي تالت تجربة مختلفة علي السينما بيقدمها محمد حفظي في سنتين

الإتنين
قهوة سادة..مكتبة الاسكندرية

المسرحية كانت بتعرض ليلتين بس في الاسكندرية
قريت عنها كتير جدآ و كان عندي حماس انني اشوفها
العرض مدته ساعة و نص..و كانوا ساعة و نص من الابداع و الابهار المتواصلين
و كمية تصفيق و ضحك عالية جدآ

المسرحية بتتكلم عن السلبيات اللي بقت موجودة في حياتنا..و قبل كل مشهد بيظهر الابطال قاعدين يشربوا قهوة سادة كإنهم في عزاء

و كإنهم بيشربوا قهوة سادة علي السلبية اللي هيناقشوها في المشهد اللى جاى

المسرحية مفيهاش حاجة وحشة
الموسيقي التصويرية و الإعداد الموسيقي رائعين
الإضاءة و استخدامها في العرض ممتاز
الممثلين موهوبين جدآ
و خالد جلال كتب و اخرج عرض مسرحي عبقري..و كفاية ان الابطال كان بيبقي قدامهم 30 ثانية في الظلام قبل كل مشهد يحضروا نفسهم

قهوة سادة حالية فنية تخلي الواحد بعد العرض له نفس يشرب شربات فرح رجوع العروض المسرحية المحترمة

ملحوظة: يوم الاربعاء شفت فيلم 1000 مبروك

بس اظن ان الكتابة عن فيلم لاحمد حلمي بقي مفيهاش شيء جديد ممكن يتقال

كالعادة...أحلي أفلام الصيف

قالوا الاسبوع ده

(1)

تردد أن هذه المشاهد ضايقت الفنان أحمد حلمي، وهذا غير صحيح على الإطلاق، لأن المشاهد موظفة جيدا في السياق الدرامي، كما أنها جاءت خفيفة

حسن الرداد بيدافع عن مشاهده مع مني زكي في فيلم إحكي يا شهرزاد..بس هو يعني ايه موظفة في السياق و خفيفة؟؟

و التصريح ده جاى بعد اسبوع من تصريح لحلمي انه مش زعلان و ان مني ادت المشاهد كويس بإحترافية

(2)

أقول للجمهور الذي يتأثر بشكلي وملابسي، أنني عانيت كثيرا في حياتي كي أصل لما أنا فيه الآن، ومن يريد التأثر بي فليتأثر أولا بصبري ومعاناتي والمجهود الذي بذلته لأحقق النجاح

المناضل تامر حسني بينصح الجيل اللي بيحكمه..الكارثة ان في ناس بدأوا تقليد شكله فعلا..و البرنيطة بقت تتباع

تخيلوا منظر واحد طالع من البحر بفانلة و شورت و برنيطة تامر يبقي عامل إزاى؟

(3)

سيتم قتل "الأستاذة ليلى" في حادث مأساوي مدبر من جانب أحد رجال الأعمال، الذي ظل يطاردها طوال أحداث المسلسل
عمر الشيخ مخرج مسلسل ميرفت امين الجديد بيقول لنا نهاية المسلسل عشان مانضيعش 30 يوم في الفرجة علي الفاضي

(4)

الناس بتقارن مابين وحياتى خليكى وخليها تاكلك...طب ازاى بس؟

عاطف المختار بيتكلم عن المقارنة بين عمرو دياب و تامر حسني

(5)

ناس منسية ..مرمية ..مهملة..تفتقر لأبسط حقوق العيش والآدمية .. لما يحبوا ياكلوا ..يقعدوا يفتشوا على بقايا الأكل في اكياس الزبالة !! ولما يجوا يسجلوا ولادهم في المدرسة .. يكتبوا اسم منطقتهم في ورقة التسجيل جنب خانة عنوان المنزل..فتعتذر المدرسة عن قبول ابنهم لأن المكان مش موجود على الخريطة

ساره بتتكلم عن سكان العشوائيات - مش موجود علي الخريطة

(6)

قالت لي وهي تبكي
" يارب اموت وترتاحوا مني "
فرددت في صمتٍ
" مش هنرتاح بس هو هيرتاح "
أليس هذا كفيلاً بأن تبقي على قيد الحياة ؟!

ساره في واحدة أخرى من ابداعاتها - همسة


(7)

الموديلز اللبنانيات احسن من المصريات

حاتم فهمي في تصريح عجيب قال فيه ان اللبنانيات كفائتهم اكبر..بس ماوضحش إزاى؟

(8)

وافقت على الفيلم بعد تأكيدات بشرى لي أن مخرج الفيلم قادر على أن يقدم فيلما جيدا، وللأسف اتضح لي أن رؤيتها ضعيفة، وصدمت عندما وجدت اسمها على الأفيش وتتر الفيلم كمخرج منفذ، وهو يضعها موضع المسئولية ويجعلها تتحاسب وتشيل الليلة

عمرو واكد بيتبرأ من فيلمه الجديد المشتبه بعد ما بشري و المخرج ضحكوا عليه و حطوه قدام الامر الواقع

(9)

ارتباطي مؤخرا بمحمد زيدان لا يعني أنني سأتوقف عن المشاركة مع تامر حسني في أفلام مرة أخرى، فنحن مستمران في الدويتو القائم بيننا سينمائيا

التصريخ رقم 5000 لمي عز الدين عن خطوبتها لمحمد زيدان..و مش فاهم ايه العلاقة بين خطوبتها لزيدان و شغلها مع تامر!؟


(10)

مفاجأة تنتظر كل عشاق الساحرة المستديرة بظهور النجوم العالميين توتى و ديفيد بيا ومورينتس فى الفيلم

محمد حفظي في تصريح عن فيلم العالمي فكرني بالراجل بتاع إعلان إتصالات اللي بيقول
معايا يا جماعة فانلات رجالي قطن 100% صافي

(11)

بدورى فى دكان شحاتة اخترقت منطقة محظورة يخشاها الممثلون وهى أدوار الشر، ولكننى دخلتها بتحد حتى يتأكد المشاهد أنى أقدم كل الأدوار ولا أستهلك نفسى فى أدوار بعينها

تصريح قنبلي صاروخي للفنان الأسطوري محمد كريم اول من يقدم دور شر في السينما المصرية

(12)

الفيلم يقدم صورة عارية عن فساد رسمى وفساد اجتماعى يتجاوران جنباً إلى جنب ويتحالفان يدا بيد للانقضاض على شرف وعذرية وطن كامل، فى دولة لا يعلو فيها إلا حملة المباخر ومحترفو التزلف إلى السلطة

خالد صلاح - اليوم السابع
دي اخف جملة في مقال تطبيلي محزلق مفزلك عن فيلم إحكي يا شهرزاد

(13)

حين أيقنت من أنه لا يداعبني، وافقت مباشرة

مايكل أوين بعد صدمته برغبة اليكس فيرجسون مدرب نادى مانشستر يونايتد في التعاقد معاه بعد ما اتصل به في التليفون و طلب منه يزوره في النادى و فاجئه بطلبه بعد ما كان بيتفاوض مع اندية القاع عشان يلاقي نادى يلعب فيه

(14)

العقد مدته ثلاث سنوات..وسوف نقوم ببث كل مباريات الدوري الإنجليزي حتى وإن كانت في نفس التوقيت..لأننا بصدد إنشاء قنوات إضافية لنقل هذا الدوري الكبير

محمد نجيب مدير قناة ابوظبي الرياضية بيغيظ كل الناس اللي بيتابعوا الدوري الانجليزي علي شوتايم و بيقول لهم ان الموسم الجاى اخر موسم هتذيع فيه الشوتايم الدوري قبل ما يلطشه هو

(15)

من المؤكد أنني سأقدم أدوار إغراء مستقبلا، ولكن إذا وجدت الدور الذي أبحث عنه، مثل تلك الأدوار التي أدتها الفنانة هند رستم، والتي حملت بعدا فنيا وإنسانيا كبيرا

تصريح لدنيا سمير غانم بتطمن محبيها انها هتقدم لهم ادوار إغراء..بس هو ايه البعد الإنساني الكبير اللي هي تقصده في الإغراء؟

بدل فاقد..فيلم ماتفوتوش

الفيلم بإختصار ممتع

الفكرة بسيطة..بس التنفيذ رائع

مش هتكلم عن القصة ولا الاحداث عشان محرقش عليكم حاجة

لكن الفيلم من أكتر الافلام اللي بتحترم عقل المشاهد

لازمه تركيز في كل لقطة و جملة

كل الممثلين كانوا في احسن حالاتهم

محمد لطفي نضج اوى كممثل

لكن اكتر حد وقفت قدامه في الفيلم ده هو المخرج..أحمد علاء

الاسم كنت لاول مرة اسمعه..حتي ما اتذكرش انني شفته كمساعد مخرج في تتر فيلم الفترة اللي فاتت

الافلام اللي من النوعية دي بتعتمد علي المخرج

و في بدل فاقد..في مخرج عبقري و له رؤية مميزة و خاصة

أنصحكم بعدم تفويت متعة المشاهدة

إبراهيم الأبيض المتوسط

مساكين أهل العشق..حتي قبورهم عليها تراب الذل بين المقابر

لحد دلوقتي مش فاهم السبب اللي خلي صناع الفيلم يكتبوا كلمة "شاعر مجهول" جنب بيت الشعر اللي في بداية إعلان الفيلم..و بداية الفيلم نفسه

البيت من كتاب "روضة المحبين" للإمام ابن القيم الجوزيه

بس عامة إختيارهم للبيت كان موفق..لانه بيلخص قصة الفيلم

فيلم إبراهيم الأبيض هو بإختصار قصة امرأة عشقها هلاك

حورية اللي بتلعب دورها هند صبري هي محور القصة

و الأحداث بتدور في احدي المناطق المهمشة اللي بيعيش فيها عصابات البلطجية

كل منطقة لها كبير..و رجالة المنطقة..هم رجالة الكبير و صبيانه

أم حورية كانت ست مسيطرة علي جوزها..عشانها قتل و إتقتل

أبو حورية قتل أبو إبراهيم بالخطأ لإن أم ابراهيم (حنان ترك) ضربت أم حورية (سوسن بدر) بالقلم

فأبو حورية راح و معاه بلطجي (باسم سمرة) و قعدوا يضربوا الراجل لحد ما مات منهم

إبراهيم قتل أبو حورية بالخطأ لإن أم حورية لقت حورية و إبراهيم ( الاطفال) نايمين جنب بعض

فأبو حورية قعد يضرب إبراهيم لحد ما ابراهيم اخد سكينة و ضربه و هرب

بعد سنين إبراهيم (السقا) بيشوف حورية (هند صبري) و بيعرفها بس ما بتعرفوش

في اليوم ده كان عبد المالك زرزور ( محمود عبد العزيز) قرر يشغله معاه

إبراهيم بيتفق مع حورية علي ميعاد

و في الميعاد ده بيبهرها لدرجة انه خلي عشري صاحبه (عمرو واكد) يكتف عمال امن الملاهي و يخليهم يشغلوا عربيات الملاهي عشان حورية و إبراهيم يلعبوا

و بتنتهي الليلة بأبراهيم و حورية سكرانين في عربية من عربيات القطار المهجورة..في مشهد وضح ان حورية طالعة لأمها

هي اللي بتسيطر

في اول عملية لإبراهيم مع عبد المالك..بيعرف من واحد من رجالته (نضال الشافعي) ان كل ستات العالم كوم عند عبد المالك..و حورية كوم تانى

هي الوحيدة اللي عبد المالك عشقها و مقدرش يحصل عليها

و إن اى حد يتقدم لها و توافق عليه..تاني يوم يلاقوه مقتول

في يوم في حفلة سبوع حفيد عبد المالك..إبراهيم بيكون موجود و حورية واقفة في البلكونة بتتفرج..و بتخرج ام حورية تتفرج و بتلمح إبراهيم..و بتعرفه

و هنا حورية بتنقلب علي إبراهيم بعد ما تعرف ان حبيبها هو اللي قتل ابوها

و بصرف النظر عن عدم منطقية انها ماعرفتوش من البداية خاصة انه حب طفولتها و هو اللي قتل ابوها و اسمه إبراهيم

يعني مش محتاج تفكير..بس ده اللي صناع الفيلم كانوا شايفينه

و قبل ما إبراهيم يحاول يصلح علاقته بها.. بيكون عبد المالك بيبلغ عن إبراهيم

و بيتقبض علي إبراهيم و هو رايح يقابل حورية عشان تسمعه لاخر مرة

و بتفضل حورية قاعدة مستنياه..في حين ان إبراهيم كل اللي شاغله في القسم هو حورية

و بيهرب من القسم و بيجري علي المكان اللي هي مستنياه فيه..بس بيكون بعد فوات الاوان..حورية مشت

و بيستسلم للعساكر اللي بيطاردوه..و بيروح السجن

و بتقرر حورية الإنتقام

بتروح لعبد المالك و تشترط عليه انها تعيش معاه بدون ما يفكر يلمسها

و بيديها وعد بده علي امل ان ييجي اليوم اللي هي توافق فيه انها تتجوزه

و عشان تزيد انتقامها بتختار يوم خروج إبراهيم من السجن عشان يكون يوم جوازها من عبد المالك

و زي ما كانت امها...بتبقي هي المتحكمة في عبد المالك..و برغبتها في الانتقام بتخليه يبلغ عن إبراهيم و يتقبض عليه لتاني مرة

و رغم رغبتها في الانتقام بنشوف انها لسه بتحب إبراهيم

و بيبان ده في مشهد هروبها من بيتها..لما بتروح تنام في اوضة إبراهيم

و في الليلة دي عشري بيشوف نور الاوضة..و بيطلع و هو سكران و يحاول يعتدي عليها و هي نايمة..فبتضربه و تسرق الفلوس اللي إبراهيم مخبيها..و فيها العقد الذهب اللي ورثه عن امه

بيخرج إبراهيم من السجن..و بيعرف من عشري ان حورية سرقت الفلوس و العقد..بس عشري مابيحكيلوش سرقتهم ازاى ولا إيه اللي حصل ليلتها

فبيروح ابراهيم و عشري يهجموا علي بيت عبد المالك..و ياخدوا العقد و يولعوا النار في البيت و يمشوا

حورية بتطلب تقابل عشري

لما بيروح بيقابلها بتديله فلوس إبراهيم

و بتديله 5 الاف جنيه مقابل انه يستدرج إبراهيم للقهوة و هناك رجالة عبد المالك يضربوه عشان يأدبوه

طبعآ عشري بيرفض..فبتهدده انه تحكي لإبراهيم عن اللي حصل ليلة ما كان سكران و تسيب إبراهيم يقتله

و فعلآ..عشري بيرضخ لطلبها..و في الليلة دي عبد المالك بيقرر يروح بنفسه عشان يقتل إبراهيم

وسط محايلات من حورية انهم ماياذوش إبراهيم..و بتهدده لو إبراهيم جراله حاجة مش هيشوف وشها تانى

و بيروح مع رجالته و بيبدأوا في الضرب مجموعة بتضرب عشري و مجموعة بتضرب إبراهيم

لحد ما بيموت عشري و بيجتمع كل رجالة عبد المالك و يبدأ كل واحد يطعن ابراهيم بنفس الطريقة اللي عملها معاهم في اول الفيلم..عور بس ما تقتلش

بعدين بيولعوا فيه النار بنفس الطريقة اللي هو ولع بيها بيت عبد المالك

و في الوقت ده حورية بتروح القهوة و عبد المالك بيطلع المسدس و يضربها بنفسه

فبيشيلها إبراهيم اللي محروق و كل حتة في جسمه بتنزف

و بيقعد علي جنب..و بيموتوا الاتنين في نفس اللحظة

و يخلص الفيلم

الفيلم في مجمله متوسط و فيه كمية لا بأس به من اللامنطقية في احداثه

زي مثلا اننا مش هنفهم ازاى عشري كان هو الراوى في الفيلم..و مات في الأخر

ولا هنفهم ازاى حورية ما اتعرفتش علي إبراهيم و امها شافته من مسافة اكتر من 20 متر و في ثواني اتعرفت عليه رغم مرور السنين

ولا هنفهم سر القوة الخارقة لكل أبطال الفيلم اللي تخليهم بيتضربوا 50 مطوة و يكملوا بدون ما يعرجوا

و برضه مش هنفهم ازاى رغم إن إبراهيم مصاب بالعرج..بس كان بيجري بسرعة خارقة اثناء مطارده الشرطة له و بدون ما يعرج

مشهد المطاردة في اول الفيلم منقول بدرجة اقرب الي نقل المسطرة من فيلم

Slumdog millionaire

و النقل يشمل ديكورات الحي العشوائي كمان

الفيلم كعادة كل أفلام جود نيوز..ناقصه حاجات كتير

و التصريحات اللي اطلقها السقا علي الفيلم تخلينا نقدر نحكم علي مدي قناعته بالفيلم اللي قدمه

"تجربة مهمة..و ان شاء الله الديلر يبقي خطوة أفضل"

"الفيلم رومانسي"

"سعيد انني إشتغلت مع محمود عبد العزيز"

"شيء مهم ان يبقي في مندوبين عن شركات توزيع الافلام من كل الدول بيشوفوا فيلمي"

السقا شايفه تجربة مهمة و اكيد مقتنع انه خطوة اقل من اللي قبله

بس انا شايف ان التجربة دي خطوة سيئة جدآ بعد فيلم "الجزيرة" و اعتقد برضه انها خطوة سيئة قبل فيلم "الديلر" اللي اتمني مايكونش تجربة أخري

لان الجمهور مش مستني تجارب

أخيرآ..زي ما صناع الفيلم اضافوا جملة في اخر الفيلم تعبر عن فيلمهم..احب انا اضيف جملة من عندي اعبر بها عن الفيلم

امرأة واحدة تستطيع أن تغوي ألف رجل - شيخ مجهول سمعته في التاكسي

دليلك للفيلم الهابط في 10 خطوات

بما ان موسم افلام الصيف ابتدي..و دخلنا مرحلة نزول فيلم كل اسبوع

قررت ادي شوية نصايح للناس اللي يحبوا يضيعوا 3 ساعات في السينما يشوفوا فيهم فيلم تافه

و علي غرار علامات جودة المنتجات

دي علامات سوء الفيلم اللي لازم محبي الافلام الهايفة يحرصوا علي وجود اكبر كم منها في الفيلم

(1)

يتصدر الافيش صورة لفنان من نجوم الصف التاني يبدو فيها انه علي وشك التقيؤ او مصاب بإسهال شديد

(2)

ان تكون احدى بطلات الفيلم هي علا غانم او ميرنا المهندس

(3)

بجوار البطل و البطلة ستجد حسن حسني يقف راسمآ علي وجهه تعبير ساذج من المفترض ان يضحكك

(4)

الفيلم من إخراج اكرم فريد او احمد البدري في حالة سخاء الانتاج
او مخرج مجهول في حالة وجود منتجين من نوعية نافع عبد الهادى

(5)

تأكد من سماعك لاغنية شعبية اشتهرت في الفترة الاخيرة في اعلان الفيلم

(6)

تأكد من وجود مطرب يمثل لأول و اخر مرة بالفيلم

(7)

يوجد علي الافيش صورة لشاب وسيم أو فتاة مزة لا يعرف اسمهما احد

(8)

تستطيع ان تجد في الاعلان او الافيش او كلاهما ما يكفي من لحوم لجذب الجمهور الغير نباتى

(9)

ممثل قديم و مكروه ابتعد عن شاشة السينما و يبدو من الاعلان و الافيش انه قرر ان يعود رغم انوف المشاهدين

(10)

المنتج و المؤلف و المونتير و مدير التصوير و واضع الموسيقي التصويرية مجهولون

اطيب التمنيات بمشاهدة طيبة و وقت ضايع ممتع

ملحوظة: لو مستعجل و مش فاضي تدور علي العلامات دي..ادخل فيلم لتامر حسني

أجمد 10 الساعة 8

(1)

أغنية فيلم "دكتور سليكون" اللي قام بغناءها عبد الله الكاتب

و هو بالمناسبة منتج و بطل الفيلم كمان

هي نموذج للإبتذال الأخلاقي اللي ممكن يلجأ له شخص عشان يلفت نظر الناس

عبد الله الكاتب بيقوم بدور دكتور السليكون اللي هيحقن مروي

و مش عارف ايه دخل نانسي عجرم في الموضوع..بس هو بيحاول يتسول دعاية علي حسابها

و بيقول انه وجه لها دعوة لحضور العرض الخاص و هي ماجتش

و بينفي كمان خبر ان نانسي عجرم زعلانة من الفيلم

نوعية الاخبار المتخلفة دي شيء طبيعي نسمعه عن فيلم اخراج احمد البدري و بطولة نيرمين الفقي

(2)

مفيش حاجة هتمنعني من مواصلة حملة "هيا بنا نفكس" طالما في عدد لا بأس به من الناس الفاكسين المحيطين بي

(3)

"و كلامها ده هز قلبه و فرحه..و نساه انها في الايام دي نسيته"

صدق اللي قال..يا مأمن لهم يا شارب من مرهم

(4)

اول ما إنتشر الفيس بوك كانت الموضة هي صور المايوهات

بعدين طلعت موضة صورة حملة حماية بتاعة صناع الحاجات

الموضة الجديدة علي الفيس بوك اليومين دول صورة الكاس

يعني الواحد يبقي واقف ماسك الكاس في ايد و السيجارة أو المزة او كلاهما في الايد التانية

تسأله ايه ده يا عم؟

يقول ريد بول طبعآ

و عينك حمرا و بتلمع من الريد بول؟

لا ده عشان أنا مطبق

مطبق؟ وماله

طبعآ مفيش داعي اسئله عن المزة اللي محضونة أحسن تطلع أخته في الرضاعة

(5)

حكمة أجمد 10: شد اللحاف علي وشك..غيره ما يفيدك

(6)

فلسفة أجمد 10: زمان قالوا لنا اللي يتلسع من الشوربة ينفخ في الزبادي

بس ولا حد فكر يقول لنا هنعمل ايه مع الشوربة بعد ما إتلسعنا منها؟

هنسيب الطبق و نجيب الزبادي و ننسي موضوع الشوربة

ولا نمسك الشوربة تاني بعد 5 دقايق و ندوقها..و إحنا و حظنا..يا نتلسع تاني يا نشربها

(7)

إذاعة موزاييك التونسية و دي إذاعة جامدة زي نجوم اف ام في تونس

إختارت الممثلة درة كأجمل امرأة تونسية لعام 2009 بمناسبة يوم المرأة

تعليق درة كان انها اتفاجئت خاصة ان تونس مليانة بنات جميلات

و انها تتمني ان الاختيار ده يكون لجمال روحها و شخصيتها مش جمال شكلها

طبعآ نجوم اف ام لو قررت تقلد الفكرة و يعملوا بنصيحة درة..هيتم إختيار كريمة مختار

علي اساس انها "حد جميل" و روحها حلوة في اللوكيشن

(8)

علي الفيس بوك و قبله هاى 5

الواحد كان بيشوف حاجات صادمة..بروفايلات لبنات عرب متصورين صور فاضحة

لي واحد صاحبي عنده هواية العثور علي البروفايلات دي و التبليغ عنها

و بيسميهم زي ما معظمنا بيسميهم..بروفايلات مضروبة

بس السؤال..البنات دول إتصوروا الصور دي إزاى؟

و الصور دي إزاى برضه وصلت علي النت و شخص تعبان نفسيآ عمل بها بروفايل مضروب؟

(9)

الشيء بالشيء يذكر..شكل الفيس بوك الجديد متخلف جدآ

و واضح ان ماتمش إختباره قبل طرحه لانه مليان عيوب تقنية

و ده غير إنه بيفتقد لابسط قاعدة اساسية في تصميم المواقع

friendly user interface

يعني يكون شكله يشد و استخدامه سهل

و لحد النهاردة لا حبيت الشكل..ولا عارف اتعامل مع الاعطال

(10)

و انا بكتب الفيلم الهابط بتاعي..كنت فاكر انني بطرح قصة عجيبة شفتها

بس إكتشفت انها عادية جدآ مقارنة بالقصص اللي قريتها في الردود

!مجرد أسئلة غبية أخري

المجموعة الاولي: أسئلة قصيرة إجابتها طويلة

س1: مين أحسن شاعر غنائي؟

بهاء الدين محمد - أيمن بهجت قمر - هاني عبد الكريم - شخص أخر

س2: مين أحسن مطرب في لبنان؟

فضل شاكر-وائل كفوري-راغب علامة - شخص أخر

س3: إيه أحسن ستوديو تحليل كروي؟

بتاع مدحت شلبي - بتاع خالد الغندور - بتاع خالد توحيد - شخص أخر

س4: مين أحسن مهاجم جنب فلافيو؟

أحمد بلال - أسامة حسني - هاني العجيزي - شخص أخر

س5: مين يحرس مرمي منتخب مصر بعد الحضري؟

عبدالواحد السيد - أمير عبد الحميد - شريف إكرامي - شخص أخر

س6: مين اسوأ بطلة سنيمائية قديمة؟

إلهام شاهين - نادية الجندي - نبيلة عبيد - شخص أخر

س7: مين اسوأ بطلة سنيمائية حالية؟

نيللي كريم - داليا البحيري - علا غانم - شخص أخر

المجموعة التانية: أسئلة طويلة و هبلة

س8: ليه كل الممثلين اللي اخدوا فرصة البطولة و النجومية في أفلام يوسف شاهين الاخيرة بقوا فاشلين؟

مابيعرفوش يمثلوا اصلآ -

المتفرجين حمير و مش بيقدروهم -

هم متعمدين يفشلوا عشان يخزوا العين -

سبب أخر -

س9: ليه كل الصحف بتكتب خبر ان الممثلة المعتزلة بتعمل مسلسل و هي معتزلة؟

تمويه عشان تصدم المتفرجين -

جهل من الصحفي اللي بيكتب الخبر -

عشان العدد الجاى تقول انا اتحجبت بس لسه ما اعتزلتش -

سبب أخر -

س 10: ليه أجر الممثلة المعتزلة اللي بتعمل مسلسل و هي معتزلة أعلي من أجرها قبل ما تعتزل؟

فرق فلوس الكوافير -

عشان المنتج فاكرها هتتبرع بالفلوس للمستشفيات -

عشان هي معتزلة و لازمها قرشين تتسند عليهم -

سبب أخر -

س11: ليه مذيعات برامج الاطفال زمان كانوا بيسموا نفسهم "ماما"؟

اتحرموا من الانجاب و بيعوضوا -

الام هي اللي قدمت برامج و حكت حودايت مش اللي خلفت -

عشان الاطفال بيسمعوا كلام ماما و كده هيسمعوا كلام المذيعة -

سبب أخر -

س12: ليه النقاد بيشتموا هيفاء وهبي و مابيعبروش سمية الخشاب؟

سمية بتعمل افلام ساعتين تثبت فيهم مواهبها كلها و هيفاء كليباتها 5 دقايق -

عشان عري سمية تمثيل..لكن عري هيفاء بجد -

عشان الناس بيشوفوا سمية بفلوس لكن هيفاء تتشاف ببلاش..رخيصة -

سبب أخر -

س 13: ليه النقاد بينتقدوا فستان هيفاء وهبي و مابيعبروش فستان إليسا؟

خلافات شخصية مع مصمم أزياء هيفاء -

أصل النقاد بيسرحوا مع صوت إليسا و مابياخدوش بالهم من الفستان -

إليسا لسه صغيرة و حقها تعيش سنها و تلبس اللي هي عايزاه..لكن هيفاء كبيرة -

سبب أخر -

س14: ليه الصحف عندنا لما تيجي تكتب عن فنان أجنبي و صاحبته يقولوا "فلان و زوجته" او "فلان و خطيبته"؟

عشان مايفتحوش عنين الفنانين بتوعنا ع الحاجات الوحشة دي -

عشان يستروا علي البنت بدل ما اهلها يعرفوا انهم عايشين في الحرام -

عشان دي خصوصيات ناس و ماتهمش القاريء اللي هنا -

سبب أخر -

أجمد 10 الساعة 1

(1)



عمري ما كنت أتخيل انني هحب حاجة في مسلسل سميرة أحمد الاخير

ولا كنت اتخيل انني ممكن اسمع اغنية لنبيل شعيل

بس ده اللي حصل

اغنية نهاية المسلسل اللي غناها نبيل شعيل اكتر من رائعة

و بهاء الدين محمد تألق في الكلمات
خصوصآ في الكوبليه الاول بتاع

ماتخافيش لو طال سكاتي..انا صوتي مخنوق من اهاتي
و يوم ما هتكلم هقول الحق..دي كرامتي أغلي من حياتي



(2)



كل ما اجيب مسلسل لمصطفي فهمي الاقيه لابس بدلة

لدرجة انني بدأت اشك انه معندوش بيجامات و برضه بينام بالبدلة



(3)



الصدفة البحتة خلتني اشوف فيلم كباريه

هو ده اللي اسمه بطولة جماعية..مش العك بتاع ليلة البيبي دول و عمارة يعقوبيان



(4)



حاليآ بمعرض القاهرة الدولي للكتاب و بجميع منافذ بيع كتب دار الشروق

كتاب "جر ناعم" لعمر طاهر



(5)



حكمة اليوم : يا داخل بين البصلة و قشرتها..إطلع



(6)



كنت بحاول اتخيل مواصفات الممثل الرخم النموذجية

فقررت اجمع موهبة تامر هجرس مع إنفعالات خالد النبوي و كوميدية حجاج عبد العظيم و خفة دم وحيد سيف و كاريزمة جمال عبد الناصر و شنب و تسريحة شعر ياسر جلال





(7)

إلهام شاهين في خلطة فوزية بتتجوز 5 رجالة

!قبل ما حد يفكر ينتقد الخيال العلمي ده..إلهام هي المنتجة يعني بفلوسها



(8)

لا ادري لماذا يستفزني هذا الجنزعور المشفلف بالابانين؟
فلطالما سألت نفسي لماذا اتنفقل بينما لا استطيع البوحان بحمبكيلي المشكاني
ياله من شيء مزعج حقآ



(9)



أعتقد ان سر إقبال المنتجين علي علا غانم رغم إنعدام موهبتها..هو انها ارخص الممثلات الموجودين حاليآ



(10)

قنوات ميلودي لغت شريط الإس ام إس
عقبال ما يلغوا القنوات نفسها

إستفتاح...2009

يا صباح الخير ياللي معانا..ياللي معانا

هنستفتح 2009 اهو عشان تبطلوا تقولوا كسلان

خلونا نستفتح و نقول الحاجات اللي أحب اشوفها بتحصل في عالم الفن في 2009 إن شاء الله

نيللي كريم تتفرغ للباليه و تسيبها من التمثيل

هيفاء وهبي تلبس فستان مقاسها

نانسي عجرم تبطل تحلو عشان كده النمل هيتلم

خالد صالح يعمل مسلسل جديد و البطل يكون اسمه أمجد..بعد ما عمل سلطان في سلطان الغرام و يوسف الصياد في بعد الفراق

تامر حسني يقرر انه يبطل بقي و يحترف الغناء..و يبطل تشتمل حاجات كتير مفيش داعي لذكرها

لؤي يغني

بعد تجربة الشبكة القديمة و القرد اللي بيتكلم..إحتراف عايدة رياض و ميمي جمال التمثيل في مسلسلات التليفزيون الشمبونجي

ياسمين عبد العزيز ترجع للتمثيل

مي عز الدين تشتغل مذيعة في ميلودي تريكس

سمية الخشاب تتجوز بدل ما هي مقضياها تمثيل

خالد يوسف يبطل أدواره القيادية بكافة اتجاهاتها

خالد النبوي يبقي خالد النبوي بس

بلال فضل يكتب فيلم سينما بنية صافية

قناة موريتانيا الفضائية تعرض مسلسل نبيلة عبيد الجديد حصريآ

عمر طاهر يكتب فيلم سينما له علاقة بموهبته..بعد الفيلم العجيب "عمليات خاصة"..خالد سليم و تامر هجرس و نبيل عيسي؟؟

أحمد البدري و أكرم فريد يتجهوا للمجال الإداري و كل واحد فيهم هيمسك فرع من فروع جزارة السبكي و ده بعد ما السبكي قرر إعتزال السيما

إعتزال تلات ارباع النقاد السنيمائيين في مصر

أشرف عبد الباقي يعرض فيلمه الجديد في 60 دار عرض

يستضيفوا رامز جلال في برنامج و يبطلوا يفقعونا بسيرة الصواريخ اللي بيفرقعها

إختفاء المركب التي تقل عايدة رياض و ميمي جمال في مثلث برمودا أثناء إتجاههم لشمبونجو و أنباء عن إحتفالات في العاصمة الشمبونجية

TSA 08 - جوائز الفضائيات و الإعلانات

نكمل كلامنا في التليفزيون..و المرة دي عن البرامج و القنوات..و كمان الإعلانات

السنة دي كانت مهمة..لانها شهدت تغييرات كتير اوى في القنوات

اولا:القنوات و البرامج

أقوي قناة جديدة

قنوات الحياة

قنوات اتولدت قوية..إنتاج ضخم..مذيعين نجوم

إكتشاف مذيعين جدد..كل من يطلق عليهم نجوم الصف الاول سهل تلاقيهم علي شاشة الحياة

و يكفي إن عادل امام بيجري حوارين في نفس السنة مع القناة دي..و ده انجاز لم يسبقهم إليه غير محمود سعد في البيت بيتك

أسخف قناة جديدة

قناة موجة كوميدي

سخيفة ببرنامجها اليتيم المستفز توك شو و الافلام و المسلسلات القديمة

جايزة الغباء المستمر

ميلودي تريكس

جايزة مش محتاجة اى توضيح

جايزة السخافة اللامتناهية

مناصفة بين

إنجي علي - يا مسهرني

عمرو - شبابيك

قناة دريم بتتميز بوجود اتنين من أسخف المذيعين اللي الواحد ممكن يشوفهم

إنجي علي في برنامج يا مسهرني..بصرف النظر عن ازمتها مع كتفها

إلا انني مش فاهم هي ليه بتشب لفوق و تصرخ و هي بتكلم الجمهور كإن الجمهور قاعد ورا سور
و سرقت حركة هالة سرحان بتاعة التصقيف عمال علي بطال

و لازم تاخد المطرب من ايده و هو قايم يغني و تقف جنبه تصقف..عندها عقدة من التصقيف تقريبآ

اما عمرو بتاع شبابيك فهو تقريبآ محاولة يائسة من قناة دريم لتعويض غياب عمرو سمير اللي سابهم و راح
otv

otv و بالتالي بتوع دريم قرروا يردوا الخبطة لبتوع

و خطفوا عمرو و حطوه مكان عمرو سمير في تقديم برنامج شبابيك

بس يبدو انهم شربوا مقلب فظيع و فتاك

اول مرة اشوف مذيع بيرخم علي الضيوف ببراعة يحسده عليها بياعين المناديل في إشارات المرور

جايزة بيت الرعب

مذيعين قناة دريم

كل ما اشوف برنامج هواء علي قناة دريم احس ان المذيعين تلاميذ مدرسة مزنوقين في حصة عربي فيها تسميع

عايزين الوقت يعدي بسرعة و يروحوا البيت

اكيد الهواء له رهبة و قلق..بس دول كل يوم علي الهوا

و كل يوم بيطلعوا مرعوبين

سواء الشلة بتاعة شبابيك اللي بحسهم دماغهم مجوفة بالاضافة لكونهم تايهين..او فرح مذيعة سمعنا يا سيدي بغمازاتها الحلوين

و حتي مني الشاذلي بتتلجلج في العاشرة مساءا..و خالد الغندور لازم يتلخبط في 4 جمل علي الاقل في الرياضة اليوم

هم بيوقفوا لهم عفريت ورا الكاميرا ولا ايه؟

جايزة الراجل البركة

مصطفي عبده

بما انه كان صاحب البرنامج المنافس الوحيد في المحور..رحب بمنصب مدير البرامج الرياضية في قنوات دريم

و البرامج الرياضية في قنوات دريم ما هي الا برنامجه و برنامج خالد الغندور

كان اهم انجازاته تغيير اسم برنامج شوبير من "الكورة مع دريم" الي "الكورة في دريم" و طبعآ الفرق واضح

خلال اسابيع قليلة نجح في انه يخلي برنامجه خفي و غير مرئي

و هو بيكتفي بدور الراجل البركة الكبير اللي بينصح اللاعيبة..و دايما يبدأ نصيحته بجملة "و احنا بنقووول" و يقوم فاقع نصيحة من عينة اللاعيب الصغير لازم يحترم اللاعيب الكبير...و احنا مش مع حد ضد حد

جايزة البرنامج العبيط

توك شو

إستظراف.. قلة ادب..مبالغة تصل لحد العبط

و ضيف علي ده انهم قرروا يعملوا في يوم توك شو 2

ايه الفرق بين 1 و 2 معرفش؟

و ايه سر الإعلانات المكثفة عن توك شو 3 و كإن الناس هتموت علي البرنامج برضه معرفش

جايزة أنا المذيع..انا المذيع

علاء صادق

مشفتش مذيع عدواني كاره الناس كلهم قد علاء صادق

في نظره الحكام مرتشين و سفلة و صراصير و قاذورات و ريحتهم وحشة علي حد تعبيره

و اللي يعارضه يدور له في الملفات و يخترع فضايح و ينزل في وصلة ردح

و كل الكلام ده بيقوله و علي وشه ابتسامة من الودن للودن تضفي له إيحاء المختل عقليآ

جايزة الهبوط المستمر

قناة دريم

مين يصدق ان دريم اللي قدمت محمود سعد كمذيع..و خلت هالة سرحان مذيعة جماهيرية..و كانت القناة اللي كسرت كل القوالب

هي نفسها دلوقتي القناة اللي مفيهاش غير برنامج او اتنين الواحد ممكن يشوفهم؟

قناة فقدت بريقها بطريقة غريبة

جايزة التألق المستمر

محمود سعد

بيعمل كل اللي هو عايزه..حوارات فنية ..يساعد الفقراء..برنامج جواز

يمكن يكون اول مذيع يعرف يستغل إمكانيات التليفزيون المصري بطريقة سليمة

نموذج للإعلامي الذكي

ثانيا: الإعلانات

أحسن إعلان موبايل

حملة إعلانات شومبونجو - موبينيل

إخترعوا سؤال مايهمش الناس و هو الشبكة القديمة راحت فين؟

بس خلوا الناس كلهم يتابعوا الحملة الإعلانية بمختلف فئاتهم العمرية

لدرجة ان في جروب علي الفيس بوك بيطالب بإعادة القرد اللي بيتكلم من شمبونجو

يبقي اننا نعرف ان الشبكة القديمة إشترتها إتصالات و ما اتشحنتش علي شومبونجو

اسوأ إعلان موبايل

صابر - إتصالات

كان واحد من افشل المحاولات الفاشلة لإختراع إعلان مرح لإتصالات

أحسن إعلان لنجم

حملة كوكاكولا - كريم عبد العزيز

رغم انني من محبي بيبسي و بكره كوكاكولا..و رغم ان إعلانات حلمي مميزة دايمآ..بس المرة دي كريم حملة إعلاناته خطف الاضواء من حلمي اللي قدم السنة دي واحدة من اضعف حملات بيبسي الإعلانية

اسوأ إعلان لنجم

حملة رشيدي الميزان - رامز جلال

الجمل و المواقف كلها مسروقة من كتاب "شكلها باظت" لعمر طاهر..و ده دفع عمر طاهر انه يكتب مقال في جريدة الدستور يوضح انه مش هو اللي كتب الإعلانات

و لما اتصل بمنتج الإعلانات إعترف له بالسرقة..و لما اتصل برامز جلال قال له ماقريتش الكتاب

أذكي حملة إعلانية

حملة المفتش كرومبو

مين فينا مابيستناش اللغز الجديد لكرومبو؟

و مين فينا مابيحبش اسامي الابطال؟

أغبي حملة إعلانية

حملة سرحان & نفيسة

مين المستفز اللي عمل الإعلانات دي؟

و مين الاكثر استفزازآ اللي بيعمل اصوات سرحان و نفيسه؟

تقليد فاشل لفكرة كرومبو

و إضافة قوية للعك بتاع موجة كوميدي

...بوست كمان و تخلص الجوايز إن شاء الله

TSA 08 - جوائز السينما

السنة دي الأفلام كانت كتير..بس الأفلام الجيدة كانت قليلة

السنة اللي شهدت تجارب جديدة فيها مغامرة من اصحابها زي أسف علي الإزعاج و حسن و مرقص و ورقة شفرة و كباريه

هي نفسها السنة اللي شهدت تجارب مريعة زي جنينة الاسماك و الريس عمر حرب

كانت سنة غريبة سنيمائيآ..لي فيها مليون ملاحظة

اول فيلم شفته في 2008 كان طباخ الريس و اخر فيلم شفته كان من ساعة و للأسف هو من انتاج 2007 و هو اخر الدنيا..و الحقيقة كان نفسي يكون انتاج 2008 عشان كان هيكتسح في الجوايز..ربما يكون لي رجعة معاه في بوست تاني بعدين..لاته فيلم مايتسكتش عليه..هل انا محظوظ انني ماشفتوش كل الفترة دى؟

فيما يلي..رأيي في الافضل و الاسوأ طبقآ للأفلام اللي شفتها في 2008

المنافسة خرج منها أفلام زي هي فوضي و الجزيرة و خارج علي القانون بما انهم عرضوا في ديسمبر 2007

و طبعآ هستثني من حسبة الأفلام بتاعة السنة دي..الأفلام اللي من نوعية كامب و بنات و موتوسيكلات

عشان كده..المنافسة كان سهل حسمها نظرآ لان الافلام اللي بتتنافس عددها قليل و معظمها كان متوسط المستوي

و بالتالي معظم الافلام بعيدة عن المنافسة علي اي من لقبي الافضل او الاسوأ

أفضل فيلم

أسف علي الإزعاج

أفضل ممثل

أحمد حلمي - أسف علي الإزعاج

أفضل ممثل مساعد

مناصفة بين

أحمد الفيشاوى - ورقة شفرة

آسر ياسين - زي النهاردة

محمود حميدة - أسف علي الإزعاج

جمال سليمان - ليلة البيبي دول

أفضل ممثلة

منة شلبي - أسف علي الإزعاج

أفضل ممثلة مساعدة

سولاف فواخرجي - ليلة البيبي دول

أفضل سيناريو

أيمن بهجت قمر - أسف علي الإزعاج

أفضل إخراج

خالد مرعي - أسف علي الإزعاج

أفضل موسيقي تصويرية

مناصفة بين

راجح داوود - غرفة 707

ياسر عبدالرحمن - ليلة البيبي دول

اسوأ فيلم

غرفة 707

اسوأ ممثل

عمرو واكد - جنينة الأسماك

اسوأ ممثل دور مساعد

ياسر فرج - غرفة 707

اسوأ ممثلة

مناصفة بين

رولا سعد - غرفة 707

هند صبري - جنينة الأسماك

اسوأ ممثلة مساعدة

سميرة محسن - غرفة 707

اسوأ سيناريو

سميرة محسن - غرفة 707

اسوأ إخراج

مناصفة بين

إيهاب راضي - غرفة 707

يسري نصر الله - جنينة الاسماك

في شوية جوايز خاصة لجنة التحكيم شايفة ان من الواجب منحها

جايزة اكتر فنان مظلوم

مجدي كامل / راجح داوود - غرفة 707

شيلوا موسيقي راجح داوود و مجدي كامل باداءه من الفيلم و حطوهم مع مخرج و ممثلين كويسين و سيناريست يشتغل شوية علي قصة الفيلم..هتاخدوا فيلم تاريخي

جايزة اكتر فنان عمل حاجة مفيدة

محمد حفظي - إنتاج ورقة شفرة / زي النهاردة

ادي مساحة لـ3 مجهولين لاغلبية الجمهور..و وثق في امير رمسيس بعد كوارثه السنيمائية السابقة فطلع بفيلم ممتع زي ورقة شفرة

و مافاتش شهور قبل ما يكرر التجربة تاني مع عمرو سلامة و يثق فيه كمخرج مالوش اي تجارب ولا دراسة فطلع بفيلم زي النهاردة

جايزة أذكي ممثل

أحمد الفيشاوي - ورقة شفرة / زي النهاردة

و عدم اهتمامه بحجم الدور علي قد قيمته في ورقة شفرة..بيثبتوا ان احمد الفيشاوي بني ادم ذكي بيعرف يحسب خطواته صح

و الدليل انه دلوقتي بيستعد لعمل فيلم إكرامي تايتانيك اللي هيكون مخصص لشخصية إكرامي اللي قدمها في ورقة شفرة

و رجع تاني كرر المغامرة مع محمد حفظي و قدم زي النهاردة مع عمرو سلامة..و طبعآ مش محتاج اتكلم عن الفيلم و تألق الفيشاوى فيه

جايزة الزيطة ع الفاضي

شركة جودنيوز - حسن و مرقص / ليلة البيبي دول

جايزة اكتر ممثل محظوظ

آسر ياسين - زي النهاردة / الوعد

في شهرين حياة آسر ياسين كممثل اتغيرت

دور رائع في زي النهاردة

بعده بطولة في فيلم بيساعده فيه غسان مسعود و محمود ياسين و بيكتبه وحيد حامد

مشفتش فيلم الوعد..بس اي ممثل يبقي محظوظ لما ده يبقي فريق العمل اللي يشتغل معاه بعد دور مهم زي اللي قدمه آسر في زي النهاردة

جايزة السعفة الخضراء

لكل فريق عمل كارتون سوبر هنيدي

عمر طاهر..شريف جمال..محمد هنيدي..طلعت زكريا..حنان ترك..علاء مرسي

كارتون مصري كوميدي فيه نجوم صعب يجتمعوا في فيلم واحد دلوقتي

كل حلقة تساوى عندي فيلم لهنيدي و طلعت زكريا

بيقدموا في ربع ساعة كوميديا اكتر من اللي ممكن تتشاف في فيلم ساعتين

دي كانت الجوايز الخاصة بالسينما..باقي الجوايز تستكمل لاحقآ إن شاء الله