قهوة ساده في فرح العالمي

الاسبوع اللي فات مريت بحالة نشاط فنى زائدة

و كنت محظوظ انني في 3 ايام متتاليين اشوف 3 عروض فنية رائعة

السبت

فيلم الفرح

نزلته من ع النت
الصوت ممتاز و الصورة مش وحشة
القصة تدور في حي عشوائي بجد -مش من بتوع خالد يوسف- عن مجموعة ابطال مطحونين
الابطال دول كلهم بيجمعهم شيء واحد..الفرح

خالد الصاوى بيخترع فرح وهمي لاخته الوهمية بهدف انه يلم النقطة و بفلوسها يشتري الميكروباص اللي بيحلم به
و الافراح دي معروفة باسم "الجمعية" نسبة للجمعيات اللي الناس بيعملوها و كل شهر شخص يقبضها
اللي بينظم الجمعية دي متعهد افراح و كل شهر واحد بيعمل فرح و يلم فلوس
و العريس و العروسة بيكونوا متأجرين

الشخصيات اللي جوه الفرح ورا كل واحد منهم قصة..و بيحصل اثناء الفرح ان ام صاحب الفرح اللي قاعدة في البيت بتتعب..فمراته بتروح له و تاخده علي البيت و يروحوا يلاقوها ماتت
فبيطلب ان الفرح يقف و بيجتمع في بيته مع متعهد الفرح..و النباطشي اللي بيحيي الفرح و العريس و بيقرروا انهم يخبوا الخبر و الفرح يكمل عشان يلم فلوسه
و بيرجعوا للفرح و يكملوه فبتحصل احداث و صدمات كتير متصاعدة و متتالية
لحد ما يخلص الفرح
و ينتهي الفيلم بمشاهد بتعرض النهاية اللي كان ممكن تحصل لو البطل رفض يكمل الفرح بعد موت امه

الفيلم قالب احداثه متشابه بشدة مع كباريه و ان اختلفت التفاصيل
و في المجمل هو فيلم مختلف و ممتع


الأحد
فيلم العالمي

كان في دماغي افلام اجنبي كتير شفتها عن الكورة بما فيها فيلم "جول" اللي مؤلف الفيلم صرح انه تأثر به فقرر يكتب فيلم مصري مشابه بس بملامح انسانية اكتر
و الحقيقة الراجل ماكدبش

الفيلم بيحكي قصة صعود لاعب كرة قدم بس بمنظور انساني و بنشوف حياته الشخصية من ايام الطفولة
لحد ما وصل لانه يبقي لاعب عالمي بيوصل بمصر لكاس العالم

الفكرة نفسها جديدة.."انسنة" البطل..و دي حاجة احنا مش متعودين عليها
البطل شخص غير مثالي نشأ في مناخ غير مثالي
طريقة السرد و المزج بين الواقع و الفلاش باك كانت ممتعة
حياته كلاعب اتعملت بطريقة حلوة و كعادة اللاعب المصري..حياته ماشية بالعواطف و الحظ
و زي اى لاعب كرة بيلاقي حواليه معجبات و شهرة...بيصاحب ابراهيم سعيد و يسهر معاه ليلة معسكر المنتخب
قصة صعوده كلاعب كرة قدم متاخدة من قصص مهاجمين منتخب مصر
حتة من محمد زيدان علي حتة من ابوتريكة علي حتة من ميدو علي حتة من عماد متعب علي حتة من عمرو زكى
تم تغليف ده كله بظهور عدد مهول من الشخصيات الكروية المحلية و العالمية
مع واقعية شديدة في الاحداث خلت في مصداقية للفيلم

قبل الفيلم كنت متخوف ان اداء الممثلين يفسد الفيلم..بس احمد مدحت قدر يختار ممثلين صح و يتحكم في اداءهم
خالد حماد كان في منتهي التألق في الموسيقي التصويرية و من اول ثانية في تتر البداية قدر يشدني

ياسين كامل نجح في انه يكتب فيلم تراجيدي مبهج و اهم حاجة انه مفيهوش ابطال مثاليين
بإختصار..انا معجب بالتجربة اللي في الفيلم ده

و دي تالت تجربة مختلفة علي السينما بيقدمها محمد حفظي في سنتين

الإتنين
قهوة سادة..مكتبة الاسكندرية

المسرحية كانت بتعرض ليلتين بس في الاسكندرية
قريت عنها كتير جدآ و كان عندي حماس انني اشوفها
العرض مدته ساعة و نص..و كانوا ساعة و نص من الابداع و الابهار المتواصلين
و كمية تصفيق و ضحك عالية جدآ

المسرحية بتتكلم عن السلبيات اللي بقت موجودة في حياتنا..و قبل كل مشهد بيظهر الابطال قاعدين يشربوا قهوة سادة كإنهم في عزاء

و كإنهم بيشربوا قهوة سادة علي السلبية اللي هيناقشوها في المشهد اللى جاى

المسرحية مفيهاش حاجة وحشة
الموسيقي التصويرية و الإعداد الموسيقي رائعين
الإضاءة و استخدامها في العرض ممتاز
الممثلين موهوبين جدآ
و خالد جلال كتب و اخرج عرض مسرحي عبقري..و كفاية ان الابطال كان بيبقي قدامهم 30 ثانية في الظلام قبل كل مشهد يحضروا نفسهم

قهوة سادة حالية فنية تخلي الواحد بعد العرض له نفس يشرب شربات فرح رجوع العروض المسرحية المحترمة

ملحوظة: يوم الاربعاء شفت فيلم 1000 مبروك

بس اظن ان الكتابة عن فيلم لاحمد حلمي بقي مفيهاش شيء جديد ممكن يتقال

كالعادة...أحلي أفلام الصيف

الأستاذ

بيقولوا ان يوسف شاهين هو الأستاذ

و الحقيقة ماعرفش سبب لأستاذيته

انا اعرف ان الاستاذ هو اللي يطلع ناس يطوروا المجال

و ده شيء ماعملوش يوسف شاهين

لان تلامذته كل اللي بيعملوه انهم بيقلدوه

في رأيي الأستاذ الحقيقي هو شريف عرفه

ليه شريف عرفه هو الأستاذ؟

تعالوا نشوف يوسف شاهين طلع مين و شريف عرفه طلع مين

يوسف شاهين طلع يسري نصر الله و رضوان الكاشف و خالد يوسف

مش محتاج اتكلم عن أفلام الاتنين الاولانيين و خالد يوسف أفلامه بتنجح لنفس سبب نجاح "هي فوضي؟" فيلمه مع يوسف شاهين..الإسقاطات السياسية و الكبت عند الناس

من ناحية الممثلين فيوسف شاهين إكتشف عمرو عبدالجليل و هاني سلامة و أحمد يحيي و يسرا اللوزي

اللي نجح هاني سلامة..و نجاحه بيعتمد علي اعجاب بعض البنات بشكله

لكن تمثيليآ هاني سلامة تمثيله يشل

بينما شريف عرفه إكتشف عمرو عرفه و علي إدريس و أحمد صالح و أحمد مكي كمخرجين

و إكتشف كريم عبدالعزيز و أحمد حلمي و بسمة و محمود عبدالمغني و أعاد إكتشاف محمد سعد و رجع هشام سليم للسينما، ده غير انه فجر مواهب علاء ولي الدين و قدم معاه "الناظر" واحد من أفضل الأفلام الكوميديا في تاريخ السينما المصرية

بدون شك شريف عرفه هو الأستاذ

ده طبعآ من غير الخوض في مقارنة بين مايقدمه الإتنين من مستوي فني في افلامهم و صورة كل واحد منهم لدي المشاهد عاملة إزاى و مدي إحترام كل مخرج منهم لعقل المتلقي

و كل المقارنات دي برضه محسومة للأستاذ...شريف عرفه

بين الفوضي و الحمير

جو

أسطورة الأساطير

هو عالمي حتي لو محدش يعرفه بره مصر

هو عالمي حتي لو محدش بيفهم أفلامه جوه مصر

مؤخرآ بعد نجاح فيلمه الاخير "هي فوضي؟" قرر انه يعترف إعتراف خطير و قال ان ربما يكون قد حصل منه اخطاء في الماضي في طريقة صياغة أفلامه أدت الي ان الناس ماتفهمهاش و تقبل عليها

ده طبعآ بعد ما الفيلم حقق اعلي إيرادات في تاريخ أفلامه

بس أكيد السر مش في عبقرية يوسف شاهين

السر إنه لاول مرة ركز في ان اسم الممثل بيهم المشاهد و ان الناس مايهمهاش الفيلم إخراج يوسف شاهين ولا دوللي شاهين

فإختار خالد صالح و منة شلبي و يوسف الشريف و درة

و جاب خالد يوسف يخرج الفيلم

و دي اسماء تكفي ان الناس تشوف الفيلم حتي لو كان من إنتاج السبكي

و قعد جو يكح في الستوديو لحد ما قالوا له خلصنا تصوير

قام قايلهم إكتبوا اسم خالد يوسف ع الافيش

و بالرغم من الزيطة و الزمبليطة اللي اتعملت و الناس اللي قعدوا يقولوا شوفوا التواضع بتاع "الأستاذ" و الحقيقة معرفش مين استذه

بس ده حق خالد يوسف اللي واضح انه اخرج معظم ان لم يكن كل الفيلم

يوسف شاهين ماحسيتهوش غير في مشاهد قليلة

خصوصآ مشهد مش هحمر و مش هخضر و هرجع كل اللي في بطني

و مشهد الرقصة بين درة و أحمد يحيي

و المشهد الخيالي بتاع المظاهرة

و طبعآ مشهد "بيقولوا البوس اتمنع في السيما عشان تبقي سينما نضيفه..و هي السيما تبقي سيما من غير بوس" و ده بيعبر عن كبت شديد بتعاني منه البطلة اكتر مما هو بيعبر عن وجهة نظر مخرج

مش شايف القصة عبقرية ولا السيناريو منطقي ولا حتي الإخراج كان مذهل

بس الممثلين كانوا كفاءة يشيلوا الفيلم

هات واحد مايعرفش حاجة و قوله هوديك فيلم لخالد صالح و منة شلبي و يوسف الشريف و درة

هيقولك موافق طبعآ

و لو قلت له معاهم هالة فاخر و هالة صدقي ممكن يفتكره فيلم كوميدي و ياخد معاه اهله كمان

و لو ميلت عليه و قلت له و كمان صفوة..هيرمي اهله في البيت و ياخد اصحابه يروحوا يتفرجوا ع الرقاصة

فيلم يجبرك تشوف كل الناس دول بيعملوا ايه في فيلم واحد

و حتي لو كل دول ماكانوش في الفيلم كفاية كمية المراهقين اللي كانوا في السينما عشان يشوفوا المشهد بتاع رحاب الجمل اللي كان بييجي في الإعلان و هو يحتل ترتيب متقدم في قائمة "أسفل مشهد في الـ30 سنة الأخيرة" بجدارة

لكن المشكلة مش في "هي فوضي؟" خالص

المشكلة في يوسف شاهين قبل الفيلم ده

كان كل ما حد يسأله و يقوله الناس مابيفهموش افلامك يقول اللي مايفهمش فيلمي يبقي حمار

كان كل الناس في نظره حمير لحد ما نجح له فيلم و هو في العقد التامن من عمره

هنا بس أدرك انه ربما يكون قد اخطا في افلامه السابقة و ربما يكون اساء تحديد الحمير

بس ياريت يكون مدرك كمان ان الناس مش حمير عشان ينسبوا نجاح الفيلم له

الكلام عن جو مايخلصش..راجعله تاني ان شاءالله

كيف تصبح حبيب قلب النقاد؟

نقاد السينما عندنا تلات ارباعهم مقضيينها بالبركة

يعني مرة قريت في جريدة صدرت يوم الاربع و اتطبعت التلات الساعة 10 بالليل نقد لفيلم الحاسة السابعة اللي اتعرض التلات 9 بالليل و النقد كان مالوش اي صلة بالفيلم

كان مجرد شتيمة في احمد الفيشاوى اللي فيلمه فاشل و اثبت ضعف موهبته في جمودية تعبيرات وشه طول الفيلم و ده لانه كان بيمثل و هو ضميره مش مستريح من اللي عمله في هند الحناوى و النقد طبعآ اتكتب بدون اي مشاهدة للفيلم

و اي واحد شاف الفيلم هيعرف انه مالوش اي اساس من الصحة

ناقد تاني بيصنف العري صنفين..صنف بتاع مخرجين مؤدبين و صنف بتاع مخرجين لسانهم طويل

يعني لو العري في فيلم لمخرج من عينة يوسف شاهين و يسري نصرالله و خالد يوسف أكيد هيبقي موظف دارميآ و واقعية مريرة تسخر من الحال البتنجاني للمجتمع الفقير

لان اي مخرج من دول هيوصف الناقد بإنه حمار لو قرا رأيه و مش هيعزمه علي العرض الخاص و بالتالي الناقد مش هيتعرف علي المزز اللي عملوا المشاهد دي

اما لو المشهد لمخرج تاني مؤدب فالنقد هيكون انه عودة للعري و افلام المقاولات مع التشبيه الممل بتاع سينما الجنس و المخدرات

و رغم انني ضد العري في الحالتين الا انني كمان ضد الناقد المتخلف اللي بيحكم علي العري من منظور اللي بيقدمه مين مش متقدم ليه

عمري ما شفت ناقد قال ان العري في السينما غلط..كلهم شايفينه مهم للدراما معرفش ليه

و حيث كده انا قررت اخطي-من الخطي مش الخطيئة- اولي خطواتي في إتجاه انني اكتب فيلم روائي طويل

و هعرضه علي واحد من المخرجين اللي بيخوفوا النقاد يخرجه عشان ما اتشتمش

قصة الفيلم تدور حول فتاة ليل و متهم في قضية إغتصاب بيتقابلوا في مكتب المحامي الفاسد الملتوى اللي بيترافع عنهم هم الاتنين

و طبعآ البطلة هتقرف من البطل..اللي بدوره هيقرف من فتاة الليل الرخيصة

و يستمر الفيلم في عرض حياتهم المليئة بالمشاهد المسفه و دوافعهم لعالم الجريمة

مع إستعراض الصراع النفسي و الكره ما بين الاتنين

لحد ما تمر ساعة و نص من الفيلم و المنتج يقول لنا اختصروا عشان نقدر نعرضه 4 حفلات

ففجأة بدون مبرر يحبوا بعض

و دي قمة الصراع في الدراما طبعآ

و ينزل التتر

و بعد ما نشوف الفيلم و نرجع من القرف هتلاقوا صوري في كل المجلات و انا باخد جوايز السيناريو

و النقاد اياهم هيقولوا انني مبدع قل ان يجيء مثله في جيل الشباب

و انني احسن من يعبر عن الصراع السيكولوجي في نفسيات ابناء الطبقة المنحطة الوضيعه

و مش بعيد يجاملوني و يطلعوا عليا إشاعات انني هتجوز ساندى بعد ما انهيت علاقتي بمنة شلبي