نقاد السينما عندنا تلات ارباعهم مقضيينها بالبركة
يعني مرة قريت في جريدة صدرت يوم الاربع و اتطبعت التلات الساعة 10 بالليل نقد لفيلم الحاسة السابعة اللي اتعرض التلات 9 بالليل و النقد كان مالوش اي صلة بالفيلم
كان مجرد شتيمة في احمد الفيشاوى اللي فيلمه فاشل و اثبت ضعف موهبته في جمودية تعبيرات وشه طول الفيلم و ده لانه كان بيمثل و هو ضميره مش مستريح من اللي عمله في هند الحناوى و النقد طبعآ اتكتب بدون اي مشاهدة للفيلم
و اي واحد شاف الفيلم هيعرف انه مالوش اي اساس من الصحة
ناقد تاني بيصنف العري صنفين..صنف بتاع مخرجين مؤدبين و صنف بتاع مخرجين لسانهم طويل
يعني لو العري في فيلم لمخرج من عينة يوسف شاهين و يسري نصرالله و خالد يوسف أكيد هيبقي موظف دارميآ و واقعية مريرة تسخر من الحال البتنجاني للمجتمع الفقير
لان اي مخرج من دول هيوصف الناقد بإنه حمار لو قرا رأيه و مش هيعزمه علي العرض الخاص و بالتالي الناقد مش هيتعرف علي المزز اللي عملوا المشاهد دي
اما لو المشهد لمخرج تاني مؤدب فالنقد هيكون انه عودة للعري و افلام المقاولات مع التشبيه الممل بتاع سينما الجنس و المخدرات
و رغم انني ضد العري في الحالتين الا انني كمان ضد الناقد المتخلف اللي بيحكم علي العري من منظور اللي بيقدمه مين مش متقدم ليه
عمري ما شفت ناقد قال ان العري في السينما غلط..كلهم شايفينه مهم للدراما معرفش ليه
و حيث كده انا قررت اخطي-من الخطي مش الخطيئة- اولي خطواتي في إتجاه انني اكتب فيلم روائي طويل
و هعرضه علي واحد من المخرجين اللي بيخوفوا النقاد يخرجه عشان ما اتشتمش
قصة الفيلم تدور حول فتاة ليل و متهم في قضية إغتصاب بيتقابلوا في مكتب المحامي الفاسد الملتوى اللي بيترافع عنهم هم الاتنين
و طبعآ البطلة هتقرف من البطل..اللي بدوره هيقرف من فتاة الليل الرخيصة
و يستمر الفيلم في عرض حياتهم المليئة بالمشاهد المسفه و دوافعهم لعالم الجريمة
مع إستعراض الصراع النفسي و الكره ما بين الاتنين
لحد ما تمر ساعة و نص من الفيلم و المنتج يقول لنا اختصروا عشان نقدر نعرضه 4 حفلات
ففجأة بدون مبرر يحبوا بعض
و دي قمة الصراع في الدراما طبعآ
و ينزل التتر
و بعد ما نشوف الفيلم و نرجع من القرف هتلاقوا صوري في كل المجلات و انا باخد جوايز السيناريو
و النقاد اياهم هيقولوا انني مبدع قل ان يجيء مثله في جيل الشباب
و انني احسن من يعبر عن الصراع السيكولوجي في نفسيات ابناء الطبقة المنحطة الوضيعه
و مش بعيد يجاملوني و يطلعوا عليا إشاعات انني هتجوز ساندى بعد ما انهيت علاقتي بمنة شلبي
2 comments:
بعد فاصل من المسخرة و القهقهة و الانشكاح يا عزيزي سولتو,, لقيت أني لازم أرد ع البوست ده لأن دايما بيعجبني رأيك في السينما و النقاد.. عندك حق! ساعات كتير بقرا نقد و أحس أن اللي كتبه كان قاعد في بلكونة بيتهم مستني الغدا اللي مراته لسه متعبتش نفسها و طبخته, و الدنيا حر و الميزانية مش سامحة يجيب تكييف, و رئيس التحرير مطلع عينه و مستقصده و عايزه يخلص النقد عشان يتنشر و نخلص..
لذا, يقوم الكاتب مغلوب على أمره و يكتب أي هبل في الجبل من وجهة نظره الشخصية(و مش من منظور مشاهدته للفيلم طبعا لأنه استخسر يدفع فيه 15 جندي و قال أجيب فول للعيال أفيد..) فطبعا بيطلع النقد بهذا الابداع الذي لا يمت للفيلم بصلة أصلا..
مستنية فيلمك و أعمالك اللي حتكمم أفواه النقاد من الاعجاب يا سولتو.. :D
استني فيلمي الجاى مع سمية الخشاب..هترجعي من الإسفاف :D
Post a Comment