نكمل كلامنا في التليفزيون..و المرة دي عن البرامج و القنوات..و كمان الإعلانات
السنة دي كانت مهمة..لانها شهدت تغييرات كتير اوى في القنوات
اولا:القنوات و البرامج
أقوي قناة جديدة
قنوات الحياة
قنوات اتولدت قوية..إنتاج ضخم..مذيعين نجوم
إكتشاف مذيعين جدد..كل من يطلق عليهم نجوم الصف الاول سهل تلاقيهم علي شاشة الحياة
و يكفي إن عادل امام بيجري حوارين في نفس السنة مع القناة دي..و ده انجاز لم يسبقهم إليه غير محمود سعد في البيت بيتك
أسخف قناة جديدة
قناة موجة كوميدي
سخيفة ببرنامجها اليتيم المستفز توك شو و الافلام و المسلسلات القديمة
جايزة الغباء المستمر
ميلودي تريكس
جايزة مش محتاجة اى توضيح
جايزة السخافة اللامتناهية
مناصفة بين
إنجي علي - يا مسهرني
عمرو - شبابيك
قناة دريم بتتميز بوجود اتنين من أسخف المذيعين اللي الواحد ممكن يشوفهم
إنجي علي في برنامج يا مسهرني..بصرف النظر عن ازمتها مع كتفها
إلا انني مش فاهم هي ليه بتشب لفوق و تصرخ و هي بتكلم الجمهور كإن الجمهور قاعد ورا سور
و سرقت حركة هالة سرحان بتاعة التصقيف عمال علي بطال
و لازم تاخد المطرب من ايده و هو قايم يغني و تقف جنبه تصقف..عندها عقدة من التصقيف تقريبآ
اما عمرو بتاع شبابيك فهو تقريبآ محاولة يائسة من قناة دريم لتعويض غياب عمرو سمير اللي سابهم و راح
otv
otv و بالتالي بتوع دريم قرروا يردوا الخبطة لبتوع
و خطفوا عمرو و حطوه مكان عمرو سمير في تقديم برنامج شبابيك
بس يبدو انهم شربوا مقلب فظيع و فتاك
اول مرة اشوف مذيع بيرخم علي الضيوف ببراعة يحسده عليها بياعين المناديل في إشارات المرور
جايزة بيت الرعب
مذيعين قناة دريم
كل ما اشوف برنامج هواء علي قناة دريم احس ان المذيعين تلاميذ مدرسة مزنوقين في حصة عربي فيها تسميع
عايزين الوقت يعدي بسرعة و يروحوا البيت
اكيد الهواء له رهبة و قلق..بس دول كل يوم علي الهوا
و كل يوم بيطلعوا مرعوبين
سواء الشلة بتاعة شبابيك اللي بحسهم دماغهم مجوفة بالاضافة لكونهم تايهين..او فرح مذيعة سمعنا يا سيدي بغمازاتها الحلوين
و حتي مني الشاذلي بتتلجلج في العاشرة مساءا..و خالد الغندور لازم يتلخبط في 4 جمل علي الاقل في الرياضة اليوم
هم بيوقفوا لهم عفريت ورا الكاميرا ولا ايه؟
جايزة الراجل البركة
مصطفي عبده
بما انه كان صاحب البرنامج المنافس الوحيد في المحور..رحب بمنصب مدير البرامج الرياضية في قنوات دريم
و البرامج الرياضية في قنوات دريم ما هي الا برنامجه و برنامج خالد الغندور
كان اهم انجازاته تغيير اسم برنامج شوبير من "الكورة مع دريم" الي "الكورة في دريم" و طبعآ الفرق واضح
خلال اسابيع قليلة نجح في انه يخلي برنامجه خفي و غير مرئي
و هو بيكتفي بدور الراجل البركة الكبير اللي بينصح اللاعيبة..و دايما يبدأ نصيحته بجملة "و احنا بنقووول" و يقوم فاقع نصيحة من عينة اللاعيب الصغير لازم يحترم اللاعيب الكبير...و احنا مش مع حد ضد حد
جايزة البرنامج العبيط
توك شو
إستظراف.. قلة ادب..مبالغة تصل لحد العبط
و ضيف علي ده انهم قرروا يعملوا في يوم توك شو 2
ايه الفرق بين 1 و 2 معرفش؟
و ايه سر الإعلانات المكثفة عن توك شو 3 و كإن الناس هتموت علي البرنامج برضه معرفش
جايزة أنا المذيع..انا المذيع
علاء صادق
مشفتش مذيع عدواني كاره الناس كلهم قد علاء صادق
في نظره الحكام مرتشين و سفلة و صراصير و قاذورات و ريحتهم وحشة علي حد تعبيره
و اللي يعارضه يدور له في الملفات و يخترع فضايح و ينزل في وصلة ردح
و كل الكلام ده بيقوله و علي وشه ابتسامة من الودن للودن تضفي له إيحاء المختل عقليآ
جايزة الهبوط المستمر
قناة دريم
مين يصدق ان دريم اللي قدمت محمود سعد كمذيع..و خلت هالة سرحان مذيعة جماهيرية..و كانت القناة اللي كسرت كل القوالب
هي نفسها دلوقتي القناة اللي مفيهاش غير برنامج او اتنين الواحد ممكن يشوفهم؟
قناة فقدت بريقها بطريقة غريبة
جايزة التألق المستمر
محمود سعد
بيعمل كل اللي هو عايزه..حوارات فنية ..يساعد الفقراء..برنامج جواز
يمكن يكون اول مذيع يعرف يستغل إمكانيات التليفزيون المصري بطريقة سليمة
نموذج للإعلامي الذكي
ثانيا: الإعلانات
أحسن إعلان موبايل
حملة إعلانات شومبونجو - موبينيل
إخترعوا سؤال مايهمش الناس و هو الشبكة القديمة راحت فين؟
بس خلوا الناس كلهم يتابعوا الحملة الإعلانية بمختلف فئاتهم العمرية
لدرجة ان في جروب علي الفيس بوك بيطالب بإعادة القرد اللي بيتكلم من شمبونجو
يبقي اننا نعرف ان الشبكة القديمة إشترتها إتصالات و ما اتشحنتش علي شومبونجو
اسوأ إعلان موبايل
صابر - إتصالات
كان واحد من افشل المحاولات الفاشلة لإختراع إعلان مرح لإتصالات
أحسن إعلان لنجم
حملة كوكاكولا - كريم عبد العزيز
رغم انني من محبي بيبسي و بكره كوكاكولا..و رغم ان إعلانات حلمي مميزة دايمآ..بس المرة دي كريم حملة إعلاناته خطف الاضواء من حلمي اللي قدم السنة دي واحدة من اضعف حملات بيبسي الإعلانية
اسوأ إعلان لنجم
حملة رشيدي الميزان - رامز جلال
الجمل و المواقف كلها مسروقة من كتاب "شكلها باظت" لعمر طاهر..و ده دفع عمر طاهر انه يكتب مقال في جريدة الدستور يوضح انه مش هو اللي كتب الإعلانات
و لما اتصل بمنتج الإعلانات إعترف له بالسرقة..و لما اتصل برامز جلال قال له ماقريتش الكتاب
أذكي حملة إعلانية
حملة المفتش كرومبو
مين فينا مابيستناش اللغز الجديد لكرومبو؟
و مين فينا مابيحبش اسامي الابطال؟
أغبي حملة إعلانية
حملة سرحان & نفيسة
مين المستفز اللي عمل الإعلانات دي؟
و مين الاكثر استفزازآ اللي بيعمل اصوات سرحان و نفيسه؟
تقليد فاشل لفكرة كرومبو
و إضافة قوية للعك بتاع موجة كوميدي
...بوست كمان و تخلص الجوايز إن شاء الله
5 comments:
ممكن أقول حاجة..أنا آسفة حاجة مش مهمة
بس الإعلان إللي فيه كريم عبد العزيز بيرمي واحد كبير في السن عواد في النيل بتاع كوكاكولا..عيب قوي وميصحش
الإعلان إللي فيه منة عرفة..بتوقع سامح حسين برضه الأكبر عنها
هي وشوية العيال الصغيرين يضحكوا عليه
عيب قوي وميصحش
الصغير والكبير بس!
بس
اكيد طبعآ الصغير مفروض يحترم الكبير
و ممكن اتفق معاكي فعلا ان فكرة اعلانات منة و سامح كان فيها الجزئية دي
بس إعلان كريم و المطرب مكنش مرتبط بسن المطرب..يعني لو كانوا جايبين طفل كان هيأدي نفس الغرض..اختلف ان الممثل اللي عمل دور المطرب سنه اكبر من كريم شوية
طيب أنا آسفة يعني
اشمعنى يعني الحياة قوية علشان جه عليها عادي إمام مرتين
إمم
أنا آسفة..مهي دريم اتنين على طول بيجي عليها حاجات عن دكتور أحمد زويل
لقاءات عنه أو تستضيفه منى الشاذلي لما يجي صح
برنامجها حلو والله العظيم
بس..انا حاسة ان دريم..تقريبا دريم اتنين احسن..مش عارفة..فيه ناس كدة جت فيها..مش عارفة حلوة فعلا..مش بس فنانين يعني وكدة..الحياة..حاساها جذابة وبراقة..مش متابعاها قوي..بس مش عارفة هي بتستضيف فنانين كتير قوي ولا انا متهيألي..حتى برامج الكورة باين..
بس..دريم اتنين..مش عارفة..انا مش متابعة والله اسفة..بسحتى باين برامج المنوعات فيها..هو صباح دريم مثلا اختي بتقولي عليه استضافوا مساعدة دكتور مصطفى السيد تقريبا..وبرنامج مش فاكرة اسمه الطبعة التانية باين..عملوا حلقة عن دكتور زويل كانت حلوة قوي..وطبيعي لما بيجي دكتور زويل بيجي مع منى الشاذلي..
بس الحياة..انا اسفة..مش تقليل من حد..بس لما بفتحها..بحس زي ما بيقولوا..ماسورة فن واتفتحت..البرامج والاعلانات ومعظم الضيوف..وده اللي مخليها براقة..أكيد انا غلط علشان مش متابعاها كويس صح ؟!!
يمكن انا غلط.
...........
آسفة,ممكن طيب أقول حاجة..بخصوص المفتش كرومبو :)
بنت أختي من يومين.بكلمها في التلفون,بتقولي,إيمان.انتي عارفة حلقة المفتش كرومبو,ده راح امريكا..والحلقة صعبة خالص مش هتعرفيها
متابعة هي :)
المفتش كرومبو ده بيفكرني أصلا..ببرنامج..5757160 إذاعة..ولا كان اسمه ايه..مش فاكرة :)
بحس ان زمان..كانوا بيعملوا ألغاز..كدة للكبار..دلوقتي للأطفال :) حتى الكبار بقوا أو بقينا زي الأطفال..أنا آسفة,,بحس كل حاجة موجهة لينا بقت شكلها كدة:)
على فكرة أنا آسفة أصلا..مانا بتفرج على كل الحاجات دي :D
أنا بس بفكر ويمكن بفكر غلط :)
kol d channels ya sulto :|
ana bb2a kter if i watch ART moveis :D
Post a Comment