السنة دي الأفلام كانت كتير..بس الأفلام الجيدة كانت قليلة
السنة اللي شهدت تجارب جديدة فيها مغامرة من اصحابها زي أسف علي الإزعاج و حسن و مرقص و ورقة شفرة و كباريه
هي نفسها السنة اللي شهدت تجارب مريعة زي جنينة الاسماك و الريس عمر حرب
كانت سنة غريبة سنيمائيآ..لي فيها مليون ملاحظة
اول فيلم شفته في 2008 كان طباخ الريس و اخر فيلم شفته كان من ساعة و للأسف هو من انتاج 2007 و هو اخر الدنيا..و الحقيقة كان نفسي يكون انتاج 2008 عشان كان هيكتسح في الجوايز..ربما يكون لي رجعة معاه في بوست تاني بعدين..لاته فيلم مايتسكتش عليه..هل انا محظوظ انني ماشفتوش كل الفترة دى؟
فيما يلي..رأيي في الافضل و الاسوأ طبقآ للأفلام اللي شفتها في 2008
المنافسة خرج منها أفلام زي هي فوضي و الجزيرة و خارج علي القانون بما انهم عرضوا في ديسمبر 2007
و طبعآ هستثني من حسبة الأفلام بتاعة السنة دي..الأفلام اللي من نوعية كامب و بنات و موتوسيكلات
عشان كده..المنافسة كان سهل حسمها نظرآ لان الافلام اللي بتتنافس عددها قليل و معظمها كان متوسط المستوي
و بالتالي معظم الافلام بعيدة عن المنافسة علي اي من لقبي الافضل او الاسوأ
أفضل فيلم
أسف علي الإزعاج
أفضل ممثل
أحمد حلمي - أسف علي الإزعاج
أفضل ممثل مساعد
مناصفة بين
أحمد الفيشاوى - ورقة شفرة
آسر ياسين - زي النهاردة
محمود حميدة - أسف علي الإزعاج
جمال سليمان - ليلة البيبي دول
أفضل ممثلة
منة شلبي - أسف علي الإزعاج
أفضل ممثلة مساعدة
سولاف فواخرجي - ليلة البيبي دول
أفضل سيناريو
أيمن بهجت قمر - أسف علي الإزعاج
أفضل إخراج
خالد مرعي - أسف علي الإزعاج
أفضل موسيقي تصويرية
مناصفة بين
راجح داوود - غرفة 707
ياسر عبدالرحمن - ليلة البيبي دول
اسوأ فيلم
غرفة 707
اسوأ ممثل
عمرو واكد - جنينة الأسماك
اسوأ ممثل دور مساعد
ياسر فرج - غرفة 707
اسوأ ممثلة
مناصفة بين
رولا سعد - غرفة 707
هند صبري - جنينة الأسماك
اسوأ ممثلة مساعدة
سميرة محسن - غرفة 707
اسوأ سيناريو
سميرة محسن - غرفة 707
اسوأ إخراج
مناصفة بين
إيهاب راضي - غرفة 707
يسري نصر الله - جنينة الاسماك
في شوية جوايز خاصة لجنة التحكيم شايفة ان من الواجب منحها
جايزة اكتر فنان مظلوم
مجدي كامل / راجح داوود - غرفة 707
شيلوا موسيقي راجح داوود و مجدي كامل باداءه من الفيلم و حطوهم مع مخرج و ممثلين كويسين و سيناريست يشتغل شوية علي قصة الفيلم..هتاخدوا فيلم تاريخي
جايزة اكتر فنان عمل حاجة مفيدة
محمد حفظي - إنتاج ورقة شفرة / زي النهاردة
ادي مساحة لـ3 مجهولين لاغلبية الجمهور..و وثق في امير رمسيس بعد كوارثه السنيمائية السابقة فطلع بفيلم ممتع زي ورقة شفرة
و مافاتش شهور قبل ما يكرر التجربة تاني مع عمرو سلامة و يثق فيه كمخرج مالوش اي تجارب ولا دراسة فطلع بفيلم زي النهاردة
جايزة أذكي ممثل
أحمد الفيشاوي - ورقة شفرة / زي النهاردة
و عدم اهتمامه بحجم الدور علي قد قيمته في ورقة شفرة..بيثبتوا ان احمد الفيشاوي بني ادم ذكي بيعرف يحسب خطواته صح
و الدليل انه دلوقتي بيستعد لعمل فيلم إكرامي تايتانيك اللي هيكون مخصص لشخصية إكرامي اللي قدمها في ورقة شفرة
و رجع تاني كرر المغامرة مع محمد حفظي و قدم زي النهاردة مع عمرو سلامة..و طبعآ مش محتاج اتكلم عن الفيلم و تألق الفيشاوى فيه
جايزة الزيطة ع الفاضي
شركة جودنيوز - حسن و مرقص / ليلة البيبي دول
جايزة اكتر ممثل محظوظ
آسر ياسين - زي النهاردة / الوعد
في شهرين حياة آسر ياسين كممثل اتغيرت
دور رائع في زي النهاردة
بعده بطولة في فيلم بيساعده فيه غسان مسعود و محمود ياسين و بيكتبه وحيد حامد
مشفتش فيلم الوعد..بس اي ممثل يبقي محظوظ لما ده يبقي فريق العمل اللي يشتغل معاه بعد دور مهم زي اللي قدمه آسر في زي النهاردة
جايزة السعفة الخضراء
لكل فريق عمل كارتون سوبر هنيدي
عمر طاهر..شريف جمال..محمد هنيدي..طلعت زكريا..حنان ترك..علاء مرسي
كارتون مصري كوميدي فيه نجوم صعب يجتمعوا في فيلم واحد دلوقتي
كل حلقة تساوى عندي فيلم لهنيدي و طلعت زكريا
بيقدموا في ربع ساعة كوميديا اكتر من اللي ممكن تتشاف في فيلم ساعتين
دي كانت الجوايز الخاصة بالسينما..باقي الجوايز تستكمل لاحقآ إن شاء الله
6 comments:
أسوأ. ممثلة مناصفة بين :D
حضرتك محسسني إن حاجة مهمة :D
بعتذر عن التدخل طبعا :)
قصدي عن لقب أسوأ مناصفة بين..كأن هيتخانقوا على اللقب :)
ثواني حضرتك تاني..بعد اذن حضرتك :)
إيه السعفة الخضراء دي :)
واشمعنى حضرتك سوبر هنيدي..بعد اذن حضرتك :)
وآسفة مرة تانية للتدخل:)
وبعدين ثواني حضرتك :)
أفضل ممثل مساعد
مناصفة بين
أحمد الفيشاوى - ورقة شفرة
آسر ياسين - زي النهاردة
محمود حميدة - أسف علي الإزعاج
جمال سليمان - ليلة البيبي دول
هو مناصفة تنفع هنا :)
مش مناصفة يعني بالنص :)
تبقى مشتركة..ولا مناصفة مجازا يعني :)
اقصد..مناصفة بالنص..ودايما بيقولوها لو اتنين
مش شفتها خالص لان مفيش تقريبا تلاتة اخدا
تبقى مشتركة بين :)
اعتقد مناصفة بالنص
ودايما بيقولوها لان اغلب اللي اخدوا اتنين صح :)
اسفة:)
نصف..مناصفة..اسفة:)
دي اربع ترباع :)
واسفة للتدخل والله..
السلام عليكم:)
طبعآ اسوأ ممثلة جايزة مهمة جدآ - بالنسبة لي- و لازم تبقي مناصفة..بس هم مش هيتخانقوا..انا اللي هتخنق لو اغفلت حق واحدة منهم في الجايزة
بالنسبة لحتة مناصفة..فهي الكلمة المستخدمة لأي شيء مشترك بين اكتر من شخص..مش لازم شخصين
علي سبيل المثال مهرجان الاسكندرية السنيمائي اللي فات منح جايزة احسن ممثل لـ4 ممثلين..و جايزة احسن ممثلة لـ4 ممثلات..منحها لهم مناصفة
ممكن تتخيلي اصلا تتفرجي علي مهرجان و تلاقي المذيع بيعلن جايزة احسن ممثل متالتة او مرابعة؟ :)
السعفة الخضراء؟
عارفة سعفة النخل؟ اللي هي ورقة النخل العريضة؟
في مهرجان كان عاملين الجايزة الاولي باسم السعفة الذهبية
و بالنسبة لي هي السعفة الخضراء
اما إشمعني سوبر هنيدي..فهي للأسباب اللي ذكرتها
لو مشفتيش سوبر هنيدي قبل كده..فإنتي فوتتي عليكي كتير
علي العموم هرجع تاني بلينكات لكل حلقات المسلسل لما النت يتصلح في مصر ان شاءالله
ايه رأيك بقي في الجوايز..و هل في حد حاسه انه كان يستاهل جايزة و مافازش بها؟
طيب اسفة بقى اني اتلخبطت معلهش:)
كان قصدي السغفة الخضراء يعني مش الذهبية:) هياخدوا خضراء :)
معلهش بقى بوظت الموضوع قوي بعتذر لحضرتك والله:)
Post a Comment