ساعات قليلة و تخلص السنة دي إن شاءالله
في الاول كنت حابب اتكلم عن 2008 و احداثها.. بس نظرآ لازدحامها بمواقف بايخة
و لانني مش من هواة البكاء علي الأطلال
لقيت نفسي بقول خليها تروح لحالها..مش عايز افتكر اللي جرالي فيها
خلونا نفتكرها بالخير احسن..عشان كده هتكلم من منظور تاني عن 2008
هتكلم عن الحاجات اللي اضفت لسنة 2008 اللي مريت بها لحظات جميلة
حاجة كده اشبه بشكر خاص اللي بتتكتب في اخر الكليبات
شكر خاص لمحمد صاحبي اللي قابلني بالصدفة في واحدة من اسوأ لحظات 2008 و مكنش يعرف مالي و قال لي جملة هي اللي مصبراني لحد دلوقتي
شكر خاص لمحمد نصر اللي عرفني علي محمد قباري بالصدفة
شكر خاص لقباري اللي عرفني علي أحمد ماجا عن عمد
شكر خاص لعمر طاهر اللي خلاني قريت له 4 كتب و شفت له 45 حلقة من سوبر هنيدي و كل ده في سنة واحدة
شكر خاص لمحمد منير عشان عمل اغنية طعم البيوت وقت ما كنت بعزل
شكر خاص لعم عثمان بتاع الامن في بيتنا القديم اللي فضل اخر ساعة لي في البيت بيبص لي و هو متأثر و مدمع
و كمان شكر خاص لعم يونس المكوجي اللي ساب شغلانة المكوي و تفرغ لوظيفته الحكومية بس مظنش هيقدر يسيب تشجيع الزمالك اللي جابله الضغط و خلاه مكسوف يروح الشغل بسبب زمايله الاهلاوية
شكر خاص لحسن شحاته اللي فرحنا في بطولة الامم اللي فاتت
شكر خاص للاعيبة المنتخب اللي كانوا رجالة و دي حاجة مش متعودينها منهم
شكر خاص لعمرو زكي اللي ادي للدوري الانجليزي اللي بحبه نكهة تخليني فخور انني مصري
شكر خاص لأشرف عبد الباقي عشان عمل برنامج دارك
شكر خاص لمصممي و محرري مواقعي المفضلة
شكر خاص لأحمد حلمي اللي عمل اسف علي الإزعاج و عمره ما خيب ظني فيه
شكر خاص لمحمد شرف اللي قدم دور بسيط جدا و ممتع جدا في نفس الفيلم..اوعي تكون بلاستيك
شكر خاص لمنة شلبي اللي نضجت اوى و بقت تمثل بمزاج عالي
شكر خاص لمحمد حفظي عشان انتج ورقة شفرة و زي النهاردة
شكر خاص لمحمد حماقي عشان دايمآ بيثبت انه احسن مطرب في جيله بدون القاب
شكر خاص لعمرو اديب عشان دايما لما النت بيقطع و اكون زهقان بيكون هو المنفذ الوحيد لحد ما يسلمني لقنوات المسلسلات الاجنبية الساعة 2 صباحا
شكر خاص لكل مبرمج شغال في ستوديوهات
SEGA & Sports Interactive
علي إختراعهم العبقري لعبة
Football Manager 2009
:شكر خاص لإحساس كل من
أصالة
تامر عاشور
تامر عاشور
محمد نور
محمد حماقي
محمد محي
MTM
عمرو مصطفي
إيساف
حسام حبيب
شيرين
أحمد سعد
رامي صبري
أنغام
سعاد ماسي
محمد منير اللي ماجربتش اسمعه غير السنة دي
شكر خاص لكل صناع الافلام الحلوة اللي شفتها و اللي لو حاولت اذكر حد فيهم هنساه
و شكر خاص لإحساس عمر طاهر في مقالاته
شكر خاص لكل حد من اصحابي كتب حاجة بإحساس عالي
شكر خاص لفنون علي مدونتها اللي ادمنت متابعة كل حرف فيها
شكر خاص لمحمد بدر عشان عمل راديو شلة و عشان هو شخصية جميلة
شكر خاص لصاحبي عمرو و جملته "اخشي ان اكون قد ازعجتك" اللي بيقولها لي في كل مكالمة و مش فاهم لها سبب
شكر خاص لكل حد من اصحابي وقف جنبي و سمعني و انا مخنوق و اداني نصيحة فادتني..و دول مش كتير علي فكرة
شكر خاص لكل حد من اصحابي خذلني..الجرح رغم انه بيعلم بس بيعلم
شكر خاص لكل الناس اللي اجبرتني الحياة ابعد عنهم في 2008..اتمني نتقابل تاني بجد
شكر خاص لهشام نزيه و اصالة و مدحت الخولي علي الحالة بنت اللذينه في اغنية نص حالة
شكر خاص لخالد حماد علي موسيقي أحلي الاوقات
شكر خاص لعمرو اسماعيل علي موسيقي أسف علي الإزعاج اللي خلته بطل تاني جنب أحمد حلمي..و طبعآ الإعداد الموسيقي للفيلم كان في نفس مستوي الموسيقي التصويرية
شكر خاص لأحمد العريان علي إنتاجه اغنية أمنية سليمان الحب بييجي في ثانية..اللي بعتبرها من احلي حالات الاغاني في 2008
شكر خاص لمحمد نور عشان كل فترة بيثبت انه ذكي
شكر خاص لنادر حمدي اللي برغم اللي بسمعه عنه بيفضل واحد من اذكي الموزعين الموسيقيين
شكر لخالد سليم انه رغم كل الحاجات المقرفة اللي فيه و حواليه عمل اغنيتين زي فين الحبايب و زي النهاردة
شكرآ لكل اصحابي اللي خلوا عيد ميلادي اللي فات ممتع
شكر خاص لكل الناس اللي مقتنعين انني قادر أوصل
شكر خاص لحبيبتي اللي مقدرش ابعد عنها يوم...الأسكندرية
و شكر خاص تاني لعمر طاهر عشان كان دايمآ بكتابته بيعدل لي كفة الميزان لما تبقي طابة
شكر خاص لفريق عمل مسلسل سوبر هنيدي..بما فيهم عمر طاهر
شكر خاص لفريق عمل اغنية محمد العتر "بسهر"..و للمصادفة البحته اللي كتبها عمر طاهر
شكر خاص تالت لمحمد حماقي علي اغاني "و افتكرت" و "انا لو اذيته".. الإحساس اهم حاجة
شكر خاص لكريم ابن خالتي و احمد صديق طفولتي..ماعملوش حاجة بس برضه اتربينا سوا و العشرة ماتهونش
شكر خاص لكل حد عمل حاجة خلتني ابتسم او افكر او احس احساس حلو
شكر خاص لكل اللي هفتكرهم بعد ما ابعت البوست
شكر خاص لكل اصحابي الجدعان
شكر خاص لكل اللي حبوني من قلوبهم و اتمنوا لي السعادة و الخير
شكر خاص و إعتذار كبير لناس معرفتش قيمتهم غير متأخر
شكر خاص لكل واحد قرا البلوج دي
شكر خاص لكل واحد كتب كومنت علي بوست
شكر خاص لكل اللي شجعوني استمر علي الكتابة بإستمرار لأطول فترة في حياتي
شكر خاص لكل اللي رافقوني و دعموني في مشوار 2008 الصعب
و في الختام شكر خاص لكل واحد قرا البوست دي رغم انها ممكن تكون طويلة و مالهاش معني
بعد الختام
(1)
خلاصة 2008
سألت نفسي كتير..مارسيتش يوم علي بر..انا اللي فيا الخير ولا اللي فيا الشر؟
مليان عيوب ولا.. خالي من الذنوب ولا..ولا ايه؟
ولا انا جوايا و مش داري الاتنين في بعض
و 500 حاجة و مالهمش دعوة ببعض
انا مين و فين انا ايه؟
مفروش طريقي بورد ولا الزمان ده انا فيه اضعف واحد ع الأرض؟
(2)
اغاني من تحت الماء
هو انت مين بيصدقك علشان عايزني اصدقك؟ - تامر عاشور
مش غريب عليكي..و اللي فيكي فيكي - صادق
ابحث عنك كل يوم و انا اعلم انك بداخلي - يوري مرقدي
و الله و الايام عدت قوام..ياما شوفنا سوا و كبرنا هوا في مدرسة الحياة - محمد عدوية
الحب بييجي في ثانية مالوش وقت و مواعيد - أمنية سليمان
هيمانة و نفسها حد يبربش.. يشغل وقتها و يدردش.. و اهو من وقتها هي بتنكش عايزاني احبها - محمد محي
مين بيفضل طول حياته في مطرحه؟ ناس بييجوا و ناس في ثانية يروحوا
لو بموت هسكت مالومشي زي ما انت هتمشي همشي..كل واحد يعمل اللي يريحه - محمد عطية
كل ما انساها افتكرها..مهما اشوف مابشوفش غيرها- رامي صبري
خلاص المستخبي اهو بان..في ناس في الغش محترفة..بجد طريقة مختلفة - جنات
يرضيك كده فات كتير و انا مستني مابقتش حاجة تطمني و هموت عشان الاقيك - محمد حماقي
الحياة مقدرش اقولك حلوة بعدك قد ايه - محمد نور
أسامحك..قال اسامحك..لو بموت ولا يوم هصارحك..اصلك انت كسرت فيا حاجات كتير - محمد حماقي
و حتي ان كنت مش جنبي..بشوفك نور ملي قلبي و احس ان انت جوايا يا كل منايا و حبايبي - حسام حبيب
و أتاريني علقت روحي بحبال دايبة..ضيعت وقتي في مجازفة خايبة - إيساف
اليأس ضعف و خوف جبان..لكن الامل يفتح ببان - مدحت صالح
و إفتكرت مسكته في ايدي..و ايدي خلاص سايباه - محمد حماقي
ده انا من زمان شايفك و للناس بوصفك..و بغير عليكي قبل حتي انا معرفك - حاتم فهمي
لسه مش قادر اصدق..و ابتديت معرفش افرق بين مشاعري في وقت جرحي و بين مشاعري في البداية - إيساف
من زمان عايش بعقلي و قلبي رافض فتح بابه..سبب مخاوفه كان اللي شايفه من الحب و من صحابه - وسط البلد
ضيعني منه و انا كنت نفسي مضيعش - حاتم فهمي
و مش كل الكلام يتقال..وحشتيني - محمد نور
و هتفضل علي طول لعبتها..إكمنك دبت و حبيتها - وسط البلد
لعنة الحب اللي بتذل الحبيب - أصالة
شكلي ظلمت انا حد زمان و مخدتش بالي - عمرو مصطفي
عاجبك كده..صعبان عليا كل ده اللي وصلت ليه - محمد نور
و كفاية لما بتلاقيه فاتح دراعه و بيناديك و يقول تعالي في حضني ده انت واحشني موت - محمد منير
علي ايه تنزل دمعاتك لو يوم عداك او فاتك..احلم بالجاى تعيش مرتاح
الدنيا لو جارحة لونها لون فرحة..ماهو ايه بيطول عمر الواحد غير الفرحة - محمد منير
و مابين كده او كده..مش مرتاح انا - محمد منير
كل سنة و انتم طيبين..ميعادنا في 2009 بإذن الله
20 comments:
العفو يا حبيبى D:
يا راااجل دانا اللي ادمنت مدونتك من اول جرعة :)
كل سنة وانت طيب يا سلطان بوست استمتعت جدا بقرائته كالعادة
نسيت تحط اغنية ل تيمو يا سلطان اخس عليك دا كان ليه روائع في 2008 :)
المفروض تنزل لكل واحد مننا بوست شكر خاص
احس من عمر طاهر اللى بتشكره كل سطرين
على الاقل احنا بنرد لكن هو مش هيسال فيك
بس يلا مش مشكله احنا برده بنعمل باصلنا
كل سنة وانت طيب وبخير ويارب السنة الجديدة ياسولتو تكون سنة سعيدة عليك .. ماتكونش زي 2008 الي كانت كلها نكد وغم من اولها لاخرها
ربنا يوفقك يارب ويسعدك :)
كل عام وأنت بألف خير يا سلطان
وصادق Nanoz مش تشكر الي بيسأل عنك
احسن من عمر بطيخ اللي عمال تشكر فيه كل سطرين
يارب تكون سنة حلوة عليك
ونفضل مستمتعين بمدونتك الرائعة
وتحقق امنياتك يارب يامحمد
تحياتي..
العفو و لا شكرا على واجب
بما اني من اللي قرو البوست
و بضم صوتي لصوتك في بعض التشكرات دي و خاصة لاصالة على الحالات اللي في الالبوم و خالد سليم حبيبي في زي النهاردة
و كل سنة و حضرتك طيب
طيب ممكن أقول حاجة,
شكرا جزيلا لحضرتك على فكرة
عن موقف,,بجد في المنتدى.بشكرك عليه
حتى لو كان سؤال عن مشكلة فعلا..في السنة دي..مش هنسى الموقف ده.وبشكر حضرتك عليه فعلا :)
شكرا ليك
واعتذار لحضرتك..عن..مش سوء ظن..يعني لو هي كلمة كبيرة ..بس سوء ظن على خفيف..يعني المنتدى والوقف والحاجات البسيطة دي..بتدي ساعات فكرة غلط جوانا عن شخصيات..بعتذرلك..
علشان دي بس حاجات..خلتنا أو خلتني شخصيا..أعرف شخصية حضرتك من خلال المنتدى..أو مدونة حضرتك خلال السنة دي
فشكر ليك..واعتذار لحضرتك برضه:)
شكرا ليك.
أنا آسفة,إن كلامي وشكري لحضرتك.عن حاجة مش تعتبر حياة,منتديات وكدة بس..بس دي أوجه التعامل زي ما بيقولوا:) وحابة اني اشكر حضرتك مع ليستة الشكر اللي حضرتك حاططها دي يعني :)
عودة 2009
شايف نفسنة جامدة من عمر طاهر مش عارف ليه..رغم ان كل اللي نفسنوا لو عدوا عدد المرات اللي شكرتهم فيها هيلاقوا انني شكرتهم قده و ممكن اكتر
و بعدين عمر طاهر كان صانع الالعاب في مباراة 2008 بالنسبة لي..أقل واجب انني اشكره
لكن نعمل ايه في النفسيات بقي :D
خلونا نبتدي الردود بقي (H)
أمجد..شفت انا اصيل ازاى و متغاضي عن حاجات كتير و شكرتك؟ :D
فاطمة..و انتي طيبة و بصحة و سلامة
كنت عمال افكر بشدة فعلا في حتة تامر دي..بعدين قلت مش معقول اقرف الناس ليلة راس السنة
لكن لو كنت هختار له جملة فبدون شك كان لازم احط الجملة اللي بتقطع قلبي من الرومانسية
"نيمت العجلة كده ع الجنط و حلفت لاجيبها و حياة طنط"
ميكانيكي بيغني :D
نونوس..عمر طاهر اللي مش عاجبك ده هو مؤلف سوبر هنيدي اللي بتتابعيه اكتر مني :D
و هو مؤلف كتاب قهوة و شكولاتة اللي انتي اهديتيه لمارو
و عدي شكرتك كام مرة و عدي شكرته كام مرة..لكن عايزاني ابقي ناكر للجميل و ما اشكروش؟
لا..كله الا جحود القراء :D
هبة..و انتي طيبة و بصحة و سعادة
ربنا يجعلها سنة نجاح و خير عليكي إن شاء الله
تسلمي يا هبة :)
الاء..كل سنة و انتي طيبة
و إن شاءالله السنة دي تبقي أفضل من كل اللي قبلها
علي فكرة يا الاء..عمر طاهر بهدل تامر حسني في حلقات سوبر هنيدي :D
ريم: و حضرتك طيبة و بخير و سعادة
و اتمني السنة دي تكوني بتشاركي بردودك علي طول إن شاء الله :)
إيمان: كل سنة و انتي طيبة
مفيش داعي للأسف..و لا شكر علي واجب
ربنا يكرمك و يوفقك في 2009 و في كل حياتك إن شاء الله :)
انت نسيت تشكر نغ :(
انا زعلانه منك ها :'(
نسيت كل الي كان بينا :'(
تاعبك والله تامر :)
بصراحة عمري ماسمعت عنه عمر ده
وأنا لا أختلف معاك إن البوم تامر
كان أقل من المستوى المأمول
لكن ذلك لايعني أن كل الألبوم سيء
عموما
أتمنى وجهة نظرك تتغير عنه
وكمان هو يحاول ياخد بعض النقد الهادف بعين الإعتبار..
ولولا اختلاف الأذواق لبارت السلع
كل عام وأنت بخير
غبت عننا كتير المرة دي ياسولتو :)
مستنيين البوست الجاي :)
انغام: اسمحيلي استلف كلمة نانسي المفضلة و اقولك..إتنيلي :D
الاء: البوم تامر ايه بس اللي كان مستواه مش مأمول؟
تامر ذات نفسه مستواه مش مأمول :D
هبة: عــدنــا :D
دب الباندا يبقي يرد عليك و يعرفك قيمتك
Post a Comment