(1)
عمري ما كنت أتخيل انني هحب حاجة في مسلسل سميرة أحمد الاخير
ولا كنت اتخيل انني ممكن اسمع اغنية لنبيل شعيل
بس ده اللي حصل
اغنية نهاية المسلسل اللي غناها نبيل شعيل اكتر من رائعة
و بهاء الدين محمد تألق في الكلمات
خصوصآ في الكوبليه الاول بتاع
ماتخافيش لو طال سكاتي..انا صوتي مخنوق من اهاتي
و يوم ما هتكلم هقول الحق..دي كرامتي أغلي من حياتي
(2)
كل ما اجيب مسلسل لمصطفي فهمي الاقيه لابس بدلة
لدرجة انني بدأت اشك انه معندوش بيجامات و برضه بينام بالبدلة
(3)
الصدفة البحتة خلتني اشوف فيلم كباريه
هو ده اللي اسمه بطولة جماعية..مش العك بتاع ليلة البيبي دول و عمارة يعقوبيان
(4)
حاليآ بمعرض القاهرة الدولي للكتاب و بجميع منافذ بيع كتب دار الشروق
كتاب "جر ناعم" لعمر طاهر
(5)
حكمة اليوم : يا داخل بين البصلة و قشرتها..إطلع
(6)
كنت بحاول اتخيل مواصفات الممثل الرخم النموذجية
فقررت اجمع موهبة تامر هجرس مع إنفعالات خالد النبوي و كوميدية حجاج عبد العظيم و خفة دم وحيد سيف و كاريزمة جمال عبد الناصر و شنب و تسريحة شعر ياسر جلال
(7)
إلهام شاهين في خلطة فوزية بتتجوز 5 رجالة
!قبل ما حد يفكر ينتقد الخيال العلمي ده..إلهام هي المنتجة يعني بفلوسها
(8)
لا ادري لماذا يستفزني هذا الجنزعور المشفلف بالابانين؟
فلطالما سألت نفسي لماذا اتنفقل بينما لا استطيع البوحان بحمبكيلي المشكاني
ياله من شيء مزعج حقآ
(9)
أعتقد ان سر إقبال المنتجين علي علا غانم رغم إنعدام موهبتها..هو انها ارخص الممثلات الموجودين حاليآ
(10)
قنوات ميلودي لغت شريط الإس ام إس
عقبال ما يلغوا القنوات نفسها
6 comments:
انت كل دا ماكنتش شوفت فيلم كباريه ؟ الفيلم حلو اوي اوي بجد فيلم ممتاز مش مجايب السبكي خالص
"حاليا بمعرض الكتاب" هو لسه فيه معرض كتاب ؟ مش خلص خلاص دا ولا ايه ؟
هما ميلودي لغو شريط ال اس ام اس ؟ اكيد في حاجة مش طبيعيه مش ممكنيكونالخبر كدا بالبساطة دي !!
موتني من الضحك في مواصفات الممثل الرخم مع انك نسيت ناس
انا فعلا مش مستوعب ان السبكي و سامح عبدالعزيز يعملوا فيلم عدل
يمكن أحمد عبدالله اثبت نفسه في ثلاثيته مع شريف عرفه و علاء ولي الدين الله يرحمه
بالنسبة لانتهاء معرض القاهرة للكتاب..عادى..انا مواطن اسكندراني يجهل ان المعرض خلص يوم الخميس :D
الحكاية بتاعة ميلودي انهم جربوا يشيلوا الشريط من ميلودي هيتس لقوا نسبة المشاهدة إرتفعت لان الناس بقوا يحبوا يشوفوا الصورة بتاعة الكليب كاملة..فعمموا التجربة و اصدروا بيان ان راحة المشاهد اهم من الربح المادى :D
انا مانستش ناس كتير..انا بس مخلي التقيل لقائمة معينة بعملها عن الممثلين
معلهش شلت تعليقي,كان تعليق على الأغنية,بس خرجت براها..تماما :)
معلهش:)
مكنش في داعي يا إيمان
ما الكلام بيجيب بعضه يعني احنا مش مجبرين نمشي علي السطر و احنا بنعلق عليه
حاجة بتجيب حاجة و موضوع يجيب موضوع..المهم تقولي اللي انتي عايزاه
(: ولا ايه؟
ربنا يكرم حضرتك بجد :)
ليه مش عارفة:)لكن دعوة :)
هو كان تعليق على جملة دي كرامتي أغلى من حياتي,,الأغنية :)
وذكرت مواقف عليها.إيجابية يعني,يمكن برة الموضوع :)
هو الحكاية,مش عارفة,ليه مش حاسة,إننا بقينا في زمن,يمكن محدش بيقدر فيه,معنى كرامة إنسان :)
كنت بلاقيهم زمان,يقولوا على إنسانة مثلا,,إنها حرة,,ودي معناها..يعني إنسانة ..مش عارفة,كنت بحس.إن يعني إنسانة,كرامتها متصانة
لكن دلوقتي..مبحسش..بأي أهمية للكرامة دي عند أي حد:)
زمن تاني يعني :)
يعني..كنت بقول مواقف..فيها الإنسان بينزل جدا..ويكون متسامح في حاجات,يعني زي موقف شخصي لشخص أعرفه تقريبا:) ومواقف تانية,من كلمة ممكن تمس الكرامة,كلمة بس..بتكون أقوى من أفعال كتيرة تانية,يعني..قد إيه بجد كرامة الإنسان غالية,وقد إيه كلمة حتى,تفرق قوي في موضوع الكرامة ده..وقد ايه ممكن بنفسه ينزل في مواقف كتيرة تسامح,لكن..كلمة واحدة ممكن تمس كرامته
يعني
عجبتني الجملة,,دي كرامتي أغلى من حياتي,وكنت بقول,أحلى ما في المسلسل,وصورة سميرة أحمد جميلة فيها جدا,وصوت نبيل شعيل فيها على فكرة,أول مرة أحسه قوي بالحلاوة دي
هي الحكاية,,جملة
ومجرد تفكير..ليه الناس,مش مقدرة,معنى كرامة إنسان تاني الأيام دي
مش زي ما بشوف في ناس تانية,كانوا أبيض وأسود
عموما.زي ما حضرتك بتقول..اللون الأخضر أجمل لون
فالناس,,إللي كانوا في الصور اللي زمان أبيض وأسود,لسة طيبين,وكانوا في زمانهم الأغلبية وإللي عاشوا فيه واتربوا عليه كدة
ودلوقتي...لسة كدة بس..الناس اللي عايشة جوة الخضرة:) في الأرياف يعني :) لسة بيحترموا غيرهم وبيحترموا بعض..والكبير برضه بيحترموه..لسة بيقولوا أبا الحاج لأي حد كبير مثلا
شفت حضرتك خرجت إزاي :)
شكرا لحضرتك:)
ربنا يكرمك انتي كمان يا إيمان :)
عندك حق..في ناس مابقاش للكرامة اهمية عندهم..و بقت اهم من الحياة بالنسبة لهم
زي الرجل اللي قتل مراته و ولاده بعد ما خسر ثروته في البورصة الامريكية بحجة انه مش هيقدر يعيشهم في مستوي العيشة اللي اتربوا عليها
مع العلم ان ابنه و بنته كانوا ناس كبار في منتصف العشرينات و لهم وظايفهم اللي تعيش كل واحد فيهم بدون ما ابوه يصرف عليه
بس شاف ان وضعه الاجتماعي اهم من حياة اسرته كلها
فقتلهم و هم نايمين و حاول يقتل نفسه بعدها بس انقذوه
Post a Comment