قررت أعمل قناتي الخاصة بعد ما طورت القنوات الفضائية
برضه لازم اضيف لهم إبداعي الإعلامي كمان عشان نرتقي بالذوق العام
هحط الخطوط العريضة لقناتي المرتقبة
Sulto TV
اول حاجة البرامج لازم تحمل بصمتي
انا ناوى اعد و اقدم كل البرامج المهمة..خليني اديلكم لمحة عنهم
برنامج المرأة
"ويك ويك و كلام نسوان"
إعدادى و تقديمي
اسم البرنامج واخده من محمد سعد في فيلم بوحه..و هو بيعبر عن الإزعاج اللي الستات بيسببوه
و ده هو محور البرنامج..انا مش هتكلم في الموضة و الطبيخ و وصفات التخسيس
انا هتكلم عن المرأة من وجهة نظري..و انبه المغلوب علي امرهم من معشر الرجال للكمائن اللي ممكن يقعوا فيها
البرنامج الإخباري
"الصفحة التانية"
إعدادى و تقديمي
مش هعمل نشرة أخبار..اى حد بيذيع نشرة اخبار
انا هقرا الجرايد قراءة خاصة..مش زي اى برنامج تاني
مايهمنيش مانشيتات الصفحة الاولي..ولا مقالات الكتاب في الصفحة الاخيرة
انا هدور علي الاخبار اللي بتعكس صورة المجتمع
يعني ايه؟
هتفهموا اكتر لما البرنامج يتذاع
البرنامج الرياضي
" ع الـ18"
إعدادى و تقديمي برضه
تحليل الكرة كما يجب ان يكون
الاهم من انني اجيب ناس يتكلموا و يقولوا كلام مكرر..انني اوعي الناس و افهمهم الكرة بتتلعب إزاى
في ناس بيشجعوا اندية و متعصبين لها و رغم ذلك مايعرفوش وظائف و مهام اللعيبة في الملعب
مايهمنيش أجيب للناس أخبارماليه الجرايد..مش حابب اصلا اكون مصدرهم الوحيد للمعرفة
انا عايز المشاهد يشوف برنامج شوبير ولا خالد الغندور بعدين ييجي لي افهمه ايه اللي سمعه من الناس دول
و هعمل حاجة مميزة في القناة دي..و هي شيء جديد علي التليفزيون
هعمل فترة 4 ساعات القناة تتحول فيها لمحطة اف ام
من 2 لحد 6 صباحآ تبقي فترة اف ام
و طبعآ هاخد برنامجي "أحلي الاوقات" معايا
بس الشاشة مش هتبقي ضلمة..شريط الاهداءات هيبقي بيتعرض علي الشاشة و ده
و كل يوم هيبقي في ساعة لأغاني فيروز عشان ترويق الأعصاب
بالنسبة للإعلانات..فأنا مش هقبل أى إعلان ولا هقبل أى رعاة للبرامج
لازم تكون الإعلانات صورتها حلوة و فيها فكرة و تكون لمنتج بحبه
و بالنسبة للرعاة لازم تكون شركات بحبها
يعني محدش يجيب لي كوكا كولا او ماكدونالدز او بيتزا هت
دي كانت الخطوط الاولية لقناة
Sulto TV
مصحوبة بعرض سريع لفكرة
Sulto FM
أتمني لكم مشاهدة و إستماع طيب
و مين عارف...يمكن كمان يكون في قراءة طيبة قريب ان شاء الله لبرنامج من البرامج دي
عايزينها تبقي خضرا ... Sulto TV
10 comments:
والله جميلة كل أفكارك دي,والعالم إللي في المدونة دي :)
متقفلهاش في يوم,جميلة قوي:)
ربنا يوفقك:)
ماكانش العشم يا سلطان:(
يعني مافيش برنامج كدا ولا كدا يكون توك شو و كبير وحلو و رهيب
ومش لاقي حد يذيعه تقوم تقول نجيب البنت فاطمة تذيعه :(
لا بس قناة لطيفة عجبتني بشكل عام
اه صحيح
انا نسيت اقولك من زمان ان انا لوني المفضل هوالاخضر
واعتقد ان ايمان سما مصر كمان لونها المفضل الاخضر
إيمان
متشكر اوى..ربنا يخليكي ع الكلام الحلو ده :)
و إن شاء الله مش هقفل المدونة إلا لو لغوا الكورنيش من الاسكندرية :D
فاطمة
ما انا مش عايز انزل بالقناة كلها دلوقتي
كنت عايز اشوق المشاهدين :D
اللون الاخضر ده كان اجدع لون في علبة الالوان بتاعتي في المدرسة..و هو مسيطر علي عالمي بشدة :D
أحييكم علي ذوقكم الرفيع في اختيار اللون ده..عايز ابقي اديله حقه و اكتب عنه شوية :D
لا مش في التلوين أو الكتابة,أنا برسم خطوط بس,مبعرفش ألون..
في الطبيعة بتاعة ربنا,ده أجمل لون,وفعلا مريح نفسيا
وأيام المدرسة,مفتكرش إني رسمت حاجة حلوة,هي الشجرة لو رسمتها..أفضل ملياها تفاح تفاح..وأحط المية جواها بط ,والسما فيها حااجات بتطير غريبة..وأرانب..
بعيد عن الموضوع أصلا تماما:)
بس والله فكرة جميلة,إن الواحد يجيب علبة ألوان من أول وجديد,بعيد عن الكمبيوتر :)
رغم إن الواحد هيزهق فعلا يرسم وهيشخبط في كل كراسة الرسم ويرميها :S
بعيد عن الموضوع معلهش آسفة
هي بجد فكرتها حلوة و مجنونة
بس هما المشاهدين كدة مش هيزهقو من
مذيع واحد لكل البرامج دي
يعني الواحد برضو يحب ينوع
إيمان
حكاية شجرة التفاح دي رجعتني لذكريات حصص الرسم في المدرسة
كان نفسي اعرف ارسم اى فاكهة علي الشجرة..بس كنت كل ما اجرب ارسم فاكهة فوق الشجرة اللونين يدخلوا مع بعض و يدوا علي اسود
الواحد كان بريء اوى زمان :D
ريم
لما اظهر 3 مرات في الاسبوع كل مرة بقول كلام مختلف مش هتبقي صعبة علي الناس خصوصآ ان هيبقي في اكيد برامج و مذيعين تانيين :D
بعدين انا مذيع عشري مع جمهوري و مش هيزقهوا مني :D
عمري ما حبيت اللون الاخضر و انت عارف :D
بس حلوه القناه ... ده غير الشركه الي شاركتني فيها و لا حاجه تانيه
Post a Comment