"لو مش عاجبك..عندك ريموت كونترول تقدر تغير به المحطة"
دي الجملة اللي كل مطربات العري و مذيعات التفاهة بيقولوها لما حد يسألهم عن العك اللي بيقدموه
سرحت مع نفسي و قلت..يحصل ايه لو انا بالريموت كونترول اقدر أغير المحطة فعلآ مش مجازآ
يعني اعدل محتواها و شكلها..الغي و اضيف
قلت الحكاية مش سهلة..و لازمها تفكير
قمت عملت شاى و قعدت أفكر..شوية و قررت انزل اتمشي علي البحر عشان القرارات تتخمر في دماغي
و طلعت بالنتيجة الاولية دي
(1)
هعيد هيكلة قنوات دريم
هلغي دريم 1 و دريم 2..هوحدهم في قناة واحدة يبقي اسمها دريم و يكون شعارها المرة دي أخضر
هتخلص من تلات ارباع المذيعين و الغي برامجهم
ناس زي انجي علي و مصطفي عبده و أمينة شلبايه و وائل الإبراشي و إبراهيم عيسي و عمرو الرخم و ناس كتير تانيين مالهمش مكان
لو جمعنا مني الشاذلي و خالد الغندور و مذيعين شبابيك و نادية حسني و دينا عبد الرحمن في قناه واحدة هيعملوا لوحدهم 11 ساعة يوميآ
(2)
هلغي كل القنوات الفضائية الحكومية
بصرف النظر عن انها قنوات مملة و مصاريف علي الفاضي بس برضه انا ماسمعتش عن الفضائية الإيطالية او قناة فرنسا او إنجلترا تي في
بعدين ما احنا عندنا قطاع قنوات النيل المتخصصة
و كل بلد عندها كام قناة خاصة زي الفل
(3)
عدد قنوات ميلودي بقي 5 قنوات
تريكس..تيونز..افلام..ارابيا..هيتس
و كلهم بيذيعوا عري و إسفاف عن عمد..و العمد كان واضح في إعلان دانا بتاع ميلودي تتحدي الملل
لدرجة انني بقيت حاسس انهم هيعملوا قناة ميلودي 6 تذيع نخبة من اقذر ما عرضت القنوات الـ5 طول اليوم
فقررت اتخلص من 4 قنوات و أسيب ميلودي ارابيا
مع فرض قيود رقابية مشددة تمنع امثال دانا و نانا و ماريانا و اى واحدة حرانة من الظهور علي شاشة القناة
(4)
مزيكا و زووم يبقوا قناة مزيكا
روتانا كليب و روتانا موسيقي يبقوا قناة روتانا موسيقي
باقي قنوات الأغاني تتلغي
(5)
إلغاء كل قنوات المسابقات
و التحقيق في مصداقية المسابقات طول الفترة اللي فاتت
(6)
إلغاء مجموعة قنوات الجزيرة
و التحقيق مع اى واحد يشتبه تورطه في علاقة بالشبكة دي
(7)
إلغاء برنامج هنا القاهرة اللي بتذيعه قناة مودرن سبورت
مع إحالة علاء صادق إلي مستشفي الامراض العقلية و النفسية لمدة 45 يوم للكشف علي سلامة قواه العقلية
و تغريم القناة 5 مليون جنيه تعويض عن الأضرار النفسية اللي أصابت المشاهدين بسبب تعليق مدحت شلبي علي ماتشات الكورة الاوروبية
(8)
تشكيل لجنة من علماء الدين لإعادة تقييم القنوات الدينية
و إختيار النخبة من ضيوف و مذيعين القنوات دي عشان يكونوا قناة دينية واحدة قوية تفيد الناس
(9)
الغي برنامج صبايا علي القناة المحور و امنع ريهام سعيد من الظهور في أى قناة
و أرجع معتز الدمرداش لقناة العربية عشان ده مكانه الوحيد اللي ينفع فيه
دي كانت رؤيتي المبدأيه..مستني اسمع رؤيتكم للقنوات
سواء كانت قنوات اتكلمت عنها او قنوات تانية
و البوست الجاى إن شاء الله هكلمكم عن اقوي قناة تليفزيونية عربية هتنطلق في 2009
قناتي الخاصة
Sulto TV
20 comments:
هههههههههههههههه
عجبتنى أوى بتاعة مودرن سبورت دى
ياريت و الله كل واحد يقدر يحول الاعلام بالطريقة اللى على هواه و تناسبه
أنا لو مسكت الريموت كونترول هغير بطريقة مختلفة عنك كتير
بس شور هلغى دانا و أمثالها
و هلغى كل كل كل برامج الكورة اللى فى الدنيا عشان مش بحب الكلام فى الكورة :)
بس مش هشيل ريهام سعيد ... دى بتقول كلام جميل وا لله
بس الأكيد... هولع فى مدام موجا اللى بتيجى على قناة موجا كوميدى..بنى أدم مقزز
بوست لذيذ و جديد
مستنية أسمع عن قناتك الخاصة
تحياتى و ياريت تقبل أول زيارة عندك :)
يا للهول !!!
انت زمالكاوي !!!!!
تصدق انا فعلا عندي ذاكرة سمك
رجعت ابص في البوست اللي قبل اللي فات لاني افتكرت انك كنت كاتب حاجة على الكورة لاقيتك بتقول بفكر اشجع الاهلي !
لا لا لا انا مصدومة فيك يا سلطان
لا متقلقيش على سلتو
سلتو مش زملكاوى
هو اليط ومش بيشجع كره محليه خالص
هو شخصيه عالميه
بس بيفكر يشجع الاهلى من باب تشجيع الصناعه المحليه
اول مرة اكتبلك تعليق وعلى وجهي ابتسامة عجيبة
حاسة بوست خيالي حقيقي خرافي رهيب مش عارفة ازاي ولا ايه معنى الكلمات السابقة
بس هو دريم فعلا محتاجة ترجع زي زمان وخصوصا شبابيك بصراحة نفسي يرجع القروب الاول القروب الجديد ده عيل شوية
و قنوات الاغاني اكيد معاك و نشد على ايدك و خصوصا دانة اللي فرحانة بنفسها اوي دي و اخواتها خربو بيوت عمرانة كتير
و مستنين قناتك الخضراء شكلها هتكون حاجة تانية
هشيل شريط التشات في كل الروتانيات,وأولهم روتانا زمان علشان أنا عاوزة أستمتع بالفرجة على الفيلم الأبيض والأسود
وفعلا..شريط التشات .معدش بس..لا..هو بيتعب أعصابي..وأنا فعلا مش ناقصة تعب أعصاب.غير كدة فعلا.بيسبب لي حالة خوف شديدة.مش عارفة ليه..بس فعلا..بحس بحالة خوف منه
حاليا..هما حاطين إعلانات مكانه..
بس الأفضل يشيلوه من روتانا زمان بالذات..لأني فعلا..عاوزة أتفرج عليها..وأعصابي مش تتعب أو أخاف من حاجة..لازم يشيلوا شريط التشات..لو مش هيقدروا يتحكموا فيه..معرفش..دي أكتر حاجة بتضايقني.
أو..مش عارفة..كدة كدة..عاوزة أتفرج على روتانا زمان بالذات..بملو الشاشة يعني..من غير شوشرة حتى مثلا
د.سمر
ريهام سعيد بتقول كلام مستفز
انا حاسس انها بتعاني من عقدة نفسية..حد ماسك عليها ذلة
طول الوقت و كل ما اجيبها الاقيها بتحذر الناس من كاميرا الموبايل
و في الوقت اللي بتحذر فيه الناس من انهم يتصوروا و يتفضحوا بتبعت فريق الاعداد يصور ناس في اوضاع مش مظبوطة
قال ايه بتناقش الظاهرة
بالنسبة لمدام موجه..انا عايز اولع في القناة كلها ماعدا اكرم حسني و نشرة الخامسة و العشرون :D
نورتيني في اول زيارة :)
فاطمة
اولا..السمك مالوش ذاكرة..انا اصطدت نفس السمكة مرتين مما يدل ان السمك مغيبب
بعدين انا لا يمكن افكر حتي اكون زملكاوى
هو زي ما نانسي قالت لك كده..مابشجعش كرة محلية فكنت بفكر اشجع الاهلي..بس حتي دي صرفت نظر عنها :D
نونوس
هي مش ألاطة..بس تقدري تقولي بستنضف :D
ريم
ربنا يخليكي..متشكر جدآ لرأيك :)
شبابيك زمان كان برنامج له معني
لكن دلوقتي بقي بقايا برنامج و اللي انضموا للمذيعين بوظوه
عمرو سمير و هبة أفضل بكتير من عمرو الرخم و فاطيما
إيمان
حمدالله علي السلامة..سعيد انك رجعتي تاني تنوريني :)
تصدقي خليتيني عايز اشوف روتانا زمان..فكرة انك تشوفي الفيلم من غير شريط يشتت انتباهك كويسة جدآ
في قناتي ان شاء الله هلغي الشرايط اللي تحت و لو انها بتجيب فلوس من الهوا :D
مانا عارفه ان السمك ماعندوش ذاكرةامال انا بقول على نفسي عندي ذاكرة السمك ليه :)
بقول كدا عشان انا نسيت انك كاتب كاتب بفكر اشجع الاهلي البوست اللي قبل اللي فات
بالنسبة بقى لانك زملكاوي فانا فعلا بعد اختيارك للغندور تأكدت انك زملكاوي متنكر في زي واحد ما بيشجعش الكورةالمحلية :)
اعترف يا سلطان الانكار مش هينفعك
انا كنت زملكاوى..مانكرش ده
بس صحيت في يوم و قررت ماشجعش اى فريق مصري غير المنتخب
و ده كان من سنين..من يومها
بكتفي بالغلاسة علي الزملكاوية و الاهلاوية
و تفرغت للتشجيع الخارجي في إنجلترا:D
هما شالوا الشريط
بس هيطوروه ويرجعوه :D
مش مشكلة,أنا آسفة بقى.أي رد اللي فات :)
فعلا ولله أكتر حاجة بتضايقني
شريط الشات الممل والمقرف والمعبر عن مدى سخافة شعوب العالم العربي..
ثانيا : نفسي احذف كل قنوات ميلودي
دي اكتر حاجة بتضايقني..
اما الباقي فمقدرش أحكم عليه لاني مش متابعة دائمة للتلفزيون..
تحياتي
إيمان
فرصتك تشوفي الافلام بروقان قبل ما يرجعوا الشريط :D
الاء
مش هتسيبي ولا قناة لميلودي؟
و تشوفي كليبات تمورتك فين؟ :D
مودرن سبوت
حبطلهم يذيعوا الماتشات من الأستديو .. حبطل صاحب القناة يتكلم كل يوم .. حجيب أحمد الطيب للتعليق الأوربى
دريم
انا عكسك .. انا عجبانى فكرة دريم 1 و 2 .. حزود برنامج المسلمانى ساعة و اعطاءه كافة الصلاحيات .. حعمل أى حاجة تطلبها منى الشاذلى .. حدفن الغندور و مع مصطفى كرشة حكتشف لاعب جديد يعمل برنامج رياضى يكون من لاعيبة الباسكيت علشان دول ولاد ناس :D.. حزود الجرعة الدينية
حزود المسلسلات القديمة زى رأفت الهجان .. لن أعيش فى جلباب بابا .. حزودمسرحيات صبحى القديمة .. و حعمل برنامج يومى لمعز مسعود و يترجم و يعاد ليلا
المحور بقى حلغيها تماما علشان ست الكتكوتة ريهام دى و معاها معتز النفيخ
مزيكا و روتانا و ميلودى .. لو أقنعت عمرو دياب و فؤاد و محى و منير و سميرة سعيد و أنغام أنهم يعملوا شريط كل سنة بحيث كل واحد موسم .. مش حنحتاج للقنوات دى خالص
حعمل قناة أغانى بس سبشيل .. حتذيع أغانى تنتج حديثا لتخاطب الشباب .. من نوعية قولنا بنينا و أدينا بنينا السد العالى .. أغانى تبنى مش اغانى الواو و الواو جابت دم :D
قباري
المسلماني ايه بس؟
حرام عليك يا عم :D
بالنسبة للبرامج الدينية انا هجيب محمد سعيد بتاع المسلمون يتسائلون علي المحور و يبقي معاه مصطفي حسني
شفتهم في حلقة كانوا فظاع :D
مصطفي حسني احسن من معز مسعود بالنسبة لي
بالنسبة للقناة بتاعتك..بصرف النظر عن المثال الغير مشجع بتاع قلنا هنبني و ادي احنا بنينا..فالفكرة حلوة :D
Post a Comment