عيب انك تكون بتكتب سيناريوهات و قصص..انك بتهتم بالتفاصيل في احداث حياتك
الكلمة..الحركة..طريقة نطق الكلمة..معاني بين السطور حتي اللي قالها ماياخدش باله منها
حساسيتك تجاه كل اللي بيحصل حواليك بتكون عالية طول الوقت
بتشوف الحاجات بنظرة تانية مختلفة عن نظرة الناس اللي معاك
بتشوف الحاجات بنظرة تانية مختلفة عن نظرة الناس اللي معاك
بالظبط زي ما الميكروسكوب في المعمل بيخلي نقطة الميه خلايا و ذرات
الحاجة الواحدة..بتتفصص و تبقي حاجات
الحاجة الواحدة..بتتفصص و تبقي حاجات
يمكن الحكاية دي تبان ميزة..لكن مع ناس كتير بتبقي عيب
في ناس بيشوفوها زيادة تدقيق في الامور..و ده بيكون وحش اوى خصوصآ لو بيكدبوا عليك
في ناس بيشوفوها كلكعة لحاجات بسيطة..و عمل حاجة من ولا حاجة
بس الاكيد ان علي قد ما الحكاية دي بتزعج الاخرين..فهي بتزعج الشخص اللي بيعاني من كونه بيحب التفاصيل
بس الاكيد ان علي قد ما الحكاية دي بتزعج الاخرين..فهي بتزعج الشخص اللي بيعاني من كونه بيحب التفاصيل
لان حاجات بسيطة بتأثر عليه بالسلب تأثير كبير و بيكون سهل ينزعج من حاجات سهلة
الجانب الايجابي هو ان وقت ما الانسان ده بيحب شخص أو شيء..بيشوف تفاصيل صغيرة بس لها طعم حلو
كلمة حلوة كان لها معني كبير..إبتسامة جمعت بين سعادة و خجل..نظرة
موبايلي اخترته عشان أوبشن بسيط مايفرقش عن موبايل تاني كنت هختاره
حاجات كتير ماتتحسش بيحسها اللي بيعشق التفاصيل
عشان كده لما واحد منهم بيحب..بيحب بجد
و بيكون عنده بدل السبب مليون عشان يفضل يحب الشيء او الشخص اللي بيحبه
بيكون عنده مليون سبب عشان يهتم إنه ينمي الحب ده
بيكون عنده الف مليون سبب يتلخصوا في تفاصيل صغيرة عشان يحافظ علي حبه لهواية او لشخص عرفه
و برضه بيكون عنده مليون سبب عشان يعدل سيناريو حياته و يبدأ خط جديد لو اساء إختيار خطوة في حياته
حتي لو كان التعديل ده هيأخر خطوات تانية مهمة في سيناريو حياته
الشخص ده بيحب يسمع القصص..و يحب و هو بيسمعها يتخيلها..يكون شايفها..عشان كده بيصعب الكدب عليه..لان القصة بيبقي مفيهاش منطق في احداثها
و في الوقت نفسه مابيحبش استخدام الكدب لانه هيفسد تسلسل احداث السيناريو اللي هو عايش فيه
إن الواحد يكتب قصة..قصيرة او طويلة
كوميدية او تراجيدية او رومانسية او حتي رعب
كل ده بياخد مجهود فوق مايتخيل اللي بيقرأ القصص دي
مجهود ذهني و عصبي و نفسي..محاولات تخيل الفعل و رد الفعل و البيئة المحيطة
محاولات التعايش مع احاسيس الشخصيات عشان تاخد احساس شخصية منهم و تكتبه بإختصار
إزاى توصف ان البطلة منهارة بعد ما حبيبها سابها في جملة او اتنين بالكتير
هتستخدم انهي كلمة..و ايه الكلمة اللي توصل المعني اسرع
و إيه الإسلوب الاريح في إستخدام الضمائر؟
إمتي تنهي المشهد و ينتهي بإيه و الحدث الجاى ايه؟
عالم بيتبني علي إفتراضات و تخيلات و معايشة صعبة مهما كانت بساطة القصة
الجماعة المؤلفين دول و انا حاسب نفسي منهم حتي لو كنت لسه في صفوف الهواة..عاملين زي سيد أبو حفيظة
بيشوفوا الاخبار بأعينهم و ينقلوها إليكم
ممكن تختلفوا مع رؤيتهم..بس الاكيد في حالتي ان مهما إختلفت رؤيتي عن اللي حواليا
بقول اللي شفته بجد
أقعدوا بالعافية..و من غير بوس
14 comments:
السلام عليكم
انا مبهور فعلا
مش مصدق
انا ماعرفكش شخصيا طبعا
بس اتقابلنا على مدونة فنون قبل كدة
انا ما قابلتش حد بيوصف عاشقي
التفاصيل بالدقة دي قبل كده
انت فعلا لمست مناطق مابيلمسهاش غير اللي عاشها وعانى بسببها
كنت بتكلم مع حد من قريب وبحاول اشرحله قد ايه صعب انك تكون عايش وسط الناس وفي نفس الوقت حاسس انك من كوكب تاني،
اللي انت شايفه ومأثر فيك وعامللك ازمات هم مش شايفينه ولا دريانين بيه،
وخصوصا لما يكون حد بيحاول يكدب و متعود ان ماحدش بياخد باله ويتصدم انك شايف الكدبة حتى لو مش عارف هي فين......(التسلسل المنطقي)ي
معاناة فعلا
مش عايز ..افصل.. اكتر من كده بجد بوست رائع ابهرني بشده
موفق ان شاء الله
يا الله يا محمد ... الناس دول مشكلة بجد
الله يعينك على نفسك :)
ما بحب أدقق كتير فالأشياء عشان بتأزم
ومابحب الناس اللي بيدققوا كتير فالحاجات لانهم بيشوفوا حاجات عيرهم مش شايفها..
وممكن يفهم حاجات بشكل تاني.. وزي منت قلت اللي قالها نفسه ممكن مايفهما ولا يحسها كده..
بس معاك حق.. اللي في عالم التأليف والكتابة لازم يكون كده .
تحياتي لك.. موضوع مميز
ليث
و عليكم السلام
منورني بجد :)
سعيد جدآ بردك و ان البوست عجبك
الحمدلله انني لقيت حد يشاركني نفس الإحساس
لان ردود الفعل بعد ما كتبت كانت محسساني انني من كوكب تاني بالفعل :D
معاناة بجد حب التفاصيل دي..بس برضه ممتعة و ماعتقدش انها حاجة نقدر نبطلها :)
الاء
خليني اوضح لك
يفهم حاجات مش متقالة اه..لكن مش هيفهم غلط
يعني مش انسان ساذج بينسج قصص مع نفسه :)
اقصد اقول انه بيحس بالحاجات البسيطة..لكن معندوش تهيؤات
أتطمني ..لسه مالسعتش
و الله يعيننا كلنا علي نفسنا :D
ولا انا بقول انه حيفهم حاجات خطــأ..
انا قصدي..
مش احيانا الواحد بيقول كلام
هو نفسه مابيفهم ان كلامه ده ممكن يكون ليه معنى تاني
يعني مثلا اكون قلت حاجة
المفروض ما أقولها لانه كلامي ممكن يتفسر بطريقة أخرى اذا ماوضحت انا اقصد ايه بكلامي..
شكلي تفرعت لموضوع آخر..
اتمنى بس تكون فهمت قصدي ايه..
تحياتي..
ماكنتش فاكرة ان في من النوع دا كتير :)
انا حالة وسط بين الحالتين
بمعنى ..عندي تفاصيل معينة بحبها جدا وتفاصيل معينة بكرهها جدا
لما بشوف حد باخد بالي بشدة وغصب عني من التفاصيل اللي بحبها واللي بكرهها
اي تفاصيل تانية ما بشوفهاش تقريبا
لاني اساسا فاقدة التركيز بشكل عام :)
ما بركزش غير في حاجات معينة بس
وهي كافية بالنسبة لي على ما اعتقد
انما النوع بتاعكوا دا ربنا يكون في عون الناس منه
صعب اوي اني اتعامل مع حد بياخد باله من تفاصيل التفاصيل بالشكل دا
هحس اني متوترة جدا ومش مرتاحة
الاريح انك تشوف الناس على بعضهم كدا من غير تفاصيل عشان التفاصيل دي عاملة زي البازل كل قطعة لوحدها ممكن تكون وحشة اوي او حلوة اوي حسب الجزء من الصورة اللي مطبوع عليها
انما لما البازل بتكمل بتقدر تحدد فعلا هل الصورة النهائية حلوة ولا وحشة
زي ما بتقول
حاجة ممتعة
مش بس ما نقدرش نبطلها
لأ انا اصلا ماتمناش اني ابطلها ولا انها ما تبقاش موجودة
.... هازعل من نفسي جدا:)
.....................
يا فنون
صحيح التفاصيل زي البازل
بس مين قاللك ان البني ادم ده ما بيشوفش الصورة على بعضها وبيشوف كل حتة منفصلة،
لأ... ده بيشوف الصورة كاملة وبوضوح بس عينه بتلقط كمان التفاصيل اللي جواها ولذلك لو في اي حاجة مش متناغمة او مش منطقية تروح منورة عنده على طول وبما انه بيتدايق من عدم التناغم او المنطقية بيبتدي يعاني واللي حواليه بيتدايفوا لأنهم غالبا مش عايزين حد يشوف التفاصيل الصغيرة اللي مش سليمة فضلا عن محاولة تصحيحها
تحياتي
أكيد ماحدش بيحب حد يشوف تفاصيله الصغيره بالذات لو فيها عيوب
عشان كدا قلت ان الناس اللي كدا بيكونوا متعبين جدا للناس اللي حواليهم بالذات لو بعد ما شافوا العيوب دي رفضوها ورفضوا الشخص بسببها
بتبقى حاجة جارحة
يعني لو هتشوف العيوب وتقبلني زي مانا اكيد هبقى اسعد انسانه في الدنيا ويمكن دا يساعدني اني أصلح عيوبي
بس لما تكشف تفصله وحشة عندي مش بسهولة حد يلاحظهاانت متخيل الاحراج والضيق
لا وكمان ترفضها وتبدي تحسسني الدونية وتتك على عيبي دا وتلمحله
شيئ مهين بصراحة
ابقوا خدوا بالكم عشان ماتعملوش كدا في حد :)
طبعا تعمد احراج حد والضغط عليه بسبب عيبه ده لا يبقى اخلاق ولا ذوق
إلا في حالة ان العيب ده يكون بيمس الانسان اللي لاحظه والتاني مصر انه مش موجود او مصر مايغيروش في الحالة دي وفي الحالة دي بس يبقى من حقه انه يغير الشيء اللي بيمسه شخصيا بس برده من غير اهانات ولا تعمد احراج
وما تقلقيش ... في الحالات الطبيعية اللي عنده العيب ده بيحاول يغيره على طول اول مابيحس انه اتشاف عشان دي طبيعة البشر... مابيحبوش صورتهم تبقى وحشة
بس زي ما قلتلك دي الحالات الطبيعية ، ومش كل الناس طبيعية.... للأسف
حبيت بس أأكد على رأي فنون..
انه فعلا.. التعامل مع الشخصيات دي متعبة..
ماقابلت أحد حتى الآن على أرض الواقع بالشكل ده ..
بس بصراحة حبيته من محمد حسيته حاسس ولامس حاجات مش شايفها .. اكتر من أي حد قابلته ..
تحياتي
زي ما ليث قال الانسان بيشوف الصورة كاملة و واضحة جدآ..بس بيلقط تفاصيل
يعني زي ما كنت بقول..نقطة ميه تحت الميكروسكوب
هي نفسها نقطة المية..بس بنشوف مكوناتها
الواحد مش بيمسك الموضوع و يحلله بتأني..إحنا بنشوف الصورة مفصلة في نفس التوقيت بتاع اى شخص عادى بيشوف الامور
يعني لو فرضنا ان في بنت جميلة واقفة..و انا واقف و ولد تاني واقف
اول ما نبص عليها..هو هيقول البنت دي جميلة..انا هقول اول حاجة تشدني فيها..إبتسامتها علي سبيل المثال
بالنسبة لنقطة ان الواحد يشوف العيوب..الانسان بطبيعته بيحب يشوف الحاجات الجميلة
انا عن نفسي كده..بشوف الحاجات الجميلة بس
لان زي ما قلت..دي حاجة بتحصل في نفس اللحظة مش عملية تفكير و تفتيت للامور
فمش معقول اول حاجة هشوفها هتبقي عيوب :)
الا في حالات بتبقي نادرة و هي انني اقابل حاجة او حد غلس
او نوعية معينة من البنات الاوفر
دي بطلع فيها مليون عيب براحة بال و روقان و اقعد افتت فيها للصبح :D
الاء..بالعكس التعامل معانا سهل جدآ و ابسط بكتير من التعامل مع شخص عمره ما هيلاحظ الحاجات البسيطة اللي بيعملوها الناس حواليه :)
و متشكر علي اخر سطر :D
عاوزين موضوع جديد,إن شاء الله :)
بس من غير غرور :D
بهذر :) إن شاء الله في يوم تكون كاتب كبير,ومتواضع بإذن الله:)
لكن برضه,عاوزين موضوع جديد,إن شاء الله:)
انا فعلا بكتب موضوع جديد..بس هو واخد وقت شوية في الكتابة:D
ربنا يسمع منك يا ايمان و اعمل حاجة حلوة في يوم من الايام و من غير غرور إن شاء الله :)
Post a Comment