بقي لي 3ايام في جدل و مناظرات مع بعض اصدقائي حول احد المواضيع
الماضي العاطفي
كلنا حبينا قبل كده بدل المرة 10..و لما نرتبط كتير مننا بيحاولوا يدفنوا الماضي
يحصل ايه لو انت قاعد مع حبيبتك و اصحابكم..و جه واحد سلم عليكم..و بعد دقيقتين واحد من القاعدين مال علي ودنك و قال لك
"انت عارف ده يبقي مين؟"
فتسأله مين..يقوم قايل لك
"ده حسام..كان بينه و بينها قصة حب جامدة اوى زمان"
في لحظتها هتبص لحبيبتك..و هتبص لحسام
و هيبتدي شيء ما يدور في عقلك
ايه هو الشيء ده...دي النقطة اللي كنت بتناقش فيها مع اصحابي
في ناس قالوا انهم هيعتبروه ماضي و مات و إحنا ولاد النهاردة
و ناس تانيين شايفين فكرة ان ده يعتبر نوع من الخيانة..البنت ما قالتش حاجة عن الموضوع ده قبل كده..و حبيبها القديم لسه له وجود في حياتها
و دخلنا في جدل فرعي حوالين طيب لو كان عرف بقصة حصلت قبل كده..بس الشخص خرج من حياتها..هل هيبقي نفس رد الفعل؟
و واحد فجر نقطة تانية..طيب اللي مرتبط بواحدة كانت بتحب صاحبه زمان..موقفه ايه؟ و موقفها هي ايه؟
و فضلنا مختلفين في جوانب كتير للموضوع ما عدا حاجة بقت ثابتة
بالنسبة للرجل او الست..الحكاية هي نفسها
الماضي المقبول هو الماضي المعروف..يعني انت عارف انها كانت بتحب حسام و هي خرجته من حياتها و مش بتتكلم عنه..فمش منطقي انه يكون موضوع يفسد الاجواء
و الماضي المجهول لازم يفضل مجهول و مايتعرفش عشان مايفسدش الواقع
حبيت اشرككم معايا في دائرة الجدل اللامتناهي..و انا واثق اننا هندخل في نقاط متفرعة جديدة في الموضوع
ايه الماضي المقبول و ايه اللي مش مقبول؟
27 comments:
بسم الله الرحمن الرحيم
كلمه السر : ماضى, حضرتك يا فندم
طالما ماضى يا سلتوتى يبقي مقبول .. طالما خلاص فات و اتقفل مع الماضى وملوش وجود فى الحاضر
بس اكيد صعبه اوى على راجل انه يبقي قاعد كده ... و يجى له واحد يديله معلومه جديده عن حبيبته ... على اساس انه اخر من يعلم ... بيتهيألى لو هو عارف ... واى حد جه يقول اى كلمه ... هيبص له بثقه و يقوله ... عارف .. و ده موضوع و انتهى من زمان
بس ميتصدمش كده وسط الناس
اصل طبيعى ان حياتهم قبل بعض كان فيها احداث و كانوا بيغلطوا و بيعملوا حاجات صح ... عشان دول بشر
نسبي
قبول الماضي وعدم قبوله مسألة نسبية
ودا بالنسبة للطرفين مش لطرف واحد
مثلا مش هقبل ماضي راجل كان مثلي
طاقتي لا تحتمل
مش هقدر ابدا اني اتجوز واحد كان مثلي في يوم من الايام
غيري ممكن يقبل جدا وعادي
بالنسبة للرجالة
في واحد الماضي المرفوض بالنسبة له ان البنت تكون حبت قبل كدا من غير حتى ارتباط فعلي
وممكن يكون الماضي المرفوض انها تكون صاحبت قبل كدا
وممكن الماضي المرفوض انها تكون اتخطبت او مطلقة او ان صاحبها يكون باسها
وفي ناس تقبل بلبوسة بشرط انها ماتكونش تعدتها
وفي واحد يقبل غلطة من واحدة مادام انها غلطة مرة وماتكررتش
وفي رجالة بتتجوز فتيات ليل تابوا
اذن المسألة نسبية تماما وغير خاضعة لأي معايير محددة
نقطة ان الماضي المقبول هو الماضي المعروف فكرة انا متفقة معاها بشدة الحقيقة
عرفني ماضيك واديني مطلق الحرية اني اقبل او ارفض
دا الصح
ودا المفروض من وجهة نظري
بس بدون تفاصيل
لان التفاصيل شيئ مالوش لازمة وبيفسد الحياة تماما
يعني مثلا انا كنت مخطوبة
لو ارتبطت تاني يكفي الشخص اللي هرتبط بيه انه يعرف اني كنت مخطوبة لفلان ولمدة كذا وسيبنا بعض عشان كذا
انما رحنا فين وجينا ومنين وعلاقتنا ببعض كانت عاملة ازاي وقالي وقولتله وعادلي وعديتله دا رغي فارغ ممكن يعمل مشاكل تفسد الحياة بلا داعي
تقريبا كل الرجال لازم يسألو السؤال ده مع انه قلة للاسف اللي بيتقبلو الاجابة لو طلع انه البنت حبت حد قبليه فعلا او انه بيفضلو ينبشوا في تفاصيل كتير لحد ما يفسدو العلاقة بينهم بس في الاخر
كل حد على حسب اللي مرتبط بيه و عقليته ماهو زي ماقولت مش كل راجل بيقبل الماضي مهما كان بريء بصراحة بس هو المفروض يعني على الاقل يعرف اني كنت مرتبطة بفلان وخلاص مش لازم الباقي عشان كدة مش بحب البنت تتمادى اوي في الحب وخروج و روحات و جايات و حاجات تتحلل للحبيب تخلي تفاصيل العلاقة على مرئ الجميع وممكن هو يسمعها من بره و من اي حد في يوم من الايام
ده لو هتكلم عموما
لو هتكلم عن مجتمعي فتقريبا هنا صعب جدا بنت تحكي لزوجها عن الماضي لا حبيت فلان و لا عرفت علان الا في بعض حالات الزواج عن حب ولانه كمان غير وارد انه الي حبته زمان يجي يسلم عليها في يوم لو شافها ماشية طبعا فخلاص بياخدوها بمبدأ الستر و انتهى الموضوع و يبقى تعيسة الحظ اللي ينفضح مستورها في يوم من الايام
بس في حتة انا اصلا ضدها من البداية بلاش اساسا لو حد كان مرتبط بحد انه يروح يسلم عليه من اي باب كان مالوش داعي الاحسن الناس تخلي باب الماضي ده مقفول نهائي و كمان تحسبا انك توقع الشخص ده في احراج خصوصا لو معاه شريك حياته فمن البداية بلاش مسألة اسلم على الحبيب الاولي دي
ضد تماما ان الماضي يتعرف الا لو احد الطرفين عاش الماضي ده مع الطرف التاني زي حكاية انهم كانوا اصحاب قبل مايحبوا بعض
او في حالة تانية إن الماضي ده يكون خطوبة او جواز انما علاقة حب انتهت فبلاش لأن لسه عقلية الرجل الشرقي بيجرم البنت اللي عايز يرتبط بيها في النقطة دي بالذات!!
ولأن 90% من الشباب العربي عمرهم مايقبلوا ماضي البنت بالتالي هم بيضطروا ان البنت تخبي عليهم بالتالي الماضي اسمه ماضي يعني شئ انتهى نفتحه تاني ليه؟!!
اما ان الشاب يقول انا احب اعرفه من باب اننا نبدأ حياتنا مع بعض على الصراحه والوضوح فده كلام افلااااام لأن الماضي بالشكل ده حيفضل طول عمره مطارده .. وحيشك في كلمتها وحيشك في حركتها وحيشك في سلامها.. ده غير اذا كان ماضيها مع حد يقربلها.. ممكن تحصل قطيعه هنا لأنه مش متحمل يشوف ابن خالة حبيبته وحبيبها سابقا بيبقعد معاها عادي يكلمها ويهزروا!!!
وزي مانت قلتلي يا محمد الماضي بالنسبالي حيفضل شبح مطاردني رديت وقلتلك طيب تستحضره ليييه ؟ ماهو الشبح مابيتشافش ولا بيتحس لكن لو استحضرته عاقبته وخيمه فليه تستحضره من اساسه؟!!
المثال اللي انت قلته ماظنش ان حد عنده الجرأة يروح لواحد متجوز ويقوله ده كان حبيب مراتك .. ماحدش وقح للدرجادي يعني وهي ممكن تحصل بس نادرا .. ابسط رد وقتها ان البنت تقول ده ماضي اقولك عليه ليه ؟ لو ماتقبلش الموضوع يبقى مع السلامة لأنه ليه بيها من ساعة علاقته بيها وبس
وبما ان الغالبية العظمى بتخبي ماضيها فليه الواحد يسأل ويحط نفسه في الموقف ده وهو تقريبا شبه عارف الإجابة؟!!
انا بالنسبالي الماضي ماضي
لا اسأل ولا اتسئل
بس ممكن يكون ماضي انا حضرته في يوم من الأيام
هنا صح ممكن اسأل وغصب عني افتكر
بس دور الراجل هنا انه ينسيني الماضي ده لما يحسسني اني كل حاجه في حياته وان الماضي على اسمه.. ماضي بجد
والمفروض ان الشاب يكون واثق إن مافيش بنت الزمن ده الا وحبت وعاشت الحب ولو في خيالها في مرحلة المراهقه يبقى سؤاله من اساسه وتفكيره في ماضيها غلط ونوع من القلق اللي هيقتله وينكد عليه
لأن والله ماحدش بيستفيد حاجه اذا فتح في الماضي غير خراب البيوت وطالما بنوصل للمرحلة دي يبقى مافيش ماضي واللي تتسئل او يتسئل ماحدش فيهم يقول ايوة كان ليا ماضي بالذات البنت لأن لسه عقلية الشاب العربي ماوصلتش انها تتقبل الموضوع ده ولو اكتشف في اي وقت انه كان ليها ماضي يبقى مش غلطتها انها خبت عليه من حقها تخبي وتعيش حياتها وترمي الماضي وراها بس غلطته هو انه بيبصلها بماضيها وبينسى ان الإنسانه اللي قدامه هي عايشه معاه الحاضر مش الماضي..
مش عايزه اجزم واقولك اني معظم الشباب اول ما بيرتطبوا اول سؤال بيسأل بيه خطيبته
انتي حبيتي قبل كدا؟
طيب نستنتج من السؤال دا ايه؟
ولا هو مثلا ببيسأل بسلامة نية؟
مقولناش حاجه انه عادي سؤال جه في باله وحب يسأله ليها
او هو مقتنع من جواه ان دا حقه انه يعرف اللي ارتبط بيها دي حبيت قبله ولا لاء؟
وياترى لو حبيت فعلا حُبها دا تعدى المسموح بيه ولا؟؟؟
وكمان حُبها دا اتنسى ولا لسه عايشه على ذاكره وارتبطت بيا عشان تنساه؟
اسئلة كتيييييييي بتدور في عقله وللأسف الشيطان بيبقى له دور فعال بشكل غير طبيعي في اشعال وتوسيع دايرة الشك عنده :D
في حاجه كمان بلاحظ ان مثلا شاب بيحب واحدة والبنت دي نفترض كانت حبت قبله ومحصلش نصيب بينها وبين اللي حبيته ودا اهو عادي تجربه وعديت ومفيهاش اي شيء يسيء لماضيها لو جات بقى وحكيت للي ارتبطت بيه دا عالقصة دي
رد الفعل منه اول حاجه هيفضل كل شوية طيب اتعرفتي عليه ازاي؟
وكنتوا بتتقابلوا ازاي؟
وليه سيبتوا بعض ليه؟
وحبك ليه اكتر مني ولا لاء؟
ووو ..
هتلاقي باب من الاسئلة اللي ملهاش غير مبرر واحد وهو انه اضايق واتخنق واتصدم وشك وحط نفسه في الدايره اللي بتتكلم عنها دي يا محمد!
انا مع اني احكيله الماضي بتاعي لو طلب مني كدا ..لكن لو مفتحش الموضوع دا معايا يبقى مش هاحكي حاجه ودا لأني مفيش حاجه تسيء ليا ولا ليه في المستقبل من حيث الماضي بتاعي
انما بقى لو الماضي دا مليان وبلاوي لاء فا دا حقه لازم يعرف ومن حقه يقبل انه يكمل معايا ولا لاء .. دي حياة مشتركة بيني وبينه متبقاش عمياني كدا
عمومآ .. الاصعب في الموضوع دا هو تقبل الشخص ماضي حبيبه او اللي ارتبط بيه سواء كان عادي مفيهوش حاجه او كان لا يخلو من شوية حاجات فوق بعض :D
ومدى مصداقية كلامه واحقية خروج الماضي دا للنور تاني من عدمه
واللي بيفرق في القصة دي هو تفكير الشخص واستعياب فكرة الماضي دا من اساسه
بختلف معاكي يامروة في نقطة
حتى لو ماضيها اسود واتعدت الخط الأحمر
وقدرت بعد كده انها تستر على نفسها
وبدأت تحاول وفكرت انها تعيش حياة طبيعية وتكون اسرة وتكون زوجة صالحة .. هل هنا هي مطالبة تروح تفضح نفسها وتقول انا عملت وعملت وعملت من باب الصراحه؟!!
ماربنا ساعدها تستر على نفسها وتلاقي ابن الحلال ايه لزومه بقى الفضايح؟
ثم هل الرجل في حالة انه اذا تعدى الخط الأحمر يقدر يقول انا عملت وعملت وعملت..طبعا لاء لأن هنا مافيش شئ يخاف يفقده بخلاف البنت .. يعني يعمل عملته ويداري عليها اما هي فلا تبقى مجرمه وغشاشة لو ماقالتش انها عملت كذا!!
الشرع في الحالة دي اختلف
في ناس حرّموا النقطة دي واعتبروها غش
وفي ناس حللوها وقالوا انها ستر ويمكن صلاح للبنت بدل ماترجع تترمي في الشارع
وانا الحقيقة مع الرأي الثاني
وان فعلا الستر على البنت مهما غلطت افضلها مليون مرة من الفضيحه لأن الشاب بيغلط كمان ويمكن اكتر منها بس الفرق ان المجتمع ذكوري بيتغاضى عن الرجل ومابيرحمش البنت ابدااا..
هاقولك حاجه يا سارة سمعت مرة مفتي ديارنا الشيخ على جمعة
بيقولك ان لو واحدة غلطت وجات ارتبطت بواحد تاني متصارحهوش باللي حصل وان دي ربنا سترها خلاص
وانا دينا دين يسر
المهم انها تعيد اصلاح نفسهاوتدعي ربنا انه يغفر لها عن الغلطة دي
والاهم ان ميكونش في أثار ونتايج هيترتب عليها هدم بيت في المستقبل
كلام سليم واكيد هو اعلم باللي بيقوله
لكن يا سارة في بنات اعوذ بالله منهم تفكيرهم فكر شياطين بياخدوا النقطة دي محلل ليهم وبيعملوا غلاطات وبلاوي وفي الاخر يتخبوا ورا و باسم الدين!!!!!!!
ومتنسيش كمان اننا في مجتمع ضيق الافق ونسبة كبيرة منه -مش تعميم- تفكيره محدود
يعني يهمه جدآ ماضي البنت حتى لو بريئة ومعملتش حاجه والعين عليها وعلى تصرفتها زي الرصاص
انما الولد حتى لو كان ماضية اسود من البلاك برده ميعبوش حاجه - دا على حد تفكيرهم-
زي ما قولتي
وعارفه كمان لما بيجي يحكي لحبيبته تحسيه عادي وهو بيتكلم وبيحكلها كأنه حق من حقوقه او قصة مر بيها في حياتة ورماها في بحر
تصدقي يا سارة في ولاد بيكونوا عارفين ماضي اللي مرتبطين بيهم انه مهبب ومنيل بس مبيرضوش يطلبوا منهم انهم يحكوا ليهم شيء ودا عشان بسسسسسسس ميتصدمش !
شوفتي تناقض اكتر من كدا
الولد بيحب يشوف البنت ملاك نازل من السما ميحبش يشوفها حتى نطقت بكلمة حب غير ليه
يا سارة احنا دايما كدا كا بني أدمين بنحب نعيش في كذبة كبيرة عارفين بوجودها ومتغطين بيها رغم اننا مكشوفين جدآآآ للي براها
لكن بنتلذذ بتغطية الكذبة وتغليفها بشوية سكر عشان نقدر نبلعها!
الولد ياسولتو يحب يغلط ويلف براحته وفاكر ان محدش ليه الحق انه يحاسبه على افعاله وغلطاته
وفي كل مرة يعرف فيها بنت او لو حنتكلم عامة بقى .. 99 وتسعة من عشرة في المية من الشباب بيفضلوا انهم يرتبطوا ببنت عمرها ماعرفت ولاد حتى من باب الزمالة او الجيرة او الاخوة .. مش حب وبس
مش بتسمع مثلا الولد اللي مقطع السمكة وديلها يقوللك انا اخلي امي تخطب لي قطة مغمضة لا راحت ولا جت ولا لفت زيي؟؟ واوقات يقوللك حاخد واحدة من البلد لا ليها في الطور ولا في الطحين :D
الولد اللي لف ودار كتير قوي بطبيعته بيشك في صوابع ايديه .. والشباب اللي لفوا ومشوا مع بنات نسبتهم في البلد دي كبيرة مستحيل اهمالها.. دة لو حد من زمايلها مثلا في الشغل بيتصل بيها بيفتح لها محكمة واسئلة ماتنتهيش .. ويقوللك انا راجل شرقي ودمي حامي
فما بالك بقى بلو عرف انها ارتبطت قبليه .. بيعتبرها الشاب في بعض الاوقات فجور وقلة رباية.. دة غير شوشو اللي حيصورله حاجات تانية ويخيل له انها عدت الخط الاحمر معاه في لحظة او العلاقة بينهم خدت شكل تاني او انحرفت بعيد عن مسارها
عشان كدة انا مع ان البنت ماتتكلمش عن ماضيها مهما كان .. وتعتبره ماضي وانتهى وصفحة لا يمكن ترجع تتكلم فيها تاني .. وانها مادام ارتبطت بحد يبقى خلاص حاضرها ومستقبلها ليه
لانها لو صرحت حيفضل الشك بينهم طول الوقت .. وحيفضل يسألها عنه ان كانت تعرف عنه اخبار عشان يتأكد انها قطعت علاقتها بيه مثلا .. والصراحة في الموقف دة بتبقى سيئة خصوصا في وقت الخناقات
وتوصل مع الولد لمرحلة المعايرة .. اه مانتي كنتي بتمشي مع ولاد قبليا ولفيتي ودورتي والله اعلم مخبية عليا اية ... يابتاعة فلان .... والله ياسولتو بتحصل والحكاوي في الموضوع دة مش حتخلص
مش كل الولاد متفتحين ويقبلوا حاجة زي كدة .. وان لو عرفوا حيفضل الموضوع دة في دماغهم برضة وحياتهم حتبقى مش مستقرة
طبعا انا اتكلمت عن حالة البنت لما تصرح بماضيها
نيجي بقى للولد صاحب الماضي
ممكن البنت تشوفها مش مشكلة دة لو هي متفتحة .. وممكن تبقى شكاكة برضة ودماغها تشتغل والشيطان يشتغل معاه .. بس ثورة البنت ناحية ماضي حبيبها حتبقى اقل من الولد طبعا
خلاصة الكلام .. الماضي ماضي وراح خلاص يبقى لا نتكلم فيه ولا نجيب سيرته .. بس
نانسي
كلامك سليم..بس نقطة انه مايتصدمش اعتقد انها صعبة اوى..ده رد فعل طبيعي
بس اكيد طبعآ مش هينفعل وسط الناس و يقوم يقول لها اهلكي يا خائنة :D
فاطمة
"نسبي"
الكلمة دي قطعت مسافة كبيرة معايا :D
طبعآ متفق مع كل كلامك
بس انتي متأكدة ان في ناس نسبيين لدرجة ان واحدة تتجوز شخص كان مصاب بالشذوذ؟؟
:|
علي سيرة موضوع نسبي
كنت بتكلم مع واحد صاحبي محترم اوى في موضوع الماضي ده
فقال لي انا بحب زميلتي في شغلي القديم..فمرة سألتها عن مديرتنا
قالت لي مش عايزة اسمع سيرتها و من يومها مش بفتح معاها سيرة المديرة عشان ما افتحش جراح الماضي و نفسد علاقتنا
هو ده بالنسبة له ماضي حبيبته..و ده الإثبات العملي المتطرف للنسبية في تقبل الماضي :D
ريـم
هو داء رجالي فعلآ..فضول..حب إمتلاك..معرفش نقدر نسميه ايه
بالنسبة لحتة انه مايروحش يسلم عليها..في ناس بيعملوها كنوع من الغلاسة
اروح اسلم عليها مع جوزها و اشوف رد فعلها لما تشوفني..اصلي عارف انها بتحبني اصلا
و اغلب اللي بيعملوا كده بيقابلوا رد فعل غبي من البنت يخليه حاسس انه اهبل عشان فكر يسلم عليها و هو فاكرها هتترمي في حضنه :D
سـاره
إحنا إتناقشنا كتير اوى في الموضوع ده
و زي ما قلتي..انا قلت لك شبح الماضي هيفضل يطارد اى اتنين لو ماقتلوهوش بنفسهم
يعني لو الواحد شايف ان ماضيه فيه حاجة مزعجة لازم يواجه الطرف التاني به عشان يقتلوا فكرة ظهور الشبح ده
بدل ما يفضل يطارد صاحب الماضي و يجيب له عقدة الذنب
متفق معاكى في جزئية ان مفيش بنت في الزمن ده ماحبتش..او خلينا نقول ما اعجبتش بحد في صمت
يعني بالعربي مفيش بنت قلبها مادقش..و دي الطبيعة
و بالنسبة لجزئية مفيش حد عنده الجرأة يقول لواحد ده كان حبيب مراتك..انتي ماتعرفيش اصحاب النوايا الطيبة حلوين قد ايه :D
بالنسبة لجزئية ماضيها السيء..اعتقد ان في خط احمر بعده ماينفعش الست تخبي عن اللي هيرتبط بها
مـروة
كلامك سليم فعلآ
هي فكرة واحدة و هتجر وراها مجموعة لا متناهية من الأسئلة..و هو ده اللي قصدته بجملة دائرة الماضي اللامتناهية
عشان كده شايف ان اى اتنين لازم يقتلوا ماضيهم قدام بعض عشان يرتاحوا
هبة
ماعتقدش ان ممكن اى خلاف يوصل باتنين للمعايرة بالماضي الا لو كانوا مراهقين من بتوع كينج اوف جينيريشن و بيسمعوا إعتذري للي هييجي بعدى :D
عندك حق في جزئية ان البنت تقبلها لماضي الولد بيكون اكبر و بتعديه بسهولة
ده في بنات اصلا بيموتوا في الولد اللي مقطع السمكة و ديلها..بيحسوا بإطراء انه ساب كل مزز الدنيا و جه عندهم و وقع في دباديبهم :D
بس مختلف معاكى في جزئية تصميم البنت علي عدم ذكر الماضي..لان احيانا التصميم ده بيدي فرصة لتوليد الشك في ان في حاجة جديرة بالإخفاء
ياسمين
كان عندي حق لما قلت ابو تريكة :D
متفق معاكى طبعآ..بس بالنسبة لحتة إرضاء الغرور فدي للبنات اهم اكتر منها للولاد
لان البنات بتحس لما الولد يسيب كل الجميلات اللي بيقابلهم و يختارها..انها احلي من اى بنت في العالم
و تبتدي تحط المقبولات شكلآ من امثال كاميرون دياز و كاثرين زيتا جونز في المرتبة التانية بعدها
بس بالنسبة لحتة كل واحد يحترم نفسه دي..المشكلة ان في ناس مش متقبلين اصلا الماضي المحترم
علي الهامش
---------
ما بلاش نتكلم في الماضي
الماضي ده كان كله جراح
و مادمت في حبك انا راضي
هندور ليه علي شيء راح؟
الماضي انتهي لما عرفتها
و عرفت انها حبتني اكيد
حسيت وقتها انني بحبها
و ابتدا حبها جوايا يزيد
عمرو دياب - الماضي - اغنية عدى عليها اكتر من 20 سنة
يا لهوي
عدى عليها 20 سنة !!!!!!!!!!!!!!!
انت بتتكلم جد ولا بتهزر
اصل انا حضرت الالبوووون دا لما نزل وكنت واعية كويس
يا خرااااااااااااااااااااااااااااااااااشيييييييييي وتقول ماضي
دا ماضي طويييييل اوي
من اجل مزيد من الدقة رجعت للأرشيف..الاغنية صدرت سنة 1992
يعني بقي لها 17 سنة :D
ليا سؤال يا محمد بعيد عن الموضوع
هو مفيش ولا شاب رد في الموضوع ليه؟؟
مش ملاحظ ان كل اللي ردوا بنااااات
؟؟
:D:D:D
ماتقلقيش يا مروة..جايين في السكة :D
طب وحياااااااة ربنا بتوصل للمعايرة وفي مشاكل هايفة جدا .. وممكن يكونوا مش من اللي بيسمعوااعتذري ولا يسقطوا البنطلون ويرفعوا شعرهم
مشكلة الولاد انهم عاوزين يكونوا نسخة بالكربون من سي السيد .. المحلل ليهم حرام على غيرهم ويعتبروها كبيرة من الكبائر كمان.. فيغلطوا ويحرتبطوا بواحدة ماعتبتش الشارع حتى
دانا سمعت مرة زميلي كان بيقوللي والله ياسولتو .. بالحرف الواحد .. انا لو اطول اخد بنوتة نونو واربيها على ايدي واكبرها وبعدين اتجوزها .. عشان اضمن انها تكون ابيض وزي مانا عاوز .. ودة بقى لا لف ولا دار قوي زي البقية
حقوللك حكاية ...
مرة واحدة اعرفها كانت مرتبطة زمان .. فاالي مرتبطة بيه سألها .. انتي كنتي بتاخدي دروس ثانوي مع بنات بس ولا مع بنات وولاد؟؟؟ فراحت قالت اه كان معايا ولاد .. بس بتسأل لية؟؟ راح قاللها لا عادي .. وكانوا كام واحد؟؟ قالتله حوالي اربعة منهم واحد جارنا من زمان اسمه احمد ومتربيين سوا .. خد بالك .. جاري ومتربيين سوا
راح قالها اية؟؟؟ ومن ورايا وماتقوليليش؟؟ يعني كان ليكي ماضي وماتقوليليش؟؟
والموضوع كبر لغاية ماراح قالها في الاخر روحي مش عاوز اعرفك تاني يابتاعة احمد !!!
لاحظ ان مكنش فيه مشكلة نهائي عشان تحصل ويعمل كل دة .. دة غير انه مكنش باين عليه التفاهة والهيافة وانه راجل عاقل وموزون .. طبعا سابوا بعض ورجع زاحف على ايديه ورجليه يبدي
الندم على غلطته بس خلاص بعد اية؟؟
كان شكله بيتلكك باين ولا اية مش عارفة
دة غير العريس اللي ساب عروسته قبل الفرح بيومين عشان اكتشف انها بتدخل منتديات وبترد على بنات وولاد زي مابنرد على بعض كدة في ايجي .. واتهمها بالخيانة .. لمجرد انها ردت في موضوع او رد صاحبه ولد
معظم الولاد ان مكنش كلهم يعني .. مش بيحبوا دول بيمتلكوا البني ادمة اللي بيرتبطوا بيها امتلاك بشع .. يديهم الحق انهم يتصرفوا فيها كأنها تي شيرت يلبسه وقت مايحب ويقلعه وقت مايحب .. او كورة يخطبها في الحيطة ويستنى لما ترجعله تاني .. والكورة ياترجعله في ايده يافي وشه
ومازلت مصممة على اخفاء الماضي ياسلتو .. لانك والله ماتضمن اية اللي ممكن يحصل قدام لما الولد يعرف ماضي حبيبته مهما كان عاقل ومتفتح ودماغه كبيرة .. ودة بيبان في المواقف الصعبة الي ممكن يقابلوها قدام
اللي مش مقبول ان ارتبط بواحده لسه بتحب الاولاني يبقي تصارحني انها مش قادره تنساه واخدها من قاصرها
اللي مش مقبول اني ارتبط بواحده وانا لسه مش قادر انسي الاولي رغم ان التانيه قايده لي صوبعها كشافات مش شمع
اللي مش مقبول ان واحده ترتبط بيا علشان تنسي الاولاني او انها ترتبط بيا والسلام بدون اي عواطف حقيقه
اللي مش مقبول اني بعد مارتبط بواحده الاقي الاولي رجعت لي وراكعه تحت رجلي فابقي مش عارف اعمل ايه في التانيه رغم اني بحبها فعلا مش باضحك عليها
اللي مش مقبول انك تسيب واحده وبعد ماهي دخلت حياه تانيه جديده تحشر نفسك مره تانيه جوه حياتها لانك حاسس بفراغ عاطفي مش اكتر وتدمر حياتها تماما
لمزيد من الدقة
كنت داخله اقول كده والله
الأغنية ليها 17 سنة نزلت وانا في اولى اعدادي
يالهوووي برضه دنا مخلصة اولى اعدادي من 17 سنة:D
بقى كده يامحمد ماتلاقيش غير الأغنية دي عشان تثبتلنا اننا كبرنا :D
...........................
ليا سؤال يا محمد بعيد عن الموضوع
هو مفيش ولا شاب رد في الموضوع ليه؟؟
مش ملاحظ ان كل اللي ردوا بنااااات
؟؟
:D:D:D
ههههههههههههههههههههههه
ماقلتش حاجه انا هي اللي قالت d:
هبة
ايه النماذج المتطرفة دى؟
اعتقد ان اللي بيتلككوا بيكونوا ناس واخدينها تسلية و بيدوروا علي حجة يخلعوا بها مش اكتر
لكن اللي عايز يرتبط بجد لازم دماغه تبقي كبيرة و فكره ناضج بدرجة تخليه يستوعب كل الجوانب في الموضوع
و من الجوانب المهمة..انه يكون عارف خريطة عالم الشخصية اللي هيرتبط بها
ليكتر
اول رجل يرد..جبت من الاخر انت
متفق معاك في كل النقط..تقريبآ هو ده رأي الوسط في الاشياء الغير مقبولة
يعني دي الحاجات اللي كانت مجال اتفاق من كل الاطراف اللي تناقشت معاهم
سـارة
شوفتي الزمان بيجري ازاى يا طنط؟ :D
و بالنسبة لسؤال مروة..انتى مفسراه غلط..هي تقصد ليه الولاد بيهربوا من مناقشة الموضوع
علي العموم محمد رد اهو..يعني مالكيش حجة :D
موضوع جداً رائع...
ونقاش أروع..
Dr. Lecter
اتفق معك في كل نقطة ذكرتها..
تحياتي لك Mr. Mohmmad..
Post a Comment