كل الناس بيقعوا في الحب..و بطبيعة الحال بييجي الوقت اللي يصارحوا الطرف التاني بمشاعرهم
أكيد لو قالت له و انا كمان مش هيبقي في حاجة نتكلم عنها في البوست دي
انا بتكلم عن اللي إتقالهم لأ..يا تري إيه احساس واحد حب ولا طالش؟
اول حاجة هيكون محرج احراج طفل عمره 4 سنين عملها علي روحه في اول يوم له في الحضانة
يعني ايه؟
يعني اللي هو عمله ده طبيعي..بس محرج له في نفس الوقت
لان اكيد قبل ما يقول حقيقة مشاعره كان عايش احلام وردية
و أكيد الاحلام دي تحطمت علي صخور الواقع
الواقع اللي بيقول ان حبيبته..ماتنفعش تفضل حبيبته
تاني حاجة هيبقي في حزن طفل عمره 4 سنين كسر لعبته المفضلة
هيفضل يحب حبيبته بس قلبه هيبقي مكسور لانه عارف انه بيحب مع نفسه
و علي رأى عنوان اغنية سميرة سعيد الجديدة اللي مسمعتهاش ولا نزلت
حب ميئوس منه
تالت حاجة حتي و هو وسط الناس هيبقي احساسه بالوحدة نفس احساس طفل عمره 4 سنين أهله سابوه في البيت لوحده
رغم ان الطفل حر يلعب و يبرطع في البيت براحته
بس لعبه و جريه و تنطيطه مالوش معني لانه لوحده
رابع حاجة..هيبقي نظرته لحبيبته نفس نظرة طفل عمره 4 سنين لكيس شيبسي محطوط علي ترابيزة عالية
نفسه يوصل لها و شايفها قدامه بس عمره ما هيطولها
و من هنا جت جملة "اللي حب ولا طالش" لانه مقدرش يوصل لكيس الشيبسي ولا قلب حبيبته
5 comments:
بوست عبقرى :D
هوا انا متهئيلى يا سولتو , ان لو واحد اتقاله لأ , تكون روحه رياضيه ويفهم انه مش واقع في فيلم بحبك وانا كمان عشان تيجى البنت الى اكيد مش هاتبقى شبه سمية الشخاب وتقوله , وانا كماااااان .. انا بيتهئيلى انه 99% من الردود بتبقى لأ اصلا , ودا مش عان تجربة شخصية والعياذ بالله :D , بس هما البنات دلوقتى بيقولها على سبيل التسلية او التجديد او انهم مش لاقيين حاجة تانية يعملوها!
بس انت ليه متعقد من سن ال 4 سنين دا , دا حتى سن انطلاق الشباب
مممممم
غلطان اللي يصرح بمشاعره لحد وهوا مش واثق من احساس الطرف التاني
اصله بيبان وبيتحس
ليه الواحد اصلا يحط نفسه في الموقف دا ويصغر نفسه لسن ال 4 سنين
ماتخليه محافظ على هيبته ويحب مع نفسه جوا نفسه
اكرم بصراحة !
بعدين في حقيقة اكتشفتها مؤخرا ...ان الانسان لو حس اي احساس من اي نوع وماتكلمش عن احساسه دا نهائي حتى مع نفسه ..الاحساس دا هيهدأ بعد فترة ومش هيبقى احساس مندفع زي الاول ..مش بقول الاحساس هيختفي او يقل ...لا ..بس فورة الاحساس هتهدى
والانسان لو حس بحاجة وقعد يتكلم فيها كتير هيقعد يكبرها جواه اوي
لسه النظرية دي تحت الاختبار بالنسبة ليا :) مش واثقة من صحتها اوي بس اهي ملاحظة لاحظتها وخلاص
أحمد: سن الـ4 سنين ده السن اللي بنواجه فيه قسوة الحياة و نصحي الصبح عشان نروح المدرسة بدل ما نشوف ماما نجوي و بقلظ
فنون: مش عارف..كتمان المشاعر جوه الانسان ممكن يخليه يندم بعدين انه ماقالش..لانه كان عنده 50% يسمع و انا كمان و 50% يسمع لأ..و دي المخاطرة اللي كل الولاد بيتحطوا فيها..يا بخت البنات
فعلا يا صاحبى .. انها لحياة قاسية مليئة بالمأسى , حياة بتخليك مجبر انك تشوف الفقرة الزراعيه في صباح الخير يا مصر عشان الكبار فاتحين التليفزيون عليها , مجبر لدرجة انك بتدندن لحن , عايزينها تبقى خضرا , الارض الى في الصحرا وانت رايح المدرسة :(
:D:D:D:D:D:D:D
فكرتنى بالذى مضى
و عايزينها تبقي خضره الارض اللى فى الصحرا و نقدمها لمصر هديه حاجه جميله معتبره ..
هى ايه ؟؟ الصحرا .. تبقي ايه ؟؟ خضرا
:D
مكانش فيه ايامها دش و الاهالى بيعذبوا ولادهم و يشغلوه على الصبح
بس الحمد لله بقالى اكتر من 10 سنين مسمعتوش ... الغريب انى لسه فاكره الاغنيه الرهيبه دى ...
Post a Comment