طراطيش كلام ع الصبح

مابحبش الباك اليمين في فرق الكورة
دايمآ بحس الباك الشمال اهم منه في الفريق

و ده مش تحيز عشان ده مركزي المفضل..بس ده الواقع

بس الإستثناء الوحيد اللي شفته في العالم هو منتخب مصر

ده فريق الكورة الوحيد اللي الباك اليمين فيه اهم من راس الحربة ذات نفسه

طبعآ دور أحمد فتحي كان اهم بكتير من دور عماد متعب في بطولتين الامم اللي فاتوا

أغبي حاجة لما اتصل بواحد صاحبي و اقوله يلا نخرج؟ يقولي مش النهاردة

اكلمه بعد يومين يلا نخرج؟ يرد مش النهاردة

يستني كام يوم و يكلمني الساعة 12 بالليل..يلا نخرج؟ اكون انا مشغول او مرهق و عايز انام و اقوله مش النهاردة

يقولي مش انت قاعد تزن عليا يلا نخرج يلا نخرج..و يزعل..رغم انني مازعلتش ولا مرة لما قاللي لا مش النهاردة

حقيقي ذكاء خارق

بحب صيد السمك حتي لو مكنتش بصطاد كتير
بس إحساس رائع انني اكون في مكان هادى مع واحد صاحبي 3 او 4 ساعات حاطين الصنارات في الميه و قافلين الموبايلات لظروف تتعلق بالنظافه و قاعدين نتكلم و مديين ضهرنا للعالم بزحمته و دوشته

كان في نيتي أكتب عن ذكريات الكلية

بس قبل ما اكتبها بساعات قابلت واحد صاحبي و قعدنا نسترجع ذكريات الكلية

و اكتشفت انني لو اتكلمت هذكر ناس كتير مايستحقوش يتذكروا بسطر نظرآ لتفاهتهم

بس لسه عندي نية اكتب عن دكتور تامر إن شاءالله

اكتشفت انني خلال الشهرين اللي فاتوا ماقابلتش غير 4 من أصحابي فقط

يبدو انني انشغلت بالحياة زيادة عن اللزوم

انا شخص صعب الإرضاء و من الصعب أقتنع

مابقتنعش بأى حاجة ولا أي حد

بس مابحبش العند..ممكن اتراجع عن حاجة مش مقتنع بها و اقتنع

بس أفهم ليه لازم أقتنع بها

و ان حد يكون له خلق يفهم اللي قدامه ده بقي شيء نادر

الصراحة مع الأخرين جزء من إحترامك لهم

ولا ايه؟

مابحبش فكرة الإحساس انني رقم 2 في قائمة الترتيب
جو الإستبن ده مابياكلش معايا خالص

تقريبآ عندي رادار بالقط به اي حد يعاملني علي اساس انني مجرد شخص إستبن
إزاى الواحد يبقي إستبن؟ ده موضوع تانى