انا احد الاطفال اللي عاشوا طفولة معذبة كانت النجومية في السينما فيها لنجمة الجماهير نادية الجندي
و اللي كانت كل فترة بتتحفنا فيها بفيلم بيدور عن انتقامها من الرجالة كلهم اللي طبعآ هيحبوها و يذهلوا قصاد جمالها الخارق و هي هتسحقهم و تضحك في اخر الفيلم
و جت مرحلة المراهقة و انقذنا محمد هنيدي و محمد فؤاد لما عملوا إسماعيلية رايح جاى
و بصرف النظر عن مستوي الفيلم اللي نجحه إعلانات الكرتون بتاعة البوم كمانانا
و بعد الفيلم ده نهضت السينما و اختفت نادية الجندي بعد كام فيلم حاولت تقاوح فيهم
طبعآ كان لازم حد يملي فراغ نادية الجندي في النجومية الغير مبررة و تقديم الأفلام الهابطة
و صبرنا سنوات لحد ما جه مصطفي شعبان يملي الفراغ ده
غلطة شريف عرفة انه اختار مصطفي شعبان في فيلم "مافيا" مع احمد السقا و مني زكي
لان من يوم ما مصطفي شعبان نط في المخزن و خد الرصاصة في كتفه و هو بيعتبر نفسه بطل أكشن
و أذكر تصريحاته الخالدة انه افضل من السقا في الأكشن لان جسمه رياضي عن جسم السقا
المهم..مصطفي شعبان بعد ما كان ممثل بارع بيحصد الجوائز عن ادوار في افلام زي" خلي الدماغ صاحي" و "النعامة و الطاووس" لقي ان افلامه ماجابتش إيرادات
فقرر يعمل افلام جماهيرية..و عمل فيلم "أحلام عمرنا" مع مني زكي و منة شلبي
و طبعآ السقا كان في دماغه فحشر مشاهد اكشن و خليني اكون حسن النية و اقول انه ما اخدش حاجة من أفريكانو ولا شورت و فانلة و كاب
بس مش هقدر اتجاهل انه في تحفته السينمائية التانية "فتح عينيك" و بصرف النظر عن كمية اللامنطق في الفيلم ده فهو قرر يقتبس من نفسه و نقل مشهده الشهير في مافيا
مافيا: عباس ابوالحسن + مني زكي و السقا في الجراج القديم + مصطفي شعبان بيروحلهم بيتضرب بالرصاص في كتفه الشمال
فتح عينيك: خالد زكي + نيللي كريم و مصطفي شعبان في الجراج القديم+ يوسف الشريف بيروحلهم بيتضرب بالرصاص في كتفه الشمال
عباس ابو الحسن هرب للصحرا و خالد زكي هرب للمطار
السقا ولع في عربية عباس ابو الحسن و مصطفي شعبان ولع في طيارة خالد زكي عشان هو اجمد طبعآ
نسيب تحفة مصطفي شعبان و نروح لكارثته "الكود 36" و ده شفته بالإكراه بعد زن شديد من احد اصدقائي و لما دخلت السينما اكتشفت انه فيلم مثير للتشويق
ما انكرشي انني كنت متشوق اشوف نور السينما بينور و اخرج
طبعآ ماشفتش فيلم "جوبا" لانني اتعلمت الدرس و عرفت انه مايتخيرش عن نادية الجندي..هيعيش دور البطل اللي بيقهر جميع الرجال و ينتصر في أخر الفيلم
مصطفي شعبان كان ممثل جامد..بس عقدة الأكشن دي مش هتوديه لاي حتة
و إحنا مش في زمن الـ4 نجوم يعني معندوش فرص كتير يقدم لنا الافلام دي
و لي عودة مع فنانين اخرين بيثروا سينمتنا الحلوة
3 comments:
انا ادمنت المدونة دي :)
ضحكني الموضوع اوي
ومتفقة معاك في كل اللي قلته
بس انت كل دا وانت ما شوفتش جوبا
امال لو شوفته كان حصلك ايه :)
منه لله الراجل بتاع البامبرز
هوا ايه اللي بيخليه يكتب
ما يخليه في العيال
في جوبا مصطفى شعبتن فعلا ما يتخيرش عن نادية الجندي في مهمة في تل ابيب
خلص الفيلم على ان مصطفى طبعا القناص الرهيب اللي مشيب اليهود وكل يوم مموت عشرات منهم وهما مش عارفين يجيبوه
والبطل القومي الذي لا يقهر
وطبعا مش قادرة احكيلك ع السقالة وتقل الدم بتاع داليا البحيري
ولا المشهد المسف ..اي والله مسف
اللي واقفة بتقوله فيه :
انت مش عارف انت ايه ..انت بطل
وهوا كان حتة مصور فضايح لا راح ولا جه
نفسي افهم مصطفى فعلا بيعمل كدا ليه
مصطفى كان مشروع ممثل ناجح جدا
هوا بس ربنا يشفيه من عقدة السقا وممكن حالته تتحسن
انا مستنيه بقيت الاجزاء بتاعت موضوعك بفارغ الصبر
ما تغيبش بقى
ربنا يخليكي ع التشجيع ده يا فنون :)
انا من اول ما شفت المشهد المسف في الإعلان و انا كنت مدرك ان الفيلم عالمي:D
و هو في الفيلم ده نجح في انه يعمل توليفة من الناس تخليني ماعديش قدام اي سينما بتعرض الفيلم
بيفكرني بنادية الجندي لما كانت بتحشر سعيد عبدالغني في اي فيلم
هو بقي يحشر احمد سعيد عبدالغني
ياعم انت جبت منين بالظبط انه ممثل بارع ! , مصطفى شعبان دا كتلة من الغباء والبرود والسخافة والاداء السنيمائى المثير للشفقة
انا بتخنق منه , وممكن اتفرج على نادية الجندى ارحم !
Post a Comment