طرطشة كلام الظهيرة

بما ان الساعة عدت 12 يبقي كده طرطشة كلام الصبح خلصت
خلينا في طرطشة الظهيرة

كنت بتكلم في البوست اللي فاتت عن ان البني ادم يكون إستبن
افرض مثلا انك كلمت احمد و قلت له يلا بينا نخرج؟
احمد قالك بص..لو مارحتش الجيم ولا خرجت مع عمر ولا كسلت و نمت هكلمك و نخرج
بطبيعة الحال واحد زيي عايز يخرج مش هيستني يبقي رابع إختيار..فهكلم واحد تاني و نخرج
و مش هكلم الجدع ده تاني و اقوله يلا بينا نخرج لانه اكيد بيهرج


مش حاجة غريبة ان انا و صديق طفولتي نبقي في نفس المدرسة من حضانة لثانوي و مع ذلك مانبقاش في نفس الفصل غير مرتين بس و بالصدفة؟

الناس قرفوني بكتاب "تاكسي" و قعدوا يزنوا عليا عشان اقراه
و قريته و جالي حالة غثيان مشابهة لحالة القرف اللي جاتلي و انا باقرأ "عمارة يعقوبيان" من وقاحة إستخدام الألفاظ بحجة الواقعية في السرد
كان عندي حق لما قلت أسعار الكتب أرتفعت و مستوي كتابها أنخفض

عودة لموضوع الإستبن

انا بحب لما اعمل حاجة اكون قادر اعملها بأفضل طريقة ممكن تتعمل
و انا طفل صغير كنت مقلبظ و بطيء في الجريء
و كنت مابعرفش العب كورة
و اوائل ما بدأت العب كورة مع اصحابي كانوا دايمآ لما ييجوا يختاروا فريق يخلوني أخر واحد

بعد فترة قررت انني مش هلعب كورة معاهم
و فعلا فضلت سنين أرفض انني العب معاهم كورة
لحد ما كبرت و بقيت زي العصايا و لمست الكورة لاول مرة من سنين

لقيت نفسي لعيب اوى و سريع
أذكر في اليوم ده عورت اتنين في اول ماتش لعبته رغم انني مالمستهمش بس ده كان بسبب فاصل إستعراض مهارات بالكورة ادي الي انهم يتقلبوا ع الارض كالبلاليص

تاني ماتش كان اول ماتش العبه في حياتي في المدرسة جبت 7 اجوال في اول 10 دقايق و طردوني عشان زهقوا من السنتره

بس مسيرتي ما استمرتش غير شهور و اعتزلت للإصابة

ابوتريكة فلت مني بسبب إعتزالي المبكر


بمناسبة ذكريات الطفولة..بما انني كما ذكرت كنت مابلعبش كرة قدم
كنت بحب اوى و انا صغير العب كرة يد مع اصحابي..و بعضهم كان بيلعب في فرق ناشئين بالاندية و المنتخبات
لحد ما في يوم قالوا لي تحب تلعب في فريق الناشئين في نادى سبورتنج؟
قلت لهم أكيد
قالوا لي انت احسن من كل لاعيبة النادى بكرة تيجي معانا التدريب
و واحد منهم قالي انا كابتن الفريق و هقنع المدرب يضمك بس بشرط
قلت له ايه؟
قاللي هتبقي مجبر تشتم و تتخانق طول الوقت
لان معظم الاندية بيكونوا لامين عيال متشردين من مراكز الشباب و دول مابيجوش يلعبوا..دول بييجوا يضربونا
و كانت تلك لحظة إعتزالي كرة اليد قبل إحترافي لها

كان في جملة غريبة في اغنية مستفزاني
حسيت بالعبقرية لما سألت صاحبي..بذمتك مين الاهبل اللي يحط الجملة دي في توقيع في منتدي؟
قال لي علي فكرة انا صاحب التوقيع ده

في الحر ده الواحد مايتمناش غير انه يبقي بطة
ايوه..بطة و اقعد ابلبط في الميه رايح جاى
صحيح هو ليه محدش في مجلة ميكي رد علي إستفسارات الجماهير عن سر الفوطة اللي عم بطوط بيلفها حوالين وسطه بعد ما يستحمي رغم انه في العادى بيلبس تي شيرت بس؟


مش عارف هعمل طرطشة العصاري و طرطشةالمغربية و طرطشة المساء ولا لأ
بس الاكيد انني مستمتع بفزلكتي في الكتابة لدرجة تخليني اصمم أطرطش بالكلام مرة تانية حتي لو ماكانتش النهاردة