بيلفت نظري عناوين الكتب و الروايات
الناس عشان يبقوا مثقفين لازم يضربوا اسم 2 كتاب اجانب ضمن الكتب اللي بيقروها
اولهم هيكون باولو كويلو
و انا احد الاشخاص اللي يطلق عليهم دودة قراية بس تقريبآ لحد سن 16 سنة كنت فاكر باولو كويلو ده احد انواع البن البرازيلي الجيدة
و لما اتشرفت بمعرفة جنابه جبت روايته
alchemist
و ماقدرتش اكمل اكتر من 30 صفحة من الملل
تسمعوا اسامي الروايات العالمية تحسوا بغموض
"الخيميائي"
"الحب في زمن الكوليرا"
"مئة عام من العزلة"
"مائتان فرسخ تحت الماء"
في حين تلاقي عناوين الكتب المصرية المقروءة عناوينها عادية
"كابتن مصر"
"شكلها باظت"
"تاكسي"
عشان كده قررت اقتحم مجال كتابة الكتب
و اهم حاجة قبل فكرة الكتاب هي عنوانه
و حاليآ جاري البحث عن شوية عناوين رنانة لكتب قد اكتبها مستقبلآ
و قررت يبقي لها صدي يدل علي ثقافتي الغزيرة و عبقريتي الفذة
قريبآ سأكتب القائمة..و ان كنت استقريت علي عنوان كتابي الاول
"أسطورة البعبع المفزوع"
و هي طبعآ واضح من عنوانها رواية في ادب الرعب
إستعدوا لمولد نجم ساطع في عالم الأدب العالمي
2 comments:
:)
انا من الناس دي باين ولا ايه
بس والله مش عشان اقول اني مثقفة
انا عموما بحب القراءة جدا من وانا صغيرة جدا
يمكن ساعد على كدا ان بابا وماما بيحبوا القارية اوي ..وعندنا في البيت مكتبة كبيرة مليانة كتب
ب 3 لغات ( عربي وانجليزي وفرنساوي )
وكتب من نوعيات مختلفة عشان زوق بابا كان غير زوق ماما
فقريت انواع كتير ولكتاب كتير يمكن في ناس قريتلهم ومش فاكراهم وحاجات قريتها ومش فاكراها من كتر ما قريت طول عمري
بس اللي علموا فيا كان ناس قليلين وكتب قليلة
من اهم اللي اثروا فيا كان باولو كويلهو وبالذات the alchemist
مش عارفه انت ازاي حسيت بالملل ..ممم يمكن قريت ترجمة وحشة واضح كدا لانك كاتب اسمه بالعربي الخيميائي
دي ترجمة سيئة جدا
جيب ترجمة باسم ساحر الصحراء للاستاذ بهاء طاهر
هوا اصلا رااائع في كتاباته ...وترجم the alchemist ترجمة فعلا اكتر من رائعة
من اهم الكتب اللي اثرت فيا كمان في ظلال القران لسيد قطب
دا مجموعة كتب كل كتاب قد الداهية
قريتهم كلهم وانا في تانية ثانوي
من ساعتها ماقريتوش تاني على فكرة
بس اتعلقت بيه وبسيد قطب شخصيا
وكمان من اهم الكتب عندي انبياء الله لاحمد بهجت
الكتاب دا انا شايفه انه مهم جدا في كل بيت
حقيقي عيب لما الناس ما تبقاش عارفه مين الانبياء ولا عملوا ايه
والكتاب دا بيحكي قصص الانبياء بشكل بسيط وفي منتهى الاحساس
من غير فذلكة وتعقيد
وبيركز جدا على الانسانيات اكتر من اهتمامه بسرد الاحداث
اخر كتاب بقى اثر فيا عشان انا كدا طولت اوي
the secret
ماعرفش اترجم ولا لا ولا ايه اسم ترجمته
بس عموما هوا كتا يستحق القراءة ومن الكتب اللي الواحد يحب يحتفظ بيها في مكتبته
المعتوه بقى اللي اسمه جابرييل غاسيا ماركيز بتاع الكوليرا والعزلة
دا قريت شوية الحاجات دي من زمان وبصراحة جالي اختناق فعلا
انا عملت زي مانت انتقدت بالظبط :)
انت قولت يحشروا اسم كتابين انجليزي واحد فيهم باولو كويلهو
انا عملت كدا بالظبط
بس والله مش فذلكة
دي الحقيقة فعلا
عموما اسم الكتاب اكيد ليه اثر كبير
في انتظار ابداعاتك
باولو ده جايب الكلام لقراءه :D
لا انا اقصد ناس معينين تلاقيهم دماغ فل ناصعة البياض
تسألي اي حد منهم بتقرا؟
يقولك طبعآ بقرا لنجيب محفوظ و لسه مخلص رواية لباولو كويلو
انا طفولتي كانت غريبة بسبب إدماني للقراءة
أكيد هتكلم عن المرحلة الهامة دي قريب ان شاءالله
بس اعتقد الرواية اللي قريتها كانت نازلة بترجمة النسخة العربي اللي هو جه وقعها هنا في مصر
و احمد السقا حرقها في تيتو..هيطلع في الاخر الكنز في الرحلة
كل ما اقرا صفحة و افتكر الجملة احس انني هشرب مقلب كبير لو كملت للأخر
Post a Comment