حاسس بإرهاق فظيع
إرهاق خلاني أجلت كل المشاوير و الإرتباطات من امبارح -التلات- لحد يوم الإتنين الجاى إن شاءالله
مش عارف سبب الإرهاق ده جسدي نتيجة لقلة و إضطراب نومي اللي مخليني عامل زي المساطيل
ولا سببه نفسي نتيجة لكثرة المواضيع اللي شاغلة بالي في نفس الوقت
ولا سببه عاطفي نتيجة لكتماني الكثير من المشاعر الإيجابية و السلبية تجاه كثير من الأشخاص
ولا الـ3 أسباب مجتمعين سوا؟
المهم إنني تعبان و قررت أستسلم و ابطل مكابرة و أقر بده
إمبارح شربت 6 كوبايات شاى ورا بعض مع نهاية الكوباية السادسة كنت نايم
الكافيين بقي مايحوقش فيا
يادوب انام ساعتين و ارجع اصحي قصادهم 20 ساعة
عايز أرتاح
عايز أحط النقط علي الحروف
عايز أحس براحة نفسية تدفعني انني البس شورت و تي شيرت زي ما البشر بيعملوا في الصيف
عايز يبقي عندي حرية انني أجرب كل الإحتمالات اللي قدامي
و اشوف كل النتايج الممكنة
و اختار النتيجة الانسب لكل موضوع
undo بس الحياة مفيهاش زرار
عشان الغي النتايج التانية اللي مش هختارها
يبدو ان كثرة التجارب و المخاطرات زرعت جوايا خوف من التجربة
بقيت مش حمل ضغط نفسي زيادة نتيجة انني اجرب و تطلع النتيجة غير المنشودة
حتي أفكاري اللي كاتبها دي حاسسها مشوشة و مش واضحة
دماغي مجهدة و مش قادر أوصل لحاجة
خلاص بقيت مش عايز أتكلم..مش قادر أصلآ
انا عايز أسمع
عايز أفهم
عايز أحس
عايز أتطمن
انا تعبت..عايز أرتاح..عايز أنام
2 comments:
:)
مش عارفه اقولك ايه
بس دا كان نفسي احساسي بالظبط لما كتبت مات المحارب في مدونتي لو كنت قريتها
انا كمان تعبت
تعبت اوي
طريقة وصفك لحالتك حلوة اوي
لسه قاري اللي كاتباه في مات المحارب
يبدو ان الحياة نازلة فينا ضرب ضرب و مفيش شتيمة
شكلها هترسي في الاخر ان الواحد ينفض للدنيا يومين تلاتة لحد ما يظبط دماغه و يقدر يواجهها :D
Post a Comment