إمبارح الساعة 3 صباحآ النور اتقطع في الشارع..بس ما اتقطعش عن البيوت
المهم انني كعادتي خرجت للبلكونة
الشارع في ظلام حالك و دامس و مفيش غير 3 عربيات بيعدوا بمعدل كل دقيقتين..و هو شيء اول مرة اشوفه في حياتي في أزحم شوارع الاسكندرية
الممتع هو العودة للطبيعة..مفيش اضواء صناعية..نور القمر الناصع البياض هو اللي منور الشارع
كان القمر مكتمل في السما..نوره رائع و مشع
حاجة كده من اللي بيوصفوها بليلة ساحرة..كان ناقص بس اكون قصاد البحر و اطلع الجيتار و ترالام لالام
و سرحت مع القمر
بيقولوا انه مجرد كرة غازية مضيئة
بس من هنا علي الأرض شكله جميل..رومانسي فعلا
نوره الأبيض البراق حقيقي يستاهل يتوصف به الجمال
في لحظات مشابهة زي اللي مريت بها امبارح..الانسان بيدرك معني وصف واحدة جميلة بإنها زي القمر
و لقيت نفسي بستل موبايلي من جيبي و اظبط الكاميرا عشان التقط تلك الصورة الساحرة الموجودة في اول البوست
من و انا صغير بحب ابص للقمر و اسرح
باحس ان عنده قوة مغناطيسيه و في اتصال غير مرئي بيني و بينه
باحس ان اشعاعات نور القمر بتصدر من القمر تجاهي..انا و بس
باحس ان اشعاعات نور القمر بتصدر من القمر تجاهي..انا و بس
ده قمري انا لوحدي
كمان بحس ان نور القمر فيه دفء مابترسلوش الشمس
الشمس بتدفي لحد ما تحرق..قاسية
لكن نور القمر دفئه حنين و شاعري..مهما بصيت له عينك مش هتوجعك
كلام كتير ممكن يتقال عن القمر و سحره
بس ماكدبش الراجل الفلاتي اللي كان بيربي ابنه علي الفساد لما قال
"ان سرقت اسرق جمل و ان عشقت اعشق قمر"
2 comments:
:)
انت ايه حكايتك النهاردة
طيب بدل ماكتب هنا احساسي بالقمر عشان مارغيش كتير
ابقى عدي عندي هتلاقي موضوع اسمه وجه القمر
ابقى طل عليه :)
مش ممكن موضوع وجه القمر ده حسيته بيتكلم عني :D
ازاى مشفتوش قبل كده؟
انا كنت بقعد اشتغل نفسي برضه و فاكر ان القمر بيمشي معايا
اول مرة اكتشفت النظرية دي قعدت اهلل زي الاهبل و اقولهم القمر جاي معانا
ضحكوا عليا و قالوا لي اه بس هو كبير و مايقدرش يركب عربية زينا :D
Post a Comment