Yes Man

رغم ان كل أفلام جيم كاري بتدور في نفس الفكرة

الراجل اللي بتحصل له حاجة غريبة تقلب حياته طول الفيلم و بعدين ينتهي الفيلم به هو و حبيبته

الا انني بحب أفلام جيم كاري و كل ما تتاح لي الفرصة انني اشوف فيلم له بستغلها

و أخر فيلم شفته له كان الفيلم اللي بيحمل نفس عنوان البوست

Yes Man

الفيلم اللي هحاول احكي فكرته بإختصار و بدون الوقوف عند التفاصيل هي ان الواحد لازم يقبل علي الحياة بروح مغامرة

بنشوف البطل اللي بيخشي انه يرتبط بعلاقات مع اى حد سواء اصدقاء او زملاء عمل بيحاول يصلح حياته

فبيسمع نصيحة احد اصدقاءه و بيحضر محاضرة عن الفكرة بتاعة الفيلم

و في المحاضرة بيحصل موقف بينه و بين المحاضر فيقرر ياخد عهد علي نفسه انه يلغي كلمة "لأ" من قاموسه

و بيخرج و هو ناوى يقول "نعم" لكل حاجة تواجهه و بيبقي متأكد انه لو قال "لأ" هتحصل له مشكلة

و فعلا من اول ما بيخرج بيفضل يقول "نعم" و اول ما يفكر يقول "لأ" بيقع من علي السلم

فيقتنع ان فعلا "لأ" لها لعنة و بيجبر نفسه علي كل الحاجات و مابيرفضش شيء

و بيفضل كده لحد ما بيقول "لأ" و بيتعرض لحادثة مع نفس الراجل اللي اقنعه بالفكرة

و بيعرف منه في المستشفي ان مفيش حاجة اسمها لعنة "لأ" ولا قوة "نعم"..الفكرة كلها نابعة من ان الواحد يعمل الحاجة من قلبه

يعني لو هو عايزها فعلا يقول "نعم" و مايرفضهاش

خلص الفيلم و فضلت مع نفسي أفكر في الفكرة

طبيعي ان الواحد لازم يكون مقبل علي الحياة

بس هل ممكن يقول "نعم" لكل حاجة يواجهها و يكون عايزها؟

بتحب الجيتار..طيب ايه اللي يمنعك تروح تاخد دروس جيتار؟

بتحب إيطاليا و نفسك تزورها..فيها ايه لو اخدت كورس في اللغة الايطالية؟

إيه اللي يمنعك لما تشوف بنت عاجباك تروح تكلمها..مش تعاكسها..لا..تتعرفوا علي بعض

إيه اللي يمنعك تبقي فاكك مع زمايلك في الشغل حتي لو حسيتهم شخصيات مختلفة عنك؟

و حاجات كتير اعمق او ابسط..اكيد كلنا نفسنا في مليون حاجة بس مابنعملش المليون حاجة

بس طالما انت عايز الحاجة و مفيهاش حاجة غلط او ضد مبادئك..ليه ما تعملهاش؟

انا شايف ان الفكرة بالإختصار هي ان الواحد ياخد الدنيا بدراعات مفتوحة

و جملة دراعات مفتوحة لها معنيين هنا

المعني الاول ان الواحد يبقي طاير و سايب ايديه

و المعني التاني إن الواحد ياخد الدنيا بالحضن

و مازال تفكيري مستمر في الفكرة..و لسه بسأل نفسي

إيه اللي يمنعني أخوض تجربة الفيلم؟

ياتري حد فيكم فكر فيها..او عنده حاجة تبلور الفكرة دي اكتر؟

قولوا "نعم" و إكتبوا كومنت..ايه اللي يمنع؟

إعترافات مؤلف يبحث عن أسانسير المجد

عيب انك تكون بتكتب سيناريوهات و قصص..انك بتهتم بالتفاصيل في احداث حياتك

الكلمة..الحركة..طريقة نطق الكلمة..معاني بين السطور حتي اللي قالها ماياخدش باله منها

حساسيتك تجاه كل اللي بيحصل حواليك بتكون عالية طول الوقت
بتشوف الحاجات بنظرة تانية مختلفة عن نظرة الناس اللي معاك

بالظبط زي ما الميكروسكوب في المعمل بيخلي نقطة الميه خلايا و ذرات
الحاجة الواحدة..بتتفصص و تبقي حاجات

يمكن الحكاية دي تبان ميزة..لكن مع ناس كتير بتبقي عيب

في ناس بيشوفوها زيادة تدقيق في الامور..و ده بيكون وحش اوى خصوصآ لو بيكدبوا عليك

في ناس بيشوفوها كلكعة لحاجات بسيطة..و عمل حاجة من ولا حاجة
بس الاكيد ان علي قد ما الحكاية دي بتزعج الاخرين..فهي بتزعج الشخص اللي بيعاني من كونه بيحب التفاصيل

لان حاجات بسيطة بتأثر عليه بالسلب تأثير كبير و بيكون سهل ينزعج من حاجات سهلة

الجانب الايجابي هو ان وقت ما الانسان ده بيحب شخص أو شيء..بيشوف تفاصيل صغيرة بس لها طعم حلو

كلمة حلوة كان لها معني كبير..إبتسامة جمعت بين سعادة و خجل..نظرة

موبايلي اخترته عشان أوبشن بسيط مايفرقش عن موبايل تاني كنت هختاره

حاجات كتير ماتتحسش بيحسها اللي بيعشق التفاصيل

عشان كده لما واحد منهم بيحب..بيحب بجد

و بيكون عنده بدل السبب مليون عشان يفضل يحب الشيء او الشخص اللي بيحبه

بيكون عنده مليون سبب عشان يهتم إنه ينمي الحب ده

بيكون عنده الف مليون سبب يتلخصوا في تفاصيل صغيرة عشان يحافظ علي حبه لهواية او لشخص عرفه

و برضه بيكون عنده مليون سبب عشان يعدل سيناريو حياته و يبدأ خط جديد لو اساء إختيار خطوة في حياته

حتي لو كان التعديل ده هيأخر خطوات تانية مهمة في سيناريو حياته

الشخص ده بيحب يسمع القصص..و يحب و هو بيسمعها يتخيلها..يكون شايفها..عشان كده بيصعب الكدب عليه..لان القصة بيبقي مفيهاش منطق في احداثها

و في الوقت نفسه مابيحبش استخدام الكدب لانه هيفسد تسلسل احداث السيناريو اللي هو عايش فيه

إن الواحد يكتب قصة..قصيرة او طويلة

كوميدية او تراجيدية او رومانسية او حتي رعب

كل ده بياخد مجهود فوق مايتخيل اللي بيقرأ القصص دي

مجهود ذهني و عصبي و نفسي..محاولات تخيل الفعل و رد الفعل و البيئة المحيطة

محاولات التعايش مع احاسيس الشخصيات عشان تاخد احساس شخصية منهم و تكتبه بإختصار

إزاى توصف ان البطلة منهارة بعد ما حبيبها سابها في جملة او اتنين بالكتير

هتستخدم انهي كلمة..و ايه الكلمة اللي توصل المعني اسرع

و إيه الإسلوب الاريح في إستخدام الضمائر؟

إمتي تنهي المشهد و ينتهي بإيه و الحدث الجاى ايه؟

عالم بيتبني علي إفتراضات و تخيلات و معايشة صعبة مهما كانت بساطة القصة

الجماعة المؤلفين دول و انا حاسب نفسي منهم حتي لو كنت لسه في صفوف الهواة..عاملين زي سيد أبو حفيظة

بيشوفوا الاخبار بأعينهم و ينقلوها إليكم

ممكن تختلفوا مع رؤيتهم..بس الاكيد في حالتي ان مهما إختلفت رؤيتي عن اللي حواليا

بقول اللي شفته بجد

أقعدوا بالعافية..و من غير بوس

سنتين ع البحر

النهاردة 20 فبراير 2009

ممكن يبان تاريخ عادى للكل..بس بالنسبة لي بيتميز في شيء

النهاردة بحتفل بمرور سنتين علي إفتتاح البلوج

علي البحر إبتدت يوم التلات 20 فبراير 2007

عملتها قبل إسبوع بالظبط من حفل تخرجي..كنت قاصد بها بداية مرحلة جديدة في حياتي

انني انقل كتابتي لمرحلة جديدة..و انتقل مع موجة التدوين اللي كانت بدأت تسيطر علي الساحة في مصر وقتها

كان اول بوست لي بعنوان المبولة...خش برجلك الشمال

كنت بشرح فيه انا بكتب ليه

blood diamond تاني بوست كتبته بعد ما شفت فيلم

بتاع ليوناردو دي كابريو..و كان عنوان البوست

TIA...This Is Africa

و إتكلمت فيه عن أفريقيا المجهولة بالنسبة لنا..و البوست ده انا بعتز به جدآ لانني عشان اكتبه قريت و عرفت حاجات عن أفريقيا كنت بعرفها لاول مرة

و كانت اول مرة أهتم انني افهم اوضاع البلاد الصغيرة اللي معانا في القارة

كتبت بوست تالت عن الموسيقي و غبت لحد شهر يونيو كتبت مرتين

مرة عن فيلم 45 يوم..و التانية عن سعاد ماسي و كنت بدافع عن اللي حصل لها

لما قامت حملة علي كل مدونات مصر تطالب بإلغاء الحفلين اللي كانت هتعملهم هنا بما انها رايحة بعدها إسرائيل

و كتبت ان بحكم انني من محبي الموسيقي اللي بتقدمها و عارف قصة حياتها عارف انها مستحيل تغني في إسرائيل حتي لو مضت العقد

و اللي اكد لي ده ان قبل كتابتي للبوست باسبوع حظي الحلو خلاني أقابلها انا و كام واحد بعد حفلة الاسكندرية

فضلت واقفة معانا حوالي فترة طويلة و فضلنا نتكلم و كان في سؤال مهم واحد جزائري معانا سأله لها

جولتك هتكمل فين؟

و إرتحت لما اجابتها مكنش فيها اسرائيل

بعدها في شهر يوليو رجعت كتبت خبر نشرته جريدة يديعوت احرنوت ان سعاد فعلا رفضت تطلع علي المسرح و الحفلة اتلغت

و مكتبتش بعدها لمدة 8 شهور..و رجعت تاني للكتابة في 15 مارس 2008

بس وقتها كنت مصمم أنني أفضل اكتب

و كان بوست الرجوع بعنوان

"ع البحر..بحر الحياة"

كنت بعاني من جرعة إحباط مركزة

كان بقي لي حوالي 4 شهور مخلص حوارات الجيش و مش لاقي شغل..و خلال شهور لازم اعزل و اسيب البيت اللي عشت فيه طول حياتي..و مخنوق من كل حاجة حواليا

كانت الكتابة هي الوسيلة الوحيدة انني أفضل اتنفس و أطلع من دوامة بحر الحياة

و من يومها و البلوج بقت مراية بتعكس حالتي النفسية و المزاجية

بقت زيها زي انني اكون قاعد قدام البحر مع واحد صاحبي..باصين للميه و قاعدين نتكلم في همومنا و افكارنا و احلامنا

و إبتديت مشوار طويل من البوستات وصل عددهم قبل البوست ده 112

من 15 مارس 2008 لحد النهاردة 20 فبراير 2009 في ناس كتير مشوا معايا المشوار ده

سواء بتشجيع..او بمناقشة فكرة..او بالمساعدة في فكرة في حالات اصحابها عارفين نفسهم

فحابب أشكر الناس اللي هم السبب انني لحد النهاردة بكتب..لانهم لحد النهاردة مازهقوش من اللي بكتبه

مش هعرف اكتب اسامي كل الناس لان أكيد هنسي الاسامي

كمان حابب أشكر الناس اللي ماكانوش بيقروا البلوج دي بس دعموني معنويآ انني اكون قادر اكتب تاني بعد يوم شاق

شكرآ من تانى لكل اللي قروا و كتبوا كومنتات

و اتمني إن شاء الله عدد الناس اللي يقعدوا معانا علي البحر يزيد في السنة الجديد

أجمد 10 الساعة 7

(1)

معرض الأسكندرية الدولي للكتاب هيبدأ يوم الخميس 19 فبراير و ينتهي يوم الاربعاء 4 مارس إن شاءالله

المعرض هيكون في نفس مكانه بتاع السنة اللي فاتت في كوته لاند بجوار مكتبة الاسكندرية منظمة المعرض

هيكون في حفلات توقيع كتب و ندوات لناس كتير زي يوسف معاطي و لميس جابر و خيري رمضان

رغم ان الافتتاح بعد يومين بس محدش خد خبر و عرفت بالصدفة

(2)

بستغرب ان نجوم السينما الرئيسيين عندنا من الرجال..رغم ان البنات ممثلات بالفطرة

شوفوا اى بنت و هي لابسة طقم جديد عارفة انه هيخزق عين صاحبتها و هيخلي حمادة يشوفها احلي من اى بنت تانية في القعدة

و الامثلة الاخري كتير

(3)

خالد يوسف رفع قضية علي قناة ايه ار تي سينما عشان عرضوا فيلمه "حين ميسرة" بعد ما حذفوا مشاهد كتير منه

و انا عايز أرفع قضية علي نفس القناة عشان بتذيع فيلم "اخر الدنيا" بدون ماتحذف اول 95 دقيقة منه و هي مدة الفيلم

(4)

حكمة اجمد 10: اللي مايحطنيش كحل في عينيه...محطوش جزمة في رجلي

(5)

فلسفة اجمد 10: البنت الحلوة زي الوردة في الجنينة..بييجي لها وقت و تدبل

بس في ورود بتفضل حلوة حتي بعد ما تدبل

و هي الورود اللي سابت بريحتها الحلوة ذكريات حلوة في نفوس اللي حبوها و هي لسه نضره

(6)

عمرو اديب كان مصدع الناس بسؤاله عن سر دبدوب الفالانتاين و إشمعني مش سلحفاة

حاولت اريحه و ابعت له الاجابة في ايميل..بس ايميل البرنامج مش بيستقبل ايميلات

الدبدوب مشتق من الدبة اللي قتلت صاحبها من كتر خوفها عليه..فبقي الدب هو رمز الحب الشديد

علي كده المفروض بقي يعملوا قطاقيط بمناسبة عيد الام..بما ان القطة بتقتل ولادها من خوفها عليهم

(7)

تعليق علي البوست اللي فات بتاع "وحدي في الفالانتاين"..انا لست هذا الشخص

يعني انا مابعملش الخطة بتاعة الاختفاء و الظهور و الكلام ده كله

ده كان مجرد موضوع يهدف للسخرية من الفالانتاين كنت باعته لمجلة كلمتنا و ما اتنشرش لاسباب تتعلق بالمساحة..قلت انشره هنا

لكن رأيي في الفالانتاين بسيط...معرفوش

يوم 14 فبراير زيه زي يوم 13 او يوم 15...كلها ايام ربنا

(8)

اثناء تجولي علي الفيس بوك وجدت احد الاصدقاء مازال مصمم علي وضع صوره "صيفية جدآ" رغم اننا في عز البرد..هو حر

لكن اللي مافهمتوش هو كومنت كتبه واحد من اصحابه قعد يتغزل فيه..و بعدين كتب..علي فكرة انا مش شاذ..بس صاحبي مز

صحيح..اللي يعيش ياما يشوف

(9)

بعد رد الفعل السريع من قنوات ميلودي علي البوست بتاع "انا اللي غيرت المحطة" و حذفهم لشريط الاس ام اس

قنوات مودرن قرروا يعملوا قناة جديدة اسمها مودرن سبورت 2..و اللوجو لونه أخضر

و عمرو الرخم بتاع شبابيك بطل رخامة

انا كده اتطمنت انني بأوصل رسالتي كمدون

(10)

مجموعة من اصحابي عاشوا الفالانتاين تحت شعار

"زي النهاردة انا كنت اسعد من النهاردة"

و كل واحد و واحدة فيهم عاشوا علي نظرية لو مكنتش سبت اللي بحبه قبل الفالانتاين

و كإن لو الفالانتاين جه و هم كانوا لسه متعايشين في مشاكل ما قبل النهاية..كان هيحصل السحر و تتحل كل الخلافات

و مازال ضحايا الحب الأعمي يتساقطون

وحدي في الفالانتاين

الناس كلهم بيتكلموا عن الفالانتاين و حلاوة و اهمية اليوم و قد ايه كل الـcouples بيكونوا زي العصافير

بس انا واحد من الناس اللي بالنسبة لهم يوم 14 فبراير مابيمثلش حاجة غير الإزعاج..و اللعب علي وتر القلب الفاضي..

إحنا الناس اللي مش بنحب و ماجربناش فكرة اننا نجيب هدية او يتجاب لنا هدية في الفالانتاين..
الكلام ده بينطبق علي و علي مجموعة من أصدقائي و بطبيعة الحال علي عدد لا يستهان به من الناس..

عشان كده حابب اكلمكم عننا بما اننا فئة من المجتمع لها حق دستوري و لنا نفس الاهلية اللي بيتمتع بها أى couple يوم 14 فبراير

رغم إن موضوع الحب من عدمه بيكون شيء إختياري ، لان اسهل حاجة دلوقتي انك تظبط و تصاحب

بس برضه فكرة ان الواحد يكون مختلف عن باقي اللي حواليه بتضعف ثقة الواحد مننا بنفسه و تخليه يحاول يخترع مبررات تخلي الناس ماينظروش له علي أساس انه حالته صعبة.
رغم إن من جوانا بنكون راضيين و مقتنعين بحالاتنا العاطفية و معندناش مشاكل نفضل علي موقفنا طول السنة...ماعدا يوم 14 فبراير!

عشان كده إحنا بنستعد للفالانتاين زينا زي باقي الناس قبلها بإسبوع، لكنه بيكون إستعداد من نوع مختلف!

بنبدأ بخطط دفاعية تتركز علي إنتقاد الفالانتاين و الهجوم علي الناس اللي بيشتروا هدايا مع إلحاق صفات مهينة بهم زي الهبل و السفه!

و المبررات المحفوظة عندنا هي جمل لولبيه من عينة:

- "يعني هو الحب بيبقي يوم واحد في السنة؟ انا بحب طول السنة و اليوم ده مايمثليش أى حاجة..عشان كده مش هحتفل به!"
و طبعآ محدش بيسأل لما انت بتحب طول السنة، فين اللي بتحبه؟

- "ده عيد بتاع الاجانب زيه زي الهالوين..ايه الهبل اللي يجبرني ألبس أحمر و اشيل هدية تكلفني الشيء الفلاني؟"
و ده سبب قوي جدآ مبني علي أساس ثقافي و إقتصادي في الوقت ذاته و هو من الحجج القوية اللي احيانا بيستلفها مننا اصحابنا المفلسين اللي بيحبوا بس مش عايزين يكلفوا نفسهم في الفالانتاين..


- "انا الفالانتاين ده هقضيه مع صاحبتي الانتيم..اصلها محبطة لانها زي ما انتم عارفين مش مرتبطة و كل اصحابنا بيحتفلوا."
و طبعآ مابتشيرش لنقطة إنها ماتتخيرش عن صاحبتها..محبطة و مش مرتبطة..و المبرر ده بيضفي علي اللي يقوله لمحة الإنسانية و الشهامة

- "انا هجيب هدية لماما..ما الفالانتاين مش مقتصر بس علي الناس الحبيبة..ممكن يبقي عيد انك تحب اهلك و تعبر لهم عن ده. و ماما دي عسل..انا بحبها قوي"
طبعآ مفيش أي سيرة عن خناقات الاهل باقي الـ365 يوم، مع تجاهل تام ليوم 21 مارس بتاع عيد الأم..
بس ده بيكون مبرر لطيف للإدعاء اننا بنحتفل برضه و مش فارق معانا الموضوع..

- "أنا عيان و الدكتور مانعني من الخروج، كان نفسي أحتفل بالفالانتاين السنة دي"
و ده مبرر بنستخدمه مع الناس المتطفلين اللي مايعرفوناش كويس و بيسألونا هنحتفل بالفالانتاين إزاى..

الكلام ده كله بيكون طول الاسبوع اللي قبل الفالانتاين..لكن ييجي يوم 14 فبراير بيكون في تغير في الاوضاع..
علي سبيل المثال لا الحصر انا بعمل كل ما يلي..

- بيكون أطول يوم في السنة أنام فيه..ماتتوقعش انني أصحي قبل الساعة 3 العصر..

- بريح بطارية الموبايل طول اليوم، فمحدش يستغرب لما يتصل و يلاقي الموبايل مقفول..

- بفضل أونلاين علي الماسنجر طول النهار و غالبآ بستخدم nicknames كلها رومانسية و حب تنفي عني أى شكوك عند الناس انني قاعد في البيت عشان مش لاقي حد يعبرني في الفالانتاين!

- أى حد يتصل بي علي تليفون البيت لما يلاقي الموبايل مقفول ، هيلاقي حد بيرد عليه يقول له إنني مش موجود و خرجت من بدري..
و طبعآ محدش هيسأل أهلي خرج يحتفل بالفالانتاين ولا راح فين، ولا حتي هيفكر يسألهم موبايلي مقفول ليه..

- بستغل اليوم ده للكلام مع اصحابي اللي بيشاركوني نفس الحالة عن قد ايه الجو برد و إننا محظوظين اننا قاعدين في البيت بالبيجامات و ربما بالزعابيط الصوف كمان!

- أول لما أحس ان اصحابي اللي خرجوا يحتفلوا بالفالانتاين بدأوا يرجعوا بيوتهم بيكون ده وقت التكتيك المخادع اللي بتبعه انا و معشر قبيلتي..
بقفل الماسنجر و أفتح الموبايل و بعد ساعة أرجع تاني أفتح الماسنجر..و ده بيضفي إنطباع إنني كنت بره و لسه راجع..و اللي هيسألني عن الموبايل هقول له مفتوح من بدري!

أنا عارف إن كل دي أسباب و حجج مالهاش مبرر ولا لازمة..بس زي ما قلت في أول كلامي..
الإحساس إننا مختلفين عن باقي الناس بيخلينا نتبع منطق "مجبر أخاك لا بطل"..

علي الجانب الأخر..إحنا بنتمتع بحياة سعيدة باقي أيام السنة..و عندنا مميزات بيحسدنا عليها باقي الناس اللي بيحبوا..

أذكر منها مثلآ:

- فلوسي في جيبي، في كل الخروجات مع اصحابي بدفع لنفسي بس.

- نادرآ لما بسمع جملة "رصيدك الحالي لا يسمح بإتمام المكالمة"، لانني مابقضيش الليل أوشوش في الموبايل عن أهمية خناقة سوسو مع داليا و انا هقف في صف مين فيهم!

بالعكس ده انا بتطلب أكتر من ما باطلب و الكارت اللي بـ100 بيقعد معايا بالشهرين و أكتر!

- انا مش مجبر في أى وقت اتعامل مع مكالمات من نوعية "إنت فين؟" أو "ماكلمتنيش إمبارح ليه؟" أو "انا زهقانة و مش جايلي نوم ممكن اتكلم معاك".
بخرج براحتي..اكلم الناس براحتي و وقت ما أحب..و مش مجبر أسهر لحد الفجر بسبب معاناة واحدة من الأرق!

- كل أصحابي المرتبطين بيعتبروني أسامة منير، مقتنعين إنني مادمت عشت تجارب و دلوقتي مش مرتبط..يبقي أكيد عندي خلاصة تجارب أنصحهم بها في مشاكلهم العاطفية!

- أخيرآ و اهم سبب..بكتب الكلام ده و أنا مش خايف إن واحدة تقراه و تشكك في مدي رومانسيتي، بل بالعكس أنا سعيد إنني بعبر عن فئة كبيرة من الناس تخجل من الإعتراف بحالتهم السنجلية!

ليلة القبض علي نانسي

أندريه أرشافين..لاعب كرة قدم روسي ..تألق مع منتخب بلده في بطولة الامم الاوروبية اللي اتلعبت في صيف 2008

كل الاندية الكبيرة بقي عندها اهتمام به..و حصلت حمي أرشافين في أوروبا..يا تري هيروح فين؟

خلص موسم الإنتقالات الصيفية و أرشافين فضل زي ما هو في ناديه الروسي

و جه شهر يناير 2009..و فضلنا طول الشهر ننام و نصحي في مسلسل أين يذهب أرشافين

لحد ما في اخر ساعة من موسم الإنتقالات الشتوية حصلت النهاية السعيدة و أرشافين إنضم لفريقي المفضل أرسنال

لحد هنا و دي مقدمة مالهاش دعوة بالموضوع..الفكرة في أول تصريح لأرشافين بعد إنتهاء فيلمه الطويل

اول حاجة قالها بعد البقين بتوع انا فرحان و بوعد الجمهور انني اكل النجيلة

"لازم تمنعوا الستات من سواقة العربيات"

و قعد يشرح انه لو كان مسئول كان قام بسحب كل الرخص و العربيات من الستات لانهم بيمثلوا خطر علي الطريق و انه بيركبه مليون عفريت لو شاف واحدة سايقة جانبه

حسيت ان الناس في أوروبا زي مصر..بنتخنق من سواقة الستات

دايمآ بنقول ان في مشكلة لو اللي سايقة واحدة ست..تلاقيها بتدي كلاكسات علي الفاضي..بتدي إشارة قبل ما تحود بنص كيلو

ماشية في الصحراوى ع الشمال علي سرعة 40 كم

و لما كنا نقول الكلام ده لاي واحدة كانت تتحمق و تقعد تدافع عن بنات جنسها

لحد ما جت نانسي و حلت لنا المشكلة

في رأيي نانسي اهميتها لمجتمع المرأة في اهمية قاسم امين و هدي شعراوى و نيكول سابا

نانسي مين؟

اسيبكم مع الخبر ده اللي نقلته مواقع كتير من جريدة الاهرام عدد الجمعة 6 فبراير 2009

قررت النيابة العامة في مصر حبس أول سيدة مصرية 4 أيام احتياطياً ، وتقديمها إلي محكمة المرور السبت 7 نوفمبر بتهمة السير عكس الاتجاه وفي حالة سكر.
وقالت صحيفة "الأهرام" فى عددها الصادر الجمعة ان الرائد أحمد زكي ضبط المتهمة نانسي فاروق محمد "28 سنة" تقود سيارتها عكس الاتجاه ، وفي حالة سكر ولا تحمل أي رخص أو بطاقة شخصية، وادعت أنها سكرتير ثالث بوزارة الخارجية وتبين أنها حاصلة علي بكالوريوس تجارة

أول واحدة كسرت قانون المرور الجديد..واحدة ست

و كانت كمان سكرانة و معهاش بطاقة و حاولت تبلطج علي الظابط

نانسي فاروق اهم للمجتمع من نهي رشدي

علي الأقل نهي رشدي فقاعة صابون مالهاش معني ولا قيمة

لكن نانسي فاروق فجرت القضية..و حطت ايدها علي مفتاح حل أزمة المرور في مصر

إمنعوا الستات من السواقة

من اجل سلامة السائقين الاخرين

من اجل سلامة الناس اللي بيعبروا الطريق

من اجل سلامة الناس اللي ماشيين علي الرصيف و مالهمش دعوة بحاجة

!إمنعوهم و خلاص

أجمد 10 الساعة 1

(1)



عمري ما كنت أتخيل انني هحب حاجة في مسلسل سميرة أحمد الاخير

ولا كنت اتخيل انني ممكن اسمع اغنية لنبيل شعيل

بس ده اللي حصل

اغنية نهاية المسلسل اللي غناها نبيل شعيل اكتر من رائعة

و بهاء الدين محمد تألق في الكلمات
خصوصآ في الكوبليه الاول بتاع

ماتخافيش لو طال سكاتي..انا صوتي مخنوق من اهاتي
و يوم ما هتكلم هقول الحق..دي كرامتي أغلي من حياتي



(2)



كل ما اجيب مسلسل لمصطفي فهمي الاقيه لابس بدلة

لدرجة انني بدأت اشك انه معندوش بيجامات و برضه بينام بالبدلة



(3)



الصدفة البحتة خلتني اشوف فيلم كباريه

هو ده اللي اسمه بطولة جماعية..مش العك بتاع ليلة البيبي دول و عمارة يعقوبيان



(4)



حاليآ بمعرض القاهرة الدولي للكتاب و بجميع منافذ بيع كتب دار الشروق

كتاب "جر ناعم" لعمر طاهر



(5)



حكمة اليوم : يا داخل بين البصلة و قشرتها..إطلع



(6)



كنت بحاول اتخيل مواصفات الممثل الرخم النموذجية

فقررت اجمع موهبة تامر هجرس مع إنفعالات خالد النبوي و كوميدية حجاج عبد العظيم و خفة دم وحيد سيف و كاريزمة جمال عبد الناصر و شنب و تسريحة شعر ياسر جلال





(7)

إلهام شاهين في خلطة فوزية بتتجوز 5 رجالة

!قبل ما حد يفكر ينتقد الخيال العلمي ده..إلهام هي المنتجة يعني بفلوسها



(8)

لا ادري لماذا يستفزني هذا الجنزعور المشفلف بالابانين؟
فلطالما سألت نفسي لماذا اتنفقل بينما لا استطيع البوحان بحمبكيلي المشكاني
ياله من شيء مزعج حقآ



(9)



أعتقد ان سر إقبال المنتجين علي علا غانم رغم إنعدام موهبتها..هو انها ارخص الممثلات الموجودين حاليآ



(10)

قنوات ميلودي لغت شريط الإس ام إس
عقبال ما يلغوا القنوات نفسها

لما تحب واحدة..إتجوز صاحبتها

تبدأ الحكاية بشاب و فتاة, "شريف" و "نيفين"..الاتنين بيحبوا بعض

في يوم شريف حس ان نيفين وحشته..مسك التليفون و كلمها

نص ساعة و هو قاعد يسمع..و بعدين قفل من غير ما يقول لها اللي كلمها عشانه

رجع كلمها تاني قالت له "ايوه.." قال لها "بحبك" و قفل السكة

ستووووووووب...ايه المشهد الرومانسي ده؟

!رومانسي؟؟..طيب استنوا لما نكمل

نيفين ماحستش باي حاجة غير القلق..هو عايز مني ايه؟ و ليه قال لي كده؟

نطت علي التليفون و كلمت إنجي صاحبتها..و حكت لها كل حاجة

و الغريب إن إنجي بدل ما تقول لها حاجة كويسة قالت لها

"خدي بالك يا عبيطة..ده شكله نيته مش سليمة و بيلعب بيكي, اوعي تروحي معاه مكان لوحدكم, و ابقي طمنيني بالتليفون"

و لان نيفين زي ما إنجي قالت "عبيطة" كلمت شريف و قالت له

"انت قصدك ايه؟ إنجي وعتني و فهمتني..انت غرضك مش سليم"

طبعا شريف قعد يومين مصدوم..ايه الهبل اللي هي فيه ده؟ اقول لها بحبك تقول لي غرضك مش سليم؟

مرت الايام و شريف بقي كل مايحاول يقول حاجة لنيفين تجري علي طول تحكيها لإنجي

اللي مابتبخلش عليها بنصايحها الذهبية

!لحد ما الحكاية خربت و شريف كره نيفين و الحب نفسه

إنتهت الحدوتة المقتبسة عن قصة حدثت بالفعل و نبدأ الكلام عن الموضوع نفسه

ليه البنت دايما في اي مسألة تخص علاقتها بالناس بتعين واحدة من صاحباتها المستشار الخاص بها؟

اللي بتفتي لها في كل امور الحياة كإنها عاشت 100 سنة و جربت كل شيء

طيب صاحبتها اللي بتنصحها جابت خبرتها منين؟

!لا..و اللطيف فعلا ان صاحبتها لما بتقع في مشكلة بتلجأ لها..يعني الاتنين مش عارفين حاجة بس بينصحوا بعض

و بما ان الحكاية كده فأنا قررت اتجوز صاحبة البنت اللي هاحبها

يناير 2006

Sulto TV

قررت أعمل قناتي الخاصة بعد ما طورت القنوات الفضائية

برضه لازم اضيف لهم إبداعي الإعلامي كمان عشان نرتقي بالذوق العام

هحط الخطوط العريضة لقناتي المرتقبة

Sulto TV

اول حاجة البرامج لازم تحمل بصمتي

انا ناوى اعد و اقدم كل البرامج المهمة..خليني اديلكم لمحة عنهم

برنامج المرأة

"ويك ويك و كلام نسوان"

إعدادى و تقديمي

اسم البرنامج واخده من محمد سعد في فيلم بوحه..و هو بيعبر عن الإزعاج اللي الستات بيسببوه

و ده هو محور البرنامج..انا مش هتكلم في الموضة و الطبيخ و وصفات التخسيس

انا هتكلم عن المرأة من وجهة نظري..و انبه المغلوب علي امرهم من معشر الرجال للكمائن اللي ممكن يقعوا فيها

البرنامج الإخباري

"الصفحة التانية"

إعدادى و تقديمي

مش هعمل نشرة أخبار..اى حد بيذيع نشرة اخبار

انا هقرا الجرايد قراءة خاصة..مش زي اى برنامج تاني

مايهمنيش مانشيتات الصفحة الاولي..ولا مقالات الكتاب في الصفحة الاخيرة

انا هدور علي الاخبار اللي بتعكس صورة المجتمع

يعني ايه؟

هتفهموا اكتر لما البرنامج يتذاع

البرنامج الرياضي

" ع الـ18"

إعدادى و تقديمي برضه

تحليل الكرة كما يجب ان يكون

الاهم من انني اجيب ناس يتكلموا و يقولوا كلام مكرر..انني اوعي الناس و افهمهم الكرة بتتلعب إزاى

في ناس بيشجعوا اندية و متعصبين لها و رغم ذلك مايعرفوش وظائف و مهام اللعيبة في الملعب

مايهمنيش أجيب للناس أخبارماليه الجرايد..مش حابب اصلا اكون مصدرهم الوحيد للمعرفة

انا عايز المشاهد يشوف برنامج شوبير ولا خالد الغندور بعدين ييجي لي افهمه ايه اللي سمعه من الناس دول

و هعمل حاجة مميزة في القناة دي..و هي شيء جديد علي التليفزيون

هعمل فترة 4 ساعات القناة تتحول فيها لمحطة اف ام

من 2 لحد 6 صباحآ تبقي فترة اف ام

و طبعآ هاخد برنامجي "أحلي الاوقات" معايا

بس الشاشة مش هتبقي ضلمة..شريط الاهداءات هيبقي بيتعرض علي الشاشة و ده

و كل يوم هيبقي في ساعة لأغاني فيروز عشان ترويق الأعصاب

بالنسبة للإعلانات..فأنا مش هقبل أى إعلان ولا هقبل أى رعاة للبرامج

لازم تكون الإعلانات صورتها حلوة و فيها فكرة و تكون لمنتج بحبه

و بالنسبة للرعاة لازم تكون شركات بحبها

يعني محدش يجيب لي كوكا كولا او ماكدونالدز او بيتزا هت

دي كانت الخطوط الاولية لقناة

Sulto TV

مصحوبة بعرض سريع لفكرة

Sulto FM

أتمني لكم مشاهدة و إستماع طيب

و مين عارف...يمكن كمان يكون في قراءة طيبة قريب ان شاء الله لبرنامج من البرامج دي

عايزينها تبقي خضرا ... Sulto TV

أنا اللي غيرت المحطة

"لو مش عاجبك..عندك ريموت كونترول تقدر تغير به المحطة"

دي الجملة اللي كل مطربات العري و مذيعات التفاهة بيقولوها لما حد يسألهم عن العك اللي بيقدموه

سرحت مع نفسي و قلت..يحصل ايه لو انا بالريموت كونترول اقدر أغير المحطة فعلآ مش مجازآ

يعني اعدل محتواها و شكلها..الغي و اضيف

قلت الحكاية مش سهلة..و لازمها تفكير

قمت عملت شاى و قعدت أفكر..شوية و قررت انزل اتمشي علي البحر عشان القرارات تتخمر في دماغي

و طلعت بالنتيجة الاولية دي

(1)

هعيد هيكلة قنوات دريم

هلغي دريم 1 و دريم 2..هوحدهم في قناة واحدة يبقي اسمها دريم و يكون شعارها المرة دي أخضر

هتخلص من تلات ارباع المذيعين و الغي برامجهم

ناس زي انجي علي و مصطفي عبده و أمينة شلبايه و وائل الإبراشي و إبراهيم عيسي و عمرو الرخم و ناس كتير تانيين مالهمش مكان

لو جمعنا مني الشاذلي و خالد الغندور و مذيعين شبابيك و نادية حسني و دينا عبد الرحمن في قناه واحدة هيعملوا لوحدهم 11 ساعة يوميآ

(2)

هلغي كل القنوات الفضائية الحكومية

بصرف النظر عن انها قنوات مملة و مصاريف علي الفاضي بس برضه انا ماسمعتش عن الفضائية الإيطالية او قناة فرنسا او إنجلترا تي في

بعدين ما احنا عندنا قطاع قنوات النيل المتخصصة

و كل بلد عندها كام قناة خاصة زي الفل

(3)

عدد قنوات ميلودي بقي 5 قنوات

تريكس..تيونز..افلام..ارابيا..هيتس

و كلهم بيذيعوا عري و إسفاف عن عمد..و العمد كان واضح في إعلان دانا بتاع ميلودي تتحدي الملل

لدرجة انني بقيت حاسس انهم هيعملوا قناة ميلودي 6 تذيع نخبة من اقذر ما عرضت القنوات الـ5 طول اليوم

فقررت اتخلص من 4 قنوات و أسيب ميلودي ارابيا

مع فرض قيود رقابية مشددة تمنع امثال دانا و نانا و ماريانا و اى واحدة حرانة من الظهور علي شاشة القناة

(4)

مزيكا و زووم يبقوا قناة مزيكا

روتانا كليب و روتانا موسيقي يبقوا قناة روتانا موسيقي

باقي قنوات الأغاني تتلغي

(5)

إلغاء كل قنوات المسابقات

و التحقيق في مصداقية المسابقات طول الفترة اللي فاتت

(6)

إلغاء مجموعة قنوات الجزيرة

و التحقيق مع اى واحد يشتبه تورطه في علاقة بالشبكة دي

(7)

إلغاء برنامج هنا القاهرة اللي بتذيعه قناة مودرن سبورت

مع إحالة علاء صادق إلي مستشفي الامراض العقلية و النفسية لمدة 45 يوم للكشف علي سلامة قواه العقلية

و تغريم القناة 5 مليون جنيه تعويض عن الأضرار النفسية اللي أصابت المشاهدين بسبب تعليق مدحت شلبي علي ماتشات الكورة الاوروبية

(8)

تشكيل لجنة من علماء الدين لإعادة تقييم القنوات الدينية

و إختيار النخبة من ضيوف و مذيعين القنوات دي عشان يكونوا قناة دينية واحدة قوية تفيد الناس

(9)

الغي برنامج صبايا علي القناة المحور و امنع ريهام سعيد من الظهور في أى قناة

و أرجع معتز الدمرداش لقناة العربية عشان ده مكانه الوحيد اللي ينفع فيه

دي كانت رؤيتي المبدأيه..مستني اسمع رؤيتكم للقنوات

سواء كانت قنوات اتكلمت عنها او قنوات تانية

و البوست الجاى إن شاء الله هكلمكم عن اقوي قناة تليفزيونية عربية هتنطلق في 2009

قناتي الخاصة

Sulto TV