و معانا إتصال هاتفي - من أرشيفي

إتصالات المشاهدين في البرامج التليفزيونية غريبة للغاية

و في بعض القنوات "مفبركة" للغاية

فمثلا في إحدي القنوات الفضائية التي تقدم برنامج إسبوعي علي الهواء يستضيف النجوم, يقوم المخرج و طاقم الإعداد بالاتفاق مع الضيف بان يختار مجموعة من أصدقائه للإتصال به طوال مدة البرنامج

بينما نشاهد علي الشاشة أرقام هاتفية للإتصال بالبرنامج..و بالطبع المتصلين لن يجدوا سوي خط مشغول
بينما في إحدي القنوات المصرية المتخصصة (دريم) تجد افضل معاملة
يرد عليك أحد الاشخاص المنزعجين دائما (شكلك اتصلت في وقت مش مناسب) و يتركك علي الخط حتي ينتهي البرنامج
و لان المعاملة جيدة فهو هايجيلك في نهاية البرنامج ليقول لك

"معلش يا استاذ..عايزين ننزل بالتتر"
!ولا تحاول ان تفهم ما العلاقة بين تتر النهاية و التليفون

أما إذا حالفك و إتصلت باحدي القنوات التي تسمح بإتصالات حقيقية للمشاهدين فبعد ان يتم تجاهلك لنصف ساعة علي الخط سيتكرم المخرج و يسمح لك بالتحدث للهانم مقدمة البرنامج

وفي بداية المكالمة لن تجد سوي العبارة التقليدية التي يكررها كل المذيعين"لو سمحت وطي صوت التليفزيون شوية" حتي لو كان تليفزيونك مغلق

ثم تبدأ المذيعة في إستعراض خفة ظلها و الخاتم الذي إشتراه لها زوجها بتحريكها ليديها طوال المكالمة

(يبدو انها تحاول ان تقوم بالترجمة بلغة الإشارة)
و بعد إضاعة بضعة دقائق في التعرف إليك و مقاطعتك أثناء محاولتك لإبداء رايك في موضوع الحلقة تقوم بإنهاء المكالمة لإتاحة الفرصة لمتصلين أخرين

و ياحبذا لو إتصلت بقناة تعرض برنامج للمسابقات

فكم الغرابة الذي قد تواجهه من مقدمة البرنامج قد يدفعك إلي تحطيم الشاشة
فالمذيعة لكي تشعر إنها مميزة تحب ان تشعر المتسابقين إنهم في رحلة برفقتها إلي القناطر الخيرية
فتجدها تصرخ فيك طوال الوقت

"هااا..قربت توصل لها..يلا يا حمادة..قربت"
و بالطبع لا تستطيع التركيز فتفاجئك بإنهاء المكالمة قائلة

"معلش..حظك وحش...يا ريت تعيد الإتصال بينا مرة تانية"
و ده طبعا بعد ما تكون قضيت قرابة الساعة علي سماعة التليفون

معظم القنوات العربية مازالت في مرحلة الطفولة من حيث التعامل مع إتصالات المشاهدين

و لذلك فمن الافضل ان لا تخاطر برفع ضغطك و قيمة فاتورة تليفونك و تجري إتصال باحد البرامج وقانا الله و إياكم شرها

يونيو 2005

تسعة عشر فكرة و فكرة

(1)

بأفكر أعمل بلوج بالإنجليزي..واثق ان مش بس اللغة اللي هتتغير

(2)

بأفكر أعمل بوست للكبار فقط..هكتب الكلام بفونت ابيض و اللي يحب يقراه يعلم عليه بالماوس

(3)

بأفكر في اللي جاى..و اللي راح..بس مش بأفكر في دلوقتي

(4)

بأفكر ألغي إشتراك النادي..فات 7 شهور و مافكرتش حتي اجدد الكارنيه

(5)

بأفكر في قيمة اللي بامتلكه و قيمة اللي بفتقده..حاجات قيمتها زادت و حاجات قيمتها قلت و حاجات ماعدش ليها قيمة

(6)

بأفكر أشجع الأهلي..برضه شيء مزعج لما اقول لحد اصلي مش بشجع كرة محلية..بيفتكروني بتعوج

(7)

بأفكر إزاى أقضي أمتع وقت ممكن من النهاردة لحد يوم 27 يناير إن شاء الله

(8)

بأفكر في الخطوات اللي فاتت و الخطوة دي و الخطوة الجاية

(9)

بأفكر إزاى أرجع حاجات راحت و إزاى الحاجات اللي هتروح هتيجي

(10)

بأفكر أشتري مايك جديد للكمبيوتر..هحتاجه جدآ الفترة الجاية إن شاء الله

(11)

بأفكر في شخصيات ثانوية مرت في حياتي و قد ايه كان لهم تأثير أكبر بكتير من شخصيات رئيسية و ناس اخدوا ادوار بطولة

(12)

بأفكر اقف مكاني و اواجه حاجات هربت و بهرب منها

(13)

بأفكر في أحلام و وعود قديمة..الحاجات دي هي اللي الواحد بيعيش لها

(14)

بأفكر أغير مركزي في الملعب و ادي شارة الكابتنة للعيب تاني

(15)

بأفكر في البوست اللي جاى رغم انني لسه باكتب في ده

(16)

بأفكر مقراش البوست ده بعد ما ابعته..عشان هيفكرني بحاجات مش عايز أفكر فيها

(17)

بأفكر أكتب مجموعة معينة من البوستات..عن مجموعة معينة من الناس

(18)

بأفكر في عدد الدكاترة اللي محتاج أروح لهم

(19)

بأفكر فيك..بأفكر فيكي..بس مش هأفكر فيها

(20)

بأفكر ان علي قد ما البوست ده فيه حاجات مش مفهومة..علي قد ما انا متوقع ردود

لانني حاسس ان 19 فكرة علي الاقل هيكون فيهم واحدة بيفكر فيها غيري

إستفتاح...2009

يا صباح الخير ياللي معانا..ياللي معانا

هنستفتح 2009 اهو عشان تبطلوا تقولوا كسلان

خلونا نستفتح و نقول الحاجات اللي أحب اشوفها بتحصل في عالم الفن في 2009 إن شاء الله

نيللي كريم تتفرغ للباليه و تسيبها من التمثيل

هيفاء وهبي تلبس فستان مقاسها

نانسي عجرم تبطل تحلو عشان كده النمل هيتلم

خالد صالح يعمل مسلسل جديد و البطل يكون اسمه أمجد..بعد ما عمل سلطان في سلطان الغرام و يوسف الصياد في بعد الفراق

تامر حسني يقرر انه يبطل بقي و يحترف الغناء..و يبطل تشتمل حاجات كتير مفيش داعي لذكرها

لؤي يغني

بعد تجربة الشبكة القديمة و القرد اللي بيتكلم..إحتراف عايدة رياض و ميمي جمال التمثيل في مسلسلات التليفزيون الشمبونجي

ياسمين عبد العزيز ترجع للتمثيل

مي عز الدين تشتغل مذيعة في ميلودي تريكس

سمية الخشاب تتجوز بدل ما هي مقضياها تمثيل

خالد يوسف يبطل أدواره القيادية بكافة اتجاهاتها

خالد النبوي يبقي خالد النبوي بس

بلال فضل يكتب فيلم سينما بنية صافية

قناة موريتانيا الفضائية تعرض مسلسل نبيلة عبيد الجديد حصريآ

عمر طاهر يكتب فيلم سينما له علاقة بموهبته..بعد الفيلم العجيب "عمليات خاصة"..خالد سليم و تامر هجرس و نبيل عيسي؟؟

أحمد البدري و أكرم فريد يتجهوا للمجال الإداري و كل واحد فيهم هيمسك فرع من فروع جزارة السبكي و ده بعد ما السبكي قرر إعتزال السيما

إعتزال تلات ارباع النقاد السنيمائيين في مصر

أشرف عبد الباقي يعرض فيلمه الجديد في 60 دار عرض

يستضيفوا رامز جلال في برنامج و يبطلوا يفقعونا بسيرة الصواريخ اللي بيفرقعها

إختفاء المركب التي تقل عايدة رياض و ميمي جمال في مثلث برمودا أثناء إتجاههم لشمبونجو و أنباء عن إحتفالات في العاصمة الشمبونجية

حفل ختام المهرجان..و السنة كمان

ساعات قليلة و تخلص السنة دي إن شاءالله

في الاول كنت حابب اتكلم عن 2008 و احداثها.. بس نظرآ لازدحامها بمواقف بايخة

و لانني مش من هواة البكاء علي الأطلال

لقيت نفسي بقول خليها تروح لحالها..مش عايز افتكر اللي جرالي فيها

خلونا نفتكرها بالخير احسن..عشان كده هتكلم من منظور تاني عن 2008

هتكلم عن الحاجات اللي اضفت لسنة 2008 اللي مريت بها لحظات جميلة

حاجة كده اشبه بشكر خاص اللي بتتكتب في اخر الكليبات

شكر خاص لمحمد صاحبي اللي قابلني بالصدفة في واحدة من اسوأ لحظات 2008 و مكنش يعرف مالي و قال لي جملة هي اللي مصبراني لحد دلوقتي

شكر خاص لمحمد نصر اللي عرفني علي محمد قباري بالصدفة

شكر خاص لقباري اللي عرفني علي أحمد ماجا عن عمد

شكر خاص لعمر طاهر اللي خلاني قريت له 4 كتب و شفت له 45 حلقة من سوبر هنيدي و كل ده في سنة واحدة

شكر خاص لمحمد منير عشان عمل اغنية طعم البيوت وقت ما كنت بعزل

شكر خاص لعم عثمان بتاع الامن في بيتنا القديم اللي فضل اخر ساعة لي في البيت بيبص لي و هو متأثر و مدمع

و كمان شكر خاص لعم يونس المكوجي اللي ساب شغلانة المكوي و تفرغ لوظيفته الحكومية بس مظنش هيقدر يسيب تشجيع الزمالك اللي جابله الضغط و خلاه مكسوف يروح الشغل بسبب زمايله الاهلاوية

شكر خاص لحسن شحاته اللي فرحنا في بطولة الامم اللي فاتت

شكر خاص للاعيبة المنتخب اللي كانوا رجالة و دي حاجة مش متعودينها منهم

شكر خاص لعمرو زكي اللي ادي للدوري الانجليزي اللي بحبه نكهة تخليني فخور انني مصري

شكر خاص لأشرف عبد الباقي عشان عمل برنامج دارك

شكر خاص لمصممي و محرري مواقعي المفضلة

شكر خاص لأحمد حلمي اللي عمل اسف علي الإزعاج و عمره ما خيب ظني فيه

شكر خاص لمحمد شرف اللي قدم دور بسيط جدا و ممتع جدا في نفس الفيلم..اوعي تكون بلاستيك

شكر خاص لمنة شلبي اللي نضجت اوى و بقت تمثل بمزاج عالي

شكر خاص لمحمد حفظي عشان انتج ورقة شفرة و زي النهاردة

شكر خاص لمحمد حماقي عشان دايمآ بيثبت انه احسن مطرب في جيله بدون القاب

شكر خاص لعمرو اديب عشان دايما لما النت بيقطع و اكون زهقان بيكون هو المنفذ الوحيد لحد ما يسلمني لقنوات المسلسلات الاجنبية الساعة 2 صباحا

شكر خاص لكل مبرمج شغال في ستوديوهات

SEGA & Sports Interactive

علي إختراعهم العبقري لعبة

Football Manager 2009

:شكر خاص لإحساس كل من

أصالة
تامر عاشور

محمد نور

محمد حماقي

محمد محي

MTM

عمرو مصطفي

إيساف

حسام حبيب

شيرين

أحمد سعد

رامي صبري

أنغام

سعاد ماسي

محمد منير اللي ماجربتش اسمعه غير السنة دي

شكر خاص لكل صناع الافلام الحلوة اللي شفتها و اللي لو حاولت اذكر حد فيهم هنساه

و شكر خاص لإحساس عمر طاهر في مقالاته

شكر خاص لكل حد من اصحابي كتب حاجة بإحساس عالي

شكر خاص لفنون علي مدونتها اللي ادمنت متابعة كل حرف فيها

شكر خاص لمحمد بدر عشان عمل راديو شلة و عشان هو شخصية جميلة

شكر خاص لصاحبي عمرو و جملته "اخشي ان اكون قد ازعجتك" اللي بيقولها لي في كل مكالمة و مش فاهم لها سبب

شكر خاص لكل حد من اصحابي وقف جنبي و سمعني و انا مخنوق و اداني نصيحة فادتني..و دول مش كتير علي فكرة

شكر خاص لكل حد من اصحابي خذلني..الجرح رغم انه بيعلم بس بيعلم

شكر خاص لكل الناس اللي اجبرتني الحياة ابعد عنهم في 2008..اتمني نتقابل تاني بجد

شكر خاص لهشام نزيه و اصالة و مدحت الخولي علي الحالة بنت اللذينه في اغنية نص حالة

شكر خاص لخالد حماد علي موسيقي أحلي الاوقات

شكر خاص لعمرو اسماعيل علي موسيقي أسف علي الإزعاج اللي خلته بطل تاني جنب أحمد حلمي..و طبعآ الإعداد الموسيقي للفيلم كان في نفس مستوي الموسيقي التصويرية

شكر خاص لأحمد العريان علي إنتاجه اغنية أمنية سليمان الحب بييجي في ثانية..اللي بعتبرها من احلي حالات الاغاني في 2008

شكر خاص لمحمد نور عشان كل فترة بيثبت انه ذكي

شكر خاص لنادر حمدي اللي برغم اللي بسمعه عنه بيفضل واحد من اذكي الموزعين الموسيقيين

شكر لخالد سليم انه رغم كل الحاجات المقرفة اللي فيه و حواليه عمل اغنيتين زي فين الحبايب و زي النهاردة

شكرآ لكل اصحابي اللي خلوا عيد ميلادي اللي فات ممتع

شكر خاص لكل الناس اللي مقتنعين انني قادر أوصل

شكر خاص لحبيبتي اللي مقدرش ابعد عنها يوم...الأسكندرية

و شكر خاص تاني لعمر طاهر عشان كان دايمآ بكتابته بيعدل لي كفة الميزان لما تبقي طابة

شكر خاص لفريق عمل مسلسل سوبر هنيدي..بما فيهم عمر طاهر

شكر خاص لفريق عمل اغنية محمد العتر "بسهر"..و للمصادفة البحته اللي كتبها عمر طاهر

شكر خاص تالت لمحمد حماقي علي اغاني "و افتكرت" و "انا لو اذيته".. الإحساس اهم حاجة

شكر خاص لكريم ابن خالتي و احمد صديق طفولتي..ماعملوش حاجة بس برضه اتربينا سوا و العشرة ماتهونش

شكر خاص لكل حد عمل حاجة خلتني ابتسم او افكر او احس احساس حلو

شكر خاص لكل اللي هفتكرهم بعد ما ابعت البوست

شكر خاص لكل اصحابي الجدعان

شكر خاص لكل اللي حبوني من قلوبهم و اتمنوا لي السعادة و الخير

شكر خاص و إعتذار كبير لناس معرفتش قيمتهم غير متأخر

شكر خاص لكل واحد قرا البلوج دي

شكر خاص لكل واحد كتب كومنت علي بوست

شكر خاص لكل اللي شجعوني استمر علي الكتابة بإستمرار لأطول فترة في حياتي

شكر خاص لكل اللي رافقوني و دعموني في مشوار 2008 الصعب

و في الختام شكر خاص لكل واحد قرا البوست دي رغم انها ممكن تكون طويلة و مالهاش معني

بعد الختام

(1)

خلاصة 2008

سألت نفسي كتير..مارسيتش يوم علي بر..انا اللي فيا الخير ولا اللي فيا الشر؟

مليان عيوب ولا.. خالي من الذنوب ولا..ولا ايه؟

ولا انا جوايا و مش داري الاتنين في بعض

و 500 حاجة و مالهمش دعوة ببعض

انا مين و فين انا ايه؟

مفروش طريقي بورد ولا الزمان ده انا فيه اضعف واحد ع الأرض؟

(2)

اغاني من تحت الماء

هو انت مين بيصدقك علشان عايزني اصدقك؟ - تامر عاشور

مش غريب عليكي..و اللي فيكي فيكي - صادق

ابحث عنك كل يوم و انا اعلم انك بداخلي - يوري مرقدي

و الله و الايام عدت قوام..ياما شوفنا سوا و كبرنا هوا في مدرسة الحياة - محمد عدوية

الحب بييجي في ثانية مالوش وقت و مواعيد - أمنية سليمان

هيمانة و نفسها حد يبربش.. يشغل وقتها و يدردش.. و اهو من وقتها هي بتنكش عايزاني احبها - محمد محي

مين بيفضل طول حياته في مطرحه؟ ناس بييجوا و ناس في ثانية يروحوا

لو بموت هسكت مالومشي زي ما انت هتمشي همشي..كل واحد يعمل اللي يريحه - محمد عطية

كل ما انساها افتكرها..مهما اشوف مابشوفش غيرها- رامي صبري

خلاص المستخبي اهو بان..في ناس في الغش محترفة..بجد طريقة مختلفة - جنات

يرضيك كده فات كتير و انا مستني مابقتش حاجة تطمني و هموت عشان الاقيك - محمد حماقي

الحياة مقدرش اقولك حلوة بعدك قد ايه - محمد نور

أسامحك..قال اسامحك..لو بموت ولا يوم هصارحك..اصلك انت كسرت فيا حاجات كتير - محمد حماقي

و حتي ان كنت مش جنبي..بشوفك نور ملي قلبي و احس ان انت جوايا يا كل منايا و حبايبي - حسام حبيب

و أتاريني علقت روحي بحبال دايبة..ضيعت وقتي في مجازفة خايبة - إيساف

اليأس ضعف و خوف جبان..لكن الامل يفتح ببان - مدحت صالح

و إفتكرت مسكته في ايدي..و ايدي خلاص سايباه - محمد حماقي

ده انا من زمان شايفك و للناس بوصفك..و بغير عليكي قبل حتي انا معرفك - حاتم فهمي

لسه مش قادر اصدق..و ابتديت معرفش افرق بين مشاعري في وقت جرحي و بين مشاعري في البداية - إيساف

من زمان عايش بعقلي و قلبي رافض فتح بابه..سبب مخاوفه كان اللي شايفه من الحب و من صحابه - وسط البلد

ضيعني منه و انا كنت نفسي مضيعش - حاتم فهمي

و مش كل الكلام يتقال..وحشتيني - محمد نور

و هتفضل علي طول لعبتها..إكمنك دبت و حبيتها - وسط البلد

لعنة الحب اللي بتذل الحبيب - أصالة

شكلي ظلمت انا حد زمان و مخدتش بالي - عمرو مصطفي

عاجبك كده..صعبان عليا كل ده اللي وصلت ليه - محمد نور

و كفاية لما بتلاقيه فاتح دراعه و بيناديك و يقول تعالي في حضني ده انت واحشني موت - محمد منير

علي ايه تنزل دمعاتك لو يوم عداك او فاتك..احلم بالجاى تعيش مرتاح

الدنيا لو جارحة لونها لون فرحة..ماهو ايه بيطول عمر الواحد غير الفرحة - محمد منير

و مابين كده او كده..مش مرتاح انا - محمد منير

كل سنة و انتم طيبين..ميعادنا في 2009 بإذن الله

TSA 08 - جوائز الفضائيات و الإعلانات

نكمل كلامنا في التليفزيون..و المرة دي عن البرامج و القنوات..و كمان الإعلانات

السنة دي كانت مهمة..لانها شهدت تغييرات كتير اوى في القنوات

اولا:القنوات و البرامج

أقوي قناة جديدة

قنوات الحياة

قنوات اتولدت قوية..إنتاج ضخم..مذيعين نجوم

إكتشاف مذيعين جدد..كل من يطلق عليهم نجوم الصف الاول سهل تلاقيهم علي شاشة الحياة

و يكفي إن عادل امام بيجري حوارين في نفس السنة مع القناة دي..و ده انجاز لم يسبقهم إليه غير محمود سعد في البيت بيتك

أسخف قناة جديدة

قناة موجة كوميدي

سخيفة ببرنامجها اليتيم المستفز توك شو و الافلام و المسلسلات القديمة

جايزة الغباء المستمر

ميلودي تريكس

جايزة مش محتاجة اى توضيح

جايزة السخافة اللامتناهية

مناصفة بين

إنجي علي - يا مسهرني

عمرو - شبابيك

قناة دريم بتتميز بوجود اتنين من أسخف المذيعين اللي الواحد ممكن يشوفهم

إنجي علي في برنامج يا مسهرني..بصرف النظر عن ازمتها مع كتفها

إلا انني مش فاهم هي ليه بتشب لفوق و تصرخ و هي بتكلم الجمهور كإن الجمهور قاعد ورا سور
و سرقت حركة هالة سرحان بتاعة التصقيف عمال علي بطال

و لازم تاخد المطرب من ايده و هو قايم يغني و تقف جنبه تصقف..عندها عقدة من التصقيف تقريبآ

اما عمرو بتاع شبابيك فهو تقريبآ محاولة يائسة من قناة دريم لتعويض غياب عمرو سمير اللي سابهم و راح
otv

otv و بالتالي بتوع دريم قرروا يردوا الخبطة لبتوع

و خطفوا عمرو و حطوه مكان عمرو سمير في تقديم برنامج شبابيك

بس يبدو انهم شربوا مقلب فظيع و فتاك

اول مرة اشوف مذيع بيرخم علي الضيوف ببراعة يحسده عليها بياعين المناديل في إشارات المرور

جايزة بيت الرعب

مذيعين قناة دريم

كل ما اشوف برنامج هواء علي قناة دريم احس ان المذيعين تلاميذ مدرسة مزنوقين في حصة عربي فيها تسميع

عايزين الوقت يعدي بسرعة و يروحوا البيت

اكيد الهواء له رهبة و قلق..بس دول كل يوم علي الهوا

و كل يوم بيطلعوا مرعوبين

سواء الشلة بتاعة شبابيك اللي بحسهم دماغهم مجوفة بالاضافة لكونهم تايهين..او فرح مذيعة سمعنا يا سيدي بغمازاتها الحلوين

و حتي مني الشاذلي بتتلجلج في العاشرة مساءا..و خالد الغندور لازم يتلخبط في 4 جمل علي الاقل في الرياضة اليوم

هم بيوقفوا لهم عفريت ورا الكاميرا ولا ايه؟

جايزة الراجل البركة

مصطفي عبده

بما انه كان صاحب البرنامج المنافس الوحيد في المحور..رحب بمنصب مدير البرامج الرياضية في قنوات دريم

و البرامج الرياضية في قنوات دريم ما هي الا برنامجه و برنامج خالد الغندور

كان اهم انجازاته تغيير اسم برنامج شوبير من "الكورة مع دريم" الي "الكورة في دريم" و طبعآ الفرق واضح

خلال اسابيع قليلة نجح في انه يخلي برنامجه خفي و غير مرئي

و هو بيكتفي بدور الراجل البركة الكبير اللي بينصح اللاعيبة..و دايما يبدأ نصيحته بجملة "و احنا بنقووول" و يقوم فاقع نصيحة من عينة اللاعيب الصغير لازم يحترم اللاعيب الكبير...و احنا مش مع حد ضد حد

جايزة البرنامج العبيط

توك شو

إستظراف.. قلة ادب..مبالغة تصل لحد العبط

و ضيف علي ده انهم قرروا يعملوا في يوم توك شو 2

ايه الفرق بين 1 و 2 معرفش؟

و ايه سر الإعلانات المكثفة عن توك شو 3 و كإن الناس هتموت علي البرنامج برضه معرفش

جايزة أنا المذيع..انا المذيع

علاء صادق

مشفتش مذيع عدواني كاره الناس كلهم قد علاء صادق

في نظره الحكام مرتشين و سفلة و صراصير و قاذورات و ريحتهم وحشة علي حد تعبيره

و اللي يعارضه يدور له في الملفات و يخترع فضايح و ينزل في وصلة ردح

و كل الكلام ده بيقوله و علي وشه ابتسامة من الودن للودن تضفي له إيحاء المختل عقليآ

جايزة الهبوط المستمر

قناة دريم

مين يصدق ان دريم اللي قدمت محمود سعد كمذيع..و خلت هالة سرحان مذيعة جماهيرية..و كانت القناة اللي كسرت كل القوالب

هي نفسها دلوقتي القناة اللي مفيهاش غير برنامج او اتنين الواحد ممكن يشوفهم؟

قناة فقدت بريقها بطريقة غريبة

جايزة التألق المستمر

محمود سعد

بيعمل كل اللي هو عايزه..حوارات فنية ..يساعد الفقراء..برنامج جواز

يمكن يكون اول مذيع يعرف يستغل إمكانيات التليفزيون المصري بطريقة سليمة

نموذج للإعلامي الذكي

ثانيا: الإعلانات

أحسن إعلان موبايل

حملة إعلانات شومبونجو - موبينيل

إخترعوا سؤال مايهمش الناس و هو الشبكة القديمة راحت فين؟

بس خلوا الناس كلهم يتابعوا الحملة الإعلانية بمختلف فئاتهم العمرية

لدرجة ان في جروب علي الفيس بوك بيطالب بإعادة القرد اللي بيتكلم من شمبونجو

يبقي اننا نعرف ان الشبكة القديمة إشترتها إتصالات و ما اتشحنتش علي شومبونجو

اسوأ إعلان موبايل

صابر - إتصالات

كان واحد من افشل المحاولات الفاشلة لإختراع إعلان مرح لإتصالات

أحسن إعلان لنجم

حملة كوكاكولا - كريم عبد العزيز

رغم انني من محبي بيبسي و بكره كوكاكولا..و رغم ان إعلانات حلمي مميزة دايمآ..بس المرة دي كريم حملة إعلاناته خطف الاضواء من حلمي اللي قدم السنة دي واحدة من اضعف حملات بيبسي الإعلانية

اسوأ إعلان لنجم

حملة رشيدي الميزان - رامز جلال

الجمل و المواقف كلها مسروقة من كتاب "شكلها باظت" لعمر طاهر..و ده دفع عمر طاهر انه يكتب مقال في جريدة الدستور يوضح انه مش هو اللي كتب الإعلانات

و لما اتصل بمنتج الإعلانات إعترف له بالسرقة..و لما اتصل برامز جلال قال له ماقريتش الكتاب

أذكي حملة إعلانية

حملة المفتش كرومبو

مين فينا مابيستناش اللغز الجديد لكرومبو؟

و مين فينا مابيحبش اسامي الابطال؟

أغبي حملة إعلانية

حملة سرحان & نفيسة

مين المستفز اللي عمل الإعلانات دي؟

و مين الاكثر استفزازآ اللي بيعمل اصوات سرحان و نفيسه؟

تقليد فاشل لفكرة كرومبو

و إضافة قوية للعك بتاع موجة كوميدي

...بوست كمان و تخلص الجوايز إن شاء الله

TSA 08 - جوائز المسلسلات

بعد ما خلصنا كلام عن السينما جه وقت التليفزيون
السنة دي كانت طفرة في عالم التليفزيون
سواء من ناحية البرامج او المسلسلات او حتي الإعلانات

الجوايز مش هتبقي زي جوايز سينما..احسن ممثل و احسن مخرج و الكلام ده
لان بكل بساطة بتوع كل سنة هم اللي هياخدوا الجوايز و مفيش مسلسل في 2008 يستاهل لقب مسلسل ممتاز
ممكن تلاقي حلقة او اتنين..او حتى مشهد او مشهدين
حتي الجزء التانى من الدالي مسلسلي المفضل..مكنش فيه حاجة مبهرة تخليه ينتزع لقب الافضل

خلونا نبدأ بجوايز المسلسلات حسب وجهة نظرى

جايزة أحلي مشهد في مسلسل
خالد صالح و هند صبري في مسلسل بعد الفراق

لما هند صبري بتتفق مع خالد محمود في العربية تحت بيتها انهم يتخطبوا
خالد محمود بيسألها اكتر من مرة عشان يعرف ان القرار ده بكامل إرادتها

و تطلع هند صبري فتلاقي خالد صالح مستنيها في البيت و عايز يتجوزها
المواجهة اللي بينهم كانت مبهرة

ما بين خنقة صوت خالد صالح..و عينين هند صبري المدمعين..و الحوار الممتع

مباراة تمثيلية عنيفة بين اتنين من احسن الممثلين الموجودين دلوقتي

جايزة الإزعاج التليفزيوني
مناصفة بين
إلهام شاهين
سميرة أحمد

مش كفاية كده بقي؟
كل سنة تعملوا لنا مسلسلات تتذاع وقت السحور و تجيبوا للناس كوابيس بسبب انكم كنتم اخر حاجة يشوفوها قبل ما يناموا
خنفان إلهام شاهين و حواجب سميرة احمد المرفوعين مع إبتسامتها الدائمة حتي في اشد المواقف تراجيدية يخلوني اطبق في زمارة رقبة اي حد يقولي زمان الفن كان إبداع

جايزة زيج زاج للأداء المتذبذب المتوازى
يحي الفخراني

زي كل سنة..يحي الفخراني يعمل مسلسل حلو و مسلسل وحش و بعد المسلسل الوحش يقول هعمل دور محمد علي
بقي لي ييجي 10 سنين بسمع نفس الكلام..و دلوقتي محمد علي بقي فيلم مش مسلسل
ياتري بعد 10 سنين إن شاءالله هنسمع خبر مسرحية محمد علي من بطولة يحي الفخراني علي خشبة المسرح القومي؟

جايزة إنت فين يا عم؟
رشوان توفيق

مستغرب ان محدش بيفكر في رشوان توفيق و محمد كامل وهم بيعملوا المسلسلات في حين ان في ممثلين بيتكرروا في 5 و 6 مسلسلات في ادوار متشابهة
رشوان توفيق من الممثلين اللي بيدفوا الشاشة لما يظهروا

جايزة كايداهم

سوسن بدر

كمية البنات اللي سمعتهم بينفسنوا علي رشاقتها في السن ده تخليها جديرة بالجايزة

يمكن رشاقتها كانت باينة في مسلسل الدالي

و تفوقها علي الممثلات اللي عملوا ادوار بناتها..زي ايتن عامر و هبة فؤاد

جايزة الأسرة السعيدة
مسلسل الدالي

نور الشريف و بنته مي
المنتج محمد فوزي و مراته وفاء عامر و اختها ايتن عامر
المخرج يوسف شرف الدين و مراته صفاء المغربي
و حتي المؤلف وليد يوسف جاب ولاده يعملوا ادوار الاطفال
في انتظار مها ابو عوف في الجزء التالت..ولا هي جت علي عزت ابو عوف يعني؟

جايزة جمعية بنات نادية الجندي للقضاء علي الرجال
تيسير فهمي

للسنة التالتة علي التوالي تيسير فهمي بتطارد العصابات في أمريكا و بتنتصر عليهم يوم 30 رمضان
و هي بتعيد امجاد نادية الجندي اللي برعت في الأدوار دي لحد ما فلست محمد مختار و قضت علي مستقبل ياسر جلال السنيمائي
و تتميز تيسير فهمي عن نادية الجندي في ان نادية الجندي كانت بتروح تل ابيب..بينما تيسير جابت من الاخر و راحت هزمت الامريكان في عقر دارهم

جايزة تقل الدم اللامتناهية

مناصفة بين

خالد النبوي

دنيا سمير غانم

مش عارف مين اللي اقنعهم انهم ممكن يعملوا ادوار كوميدية؟

اسوأ حاجة في كافيتشينو هو ابطاله الرئيسيين

الكوميديا كلها جاية من الشخصيات الثانوية

جايزة أحلي ثنائي

مناصفة بين

أشرف عبد الباقي - سامح حسين / راجل و 6 ستات

محمد هنيدي - طلعت زكريا / سوبر هنيدي

البطل و ابن عمه الغبي في حالة أشرف و سامح

و البطل و صديقه الغبي في حالة هنيدي و طلعت

اي مشهد بيجمع الثنائي بيكون مباراة في الكوميديا و التعليقات العجيبة

ساعات كتير بسأل نفسي بيستحملوا ازاى يقولوا الكلام ده من غير مايضحكوا

قليل اوى لما بنشوف دلوقتي كوميديا بين اتنين كوميديانات بجد

جايزة خرج و لم يعد

أحمد مكي

من الغلطات اللي وقع فيها منتجين تامر و شوقية لما مصدقوش أحمد مكي لما قال لهم ان الموسم التاني هو الاخير له في المسلسل

فلسفة مكي ان المسلسل عرضه كان هيكون في اثناء عرض فيلمه "إتش دبور" في السينما

كان خايف انه يتحرق كممثل..و كان حابب يتغلب علي عقدة هيثم دبور و الباروكة

بس الحقيقة إعتذاره عن المسلسل كان خسارة للطرفين

لا هو الحل اللي هيخلي الناس ينسوا الباروكة..ولا المسلسل قدر يعوض غيابه

البوست الجاى ان شاءالله نكمل كلام عن التليفزيون..بس المرة دي البرامج

TSA 08 - جوائز السينما

السنة دي الأفلام كانت كتير..بس الأفلام الجيدة كانت قليلة

السنة اللي شهدت تجارب جديدة فيها مغامرة من اصحابها زي أسف علي الإزعاج و حسن و مرقص و ورقة شفرة و كباريه

هي نفسها السنة اللي شهدت تجارب مريعة زي جنينة الاسماك و الريس عمر حرب

كانت سنة غريبة سنيمائيآ..لي فيها مليون ملاحظة

اول فيلم شفته في 2008 كان طباخ الريس و اخر فيلم شفته كان من ساعة و للأسف هو من انتاج 2007 و هو اخر الدنيا..و الحقيقة كان نفسي يكون انتاج 2008 عشان كان هيكتسح في الجوايز..ربما يكون لي رجعة معاه في بوست تاني بعدين..لاته فيلم مايتسكتش عليه..هل انا محظوظ انني ماشفتوش كل الفترة دى؟

فيما يلي..رأيي في الافضل و الاسوأ طبقآ للأفلام اللي شفتها في 2008

المنافسة خرج منها أفلام زي هي فوضي و الجزيرة و خارج علي القانون بما انهم عرضوا في ديسمبر 2007

و طبعآ هستثني من حسبة الأفلام بتاعة السنة دي..الأفلام اللي من نوعية كامب و بنات و موتوسيكلات

عشان كده..المنافسة كان سهل حسمها نظرآ لان الافلام اللي بتتنافس عددها قليل و معظمها كان متوسط المستوي

و بالتالي معظم الافلام بعيدة عن المنافسة علي اي من لقبي الافضل او الاسوأ

أفضل فيلم

أسف علي الإزعاج

أفضل ممثل

أحمد حلمي - أسف علي الإزعاج

أفضل ممثل مساعد

مناصفة بين

أحمد الفيشاوى - ورقة شفرة

آسر ياسين - زي النهاردة

محمود حميدة - أسف علي الإزعاج

جمال سليمان - ليلة البيبي دول

أفضل ممثلة

منة شلبي - أسف علي الإزعاج

أفضل ممثلة مساعدة

سولاف فواخرجي - ليلة البيبي دول

أفضل سيناريو

أيمن بهجت قمر - أسف علي الإزعاج

أفضل إخراج

خالد مرعي - أسف علي الإزعاج

أفضل موسيقي تصويرية

مناصفة بين

راجح داوود - غرفة 707

ياسر عبدالرحمن - ليلة البيبي دول

اسوأ فيلم

غرفة 707

اسوأ ممثل

عمرو واكد - جنينة الأسماك

اسوأ ممثل دور مساعد

ياسر فرج - غرفة 707

اسوأ ممثلة

مناصفة بين

رولا سعد - غرفة 707

هند صبري - جنينة الأسماك

اسوأ ممثلة مساعدة

سميرة محسن - غرفة 707

اسوأ سيناريو

سميرة محسن - غرفة 707

اسوأ إخراج

مناصفة بين

إيهاب راضي - غرفة 707

يسري نصر الله - جنينة الاسماك

في شوية جوايز خاصة لجنة التحكيم شايفة ان من الواجب منحها

جايزة اكتر فنان مظلوم

مجدي كامل / راجح داوود - غرفة 707

شيلوا موسيقي راجح داوود و مجدي كامل باداءه من الفيلم و حطوهم مع مخرج و ممثلين كويسين و سيناريست يشتغل شوية علي قصة الفيلم..هتاخدوا فيلم تاريخي

جايزة اكتر فنان عمل حاجة مفيدة

محمد حفظي - إنتاج ورقة شفرة / زي النهاردة

ادي مساحة لـ3 مجهولين لاغلبية الجمهور..و وثق في امير رمسيس بعد كوارثه السنيمائية السابقة فطلع بفيلم ممتع زي ورقة شفرة

و مافاتش شهور قبل ما يكرر التجربة تاني مع عمرو سلامة و يثق فيه كمخرج مالوش اي تجارب ولا دراسة فطلع بفيلم زي النهاردة

جايزة أذكي ممثل

أحمد الفيشاوي - ورقة شفرة / زي النهاردة

و عدم اهتمامه بحجم الدور علي قد قيمته في ورقة شفرة..بيثبتوا ان احمد الفيشاوي بني ادم ذكي بيعرف يحسب خطواته صح

و الدليل انه دلوقتي بيستعد لعمل فيلم إكرامي تايتانيك اللي هيكون مخصص لشخصية إكرامي اللي قدمها في ورقة شفرة

و رجع تاني كرر المغامرة مع محمد حفظي و قدم زي النهاردة مع عمرو سلامة..و طبعآ مش محتاج اتكلم عن الفيلم و تألق الفيشاوى فيه

جايزة الزيطة ع الفاضي

شركة جودنيوز - حسن و مرقص / ليلة البيبي دول

جايزة اكتر ممثل محظوظ

آسر ياسين - زي النهاردة / الوعد

في شهرين حياة آسر ياسين كممثل اتغيرت

دور رائع في زي النهاردة

بعده بطولة في فيلم بيساعده فيه غسان مسعود و محمود ياسين و بيكتبه وحيد حامد

مشفتش فيلم الوعد..بس اي ممثل يبقي محظوظ لما ده يبقي فريق العمل اللي يشتغل معاه بعد دور مهم زي اللي قدمه آسر في زي النهاردة

جايزة السعفة الخضراء

لكل فريق عمل كارتون سوبر هنيدي

عمر طاهر..شريف جمال..محمد هنيدي..طلعت زكريا..حنان ترك..علاء مرسي

كارتون مصري كوميدي فيه نجوم صعب يجتمعوا في فيلم واحد دلوقتي

كل حلقة تساوى عندي فيلم لهنيدي و طلعت زكريا

بيقدموا في ربع ساعة كوميديا اكتر من اللي ممكن تتشاف في فيلم ساعتين

دي كانت الجوايز الخاصة بالسينما..باقي الجوايز تستكمل لاحقآ إن شاء الله

The Sulto Awards 2008 - TSA 08

بما اننا في النص الاخير من الشهر الاخير من 2008

حابب اعلن خلال الاسبوعين المتبقيين قائمتي للافضل و الاسوأ لعام 2008

هيكون في سلسلة بوستات متعلقة بهذا الموضوع عشان اعبر عن رأيي في سنة من اهم و اصعب السنين في حياتي

و ربنا يجعل كل سنينا الجاية افضل من 2008

تابعونا عشان تعرفوا التفاصيل

الخط الأخضر

كل واحد مننا بيختار خط يمشي عليه

بنتفرق

بنتقابل

بنقرب

بنتسابق

بنقف

بنتوه

و كلنا بنقف عند اخر الخط و نسأل نفس السؤال

ياتري الخط اللي مشيت عليه..قدملي في الاخر ايه؟

مش يمكن في خط جديد و عالم اوسع امكانياتك فيه مالهاش حدود؟

ده إعلان إتصالات جرين لاين الجديد

انا اخترت اتصالات اول ماشفت اللوجو الاخضر

بس جرين لاين ده إغراء كبير و احد اهدافي المستقبلية إن شاءالله

لكن الكلام نفسه..أكبر من مجرد إعلان خط موبايل

ياتري الخط اللي الواحد ماشي عليه في حياته هيوصله لإيه؟

و مش يمكن فعلآ في خط جديد و عالم اوسع امكانياتي تبان فيه؟

اسيبكم مع الإعلان

http://www.youtube.com/watch?v=_jsQzeqZa44

لغز الفتاة الجميلة

إلتقي بها لاول مرة في إحدى الحفلات

أعجبته جرأتها و جمالها الاخاذ

و أعجبت هي بهدوءه و رومانسيته

و استمر تطور العلاقة بينهما لشهور

و عندما قرر ان يصارحها بمشاعره اجبرته ظروف عمله علي السفر بعيدآ عنها لعدة اشهر

يوم عودته الي الوطن سأل صديقه في المطار..كيف حال حبيبتي؟

أشاح صديقه بنظره بعيدآ محاولآ تجاهل السؤال

فأعاد عليه السؤال مرة أخري بإسلوب أكثر جدية

فقال له صديقه..لقد اصبحت حبيبتك فتاة مختلفة عن تلك الفتاة التي وقعت في حبها

انها تذهب الي ذلك المكان ليلآ بثيابها المثيرة

تستعرض نفسها امام الجميع املآ في جذب انتباههم

أغلب من تتعامل معهم هم رجال نصفهم من السكاري و نصفهم الاخر سأم حياته فجاءوا اليها طمعآ في لحظات سعادة و ترفيه

و منهم من يحالفه الحظ و يتحدث معها لبضع دقائق

و لو كان ماهرآ بدرجة كافية ليخبرها بماتريد ان تسمع منه..ستعطيه بعض مما تستعرض طول الليل

يجبرها مديرها علي إطالة الحديث معهم..فكلما اطالت كلما جنت مزيدآ من المال

هنا لم يتحمل الشاب ان يسمع المزيد من كلام صديقه فصرخ فيه..أخبرني ماذا تعمل حبيبتي؟

و قبل ان يجيبه صديقه..تدخل رجل يرتدي معطفآ و قبعة في الحديث و قال لهما

"انا المفتش كرومبو..و عرفت حبيبته بتشتغل ايه..لو انت كمان عرفت إبعت كومنت"

: الإجابة هي

(فتاة ليل - راقصة في ملهي ليلي - مذيعة في ميلودى تريكس)