بين نجمة الجماهير و برينس الأكشن

انا احد الاطفال اللي عاشوا طفولة معذبة كانت النجومية في السينما فيها لنجمة الجماهير نادية الجندي

و اللي كانت كل فترة بتتحفنا فيها بفيلم بيدور عن انتقامها من الرجالة كلهم اللي طبعآ هيحبوها و يذهلوا قصاد جمالها الخارق و هي هتسحقهم و تضحك في اخر الفيلم

و جت مرحلة المراهقة و انقذنا محمد هنيدي و محمد فؤاد لما عملوا إسماعيلية رايح جاى

و بصرف النظر عن مستوي الفيلم اللي نجحه إعلانات الكرتون بتاعة البوم كمانانا

و بعد الفيلم ده نهضت السينما و اختفت نادية الجندي بعد كام فيلم حاولت تقاوح فيهم

طبعآ كان لازم حد يملي فراغ نادية الجندي في النجومية الغير مبررة و تقديم الأفلام الهابطة

و صبرنا سنوات لحد ما جه مصطفي شعبان يملي الفراغ ده

غلطة شريف عرفة انه اختار مصطفي شعبان في فيلم "مافيا" مع احمد السقا و مني زكي

لان من يوم ما مصطفي شعبان نط في المخزن و خد الرصاصة في كتفه و هو بيعتبر نفسه بطل أكشن

و أذكر تصريحاته الخالدة انه افضل من السقا في الأكشن لان جسمه رياضي عن جسم السقا

المهم..مصطفي شعبان بعد ما كان ممثل بارع بيحصد الجوائز عن ادوار في افلام زي" خلي الدماغ صاحي" و "النعامة و الطاووس" لقي ان افلامه ماجابتش إيرادات

فقرر يعمل افلام جماهيرية..و عمل فيلم "أحلام عمرنا" مع مني زكي و منة شلبي

و طبعآ السقا كان في دماغه فحشر مشاهد اكشن و خليني اكون حسن النية و اقول انه ما اخدش حاجة من أفريكانو ولا شورت و فانلة و كاب

بس مش هقدر اتجاهل انه في تحفته السينمائية التانية "فتح عينيك" و بصرف النظر عن كمية اللامنطق في الفيلم ده فهو قرر يقتبس من نفسه و نقل مشهده الشهير في مافيا

مافيا: عباس ابوالحسن + مني زكي و السقا في الجراج القديم + مصطفي شعبان بيروحلهم بيتضرب بالرصاص في كتفه الشمال

فتح عينيك: خالد زكي + نيللي كريم و مصطفي شعبان في الجراج القديم+ يوسف الشريف بيروحلهم بيتضرب بالرصاص في كتفه الشمال

عباس ابو الحسن هرب للصحرا و خالد زكي هرب للمطار

السقا ولع في عربية عباس ابو الحسن و مصطفي شعبان ولع في طيارة خالد زكي عشان هو اجمد طبعآ

نسيب تحفة مصطفي شعبان و نروح لكارثته "الكود 36" و ده شفته بالإكراه بعد زن شديد من احد اصدقائي و لما دخلت السينما اكتشفت انه فيلم مثير للتشويق

ما انكرشي انني كنت متشوق اشوف نور السينما بينور و اخرج

طبعآ ماشفتش فيلم "جوبا" لانني اتعلمت الدرس و عرفت انه مايتخيرش عن نادية الجندي..هيعيش دور البطل اللي بيقهر جميع الرجال و ينتصر في أخر الفيلم

مصطفي شعبان كان ممثل جامد..بس عقدة الأكشن دي مش هتوديه لاي حتة

و إحنا مش في زمن الـ4 نجوم يعني معندوش فرص كتير يقدم لنا الافلام دي

و لي عودة مع فنانين اخرين بيثروا سينمتنا الحلوة

جهينة..صحتك أكيد مش في العلبة دي

سحقآ للأوغاد في جهينة

سحقآ للأوغاد في السوبرماركت اللي حاول يبيع لي علبة لبن جهينة

سحقآ للبقرة التي أنتجت لبن جهينة من الأساس

لبن جهينة تم منعه من التداول لانه مخالف لشروط التصنيع الصحية و حسب ما سمعت فيه بلاوى في العلبة

حاجة اشبه بفضيحة مصنع اللبن بتاع فيلم جاءنا البيان التالي

لو دخلت سوبر ماركت و مالقتش علب لبن في طريقك هتقول للراجل عايز علبة لبن إنجوي..هيقولك سوري معندناش غير جهينة

بيحاولوا يصرفوا البضاعة بأى طريقة

من شوية كنت بطلب حاجات من السوبر ماركت..فقلت لهم عايز علبتين لبن إنجوي

رد الرجل و قاللي سوري يا فندم مفيش إنجوي

قلت له جهينة ع البلاك ليست مش كده؟

قاللي ايوه جهينة اتمنع من السوق

نزلت زي الشاطر و قلت الف ع المحلات

كل ما اخش الاقي جهينة علي الارفف و مفيش اي نوع تاني لا بيتي ولا انجوي ولا بخيره ولا حتي نيدو للأطفال في 6 شهور

كلهم معندهمش غير جهينة..بيصرفوا البضاعة الخربانة

لحد ما لقيت محل في شارع جانبي دخلته لقيته سوبر ماركت ضخم و رجل تقي قاعد علي الباب و قاللي ايوه يا بني

قلت له علبتين لبن انجوي لو سمحت

قاللي امشي قدام علي ايدك الشمال

بصيت لقيته راصص ييجي 50 علبة انجوي و زيهم قزايز بيتي

كإنهم هيعدموا البقر بكرة و اللي مش هيشتري لبن النهاردة هو الخسران

المهم..جيت احاسبه لقيت سعر علبة الانجوي زاد جنيه و نص

بس رجعت البيت مرفوع الرأس و بعمل دلوقتي كوباية شاى بلبن إحتفالآ بصيدي الثمين

و نصيحة ارجو ان تنشروها لكل اللي تعرفوهم

اللي عنده علبة جهينة يرميها في اقرب صفيحة زبالة

لإن صحتك..مش في العلبة دي

انتوا عايزيني اقول لشعبي ايه؟

للمرة الرابعة اكتب بوست و امسحها

ملخبط فكريآ..بكتب كلام ماحسوش حلو بعدها بدقيقة

أصعب حاجة لما الواحد يبقي حابب يقول حاجة و يكتمها

بس الاصعب لما يبقي عايز يطلعها و مايعرفش او تطلع منه غير ماهو حاسسها

بس بعد تفكير عميق في الحاجات اللي في بالى إكتشفت ان الصمت كويس و مفيد في حالتي

انه موعد الصمت الرهيب

من قلبي سلام لبيروت

كم انتي قاسية ايتها الساحرة المستديرة

في حاجة محيراني

من 6 سنين تقريبآ لما كان شوقي غريب مدرب منتخب الشباب رحنا قطر لعبنا بطولة اسمها دورة الصداقة

و دي كان فيها منتخب البرازيل للشباب و وقتها كاكا كان بيلعب في المنتخب ده

حسام غالي إنتزع منه بجدارة لقب احسن لاعب في البطولة

ده غير اننا فزنا بالبطولة كمان

و لما ميدو كان بيلعب في اياكس كان نجم عن زلاتان ابراهيموفيتش

و لما كان بيلعب في مرسيليا كان نجم عن دروجبا

بل إنني قريت تصريح لدروجبا وقتها كان بيشتكي ان ميدو معووج عليه

دلوقتي كاكا هو احسن لاعب في العالم في إستفتاء الفيفا الاخير..و ابراهيموفيتش و دروجبا بقوا اساطير كروية و من اهم المهاجمين في العالم

اما ميدو فبيلعب في ميدلسبره الـ14 في الدوري الانجليزي و قدم موسم سيء مليء بالإصابات و حسام غالي معار من توتنهام و بيلعب في ديربي اخير الدوري الانجليزي و أمنية حياته ييجي له عرض من نادى بيلعب في الدوري الانجليزي الموسم الجاى و إلا هيضطر يمضي لديربي و يلعب في دوري الدرجة الاولي

هو العيب في ميدو و حسام؟ ولا كاكا و زلاتان و دروجبا بياخدوا منشطات؟

كتب كتاب

بيلفت نظري عناوين الكتب و الروايات

الناس عشان يبقوا مثقفين لازم يضربوا اسم 2 كتاب اجانب ضمن الكتب اللي بيقروها

اولهم هيكون باولو كويلو

و انا احد الاشخاص اللي يطلق عليهم دودة قراية بس تقريبآ لحد سن 16 سنة كنت فاكر باولو كويلو ده احد انواع البن البرازيلي الجيدة

و لما اتشرفت بمعرفة جنابه جبت روايته

alchemist

و ماقدرتش اكمل اكتر من 30 صفحة من الملل

تسمعوا اسامي الروايات العالمية تحسوا بغموض

"الخيميائي"

"الحب في زمن الكوليرا"

"مئة عام من العزلة"

"مائتان فرسخ تحت الماء"

في حين تلاقي عناوين الكتب المصرية المقروءة عناوينها عادية

"كابتن مصر"

"شكلها باظت"

"تاكسي"

عشان كده قررت اقتحم مجال كتابة الكتب

و اهم حاجة قبل فكرة الكتاب هي عنوانه

و حاليآ جاري البحث عن شوية عناوين رنانة لكتب قد اكتبها مستقبلآ

و قررت يبقي لها صدي يدل علي ثقافتي الغزيرة و عبقريتي الفذة

قريبآ سأكتب القائمة..و ان كنت استقريت علي عنوان كتابي الاول

"أسطورة البعبع المفزوع"

و هي طبعآ واضح من عنوانها رواية في ادب الرعب

إستعدوا لمولد نجم ساطع في عالم الأدب العالمي

سحقآ للغزاة

الصيف دخل و الحر ابتدا

و بالتالي الحشرات خلصت بياتها الشتوي

و من الحشرات الشهيرة في الصيف الصرصار

و الصرصار لمن لا يعرفه هو كائن بني اللون بيضاوى شكل يتمتع بشنبات طويله و منه فصيلة بتطير مثل الهليكوبتر

و عند فعص الصرصار فهو يصدر صوت قرقعة مصاحبه انتشار سوائل لزجة تلتصق بحذائك

ناس كتير بترش فليت و يستنوا يشوفوا صرصار ماشي قدامهم عشان يفعصوه

بس ده عمره ما قضي علي الصراصير مهما كانت احتياطاتك الأمنية

و لذلك انا توصلت الي تجربة عملية مع الصراصير أثبتت فعاليتها

في الاماكن الخطرة لما بيخش شخص غير مرغوب فيه بيضربوه عشان يحرم ييجي تاني..لكن لو قتلوه اهله هينتقموا و يرجعوا كلهم مسلحين

نفس الشيء بالنسبة للصراصير..لما يقابلك صرصار شوطه و ماتفعصوش

الشوطة هتبقي هي العلقة اللي خدها الصرصار خصوصآ لو الشوطة رزعته في الحيطة و اتقلب علي ضهره و قعد يلعب شنباته هيقعد ذليل بالساعات لحد ما يعرف يتعدل و يهرب

لكن لو مات هييجي جيش نمل يشيله هيلا بيلا و نملة خسيسة تروح تبلغ كبير الصراصير انك قتلت ابنهم

و بالتالي ييجوا بكل احجامهم و انواعهم..و مهما عملت بطل مش هتقدر تواجه صرصار بيطير

يبقي خليك في انك تضرب الصرصار فيروح لأهله و يقولهم خدوا بالكم من البني ادم ده..ايده تقيله

و طبعآ إياكم و رش الفليت

نظرة خاصة عن الجواز

الجواز هو انك تضرب كل مصاريفك الترفيهية × 2

رايح السينما؟ يبقي تذكرتين بدل تذكرة

هتاكل سندوتشات بره × 2

تشتري هدوم جديدة × 2

تسافر تتفسح × 2

في المقابل هتلاقي حد يقولك الفيلم كان حلو و تتكلم معاه عن الاحداث و الابطال

و هتلاقي حد يقولك ليه سندوتشات انا طابخة النهاردة

و هتلاقي حد ينقي لك هدوم تليق عليك تلبسها مكوية بدل الفضيحة اللي انت لابسها

و هتلاقي حد يسليك في سفرك و تستمتع معاه بالرحلة

الجواز هو ان كل حاجة سخيفة في حياتك يبقي لها معني جميل

هو إستقرار و راحة بال و سعادة

اقلها هتلاقي حد تفضفض له و يقولك معلش لما تبقي تعبان

شايفين الجواز حلو ازاى؟

بس الشقق اسعارها نار..و المهور غليت..و فرص الشغل قليلة و مرتباتها هزيلة..إبقوا قابلوني لو حد فيكم إتجوز..نياهاهاها

أن تكون حشبكله الملواني

حشبكله الملواني هو شخص غير موجود في عالمنا

بس هو رمز لشخص موجود في حياتنا

جوه ذكريات و واقع كل واحد مننا حشبكله صغير

حشبكله الملواني هو رمز لكل شخص بسيط بتشوفه في الحياة و تحسه مهم

بواب عمارة..فراش مدرسة..مكوجي..بقال

حشبكله بيعيش في دايرة صغيرة من الضوء صنعتها له حياته البسيطة

راجل كبير في السن بيحب يتبادل معاك أطراف الحديث كل ما تيجي له الفرصة و يشوفك

ممكن يكون حاسس بالضألة قدامك و مايحبش يزعجك و يسلم عليك كل مايشوفك بس الأكيد انه مايعرفش انك بتبص له بنظرة فيها إحترام و تقدير و ان سعادتك بتبقي اكبر من سعادته وقت ماتشوفه

تحية خاصة الي كل شخص بيرمز له حشبكله الملواني

و أخص بالتحية صديقي عم يونس المكوجي اللي عمره ما هيقرا البوست دي

الفشل في سن الرابعة

كل الناس بيقعوا في الحب..و بطبيعة الحال بييجي الوقت اللي يصارحوا الطرف التاني بمشاعرهم

أكيد لو قالت له و انا كمان مش هيبقي في حاجة نتكلم عنها في البوست دي

انا بتكلم عن اللي إتقالهم لأ..يا تري إيه احساس واحد حب ولا طالش؟

اول حاجة هيكون محرج احراج طفل عمره 4 سنين عملها علي روحه في اول يوم له في الحضانة

يعني ايه؟

يعني اللي هو عمله ده طبيعي..بس محرج له في نفس الوقت

لان اكيد قبل ما يقول حقيقة مشاعره كان عايش احلام وردية

و أكيد الاحلام دي تحطمت علي صخور الواقع

الواقع اللي بيقول ان حبيبته..ماتنفعش تفضل حبيبته

تاني حاجة هيبقي في حزن طفل عمره 4 سنين كسر لعبته المفضلة

هيفضل يحب حبيبته بس قلبه هيبقي مكسور لانه عارف انه بيحب مع نفسه

و علي رأى عنوان اغنية سميرة سعيد الجديدة اللي مسمعتهاش ولا نزلت

حب ميئوس منه

تالت حاجة حتي و هو وسط الناس هيبقي احساسه بالوحدة نفس احساس طفل عمره 4 سنين أهله سابوه في البيت لوحده

رغم ان الطفل حر يلعب و يبرطع في البيت براحته

بس لعبه و جريه و تنطيطه مالوش معني لانه لوحده

رابع حاجة..هيبقي نظرته لحبيبته نفس نظرة طفل عمره 4 سنين لكيس شيبسي محطوط علي ترابيزة عالية

نفسه يوصل لها و شايفها قدامه بس عمره ما هيطولها

و من هنا جت جملة "اللي حب ولا طالش" لانه مقدرش يوصل لكيس الشيبسي ولا قلب حبيبته