إمبارح كنت سهران مع امجد..و قررت الساعة 4 الفجر أرجع البيت مشي علي البحر
و دي حاجة تاخد حوالي ساعتين
مش اول مرة اعمل الحكاية دي
عملتها من شهر
بس المرة دي مختلفة
من شهر كنت ماشي وسط الهدوء لوحدي بدندن أغنية مع نفسي لحد ماوصلت البيت
إمبارح كان زحام مختلط غريب
مابقتش عارف البلد دي بتاعة مين
الساعة 4..ما بين شارع 45 و شارع الاسكندر ابراهيم..اللي كانوا في الشارع اما بنات ليل او حبيبه ماسكين ايدين بعض او شلة بنات بيتمشوا او رجل معاه اسرته و من لهجته هو مش مصري
الساعة 4 و ربع..قرب شارع خالد بن الوليد..كان اللي في الشارع شباب ماسكين كور و قاعدين يتكلموا بصوت عالي
الساعة 4 و نص..قرب شواطيء سيدي بشر الرصيف اتزحم والشواطيء ابتدت تتملي بناس حابين يحجزوا مكان قدام البحر علي طول..رغم ان الدنيا شديدة الظلام و الشمس مش طالعة قبل ساعتين
الساعة 5 ..كنت بعدت عن منطقة ميامي معقل المصيفين..كنت قريب من لوران بداية السكان الاصليين للأسكندرية..اللي ابتدوا يظهروا..هواة المشي و الجري علي البحر هم الموجودين في الشارع
الساعة 5 و ربع..قرب جليم..مجموعة جديدة من المصيفين بيركبوا ميكروباصات و متوجهين الي شواطيء ميامي و سيدي بشر
في الصيف مابعرفش الاسكندرية دي بتاعة مين؟
بتاعتنا؟
و لا بتاعة المصيفين الداخليين اللي بييجوا من المحافظات؟
ولا بتاعة المصيفيين الخارجيين اللي بييجوا من الدول الاخري؟
كل منطقة بيبقي لها خريطة مرورية و تركيبة ناس و كثافة تواجد في الشوارع مختلفة عن المناطق التانية
التركيبة غريبة..الإسكندرية بتبقي كإنها 3 او 4 مدن جوه مدينه واحدة
بس تركيبه حلوة و دايمآ بتكون هي اللي بتدي لصيف الأسكندرية طعم و تميز
و يبدو ان السنة دي صيف الأسكندرية هيكون متميز جدآ ان شاء الله..خلينا نستني و نشوف
4 comments:
يااااه فكرتني بحاجة :)
من سنة انت كتبت موضوع بتشتكي فيه نفس الشكوى ان اسكندرية في الصيف لا تطاق
قلتلك وقتها طبعا لا تطاق في الصيف حد يروح بردو يا سولتو
قلتلي مش انا اللي رحت هما اللي جم :)
ماكنتش اعرف قبل الموضوع دا انك اسكندراني :)
بصراحة
ربنا يكون في عونكم
حاجة تقرف لما تحس ان بلدك حصلها احتلال
بحسها في الشتا تبقى احلى
مع اني مروحتهاش في الشتا
وحتى في الصيف يعني :D
روحتها بين الاتنين
بس يوم ما مطرت واحنا في الشارع كان يوم تحفة
الله يسامحك اللي خليتنا نركب تاكسي ومنكملش مشي زي ما انا كنت عايزة
بس بكل حالاتها هي فعلا حلوة
فنون -اتعودت ع الاسم خلاص- انا لسه راجع من القاهرة..حقيقي اللي يشوف بلاوي الناس تهون عليه اسكندريته
مرمريتوس..كنتي عايزاني ييجي لي برد و انا رايح الجيش يا مفترية؟
مش كفاية ان الميه غرقت النضارة
قال نمشي في الشتا قال
اسكندرية ماتتراحش الا في الشتا وبس :D
مدونتك جميلة قوي ومميزة جدا ياسولتو :D
Post a Comment