مبدأيآ انا فاشل في التعبير عن مشاعري فلو طلع الكلام غير متناسق او مايوفيش حق صاحبه فده عادى..اللي جوايا اكتر من اللي اتقال
و الترتيب مازال من الطويل للقصير بعد التأكد ان احمد اطول من يوسف بـ1 سم
أمجد
لما تبقي الدنيا مغيمة قدامك مش هتلاقي احسن من أمجد يشوفهالك
ده مش شيء يرجع للطول علي قد ما هو يرجع لمنهجية التفكير الهندسي اللي بيتبعه
1+1 =2
دايمآ بكون مندفع و أقول حاجات متسرعة..الاقيه يقولي غلط دي كذا و كذا
و كلها يوم ولا اتنين و يثبت لي صحة كلامه
ميزته في صراحته مابيجاملش
شيء غريب ان واحد فيلمه المفضل
The God Father
يكون الأب الروحي لمعظم أصحابه و يكون مؤثر في حياتهم
جدع مع الولاد..رومانسي جدآ مع البنات
مواعيده زي الزفت..بس حججه غير منطقية و مقنعة
ببساطة..إنه أمجد
نانسي
ساعات بحس انني عيل صغير شبطان في حد كبير و انا بتكلم معاها
برجع لطفولتي ببرائتي اللامتناهية..و بستمتع بإختراع أسخف الإفيهات و التعليقات اللي لو قلتها لحد تاني كان ضربني
بس هي بتسمع و ماشتكتش من ده غير قريب لما فاض بيها من الإفترا بتاعي
و رغم ده مش عارف أبطل
ساعات بزعلها و ساعات بتزعلني بس عمرنا ما زعلنا من جوانا
رغم انني هادى بس ماقدرش امسك نفسي من الكلام معاها لحد ما هي تمل من السمع
بحكي لها ابسط تفاصيل بتحصل معايا في حاجة بسيطة اكون بعملها..بس بتسمع بإهتمام كإنني بخترع طيارة نفاثة
نانسي في تشابه شديد بينها و بين البحر
البحر موجه عالية و موجه هادية
جواه كنوز كتير اللي يعرف يغوص جواه هيلاقيها..و ده الواحد بيلاقيه كل مايقرب منها و يعرفها أكتر
و جواه أسرار كتير محدش بيعرفها غير لما الموج يحدفها علي الشط..و ده مابيحصلش غير لما نانسي هي اللي تقرر تتكلم
بس نانسي أحلي من البحر لان البحر غدار و نانسي اكتر بني ادمه تحسس اللي حواليها بالأمان
اللي يعرفها كويس يبقي محظوظ..لان نادر تلاقي زيها في الحياة
لو حاجة بسيطة مضايقاني هتهتم و تسمع بدون إنزعاج..يمكن هي بتحس بالمسئولية تجاه كتير من اصحابها كإنهم ولادها
بس بالنسبة لي في كل الاوقات و كل الحالات انا بشوفها طفلتي الصغيرة المدللة اللي بخاف عليها من اي حاجة
أحمد
ماينفعش دخلته في الفيلم تبقي زي باقي الناس
لانني دايمآ مقتنع ان احمد مفيش زيه إتنين
بحس مشهد نور الشريف في تتر مسلسل الدالي بتاع "انا سعد الدالي..انت مين؟" مستوحي من مشهد واقعي لأحمد
صاحب أقوي الأراء سخرية في اي موضوع يتكلم عنه
و صاحب مواقف عفوية بتموتني من الضحك كل ما أفتكرها
أحمد أعرفه من ايام ما كان ناشيء أخضر لسه بيستكشف الحياة
و علي طول حسيته اخويا الصغير..انسان عنده حماس و شغف يتطور
سواء علي الجانب الشخصي او جانب موهبته في الكتابة
بيعترف بعيوبه و بينكر مميزاته بس ده مايمنعش انه واثق في نفسه
و ده ادي لإنه بقي شاب فلاتي خلبوص زي احمد رمزي في شبابه
حتي و هو عصبي و ثائر بيكون طيب
أحمد بيبقي إنسان تاني لما يشوف حد من اصحابه مش كويس
بيحب كل اللي حواليه يبقوا تمام و كويسين عشان ضميره يستريح
لو إهتم بموهبة الكتابة و وثق في انه يقدر يوصل لأبعد الحدود مصر هتفخر بمولد مبدع عبقري صغير..منعكش الشعر..اسمه احمد المصري
أعتقد دي اطول عبارات جادة اقدر اكتبها عن احمد..بس لولا انني محترم نفسي في البوست ده كنت هبهدل الدنيا
مظنش اصلا إحنا في حياتنا قدرنا نتكلم كمية عبارات جادة كده
يوسف
اول مرة اشوف واحد صاحبي بيتعاكس كان يوسف و هو قاعد مستنيني قدام السينما
و اللطيف انه كان ضارب السماعات في ودانه و مش سامع البنت اللي واقفه تكلمه و انا جاى و سامعها و واقع من الضحك
مقدمة منطقية و إستهلال كان لابد منه عشان اتكلم عن يوسف
اكتر بني ادم لفيت و شفت معاه عجائب الدنيا السبع في الاسكندرية و خارجها
شفنا ما لا يخطر علي بال ولا يصدقه عقل
عنده قدرة علي توقع خطوتي الجاية ربما لانه بيفكر في اللي ممكن يعمله لو كان مكاني
و ده راجع لتشابه صفاتنا و عيوبنا بنسبة كبيرة
أحيانا بمر بمواقف صعبة..بس رد فعلي انني اضحك لان يوسف كان قايلي ان ده هيحصل قبلها بيومين
الغريب اللي مش فاهمه لغاية دلوقتي انني اول مرة شفته ماكنتش طايقه و كان نفسي يقوم و يسيب القعدة
بس يبدو ان رزالته خلته يقعد 3 ساعات لحد ما ابتدا يفك و يتكلم
عجيب يوسف ده
ازمتنا المستمرة هي اننا نظبط ميعاد مع أمجد و محدش فينا يروح متأخر
و ده عمره مابيحصل نتيجة لان دايمآ امجد بيلاقي سفينة فضاء سادة الشارع عليه و هو طالع
حنان
واخدة من اسمها كتير اوى..طيبة و حنينة بجد
شخصية ناضجة و عقلانية لابعد الحدود..و طفلة صغيرة شقية لابعد الحدود
تتمتع بخفة دم مهولة..و سخرية تدفع اي شخص للإنتحار
يا ويله اللي تستلمه حنان تريقه
في الوقت ذاته حنان صاحبة أراء هامة في كل قضايا الحياة من الطبيخ .. لكيفية اكل الطبيخ..لكيفية التحلية بعد أكل الطبيخ
بالإضافة لإهتمامات سياسية زي حكم سيمبا للمملكته و الدور السياسي لتيمون و بومبا في ده
طيبتها في التعامل مع الأشياء ساعات بتسبب لها المشاكل
بس الأكيد انها دايمآ بتعمل اللي يصح يتعمل فيها
التشابه الشديد بين حنان و أنس و ماسين ولاد اخواتها بيدفعني للشك في وجود جذور يابانيه لحنان
خصوصآ ان العيال خدودهم نافشة و قافلة علي عينيهم و اللي يشوف صور حنان و هي صغيرة هيلاقيها كده
مما يؤكد ان حنان مش مغربية بل يابانيه من طوكيو
و ده يفسر سر الشبه بينها و هي طفلة و بين شخصية ماروكو الكارتونية
اللي اعتقد حنان ادعت بعد كده انها من موروكو بسببها
مارو
مرمريتوس..عمرها ما اقنعتني انها لبنانية
دي مصرية من بولاق و ضاربة باسبور لبناني
و هي بتتكلم لبناني بحسها شايفة لها مسلسلين ع الال بي سي و بتحاول تقلدهم
لهجتها المصري سليمة اكتر من لهجتها اللبناني
بتحب تشوف كل اللي حواليها سعداء..و هي قادرة علي عمل ده
كمان قادرة علي اقناع اي حد يقلب حياته رأسآ علي عقب بكل طيب خاطر
هي اللي نصحتني اتخصص في الكلية في ايه و اخدت النصيحة بإقتناع رغم انني مش عارف ليه اتخصصت التخصص العجيب ده
بس بتتحول لمواطن مريخي مثالي لما تتكلم عن الحب
بحس ان الحب بتاع البشر اللي الواحد كبر و فهمه غير الحب اللي هي عارفاه
زي ما يكونوا ضحكوا عليها في المدرسة و درسوا لها مقررات غلط
وجودها في مصر بيكون اهم حدث في حياة كل اصحابها..الليل يتقلب نهار و النهار يتقلب ليل
مفيش نوم..مفيش قعدة في البيت
كله خروج و فسح و مرح
تنافس أبوتريكة بجدارة علي لقب "تاجر السعادة" اللي منحه له ميمي الشربيني
No comments:
Post a Comment