هو ليه لازم الواحد يتقبل الحاجة زي ما تيجي له مش مهم تناسبه ولا لأ؟
بمعني تاني ليه إحنا بنجبر نفسنا اننا مانلعبش في مكونات البيئة المحيطة؟
لو انت كاره حاجات في المجتمع اللي حواليك..ليه ماتحاولش تغيرها؟
ليه لما تسأل و ماتعرفش إجابة يتقالك..هو ده الواقع و لازم تتقبله؟
ايه اللي خلاه لازم يعني؟ و لو ماتقبلتوش يعني هيحصل ايه؟
و ياتري عدم الإجابة ده كان جهل بالإجابة ولا عدم رغبة في الخوض في الموضوع؟
لو جهل بالإجابة..ليه لما تبقي مش عارف ترفض انك تحاول تعرف؟
ايه اللي يمنع الإنسان من انه يقوم بتغيير حاجة في نظام الحياة المحيطة به هو نفسه مش راضي عنها؟
خوف؟ كسل؟ الإتنين؟
طيب يخاف من ايه و من مين اصلآ..ده اكيد في غيره متضايقين من نفس الشيء
بس برضه ماعملوش حاجة
مالهم دول كمان؟
إحنا ليه مجتمع سلبي كده؟
بنرفض نتخلص من عيوبنا..و اللي بيحاول يغير حاجة نقوله لأ مالكش دعوة و أرضي بواقعك
و لو اللي بتناقشه إتزنق..يقولك يا اخي انت ربنا كاتبلك تعيش في المجتمع ده..بتعترض علي قدرك؟
صباح التحوير..بس للاسف الشخص ده بيحور علي نفسه مش عليك
احنا ربنا خلقنا عشان نعبده و نعمر الأرض..و أكيد جزء من تعمير الأرض هو إنشاء مجتمع سليم
عشان نعيش صح زي ما ربنا خلقنا عشان نعيش
و هتلاقي في الأخر واحد ييجي يقولي..مش هنغير الكون..إرضي بالواقع
!مفيش فايدة
2 comments:
انا بعيش في لا لا لاند
انا من فنرة مش قليلة قررت اني اعمل هبلة :)
بعمل اللي انا عايزاه وبعمل اللي شايفاه صح ..بأثر وبتأثر دا اكيد
ماعنديش مسلمت غير الدين
ناس كتير بيشوفوا اني هقع على جدور رقبتي
لان خرجت عن الاعراف والمحفوظات والقوالب اللي بيحطها المجتمع
مادام انا شايفه اني صح يبقى مش مهم اي حاجة طالما مابأذيش حد
بالظبط هو ده اللي مفروض يحصل
الدين هو الحاجة الوحيدة المسلم بها
لكن باقي الحاجات في الحياة ماينفعش تبقي مسلمات الا فيما ندر
لكن غير كده كل واحد لازم يكون له طريقة حياة و تفكير و قواعد و قوانين خاصه به..لكن كل فرد الشراب تبقي شمال..ماينفعش :)
Post a Comment