ايه هي مواصفات المزة؟
سؤال يبان سهل لكن اجابته عميقة
المزة مش بلبسها
المزة بروحها
مش لازم تكون مواصفاتها الجسدية مواصفات عارضة أزياء
ده حتي عارضات الأزياء معصعصين و ماينفعوش يتقال عليهم مزز
خاصة ان مفيش ولد ممكن يحب عصاية مقشة
بس المزز مش هم اللي شاغلين دماغي
المدعين اللي بيحاولوا يعملوا نفسهم مزز هم اللي قارفينني
كعادة المجتمع العربي في اول الصيف معظم البنات بيكون عندهم وزن زايد
و بيكون عندهم هدوم الصيف اللي فات
فصباح التناسق بين واحدة مقاسها الفعلي زايد مقاسين او تلاتة عن اللي هي لابساه
بتبقي محشورة و المنظر بيثير القرف بصراحة
كان لي واحد صاحبي شاري بندقية اطفال من اللي بيتحط لهم كور خرز بدل الرصاص
و كان تخصص يطلع من الشباك و اي بنت من دول تعدي ينشن و طراااخ يصيب الهدف
طبعآ بعد ما الصيف خلص الولد اتجنن و بقي ينشن علي القطط..بس مش ده موضوعنا
الموضوع ان لازم البنات يفهموا اننا كأولاد بنحبهم بطبيعتهم
لو وزن زايد او ناقص مش دي المشكلة
المهم يكونوا طبيعيين و لابسين حاجات تناسبهم
قلة قليلة من الولاد هم اللي بيدوروا علي البنات حسب جسمهم و مدى تفتح لبسهم
و دول بيكون هدفهم انهم يبقوا مع بنت جميلة ملفته للكل
يعني بيحب جسمها مش هي نفسها
عشان كده و من هذا المنطلق بادعوا كل البنات اللي مايلي
البسي هدوم مقاسك
الدنيا حر فعلآ بس ده مش معناه ان الهدوم تكون مفتحة او قصيرة..انتي مش في البيت
و بلاش الحجج الهبلة بتاعة مفيش حد غريب و تامر ده زي اخويا مش هيبص لي..بلاش تشتغلي نفسك يا بنتي
الهدوم الضيقة هتحسسك بالخر اكتر فبلاش تتحججي بالحر و انتي لابساها..قلت لك بلاش تشتغلي نفسك
الابيض- الاسود-الاصفر-الاخضر-الاحمر هم الـ5 الوان المنتشرين الصيف ده..لو لبستي برتقالي او أزرق مش عيب برضه
إخترعوا حاجة اسمها جيب من سنين طويلة..ممكن تجربوا تلبسوها بدل الجينز اللي بوظ تكوينكم
نصيحة خاصة بالمحجبات
إرحمينا من الطرحة المخططة أبيض × اسودعارف انها حلوة..بس صدقيني اخترعوا اشكال غيرها
نصيحة أخيرة و هي إزاى تتعاملي مع حد بيعاكسك؟
ببساطة تعاملي معاه زي كلب ضال ماشي جانبك
لو جريتي هيجري وراكي..يعني مفيش داعي تسرعي في المشي
ينفع تكلمي كلب؟ يبقي ماينفعش تردي علي اللي بيعاكسك
اول ما تتعاكسي امشي مشية العسكري بخطي ثابتة و أضربي تكشيرة تبث الرعب في قلوب الأعداء
تجنبي انك تمشي في شوارع فاضية لان ده بيكون فرصة ذهبية لاي واحد انه يعاكس بدون ما يخاف من الناس
أجازة سعيدة..و لي عودة مع الولاد إن شاء الله
4 comments:
منطق الكلب الضال دا المنطق اللي انا ماشية بيه من زماااااان
انا اتخضيت لما لاقيتك كاتبه
بالذات انك ولد يعني :)
انا لا برد ولا ببص ولا كان في حاجة بتحصل حواليا بس يعلم الله اني ببقى ميتة جوا نفسي زي ما يكون فعلا معدي من جنبي كلب سعران جربان وبيبصلي :(
ما علينا
ضحكتني اوي نصايح اللبس بتاعتك :)
احنا عندنا في مصر مشكلتين
بتواجه نوعين من البنات ..نوع منهم محجبات ونوع منهم مش محجبات
الموضوع مش تعميم خالص
1- الغير محجبات
اللي مش مصدقة روحها يا عيني ومش مصدقة انه مش محجبة وعاملة في نفسها الللي ما يعمل ومنتهى الاحداااااااااااث والاوفرة في البس والقلع
والتحزيق
وفاكرة انها كل ما تقلع اكتر كل ما تبقى ارقى وكلاس وستايل اكتر
مش عارفه مين ضحك عليها وفهمها كدا
2- المحجبات
اللي صعبان عليهم انهم اتحجبوا
فتحس انها ماغيرتش لبسها وكل اللي حصل انها حاطت طرحة
انا احيانا بشوف بنات محجبات والله اتكسف البس محزق اوي كدا زييهم وانا مش محجبة
دا غير مهرجان الالوان
بتنزل لابسة كل الالوان سوا
عاملة حفلة او كرنفال
عايزة تكون ملفتة باي شكل
طيب يا امي ماهو الحجاب هدفه انك ماتكونيش ملفته
وانك تتخلصي من التعلق بالحاجات دي من جواكي
اخر حاجة بقى
كلمة مزة دي كلمة مهينة اوي
وبستغرب لما بنت تقول على نفسها انا مزة !
بجد بستغرب :S
عامة لو المقصود بيها الست المثيرة
او الجذابة
فالاثارة والجاذبية روح في الاساس
اكيد الشكل ليه عامل
بس بدون الروح مالوش لازمة وبيقلب لوح تلج
عجبني البوست دا ;)
كلمة مزة دي اعتقد انها اقل شمولية من انثي
المزة بيبقي جزء منها روح بس الجانب الاكتر شكل جذاب
الأنثي بتبقي روح و شكل جذاب و لبسها مابيكونش فج و طريقة كلام مميزة
اظن أخر أنثي قابلتها كانت الاميرة ياسمين في كارتون علاء الدين :)
بالنسبة للمشكلتين اللي عندنا في مصر..فعلآ عندك حق
الواحد بيشوف من النوعيتين دول بلاوى و حاجات ماتتلبسش اصلآ سواء لجرائتها بالنسبة لغير المحجبات او لالوان الطيف اللي فيها بالنسبة للمحجبات :D
بعيدا عن البوست نفسه والصيف و بلاويه واللى بيجرى فيه
بس بقالك 9 ايام مكتبتش حاجه جديده
وده شيئ غريب عحيب مريب
مستنين اخر ابداعاتك
متغيبش كتير
سر الكسل ده هو بطولة يورو 2008
يا اكتب يا اما اقعد اقرا الاخبار و اتفرج ع الماتشات :D
بس ان شاءالله راجع قريب لهوايتي المفضلة..الكتابة
Post a Comment