انا و إيناس في شرم الشيخ

إمبارح كان 1 إبريل

رغم إنني مش من هواة مقالب اليوم ده..بس من 3 أسابيع حسمت امري و قررت انني العب شوية

مقلبي الكبير بدأت تحضيره يوم 9 مارس اللي فات و هو اليوم الموافق لعيد المقالب في كرواتيا وطني الام

يمكن بعضكم يعرف معلومة انني مذيع في راديو شلة أحد محطات الراديو علي النت

المهم..الراديو له جروب علي الفيس بوك..و دي كانت مدخل المقلب

بدأت الخطوة الاولي في المقلب علي الفيس بوك و عملت الإيفينت التالي نصه

Sharm Elsheikh 1st Train Trip

أول قطار من أسوان لشرم الشيخ هينطلق خلال 3 أسابيع مع بداية الشهر الجديد
القطار يحتوي علي 10 عربيات فاخرةو بيبدأ من أسوان و بيتوقف في 5 محطات رئيسية
الرحلة هتستغرق حوالي 24 ساعة

مذيعين راديو شلة هيكونوا موجودين في القطر

و هنبث بث حي طول الرحلة و أكيد هنستضيفك لو انت معانا في الرحلة

التذاكر هتكون متوافرة في مكاتب السكك الحديد ابتداءآ من يوم 9 مارس 2009

من 9 مارس لحد إمبارح كان في 70 اكدوا انهم طالعين الرحلة

و 37 قالوا ان احتمال ييجوا

يعني الإجمالي 107 ضحية مصدقين ان شرم الشيخ بتتراح بالقطر

و طبعآ كنت متفق مع بدر و يوسف أدمينز الجروب معايا علي التفاصيل

عشان لو حد إستفسر

بس يبدو ان الرقم كان قليل و ما أرضاش غروري

فرفضت أستسلم لنهاية اليوم بدون مقلب أطلع فيه طاقاتي

دخلت علي الماسنجر الساعة 11:45 مساءآ

nicknameو كنت كاتب اساسيات المقلب الجديد في الـ

أعلنت خطوبتي..و ان ميعادها يوم 9 إبريل الجاى..و مانستش طبعآ اقول انني بحب حبيبتي

طبعآ في ناس كانوا فاهمين انها كدبة إبريل زي يوسف و نانسي

يوسف شارك معايا في المقلب

personal messageو كتب مبروك يا سلتو في الـ

و بكده الخبر ابتدا يبقي له مصادر

أول ضحية كانت أنغام..سألتني و اكدت لها الخبر

و هنا جه دور نانسي..ابتدت تقنع أنغام ان الموضوع بجد

و فعلا أنغام صدقت انني هخطب

personal messageو كتبت هي كمان في الـ

و بعد شوية قالت لي إن هبة و مها بيبلغوني تهانئهم

في الوقت ده كنت انا ابتديت اظبط علي الفيس بوك اللوكيشن اللي هعمل فيه الفيلم

اول حاجة..رحت معدل في البروفايل و قلت انني مخطوب

status غيرت الـ

و كتبت نفس اللي كنت كاتبه علي الماسنجر

كان ناقص حاجة واحدة و هي اهم حاجة

الـــعـــروســــة

رحت مخترع أكونت باسم إيناس عمر..خطيبتي الوهمية و عملت لها ادد و ابتدا الفيلم

بدون سابق تخطيط طلعنا انا و نانسي بفكرة الخناقة بينها و بين إيناس

دخلت نانسي تتريق علي الاسم

و ايناس ترد عليها و يشدوا مع بعض

و انا اتدخل..و اطلب من أنغام تتصرف

الاتنين بيتخانقوا علي الفيس بوك

أنغام تجاوبت و دخلت تهدي الموقف و تطلب منهم يهدوا شوية

بس أنا قررت اتخذ موقف..و قلت لنانسي انها مش لازم تحطني في موقف الإختيار و هي عارفة كويس قصدي

نانسي انفعلت..و قالت لي من غير ما تختار..نايس تو ميت يو انتوا الاتنين

و زيادة في الحبكة الدرامية..نانسي عملت لي ريموف علي الفيس بوك

قمت انا كاتب اهدي ايناس انني عملت ريموف لنانسي

و بكده نقلنا المعركة علي الماسنجر

أنغام محتاسة..ايه اللي بيحصل..ازاى اتخانق مع نانسي عشان ارضي إيناس

و طبعآ أنغام قررت تقول لي ان نية نانسي كانت الهزار و هي متأكدة من ده..بس إيناس قفشت

لكنني كنت متمسك برأيي و مصمم انني مش هسمح لحد يغلط في خطيبتي

و هنا أنغام قررت تكره إيناس..دخلت كلمتها بطريقة رسمية و قالت لها

Miss Omar

لكن يبدو ان إسلوب الكلام ماعجبش إيناس فردت و قالت لها

Miss/Mr Nagoum (sorry msh 3arfa a2ra el2esm)

و كان ده كافي جدآ علي انغام..دخلت انا رديت و قلت لها خلاص يا انغام خلينا في المهم

و برد فعل يضاهي سينما الستينات..دخلت انغام تقول سوري مش هقدر استمر و اشارك في المهم

أحمد المصري دخل فجأة و رذع الكومنت اللي كشف المقلب كله

و بالتالي إبتديت انزل بتتر النهاية..و دخل بعض اصدقائي علقوا و خلص فيلم الفيس بوك

كانت وقتها انغام استوت و توعدتنا - انا و نانسي - بالانتقام لو اكتشفت انه مقلب..و قامت تنام

يا تري المقلب خلص كده؟

لأ

إبتدا اصحابي يدخلوا علي الماسنجر يباركوا لي

و انهالت تهاني كتير و إستفسارات اكتر عن التفاصيل

كنت بستسلم مع بعضهم بعد 5 دقايق و اقول للشخص لا ده مقلب

لكن بعد بضعة اصدقاء مخدوعين..دخلت سـاره

و في ثواني راجعت مع نانسي السيناريو اللي ممكن نعمله

سـاره مش علي الفيس بوك..و بالتالي كان سهل خداعها بقصة الماسنجر

و ان انا و نانسي اتخانقنا و عملنا لبعض بلوك و ديليت

و اسباب بسيطة زي ان إيناس دي قليلة الادب و الذوق و شخصية غريبة الاطوار

مفيش دقيقتين و سـاره قالت لي ثواني هعمل حاجة مهمة

و بدأت تتكلم مع نانسي في الحكاية

كانت بتحاول إقناعها ان خناقتها مع خطيبتي إيناس مش مستاهلة اننا نخسر بعض كأصحاب

و طبعآ نانسي مصممة و رافضة تتناقش

و لكن ردود فعل سـاره خلتنا إحنا الاتنين ضميرنا يوجعنا

و قررنا بعد اقل من نص ساعة نقول لها انه كان مقلب و إنها الضحية الاخيرة للمقلب ده

بس ياتري سـاره كانت فعلآ هي الضحية الأخيرة؟

كنوع من التعاون أخويا أقنع بنت خالتي ان انا بحب إيناس و اننا مش مخطوبين

بس علاقتنا جدية لدرجة خلتني اقول اننا مخطوبين و ان دي مش كدبة إبريل ولا حاجة

دي كانت مجرد وسيلة مني للتعبير عن حبي لإيناس

و لحد اللحظة دي..بنت خالتي مقتنعة انني مرتبط بإيناس

كنت فاكر ان دي النهاية و ان النهاردة يوم جديد

لكن أثناء كتابتي للبوست ده..لقيت ألاء اونلاين

و قلت العب للمرة الاخيرة..لعبة سريعة

كلمتها و خلال اقل من دقيقة..ألاء كانت إقتنعت تمامآ

و زي معظم الناس رد فعلها كان يشوبه الاندهاش..باركت لي و خرجت اوفلاين

و مشفتهاش لحد دلوقتي عشان أقول لها ان دي كدبة إبريل

و دي كانت تجربتي البريئة الصغيرة اللي ضحكت فيها علي حوالي 120 شخص بس

و اتمني ما يكونش حد من الضحايا الحلوين زعل

حد عمل حاجة إمبارح؟

_____________________

فاصل غنائي

إمشي ورا كدبهم من تاني و روح لهم"

"بس ياريتك تلاقي الطيبة في قلبهم

ديانا حداد - أغنية إمشي ورا كدبهم

"عيل صغير عمل صوابعه كده هو مسدس و قال لصاحبه طريخ طراخ"

إيمان يونس - فيلم رشة جريئه

__________________

علي الهامش

واحد من اصحابي المقربين دخل علي الماسنجر و بيكلمني و تجاهل تمامآ اللي مكتوب
قلت له مش تباركلي؟
قال لي علي ايه..اشتغلت ولا خطبت؟
صرفت نظر عن غباء السؤال و سألته..انت شايف ايه مكتوب قدامك؟
قال لي اه..ما انا إستغربت برضه..و هو انت خطبت؟
حسيت بالغباء بيزيد..فقلت له لا..ده مقلب و كدبة إبريل
قال لي ما علينا..خلينا في المهم..الإرجنتين خسرت 6/1
و هنا يأست منه هو و مارادونا في يوم واحد

دار أيتام جوجل

زي ما إتعودنا من سنوات قليلة..بقي يوم الجمعة الاول من شهر إبريل هو يوم اليتيم

و السنة دي يوم اليتيم هيكون يوم الجمعة 3 إبريل إن شاء الله

حابب أتكلم هنا عن تجربة إيجابية عملتها شركة جوجل

زي ما عارفين شعار موقع جوجل بيتم تغييره مع كل عيد يخص البلد اللي بيمثلها

و بما ان عندنا من حوالي سنتين موقع جوجل مصر..فبقينا نشوف الخروف و الكحك في شعارات جوجل ايام اعياد الفطر و الاضحي

و السنة دي..جوجل قررت تساهم في يوم اليتيم

جمعوا 160 طفل من دور الايتام المختلفة و عملوا لهم مسابقة رسم تحت شعار

Doodle 4 Google Egypt

كل طفل يرسم شعار جوجل اللي يتحط علي موقع جوجل مصر يوم 2 إبريل الجاى

و اختاروا من رسومات الـ160 طفل 25 رسمة تتنافس في تصويت علي موقع جوجل مصر

و اللي هيدخل علي

www.google.com.eg

هيلاقي اللينك اللي بيدعو للتصويت

ده لينك الحدث

http://www.google.com.eg/intl/ar/doodle4google/index.html

و ده لينك صفحة التصويت

http://www.google.com/intl/ar_eg/doodle4google/vote.html

صوتوا للرسمة اللي تحبوا تشوفوها يوم 2 إبريل علي موقع جوجل

شد الفيشة

زهقت من الكتابة

عايز اقرا و اسمع شوية بدل ما اكتب و اتكلم

نلتقي بعد الفاصل اللي معرفش مدته إيه

أجمد 10 الساعة 8

(1)

أغنية فيلم "دكتور سليكون" اللي قام بغناءها عبد الله الكاتب

و هو بالمناسبة منتج و بطل الفيلم كمان

هي نموذج للإبتذال الأخلاقي اللي ممكن يلجأ له شخص عشان يلفت نظر الناس

عبد الله الكاتب بيقوم بدور دكتور السليكون اللي هيحقن مروي

و مش عارف ايه دخل نانسي عجرم في الموضوع..بس هو بيحاول يتسول دعاية علي حسابها

و بيقول انه وجه لها دعوة لحضور العرض الخاص و هي ماجتش

و بينفي كمان خبر ان نانسي عجرم زعلانة من الفيلم

نوعية الاخبار المتخلفة دي شيء طبيعي نسمعه عن فيلم اخراج احمد البدري و بطولة نيرمين الفقي

(2)

مفيش حاجة هتمنعني من مواصلة حملة "هيا بنا نفكس" طالما في عدد لا بأس به من الناس الفاكسين المحيطين بي

(3)

"و كلامها ده هز قلبه و فرحه..و نساه انها في الايام دي نسيته"

صدق اللي قال..يا مأمن لهم يا شارب من مرهم

(4)

اول ما إنتشر الفيس بوك كانت الموضة هي صور المايوهات

بعدين طلعت موضة صورة حملة حماية بتاعة صناع الحاجات

الموضة الجديدة علي الفيس بوك اليومين دول صورة الكاس

يعني الواحد يبقي واقف ماسك الكاس في ايد و السيجارة أو المزة او كلاهما في الايد التانية

تسأله ايه ده يا عم؟

يقول ريد بول طبعآ

و عينك حمرا و بتلمع من الريد بول؟

لا ده عشان أنا مطبق

مطبق؟ وماله

طبعآ مفيش داعي اسئله عن المزة اللي محضونة أحسن تطلع أخته في الرضاعة

(5)

حكمة أجمد 10: شد اللحاف علي وشك..غيره ما يفيدك

(6)

فلسفة أجمد 10: زمان قالوا لنا اللي يتلسع من الشوربة ينفخ في الزبادي

بس ولا حد فكر يقول لنا هنعمل ايه مع الشوربة بعد ما إتلسعنا منها؟

هنسيب الطبق و نجيب الزبادي و ننسي موضوع الشوربة

ولا نمسك الشوربة تاني بعد 5 دقايق و ندوقها..و إحنا و حظنا..يا نتلسع تاني يا نشربها

(7)

إذاعة موزاييك التونسية و دي إذاعة جامدة زي نجوم اف ام في تونس

إختارت الممثلة درة كأجمل امرأة تونسية لعام 2009 بمناسبة يوم المرأة

تعليق درة كان انها اتفاجئت خاصة ان تونس مليانة بنات جميلات

و انها تتمني ان الاختيار ده يكون لجمال روحها و شخصيتها مش جمال شكلها

طبعآ نجوم اف ام لو قررت تقلد الفكرة و يعملوا بنصيحة درة..هيتم إختيار كريمة مختار

علي اساس انها "حد جميل" و روحها حلوة في اللوكيشن

(8)

علي الفيس بوك و قبله هاى 5

الواحد كان بيشوف حاجات صادمة..بروفايلات لبنات عرب متصورين صور فاضحة

لي واحد صاحبي عنده هواية العثور علي البروفايلات دي و التبليغ عنها

و بيسميهم زي ما معظمنا بيسميهم..بروفايلات مضروبة

بس السؤال..البنات دول إتصوروا الصور دي إزاى؟

و الصور دي إزاى برضه وصلت علي النت و شخص تعبان نفسيآ عمل بها بروفايل مضروب؟

(9)

الشيء بالشيء يذكر..شكل الفيس بوك الجديد متخلف جدآ

و واضح ان ماتمش إختباره قبل طرحه لانه مليان عيوب تقنية

و ده غير إنه بيفتقد لابسط قاعدة اساسية في تصميم المواقع

friendly user interface

يعني يكون شكله يشد و استخدامه سهل

و لحد النهاردة لا حبيت الشكل..ولا عارف اتعامل مع الاعطال

(10)

و انا بكتب الفيلم الهابط بتاعي..كنت فاكر انني بطرح قصة عجيبة شفتها

بس إكتشفت انها عادية جدآ مقارنة بالقصص اللي قريتها في الردود

يعرض حاليآ : الحب الذي فقس

(1)

سهي : خليك جنبه يا مدحت..كان نفسي انا اللي اكون جانبه..بس هو مش عايزني جانبه دلوقتي
هو إنسان كويس أوى..حاول تكسبه كصديق و تساعده يعدي محنته
و أرجوك..طمنني عليه

و ياريت مايعرفش انني طلبت منك كده

مدحت : ماتخافيش..هلزق له من غير ما يعرف انك زقاني

(2)

سهي: اهو طلع من محنته..حاولت أقوله نرجع تاني

بس طلع أقسي من ما كنت أتصور يا مدحت

تخيل وصل بي الحال كل يوم الصبح أبعت له إيميل في ميعاد صحيانه و اقوله انا بحبك

إسبوعين علي الحال ده..و لما لقيت انه مابيردش

بعت له إيميل تاني..و قعدت أتأسف له..بس هو تجاهل كل كلامي

عارف قال لي ايه؟

مدحت: قالك ايه يا أختي؟

سهي: قال لي بتتكلمي عن ايه؟ انتي ماعملتيش حاجة عشان تتأسفي..خدي بالك من نفسك و بلاش نفتح السيرة دي تاني..متخيل؟

مدحت: لا مش متخيل بصراحة..بس واضح انه بيحبك

سهي: بيحبني؟ بجد؟ هو قال لك؟

مدحت: جري ايه؟ لا ماقاليش..بس مش قالك خدي بالك من نفسك؟ يبقي بيحبك

سهي: حسبي الله و نعم الوكيل فيك يا مدحت..غور من وشي

(3)

سهي: علي فكرة انا خايفة يكون بيهمل في حياته..ارجوكم راقبوه و خلوه تحت عينيكم

صديقاتها: ماتخافيش..هنكلمه و نحاول نصحصحه كل ما نحس انه هيهمل في نفسه

صديقة 1: اول امبارح كنت شايفاه و دقنه مش محلوقة..يبقي بيهمل؟

صديقة 2: لا يا غبية..يهمل يعني مايعملش الواجب

صديقة 1: خلاص هقوله يبطل مايعملش الواجب و مايهملش..فاهماها..مايهملش و مايعملش..نفس الوزن

صديقة 2: هيهيهيهي..جامدة دي

سهي و دمعة نازلة علي خدها: حتي صديقاتي الانتيم مش حاسين بمعاناتي..إهي إهي

صديقة 2: خلاص انا اسفة يا روحي كنت بهزر معاكي

صديقة 1: إمسكي المنديل ده و نفي..مناخيرك سايحة

فجأة تشتغل موسيقي راقصة و يقوم الاتنين يشدوا سهي و يرقصوا رقصة جماعية لمدة 5 دقايق وسط تجمهر الناس حواليهم في دايرة و تصقيف

(4)

سهي: انا مسافرة الشهر الجاى..مش عايزاه يعرف ده
هو كان معارض لسفري من اول يوم إتكلمنا في الموضوع
هو في اكتر من انني اقول له نتجوز و نسافر سوا؟
ده انا اللي بعرض عليه الجواز..بس هو بيقولي ان طموحه هنا..في مصر و انه يكمل مشواره
و بقي كل ما يقابلني يتجاهلني..ده بقي بيذلني مش بس بيتجاهلني
انا قدام اصحابه قلت له انت ليه بتتجاهلني كإنك ماتعرفنيش؟

واضح انه اتغير بعد اللي حصل له..بس ارجوكم..مش عايزاه ييجي حفلة التوديع

مدحت: ماشي..ماتقلقيش..إحنا اًصلآ مش عاملين حسابه في الجاتوه

صديقة 1: انت دفعت الـ18 جنيه بتوع الجاتوه لوحدك؟

مدحت بصوت واطي: بس يا هبلة ماتسيحيش قدامها

صديقة 1: ما انت لازم تقولي جبتهم منين

مدحت: طبقتهم من شنطتها و هي بتتكلم في التليفون

صديقة2: يا ندل..طب انا هاتوهها و انت شوف لي صباع روج ولا اي لاينر

سهي: انتم بتتوشوشوا تقولوا ايه؟

مدحت: ولا حاجة..ده احنا بنتكلم عن قد ايه هتوحشينا

فجاة تشتغل أغنية و تقوم سهي لترقص بينما يغني مدحت و تنظر الصديقة بغيرة بدون مانفهم سبب

(5)

لقطات متتالية لمدحت جالسآ في احد مقاهي الانترنت و امامه شاشة هلامية لملف وورد مكتوب فيه

You've got mail

لكي يفهم المشاهدون انه يقرأ رسالة

إيميل 1: انا عايشة في بيت عيلة هندية..هاعمل الماجيستير و أرجع مصر

إيميل 2: انا مقدرتش أقابلك الاجازة اللي فاتت زي ما وعدتك..أصلي إتخطبت لما نزلت..و علي فكرة خطيبي عايزني أرجع مصر

إيميل 3: أنا فسخت خطوبتي..و رجعت تاني أعيش بره..بس جالي شغل في مدينة غير اللي انا عايشة فيها

إيميل 4: انا إستقلت من الشغل..جالي عرض أحسن في دبي

كفاية انني هرجع أتكلم عربي من تاني..ماتعرفش الدرهم يعمل كام اليومين دول؟

(6)

صديقة 1: خير يا مدحت..طلبت تشوفني ليه؟

مدحت: سهي جننتني

صديقة1: مش فاهمة..مالها سهي؟

مدحت: انتي عارفة قصة الحب اللي كان بينها هي و

صديقة 1 مقاطعة: ايوه عارفة..انت ناسي انها كانت بتحكي لي كل حاجة؟

مدحت: هي كانت بتحكي لي كل ده برضه..حبينا بعض شوية
بس شكلها حبتني مكافأة عشان إهتميت باللي هي حبته و سابها
رحت سألته و حكيت له..حكالي عن واحدة تانية غير اللي عرفتها
مازعلتش منه ولا منها
هو كويس انه تجاهل فكرة انني حبيت اللي كانت في يوم حبيبته..و هي كانت بتحبه هو و كانت فاكرة انني اللي هوصلها له

بعد خطوبتها ما اتفسخت فرحت..قلت لها مستنيكي في مصر

بس بقي لي 3 سنين مستني..و حتي و انا رايح أقضي الأجازة في دبي هيبقي عندي أمل اقابلها هناك

صديقة1: مدحت..أرجوك طلع سهي من دماغك..حس بي..انا بحبك

مدحت: بتحبيني انا؟ و حياة ابوكي؟

صديقة1: ايوه بحبك..بحبك

فجاة تشتغل موسيقي و اغنية و يقوم مدحت بالغناء بينما هي ترقص..و يلتف حولهم الناس في دايرة

بينما نري سهي تفتح باب الكافيه و تدخل شايلة شنطتها و علي خدها دموع الندم

الـنــهــايـــة

تم التصوير بتقنيات فوتوشوب لتحسين صورة المواقف الفاكسة

تم الطبع و التحميض في البلكونة..سبنا الفيلم يحمض يومين و قررنا ننزله

جميع أبطال هذه القصة من الواقع..و يولعوا مالهمش حقوق عندنا

مع تحيات

المؤلف و المنتج و المخرج و الدكتور اللي هيقيس الضغط

يعرض قريبآ : الحب الذي فقس

في تاني أفلام مقاولاتكو فيديو فيلم

و عودة لأمجاد السينما الهابطة

يعرض قريبآ بجميع دور العرض الفيلم الهابط

"الحب الذي فقس"

و هو يعرض ضمن حملة "هيا بنا نفكس" التي ترعاها الشركة

و توفيرآ علي السادة الصحفيين الفضوليين نصدر لكم هذا البيان

الفيلم مستوحي من قصة رومانسية واقعية هتخليكم تعيطوا بشدة

اسم الفيلم الاصلي كان "الحب الذي فكس" ..و لكن رأى المخرج ان الاسم الجديد جذاب اكتر

ينصح بتوخي الحذر لمرضي الضغط و الكوليسترول من المشاهدين

يوجد علي مدخل كل قاعة سينما باعة مناديل..الكيس بخمسة و سبعين قرش..نص للصبي و الربع للسينما

محدش يرمي المناديل علي الارض حرصآ علي السينما النظيفة

الفيلم إستغلال سافر و وقح لنجاح سلسلة هو و هي في رمضان اللي فات

الفيلم فيه تأثر شديد بروائع أحمد البدري و أكرم فريد

حرصنا علي ان يكون الفيلم به إستخدام الابطال لجميع وسائل التكنولوجيا لكي ننافس السينما في بولندا و النرويج التي يمتلك ابطال افلامها موبايل بوليفونيك

الفيلم حائز علي لعنات و سباب جميع أعضاء لجان تحكيم المهرجانات اللي اتعرض فيها

الشركة مازالت تبحث عن فتيات موهوبات للقيام بأدوار إغراء تعيد أمجاد هند رستم ضمن مشروعنا للهبوط بالسينما

الحـب الأخـضـر

يعني ايه حب أخضر؟

يعني حب صحي

و يعني ايه حب صحي؟
يعني الحب السليم في القلب السليم

دول 7 نصائح من وجهة نظري هم الاهم للحصول علي حب أخضر

(1)

حب نضيف

دي نصيحة للشاب اكتر منها للبنت

حبوا بعض علي نضافة..بمعني أدق حافظ عليها

الحب المفروض يكون دافع منك لانك تحاول تخلي البنت دي نقية

إحترمها لإنك مش ضامن انها تكون من نصيبك في اخر المشوار

فبلاش نظرية دي بتاعتي و هي قابلة و انا عايز

النضافة اهم شيء

بحس ببلاهة شديدة لما اسمع بنت تقول اصلي كنت واحشاه..و كنا بنتمشي علي البحر ساعة الغروب..فمحبيتش ابوظ رومانسية الليلة

الغريب انها مش بوسي في حبيبي دائمآ..بس عايشة الفيلم

(2)

حب فريش

ساعات كتير الحب بيحمض بسبب تكاثر البكتيريا عليه

البتكيريا بتتمثل في ظروف و مشاكل كتير و ناس محيطين

الطرفين لما بيقربوا من بعض اكتر بيكتشفوا انهم مش قادرين علي التفاهم ولا الوصول لنقطة الوسط

كل طرف دماغه رايحة في إتجاه و مع ذلك بيعندوا و يصمموا يكملوا

لحد ما الحب يحمض..يبقي غير صالح للإستهلاك الادمي

و مستحيل يتحول لإرتباط رسمى في الاخر

يبقي لازم الحب يكون محتفظ بنضارته عشان يكون صحي نفسيآ و عقليآ للطرفين

(3)

حب سلم مش ثعبان

يعني في حب يطلعك لفوق..و حب يجيبك الارض
حب يكون دافع لك انك تشق الصخور و تهد الجبال و كل الكلام الكبير ده

و حب يخليك مش قادر تجيب حاجة من السوبرماركت اللي جنب بيتك
الحب لازم يكون مصدر قوة و إلهام للانسان انه يكون عايش حياته بإيجابية حتي لو الدنيا ضلمة

لكن الحب لما يبقي عائق ذهني و يقيد الطرفين او حتي طرف منهم..يبقي مفيش فايدة منه

(4)

الحب مش تنقية طماطم

يعني بلاش جو عمرو طيب و لذيذ و جدع و بيفهمني..بس ده مابيحبش يروح مارينا في الصيف

الانسان عمره ما هيلاقي الشخص اللي بيدور عليه او بيحلم به

و حتي لو اتهيأ له ان الشخص ده هو اللي حبه..مع الوقت هيكتشف بعض الاختلافات بينه و بين اللي بيحلم به

و طول ما الإختلافات دي مش في الاساسيات الاخلاقية او الفكرية يبقي هي إختلافات مقبولة و طبيعية

و برضه الحب مش تنقية طماطم..يعني تلاقي شخص مش مرتبط يعمل قائمة بالبنات اللي يعرفهم و ممكن يجرب يرتبط بيهم

سلمي فاضية و مش مكلكعة

بسنت فاضية بس اخوها رخم

إنجي برضه مفركشة من شهر و نص ممكن استني عليها شوية

مريم فاضية بس خنيقة ومالهاش لازمة

ليلي صاحبة منة شغالة برضه..ابقي اسأل منة ايه نظامها

و بالمرة منة لو مانفعش كل دول..متهيألي دايسة

و نفس الوضع للبنات..قائمة العرسان المثاليين اللي تحاول تلفت انتباههم

أشرف غني و شغله بيكسبه كويس و اظن انه جاهز دلوقتي

لو أشرف مجاش معاه نتيجة يبقي كريم موجود برضه ييجي منه

بس لو كريم مجاش ابعد عن ولاد الشلة دي عشان منظري قدامهم

و اشوف هادي ايه نظامه بعد ما ساب نهي

و لو ده كمان مانفعش أبقي أبطل تقل علي طارق زميلي في الشغل..مش وحش برضه

ماينفعش الكلام ده..دي مش تنقية طماطم ولا شروة جزر
كون ان انسان يرتبط بشخص بالطريقة دى غلط

يعني نفرض ان صاحبنا ده إرتبط بإنجي..هل هو إرتبط بها لانه بيحبها و ولا عشان سلمي و بسنت نفضوا له؟

طيب لو سلمي رجعت حطته في قايمتها..ينفض لإنجي ولا هيفضل معاها؟

(5)

الحب مش لعبة شطرنج

في ناس كتير اول ما يصارحوا بعض بمشاعرهم يبدأوا اللعبة دي

تيجي له شمال ييجي لها يمين

يقول لها جملة في موقف..تقعد 4 ساعات مع صاحبتها يحطوا خطة هترد علي الموقف ده إزاى؟

و زيهم 4 ساعات قبل ما تنام تفكر هتحطه في مواقف تشل تفكيره إزاى

في ناس بعد ما يصارحوا بعض بمشاعرهم بينسوا إنهم بيحبوا بعض..و بيبدأوا مرحلة الندية في العلاقة

(6)

الحب مش مسرح الهناجر

في ناس بيقولوا كلام عشان مجرد هو الرد التقليدي لكلام حفظوه كل البشر

واحدة حبيبها يقول لها كلمة..ترد عليه رد سمعته في مسلسل تمانية و ربع

و بتسمعه في كل الافلام

كتر المواقف دي بيحول الموضوع كله لمشاعر مصطنعة

حتي لو كان الحب صادق من القلب

بس هم مابيحاولوش يعبروا عن مشاعرهم بطريقتهم و اسلوبهم

طريقتهم و اسلوبهم اللي هم السبب الرئيسي انهم حبوا بعض

(7)

الحب وسيلة مش غاية

الحب هو طريق مهما طال او قصر نهايته الطبيعية الجواز

أصل ايه اللي يخلي اتنين يحبوا بعض و هم مش ناويين يرتبطوا ببعض؟

أكيد ظروف الحياة بتجبر ناس كتير علي الحب للحب نظرآ لإن إكتشاف حياة علي المريخ بقي أسهل من الجواز دلوقتي

و الحقيقة مهما اختلفت مع النظرية مقدرش الوم اللي بيتبعوها نظرآ لإنني ما املكش طرح الحل البديل

بس وقتها الحب ده هيكون مش مطابق لمواصفات الحب الاخضر الصحي اللي بنتكلم عليه

الحب الاخضر الصحي..هو اللي بينتهي بأغنية الفستان الابيض لمحمود العسيلي

!مجرد أسئلة غبية أخري

المجموعة الاولي: أسئلة قصيرة إجابتها طويلة

س1: مين أحسن شاعر غنائي؟

بهاء الدين محمد - أيمن بهجت قمر - هاني عبد الكريم - شخص أخر

س2: مين أحسن مطرب في لبنان؟

فضل شاكر-وائل كفوري-راغب علامة - شخص أخر

س3: إيه أحسن ستوديو تحليل كروي؟

بتاع مدحت شلبي - بتاع خالد الغندور - بتاع خالد توحيد - شخص أخر

س4: مين أحسن مهاجم جنب فلافيو؟

أحمد بلال - أسامة حسني - هاني العجيزي - شخص أخر

س5: مين يحرس مرمي منتخب مصر بعد الحضري؟

عبدالواحد السيد - أمير عبد الحميد - شريف إكرامي - شخص أخر

س6: مين اسوأ بطلة سنيمائية قديمة؟

إلهام شاهين - نادية الجندي - نبيلة عبيد - شخص أخر

س7: مين اسوأ بطلة سنيمائية حالية؟

نيللي كريم - داليا البحيري - علا غانم - شخص أخر

المجموعة التانية: أسئلة طويلة و هبلة

س8: ليه كل الممثلين اللي اخدوا فرصة البطولة و النجومية في أفلام يوسف شاهين الاخيرة بقوا فاشلين؟

مابيعرفوش يمثلوا اصلآ -

المتفرجين حمير و مش بيقدروهم -

هم متعمدين يفشلوا عشان يخزوا العين -

سبب أخر -

س9: ليه كل الصحف بتكتب خبر ان الممثلة المعتزلة بتعمل مسلسل و هي معتزلة؟

تمويه عشان تصدم المتفرجين -

جهل من الصحفي اللي بيكتب الخبر -

عشان العدد الجاى تقول انا اتحجبت بس لسه ما اعتزلتش -

سبب أخر -

س 10: ليه أجر الممثلة المعتزلة اللي بتعمل مسلسل و هي معتزلة أعلي من أجرها قبل ما تعتزل؟

فرق فلوس الكوافير -

عشان المنتج فاكرها هتتبرع بالفلوس للمستشفيات -

عشان هي معتزلة و لازمها قرشين تتسند عليهم -

سبب أخر -

س11: ليه مذيعات برامج الاطفال زمان كانوا بيسموا نفسهم "ماما"؟

اتحرموا من الانجاب و بيعوضوا -

الام هي اللي قدمت برامج و حكت حودايت مش اللي خلفت -

عشان الاطفال بيسمعوا كلام ماما و كده هيسمعوا كلام المذيعة -

سبب أخر -

س12: ليه النقاد بيشتموا هيفاء وهبي و مابيعبروش سمية الخشاب؟

سمية بتعمل افلام ساعتين تثبت فيهم مواهبها كلها و هيفاء كليباتها 5 دقايق -

عشان عري سمية تمثيل..لكن عري هيفاء بجد -

عشان الناس بيشوفوا سمية بفلوس لكن هيفاء تتشاف ببلاش..رخيصة -

سبب أخر -

س 13: ليه النقاد بينتقدوا فستان هيفاء وهبي و مابيعبروش فستان إليسا؟

خلافات شخصية مع مصمم أزياء هيفاء -

أصل النقاد بيسرحوا مع صوت إليسا و مابياخدوش بالهم من الفستان -

إليسا لسه صغيرة و حقها تعيش سنها و تلبس اللي هي عايزاه..لكن هيفاء كبيرة -

سبب أخر -

س14: ليه الصحف عندنا لما تيجي تكتب عن فنان أجنبي و صاحبته يقولوا "فلان و زوجته" او "فلان و خطيبته"؟

عشان مايفتحوش عنين الفنانين بتوعنا ع الحاجات الوحشة دي -

عشان يستروا علي البنت بدل ما اهلها يعرفوا انهم عايشين في الحرام -

عشان دي خصوصيات ناس و ماتهمش القاريء اللي هنا -

سبب أخر -

أجمد 10 الساعة 7

(1)

خيال المأتة..كائن إخترعه المزارعين في القري عشان يبعدوا الغربان عن الارض

و هي دي عبقرية الراجل البسيط عديم التعليم

و في المدينة الكبيرة خيال المأتة هو كائن إخترعوه المثقفين و نصبوه كبير لهم..و خلوه يشعر و يألف ويعمل ندوات و كتب

و لما عجز و كبر خلوه رمز للثقافة في البلد..و هو ده غباء الراجل المتعلم

(2)

عايدة الايوبي رجعت من تاني

هتكون في حوار مباشر علي "رحاب اف ام" في برنامج تمانينات تسعينات

يوم 10 مارس الساعة 9 مساءآ إن شاء الله

(3)

من كتر ما بقي في ناس بيحشروا كلام انجليزي في كلامهم حتي لو مالهمش فيه

بقيت لا استبعد انني في يوم الاقي واحد بيتخانق مع صاحبه و بيقول له

And what's your family's money, You cold animal!

(4)

البنت اللي العسيلي كان بيغني عنها في اغنية "مش زي الافلام" بتمثل شريحة كبيرة من البنات الجداد بتوع اليومين دول

و علي فكرة..قبل ما حد يطلع يقول لي كلمتين..اللي كاتبه الاغنية بنت

(5)

الولد اللي العسيلي كان بيغني عنه في أغنية "مش زي الأفلام" بيمثل شريحة كبيرة من الولاد بتوع اليومين دول و اليومين اللي فاتوا..و علي ما يبدو اليومين الجايين كمان

(6)

حكمة أجمد 10: ما أفكس من سيدي إلا ستي

(7)

فلسفة أجمد 10: الجمال الحقيقي يكمن في الداخل

جمال الروح مش جملة بدون معني

و إلا ماكنتش مني زكي هي فتاة أحلام الشباب الاولي

(8)

نصيحة لأي واحد عايز يخس..اوعي تلبس قمصانك بعد ما تخس

لانك هتبقي عايم جواهم

و النصيحة الاهم..بعد ما تخس

لو كنت لسه راكب دماغك و لابس قميص..اوعي تسمع كلام واحد يقولك تعالي نتصور

(9)

في أزمة حسام غالي لاعب النصر السعودي اللي قرر يخرج مع مراته في احد مولات مدينة الرياض و رجال الامر بالمعروف و النهي عن المنكر مسكوهم و اخدوهم علي مكتب الهيئة

الجرايد السعودية قالت ان رواد المول كانوا مستائين من المنظر لانها كانت غير محجبة

و صاحبي اللي كان في المول قال ان اللي حصل انهم تجمهروا حواليهم بطريقة كانت اشبه بتحرش جماعي بدون لمس

(10)

و أتاري الدنيا مش حلوة كلها...مش زي الأفلام اللي انا بحب أخشها

بجد..مش زي الأفلام

ساعات بنمر بمواقف بنبقي محتاجين فيها لشخص معين دونآ عن باقي اللي نعرفهم

مش عشان يساعدنا ولا حتي يتدخل..مجرد عشان يشوف اللحظة دي بعينه

لانه هيحسها زي ما هنحسها و شايفينها

لان مهما هنحاول نحكيها و نوصفها له بعد كده...مش هنعرف

و هو الشخص الوحيد اللي هيبقي عارف اللحظة دي بتعني لنا إيه

سواء كان موقف حزين..سعيد..محرج..مقلب شرير

المهم إحساسنا بالإحتياج لوجود الشخص ده بيكون مسيطر علي 50% من عقلنا اثناء حدوث اللحظة

و الـ100% التانيين بيكونوا حاضرين في الموقف نفسه

ايوه..في اللحظات دي مخنا بيكون شغال 150% من طاقته

الناس دول هم الاصحاب اللي بجد

هم اللي بيكونوا وقت ما تحتاجهم عين تشوفلك اللي مش شايفه...عقل يفكر لك لما تفكيرك يتعبك

هم الناس اللي كلامهم طالع من قلبهم..لان قلبهم بيكون علينا

هم طعم الحياة

هم الناس اللي أبسط حاجة حلوة في حياتنا..بتبقي حلوة جدآ بالنسبة لهم

هم الناس اللي بيحبوا هبلنا و هياسنا..و كمان جدنا

هم اللي بيخلوك تحلم و تطير لفوق أوى..و انت متطمن ان لو في يوم وقعت من فوق..هيلقطوك قبل ما تلمس الارض

و هم الناس اللي هيفوقوك ويقولوا لك "انت بتضحك علي نفسك" وقت ماتكون بتضر نفسك

و هم اللي وقت ما تكون متضايق مش بيسيبوك و بيحاولوا يكونوا جنبك بأى طريقة و تمن..مهما قاومت انت محاولات الإنقاذ دي

و هم اكتر ناس مش بتفكر تشكرهم..لانهم بيبقوا دايمآ اكتر ناس مش عايزينك تشكرهم

و العلاقة و المشاعر دي كلها بتكون هي نفسها من ناحيتك تجاههم

اللي بيقابل الناس دول في حياته بيكون ربنا راضي عنه

لإن الأصحاب اللي بجد..قليلين أوى