ان تكون ميزو

منذ طفولتي ماشفتش بني ادم اسمه معتز و طقته 5 دقايق علي بعض

كل اللي عرفتهم بالاسم ده كانوا في منتهي السماجة و اللذاجة ولا يطاقوا

حسيت ان أحمد حلمي بيفش غلي و هو كل 5 دقايق يطلع في الإعلان بتاع فيلم ظرف طارق يقول "يا ابن الكلب يا معتز" مرتين مش مرة واحدة

بقي لي يومين بعصر دماغي قبل ما اكتب البوست دي...يمكن اكون قابلت بني ادم اسمه معتز و يكون انسان لطيف

بس مفيش فعلا

كنت كل ما اشوف واحد منهم ايام عرض الفيلم اكتفي بسؤال واحد

"شفت الفيلم يا معتز؟"

..سواء قال اه او لا

بابتسم و اقوله مشفتوش بس الإعلان عجبني

و بدون سبب الاقي واحد من القاعدين يقول لهذا المعتز الجملة بتاعة حلمى كإنه قرا افكاري

ياتري هل في علاقة بين اسم الانسان و كونه سخيف؟

علي العموم عزيزي القاريء لو كنت صديق لي و اسمك معتز فدي مشكلتك انك سمج و لو كنت غريب فتأكد انك غير مقصود بالجملة و تقبل اسفي مش عشان الشتيمة لكن عشان انت اسمك معتز

فص زمرد..أغنية فيلم صياد اليمام

كتير من اصحابي سألوني بعد ما قروا البوست اللي فاتت عن إعلان فيلم صياد اليمام و قالوا لي انهم ماشفوش الاغنية
ادي الفيديو اهو..مشاهدة طيبة بقي

صياد اليمام..قبل العرض

فيلم صياد اليمام هيعرض قريبآ ان شاءالله

أغنية الفيلم نزلت علي قنوات الأفلام

و الاغنية مبشرة بنوعية الفيلم اللي حاسس ان أشرف عبدالباقي هيتألق فيه

الفيلم فيه أشرف عبدالباقي و صلاح عبدالله و طلعت زكريا و لطفي لبيب و أحمد كمال و حنان مطاوع و علا غانم و بسمة و دنيا

و من الاغنية اللي غنتها نيهال نبيل و كتبتها كوثر مصطفي و لحنها و وزعها أشرف محروس حسيت ان الفيلم ده فيه كمية لعب علي المشاعر الإنسانية هتخلينا نشوف ماتشات تمثيل

من عادتي ما احكمش علي فيلم قبل ما اشوفه

بس أشرف عبدالباقي بالنسبة لي حالة خاصة..الناس تحط صورة هيفاء وهبي ولا ديفيد بيكهام علي الموبايل..بس انا حاطط صورة لأشرف عبدالباقي

الصورة دي هي الصورة اللي فوق في اول البوست

دي جزء من المشهد الأخير من فيلم "خالي من الكولسترول" اللي أشرف لعب بطولته من سنتين

بالنسبة لي أشرف في المشهد ده قدم إستعراض هايل لمهاراته كفنان كوميدي بدون إبتذال ولا افيهات خارجة

في رأيي أشرف عبدالباقي هو الوحيد في جيله اللي يقدر يقدم كوميدي و تراجيدي بنفس البراعة

لو اتقدم له عمل فني مخدوم زي اللي بيتقدموا لهنيدي و سعد هتشوفوا أشرف يقدر يعمل ايه

صياد اليمام من اغنيته شكله مبشر..يا خوفي تطلع الاغنية خادعة

علي العموم لي عودة برأيي في الفيلم بعد ما اشوفه ان شاءالله

و أسيبكم مع المشهد اللي بتكلم عنه

http://www.youtube.com/watch?v=HZDQrUJNHl4

عندما تحدثت حنان

عندما لا أستطيع امتلاك الدنيا و ما فيها... اكتشف,, أنني أملك ورقة و قلم.. و أحلام

دي مش جملة لمفكر فرنساوى و لا فيلسوف إغريقي

دي تعريف مدونة صديقتي حنان اللي إنضمت النهاردة لعالم البلوجرز

بصرف النظر عن كون حنان بتصنف نفسها كبني أدمه رغاية اكتر من مذيعات القناة الاولي إلا إنها مفكرة عبقرية ولا انكر انها فقعتني الاسبوع ده نظريتين في منتهي الأهمية

منهم الجملة المكتوبة في اول الكلام..و هي جملة دراماتيكية اوى فيها رومانسية واقعية أستفزتني اكتب البوست دي

نظرية حنان التانية كانت في منتهي الغرابة لما سمعتها و بفكر فيها بقي لي 4 ايام..نظرية الدائرة

يعني ايه ؟

حنان كانت مصدومة و زعلانة انني ماسلمتش علي صديقي احمد اللي كتبت عنه البوست قبل اللي فاتت

نظرية الدايرة بتتلخص في ان لو كل واحد عمل شيء إيجابي لشخص تاني..هيخلي الشخص التاني يعمل شيء إيجابي لشخص تالت..و التالت يعملها للرابع..لحد ما الدايرة توسع و نحسن المجتمع

علي سبيل المثال..لو واحد فينا شاف شخص ماشفوش من فترة و سلم عليه هيخلي الشخص ده يحس بالسعادة ان في حد افتكره و هو يفكر في انه هو كمان يسعد الاخرين بإنه يسلم علي اللي بيشوفهم و مايفكرش في حتة "ياتري هيكون فاكرني" و هكذا توسع الدايرة

يمكن النظرية مثالية جدآ بما ان حنان هربانة من يوتوبيا و ماتعرفش الحقيقة المرة عن سكان كوكب الارض

بس النهاردة سمعت من أحد اصدقائي نظرية بتقول..لما تحس ان في حد باصصلك اعرف ان هو كمان حاسس انك باصص له

بما يدل انني لما قابلت احمد ممكن كان هو كمان بيفكر يسلم عليا و بالتالي فكرة الدايرة ممكن تنجح

علي العموم حنان يومها اتكلمت بإستفاضة في نظريتها لدرجة خلتني اقتنع انني لازم اسلم علي احمد يوم الجمعة الجاية ان شاءالله

بس يؤسفني اقول لحنان و اي حد فاكرني مواطن يوتوبي لدرجة انني اطبق النظرية دي

انني بابقي ماشي في الشارع و خلقي ضيق من الزحمة و الناس اللي بيتمشوا ع الرصيف زي النمل

و بالتالي أحب اصدمكم فيا و اقولكم انني شفت المزة الجامدة اللي كانت قاعدة دايمآ جانبي في اخر تيرم لي في الكلية

و كانت الساعة 2 و نص بالليل و عربيتها عطلانة و فضلت متنحة لي و انا معدي جنبها

بس انا من اول ما لمحتها قلت مش هروح اسلم عليها حتي لو فضلت متنحة

ليه عملت كده؟ دي حكاية طويلة

سوري يا حنان..لا املك سوي انني اوعدك بإنني اسلم علي احمد بس..لكن لو شفت عمرو و هو الولد التالت اللي كان بييجي يصلي معانا و يقف ساعات مش هسلم عليه..لانه كان صاحب محمد إبراهيم و انا مابحبش محمد إبراهيم

و مين محمد إبراهيم؟

مالكمش دعوة

مش مجرد أغنية

ابقي كداب لو قلت مرة انني نسيت ايام زمان

مهما ان كان مش هنسي اصحابي القدام

الايام بتعدي و الحياة بتستمر

دلوقتي بس عرفت ان انا كبرت

من اغنية ليه تشكي - mTm

و معنديش كلام اضيفه هم قاموا بالواجب

بعد صلاة الجمعة

بعد صلاة الجمعة و انا بسلم في اخر ركعة بصيت و شفته

ده أحمد..لسه زي ما هو

ماشفتوش من زمان

كان معايا في إبتدائي..نفس الفصل و نفس اتوبيس المدرسة

كان أطيب ولد شفته في المدرسة و كنا نفس مستوي الشطارة

ماكناش اصحاب اوى -انا اصلا ماكنش لي اصحاب و انا صغير- بس كنا بنقف نتكلم شوية كل ما نتقابل

المهم..كنت بشوف احمد كل يوم جمعة في الصلاة و كنت بسلم عليه

حتي لما دخلنا اعدادي و كل واحد راح فصل بقينا نتقابل يوم الجمعة و اسلم عليه

صدفة غريبة انني الاقيه كل يوم جمعة بيصلي جانبي

لما دخلنا ثانوي إختفي احمد..او اختفيت انا لانني رحت اصلي في جامع تاني جنب البيت برضه

المهم بعد 7 سنين ماشفتوش بيصلي فيهم قابلت احمد النهاردة في صلاة الجمعة

بس ماسلمناش علي بعض

لكن فضل في بالي طول الوقت و انا مروح

و رجعتلي ذكريات طفولة كتير خلتني اكتب عن أحمد

بدل طبيعة عمل

دايمآ إتعودت اقرا السؤال بتاع كل حوار صحفي مع ممثل في مجلة "ميدو ممكن تقولنا مواصفات فتاة أحلامك؟" و في كل الحوارات هذا الميدو بيحسسنا انه مثال للتقوي و الورع

فيقول متدينة بتعرف ربنا و ست بيت شاطرة و متفهمة لطبيعة شغلي

تقلب الصفحة تلاقي حوار مع ممثلة

و يسألوها نفس السؤال الغتيت "شوشو ايه مواصفات فتي أحلامك؟" ، ترد الفنانة الكبيرة و تقول يكون متفتح و متدين و رجل شرقي و متفهم لطبيعة عملي و علاقتي بالجمهور

من غير ما تسأل إزاى يكون شرقي و متفتح في نفس الوقت

إرمي المجلة و إفتح التليفزيون هتلاقي ميدو و شوشو بيبوسوا بعض..ماتتصدمش

لازم تتفهم ان دي طبيعة الشغل

ولازم تكون متفتح الذهن و عارف ان ده كله تمثيل × تمثيل

و لو عايز تكمل الإشتغالة قول لنفسك دول حاطين لوح قزاز بينهم

بجد بحتار..إزاى واحدة تبقي قاعدة في البيت و عارفة ان جوزها هيتأخر في الشغل النهاردة و النهاردة عنده تصوير في السرير مع زميلته

و الأنيل..إزاى واحد يبقي قاعد في بيته و عارف ان بنته او مراته نزلت الشغل تتباس و راجعة بكرة الصبح؟

التمثيل مهنة زيها زي موظف الحكومة و الجرسون و المهندس و الدكتور

ماسمعتش عن دكتور كان سهران يبوس زميلته في نباطشية و قال دي دواعي الشغل

و ده بيسيبنا مع أسئلة محيرة للغاية

شغل ايه ده اللي يجبر إتنين يبوسوا بعض؟

و هل البوس ده لو اتشال الشغل هيبوظ؟

و ياتري الممثلة اللي بتتباس بتاخد بدل بوس؟

و في ممثلين مخلصين في شغلهم و بيبوسوا بذمة و ممثلين بيكروتوا الشغل؟

و ياتري المخرج بيشرح لهم البوسة ولا بيعمل بروفة عليها معاهم؟

طيب لو المخرج بيبوس البطلة في البروفة..مين اللي هيبوس البطل؟

أسئلة كتير بلاش نفكر فيها أحسن

ملحوظة: منة شلبي صرحت إنها قامت بإعادة مشهد العلاقة مع سري النجار في فيلم "الساحر" 17 مرة عشان كانت بتعيط اول ماتتباس

عندما يتحدث هؤلاء

دايمآ بيلفت إنتباهي و انا بتفرج ع التليفزيون اصوات المذيعين في الإعلانات

ناس زي طارق نور و عصام سيف و أسامة منير..الأصوات اللي تشد دي

دايمآ بييجي علي بالي سؤال..هم الناس دول بيتكلموا في حياتهم كده؟

يعني هل مكالمة تليفونية مع طارق نور لها نفس مفعول إعلان طويل بيعلق عليه بصوته؟.

طيب أي واحد من دول يوم ما بييجى له برد..صوته بيبقي عامل إزاى؟ و ياتري الحكاية دي بتقف عليه بخسارة؟

و صوتهم اللي بنسمعه ده هو فعلا صوتهم ولا صوت مصطنع زي أصوات ممثلين الكارتون ما بتكون واخدة طبقة مصطنعة؟

شيء جميل ان شغلانتك تمسك ورقة و تقرا 10 جمل و تقبض قصادهم مبلغ محترم

انا من النهاردة هقضيها شرب ينسون و نعناع لحد ما زوري يسلك و أبقي زيهم..مفيش أحلي من كده شغلانة

أن تكون مطرب جيلك

كنت بشوف فيلم "حليم" و شفت قد ايه ان عبدالحليم حافظ كان بيغني للناس في كل حاجة..فرح او حزن..حب او كره

كل المشاعر كانت بتطلع من عبدالحليم و عشان كده الناس حبوه و أغانيه موجودة لحد دلوقتي

بعد ما الفيلم خلص لقيتني بسأل نفسي مين في الجيل الجديد بيعمل كده؟

لو صرفنا النظر عن منير و دياب و فؤاد. مين في الشباب بيغني لنا؟

لقيت ان اللي بيتنافسوا هم تامر و حماقي

شخصيآ انا واحد من ضمن ناس كتير مابيحبوش تامر و لا تصرفاته ولا الإشاعات اللي بيطلعها بإستمرار علي نفسه و علي المطربين التانيين

و غير كده تامر مابيهتمش لا بالكلمات ولا اللحن ولا التوزيع

كل اغانيه رزع و خبط او كلام جريء من نوعية "إعتذري للي هييجي بعدي" او سهوكه و تسبيل

في حين ان حماقي محافظ علي صورته قدام الجمهور

و بيحسن إختيار الأغاني من كل النواحي سواء كلمات او الحان او توزيع و نهاية بالفيديو كليب اللي بيكون دايمآ فيه إبهار في الصورة

غير كده حماقي غني لكل الحالات اللي ممكن أي شاب مننا يمر بيها

يعني لو بتحب ممكن تسمع بحبك كل يوم اكتر او واحدة واحدة او أحلي حاجة فيكي او طمنوني عينيك

و لو حبيبتك سابتك ممكن تسمع كل الحالات بتاعة الفراق بداية من مرحلة الصدمة في ماقدرش انساك و مش كنت تتكلم و ياريت مرورآ بمرحلة التحدي في اغنية زي بتضحك

لحد ما توصل لأغاني مرحلة الزهق زي خلص الكلام و رسالة

ده غير انك لو فصلت نفسك عن الكلمات و محتاج اغنية تفرحك هتلاقي اكتر من شكل موسيقي فيه إيقاع و أعتقد ان اغنيتين زي أحلي حاجة فيكي و بحبك كل يوم اكتر خير نموذج للشكل الموسيقي ده

و لو عايز تسمع حاجة هادية هتلاقي حاجات زي ماقدرش انساك و رسالة و مش كنت تتكلم

حماقي بيثبت ان كل خطوة بيعملها بتكون مدروسة بعناية و ذكاء و فيها إحترام للجمهور

أعتقد ان المقارنة بين ما يقدمه تامر و ما يقدمه حماقي أشبه بالمقارنة بين عربية 128 أخرها توصلك مشاويرك و عربية شيروكي تسافر بيها بلاد

محمد حماقي بيقدم أغاني تسمعها بعد 10 سنين و تحس ان لها قيمة، معتقدش ان وقتها إن شاءالله حد فينا هيكون عنده القابلية يسمع واحد بيغني

1

2

3

4

اه يا بنت الـ...ايه؟

عن العشق و الفشل

دايمآ لما اكون بتكلم مع حد من أصحابي و تيجي سيرة الحب أتكلم عن نظرية العشق و الفشل

ما هو الحب أخره يا إما عشق يا إما فشل

و كل ما اكتب نظرية العشق و الفشل أكتشف انها بتتبلور و تتغير

يعني وجهة نظري عن العشق و الفشل النهاردة غير ما كانت من شهر و غير ما كانت يوم 20 فبراير 2007 لما انشأت البلوج دي

لإن الحب نفسه بيتغير بسرعة

أصعب فترة في الجواز هي السنة الاولي و اصعب فترة في علاقة الحب هي الشهر الأول

دايمآ اي حاجة في بدايتها بتكون جديدة و عليها ضغط

يعني انت بتحب جديد عايز كل يوم تبقي مع حبيبتك مش عايز تقفل التليفون و انت بتكلمها

كل يوم بالنسبة لك هيكون فيه جديد حتي لو قعدتوا قدام بعض متنحين بتشربوا برتقال في كازينو علي النيل زي بتوع المسلسلات

خيالكم بينشط في ما يطلق عليه مرحلة "ما بعد بحبك" يعني ايه اللي جاى؟

بتبقي عامل زي طفل صغير مسك موبايل لأول مرة..عايز تدوس كل الزراير و تشوف هتعمل ايه؟

دي الغلطات اللي بيعملها اي شخصين نتيجة للهبل و الغباء اللي بيسببهم الحب للطرفين زي ما قلت قبل كده في نظرية الحب بين الغباء و الهبل

بعد ما بتصارح الطرف التاني بحبك بيبقي عندكم نسبة 50% للنجاح و نسبة 50% فشل

السؤال دايمآ، إزاى تفلت بحبك لبر الأمان و تحوله لعشق بدل فشل؟

الفشل في الحب هو اسوأ انواع الألم العاطفي، و النجاح فيه هو أقوي انواع السعادة العاطفية

طريقة بداية العلاقة هي اللي بتحدد انت هتلبس في الحيط و تفشل ولا تعدي بحبك و تمتلك العالم

و ده حديث يطول شرحه

الكلام عن العشق و الفشل لا ينتهي

زي ما العشق و الفشل لا ينتهوا من حياتنا