مين طفي النور؟

هو الواحد في الكتابة ممكن يبقي زي لعيبة الكورة؟

يعني مستواه يتراجع و يقدم اداء اقل من المستوي؟

اصل ده إحساسي..من يوم عيد ميلادى و انا حاسس ان كل حاجة بكتبها وحشة و مش راضي عنها

بيقولوا زي ما لعيبة الكورة لهم لياقة بدنية..اللي بيكتبوا لهم لياقة ذهنية

بس انا مشكلتي مش في الكتابة..انا عايز اكتب

بس كل ما اجي اكتب الاقي فراغ و صمت رهيب في دماغي

حاسس انني عايز اكتب بس مش لاقي حاجة اكتبها

و لما بكتب حاجة بحسها وحشة

اسوأ شيء لما الواحد يصحي الصبح و مفيش في دماغه فكرة جديدة

تأملات في السينما - شخصية العجوز

الواحد لما يحب يكتب فيلم و يحط فيه راجل عجوز هيحط واحد من أربع نماذج مشفتش غيرهم في السينما لحد دلوقتي

(1)

الراجل اللي كان مسيطر علي العالم في شغله و بيطلع علي المعاش او بتجبره اصابة علي التقاعد

و يبدأ يتحول لوحش مفترس في البيت محول حياة اهله لجحيم

بيحاول يسيطر علي كل حاجة

اعتراض لمجرد فرض الرأى

غالبآ بيتهد في اخر الفيلم و يعقل و ده لما يضعفه المرض و يلاقي مراته اصيلة و ولاده بيهبوا لنجدته

او بعد ما يتعرض لمحاولة نصب و اولاده ينقذوه

(2)

العجوز الثري اللي اتجوز بنت قد احفاده و بيكون مهلهل الشخصية قصادها

و طبعآ مراته بتكون امرأة لعوب تخونه مع حبيبها اللي بتحبه من اول الفيلم

و الاتنين بيبعزقوا ثروة الراجل المغفل المغلوب علي امره

و نهاية الحدوتة بتكون ان ابن الراجل العجوز و هو غالبآ مهندس او دكتور بيتصدي للبنت و يكشف لابوه خيانتها و يخلص الفيلم بالاب قاعد وسط ولاده و كلهم بياكلوا فراخ

او البنت و عشيقها يقتلوا العجوز المتخلف و البوليس يقبض عليهم

(3)

العجوز العبقري اللي اعتزل الحياة و قاعد في بيت بعيد و بيروح له بطل الفيلم

فيطرده و بعد مطارادات يعجب بتصميم البطل علي مقابلته..فيقعد معاه و يسمع حكايته

و طبعآ يقول له كلام كله الغاز يفضل البطل يجري وراه

و غالبآ العجوز ده بيكون مازال محتفظ بوسامته و شبابه

نهاية الفيلم بتكون اما بإقناع الشاب للعجوز بالرجوع للحياة العامة..او بجواز البطل من بنت العجوز

(4)

الرجل العجوز التقليدي بتاع ربنا يوفقك يا ابني و اعمليلي فنجان قهوة يا انشراح

و في الفيلم هو بيلعب دور صديق حد من التلاتة اللي ذكرتهم قبل كده

او بيكتفي بدور الجد العادى..بس في الغالب هو دور ثانوي يسهل حذفه من الفيلم

حد شاف راجل عجوز ماجبتش سيرته؟

من مظاهر الإحتفال بعيد ميلادي

(1)

التليفزيونات و الإذاعات تبث اغنية

عايزينها تبقي خضرا

العلبة اللي في الشنطة

و نقدمها لسلتو هدية

حاجة جميلة و معتبرة

(2)

كل الناس يشربوا شاى بلبن و ياكلوا ورق عنب في اليوم ده

(3)

القناة الاولي تعرض في السهرة فيلم "اخضر رجل في العالم" لفؤاد المهندس و شويكار

"hulk" و القناة التانية تعرض فيلم

(4)

إقامة مباراة ودية بين منتخب مصر و منتخب السعودية الملقب بالاخضر في استاد الجبل الاخضر

(5)

foam إعتقال اي مواطن يكون شايل عبوة

و حبسه لمدة 24 ساعة لحد ما اطفي الشمع و اكل التورتة

امبارح كان عمري 23

(: كل سنة و انا طيب

رباعيات السلطان

(1)

هي حالة غريبة شوية

الفترة اللي فاتت كنت بستمتع بالكتابة و مركز مع نفسي..بس دلوقتي عندي إستمتاع بالسمع و المشاهدة و التركيز مع الاخرين

يعني ايه؟

أكيد ماقصدش انني فاتح التليفزيون و قاعد متنح له

بس اللي اقصده انني سمعت كام جملة من بعض اصحابي..وقت سماع الجمل ماكنتش متأكد من مدي صحة كلامهم

بس دلوقتي بستمتع بمشاهدة كلامهم بيتم إثبات حقيقته

(2)

و ما الحياة الا صالون

ايوه..حياتك زي صالون..كنبة و 4 كراسي

و الناس فيها هم 10 ضيوف لازم يقعدوا في الصالون ده

الكنبة بتشيل 3 او 4

و اكيد الكرسي بياخد شخص

ماينفعش تستهبل و تقعد حبيبتك علي الكنبة لوحدها كنوع من الدلع..و أكيد برضه مش هتقعدها علي كرسي لوحدها و تضيع عليها تميز قعدة الكنبة اللي انت بس شايفه

يبقي الحل..تقدر الامور و تدي لكل واحد حجمه..تحشر جنبها 2 او 3..و تقعد الـ4 اشخاص علي الـ4 كراسي

دلوقتي الحسبة بقت 6 او 7 أشخاص..ناقص4 او 3 اشخاص

مين قالك انك لازم تقعد الـ10..حياتك فيها ناس مالهمش مكان فيها

(3)

-علاء صادق في حلقة "خطف ابوتريكة" من كارتون سوبر هنيدي-

"من المستفيد و من العبيط الذي عمل كده؟"

(4)

لسه بغلط و لسه بتعلم من غلطاتي

لسه بتكلم بس هأسكت و لازم أتعلم من سكوتي

عقبالنا كلنا

بخلاف حشيش اللي إتجوز يوم الاحد اللي فات

في موجة جواز و خطوبة إنتشرت بين اصحابي

بداية من اصحابي الـ3 اللي كانوا بيشكلوا فريق عملي في مشاريعنا العبقرية بتاعة

management information systems

اللي قرر اتنين منهم يتجوزوا و واحد يخطب

مرورآ بصديقة طفولتي اللي اتخطبت من يومين

وصولآ لـ2 من اصحابي بيستعدوا لخوض التجربة ما بين خطوبة و جواز

ما شاءالله نشاط مكثف و ربنا يوفقهم كلهم

يا تري الدور علي مين؟

أجمد 10 الساعة 5

(1)

مساحة فاضية لحاجة عايز أقولها و مش هكتبها..مش وقتها

(2)

انا إنسان مش ملاك

انا هادي مش بارد

(3)

واحد صاحبي خطب من كام يوم

و لما خطب إكتشفت انه كان بيتعرض لاكبر ذنبة من واحد صاحبنا تاني كان بيتعمد تشويه صورته و وصفه بإنه كداب و لما يصدق يشوف بنت و يلزق لها

(4)

أسف/أسفة

كلمة بسيطة معناها كبير

(5)

تعمدت ان يكون مستوي فيلم "الجميلة و الأوغاد" رديء

يعني الناس اللي قروه و مكسوفين يقولوا وحش يقولوها و هم متطمنين

ده الهدف اللي بينشده كل مؤلفين أفلام عيد الفطر

(6)

سبب رجوع أجمد 10 المفاجيء هو إقتراح لقباري مع رغبة داخلية جوايا انني اقول اللي جوايا بكلمتين

(7)

كتاب عمر طاهر الجديد "ابن الحميد" الترزي كان شاددني لدرجة انني ماقمتش قبل ا اخلص قرايته..بس ماعجبنيش

كان اقل بكتير من المستوي اللي توقعته منه بعد "كابتن مصر" و "شكلها باظت"..كتبه اللي فاتت

(8)

بعد سلسلة من الأحداث التراجيدية و الدرامية و الكوميدية المحببة لدي الاطفال..حشيش إتجوز

و حتي الأن لم تردنا أي أخبار من موقع الحدث

(9)

أصالة في البوم "نص حالة" بتعيش كل الحالات اللي ممكن تعيشها اي أنثي

(10)

هو: عارفه لما يبقي واحد جايب للبنت اللي بيحبها ورد و لابس الحتة اللي علي الحبل
و قدام بيتها يلاقيها واقفة مع واحد تاني بيديها خاتم ماس؟

هي: اممم..اه عارفه الاحساس ده

هو: عارفه لما الولد الصغير ينجح في المدرسة و يجري من المدرسة لحد بيته يلاقي جدته واقفة علي باب البيت و تقوله انت من النهاردة راجلنا يا هريدي..ابوك انجتل؟

هي: هيهي..اه عارفه برضه

هو: طيب عارفه لما تبقي البنت رايحة تزور خطيبها في مكتبه و تخش تلاقيه بيبوس السيكرتيرة؟

هي: بلاش أمثلة فيها قلة ادب بقي..عارفه

هو :و عارفه لما ولد مقرر يكلم زميلته اللي معجب بها من اول السنة..و يروح يقولها ممكن كلمة علي انفراد فتعامله بكل وقاحة قدام زملاءهم؟

هي: كلهم نفس الاحساس تقريبآ

هو:طيب كويس انك عارفه..ده كان إحساسي لما كلمتك إمبارح

يعرض حاليا: فيلم العيد - الجميلة و الأوغاد

المشهد الأول

المكان: امام قصر أحمد المصري بإحدي ضواحي القاهرة

-وقف علام و سهير قدام اليافطة اللي قدام القصر و عيونهم تحمل نظرات تجمع بين العته و الكراهية-

سهير: شايف يا خايب اخرة غباوتك ايه؟ اهو ضحك عليك و ادالك 50 جنيه و نشر حكايتنا علي انها من تأليفه و لهف هو الملايين

علام: بس يابت..ما انا منصص معاكي في الفلوس يعني مش انا بس اللي استغفلني

سهير: اه يا ناري..يا مين يلايمني عليه..هطبق في زمارة رقبته

علام: خلاص أدينا داخلين له وريني هتعملي ايه

سهير: هتشوف

علام: بس اعملي حسابك لو مد ايده عليكي انا مش هحوش..ماتعرفيش راجل عايش في قصر زي ده علاقته بالناس كبيرة عاملة ازاى

سهير: اه يا واطي

علام: انا بقولك اللي فيها من اولها عشان ماتقوليش علام باعني

سهير: طيب انجر قدامي نخش نقابله

المشهد التاني

المكان: داخل صالون قصر أحمد المصري

-احمد قاعد بالروب حاطط رجل علي رجل و بياكل عسلية و قدامه سهير و علام-

احمد: انتم معطلينني عن الفرجة علي فيلم جامد تنين لنادية الجندي شغال علي القناة التانية..فإنجزوا و قولوا عايزين ايه

علام: عايزين حقنا يا احمد

احمد بعصبية: حقكم؟ و احمد كده حاف..انت الظاهر ناسي نفسك..انا احمد المصري..انت مين؟

-تتصاعد في الخلفية موسيقي مسلسل الدالي-

علام بإرتباك: انا..يعني..كان قصدي

سهير:إسكت انت..علام كان يقصد يا احمودي انه يقولك ان الـ50 جنيه مش كفاية

علام بإستنكار: احمودي؟ بتقوليها له قدامي؟ و بعدين انت ماتعصبتش عليها ليه..ماهي بتقول اسمك حاف!؟

أحمد بسعادة: هي تقولي احمودي زي ما هي عايزة يا اخي..سوسو دي مزتي اصلا يا معلم..انت متعرفش اللي بيننا

علام: و كمان بتقرطسيني و تخونيني معاه يا بت؟

أحمد: إهمد يا عم انور وجدي..ايه الكلام القديم ده هو في حد لسه بيقولي بتقرطسيني من اصله..خلينا في المهم

علام: خلينا في المهم يا أستاذ احمد

أحمد: أستااااذ..ايوه كده..أحبك و انت مؤدب..الـ500 جنيه اللي اخدتهم مش عاجبينك في ايه؟

سهير: يا نهارك اسود يا علام..500 جنيه؟ و تضحك عليا و تقولي اداني 50 جنيه و انتي حبيبتي نقسم بالنص؟ اتاريك حرامي و شيخ منصر

علام: يابت ما انا شايلك الباقي عشان جهازك

سهير: جهاز مين يا معفن و انت حتى عرفت تجيبلي شبكة تشبكني بيها عشان تقولي جهاز

أحمد مقاطعآ: اظن انني قايلكم انني متعطل عن الفيلم اللي بشوفه..خلصوا خناقاتكم دي بره

علام: طيب ما الحل في ايدك يا استاذ أحمد

أحمد لسهير: هو انتي جاية معاه كيس جوافه ماتتكلمي يا سوسو..بذمتك مش 500 جنيه كتير علي البني ادم ده؟

سهير بدلع: هو من ناحية كتير عليه فهو كتير اوى..بس تفتكر كتير عليا يا احمودي؟

أحمد بسعادة لا متناهية: يخربيت أحمودي بتاعتك دي..بتقوليها فشر هند رستم..ماتفكك من الواد ده و تركزي معايا..هنضفك و اسنجفك و اخليكي مزة اجمد من سعاد حسني

سهير: هيهيهي..تفتكر انفع؟

أحمد: الا تنفعي..إبقي فكريني اعملك ادد علي الماسنجر

علام بنرفزة: يا أستاذ احمد..يا احمد بيه..يا باشا..و مش هوجه كلامي للبت دي عشان واطية و تبيعني في اقرب فرصة...انا عايز حقي يا باشا

أحمد: يا عم هاني رمزي كفاية..كل شوية عايز حقي عايز حقي..انا مصدع اصلا و مش فاضي لك

سهير بدلع: طب و انا يا احمودي

أحمد بسعادة: لا فاضي لك و نص طبعآ

-و فجأة رن تليفون أحمد-

أحمد: حظك من السما يا سوسو..ده خالد يوسف بيتصل..هكلمه ياخدك معاه بدل سمية الخشاب في الفيلم الجديد..ثواني و ارجع لك..خدي بالك من العبيط ده لا يلعب في حاجة

-و خرج احمد و ساب الصالون-

علام بصوت منخفض: بت انتي..لمي نفسك..ده انتي مابتدلعيش عليا الدلع ده

سهير: ياض بص له و بص لنفسك

علام بزهو: فيه إيه زيادة عني؟ ده انا حتي شعري اطول من شعره

سهير بإستنكار: و هي الليفه المقشفة اللي راسك دي تتسمي شعر..ده بيصرف علي شعره مش اقل من خمستلاف جنيه في الشهر..و تقولي شعرك..جتك نيلة

علام: جري ايه يا سهير..مش لازم تقطميني

سهير: بلا اقطمك بلا الزقك..بعدين بذمتك انت فكرت مرة تقولي سوسو؟

علام: قصدك ايه بفكرت اقولك سوسو؟ يعني انتى عاجبك فعلا كلامه و المسخرة اللي انتي عاملاها من الصبح دي مش عشان تليني دماغه يديلنا قرشين؟ بتقرطسيني بجد؟

سهير: لا اقرطسك ولا اهببك..بص يابن الناس انا اتمرمطت و اتجرست معاك في مغامراتك اللي بعتها و انت قبضت التمن و زيادة

يبقي الـ475 جنيه اللي لهفتهم حلال عليك..بس لحد هنا و كفاية..انت من طريق و انا من طريق

-في اللحظة دي احمد رجع-

أحمد: إيه ده؟ انتوا ماشربتوش حاجة صحيح..يا عبده يا إبراهيم يا سيد

-دخل الصالون 3 سفرجية-

السفرجية في نفس واحد: افندم يا سعادة البيه

أحمد: شوفوا سهير هانم تشرب..تشربي ايه يا سوسو

سهير بدلع: اللي انت تشربه يا احمودي

أحمد: خلاص يبقي هاتوا لنا 2 نسكافيه بسرعة

علام: انا اشرب كركديه

أحمد: ما سألتكش اصلا..و بعدين ايه الكركديه ده؟ المشروبات دي انقرضت من زمان..فككم منه و روحوا هاتوا النسكافيه..لي و لسوسو بس

السفرجية: تحت امرك سعادتك

أحمد لسهير: شوفتي يا سوسو..لو ماكنتش شديد مع اللي بيشتغلوا معايا مش هينفذوا اللي عايزه

سهير: طبعا يا مدمودتي..ممكن اقولك مدمودتي؟

أحمد: إنتي تقولي اللي انتي عايزاه..بس نخلص من الوغد عديم النفع علام ده

علام: اظن كده انتوا زودتوها اوى..انا لولا انني مراعي العيش و الملح معاك يا احمد بيه كان لي كلام تاني

سهير: اتنيل..قالك عيش و ملح قال..الحكاية ان الواد المهبب ده مرعوب منك و خايف تأذيه لو قل ادبه..عشان كده سايبك تلطش فيه من الصبح

أحمد: اأذيه؟ هو عندي وقت للي زي ده اصلآ عشان افكر اأذيه..إتكلم براحتك يا علام..عايز ايه؟ و من غير اسطوانات عيش و ملح

علام: بص يا احمد..انا اعرفك من و انت في ثانوي لما كنت بتيجي تاخد الجرايد من الفرشة بتاعتي..و لما جيت و قلت لي انك بتكتب في مجلة كلمتنا..قلت بس مفيش غيره يوصل كلمتي للسادة المسئولين..و اديتلك اول عدد ببلاش..قلت لي يومها ماتخافش صوتك و رأيك هيوصلوا..بس اللي حصل غير كده

أحمد بعصبية: شوفوا البني ادم الغبي..مش قايلك انني مش فاضي..إختصر يا علام..عايز ايه؟

علام: عايز تعويض مادى و ادبي

أحمد: مادى و فهمت انك عايز فلوس..لكن ادبي دي إزاى؟

علام: تصحح صورتي قدام قراء المجلة

أحمد: طيب اول عدد و قلت لي غيروا الرسمة..و وديتك المجلة و قعدوا يحاولوا يرسموا فيك ساعتين عشان يطلعوا حاجة شبهك..و خلاص الناس اتعودوا علي شكلك بتاع كل عدد..مش هينفع تتغير تاني

علام: انا مابتكلمش عن الصورة المرسومة..انا بتكلم عن الطريقة اللي بتوصفني بيها للناس

أحمد: قصدك ايه..و إختصر يا زفت

علام: اهو ده اللي بتكلم عليه..امي و اخواتي و الحتة كلها بقوا يهزقوني من كتر ما بتشتم في المغامرات..انا لي بريستيجي و وضعي برضه

سهير: بريستيج مين يا بو بريستيج انت..ده انت من صغرك العيال بيلبوك علي قفاك في الحارة..ماتصدقوش يا احمودي

أحمد: بص يا علام..انت اخدت 500 جنيه..و عشان انا مش هنكر ان القصص دي هي اللي وصلتني للعز اللي انا فيه..انا هزودلك المبلغ 250 جنيه كمان..و اكتر من كده مش هدفع..و تنصص بالحق مع سوسو

سهير بدلع: لا يا مدمودتي..انا سيبت الواد ده خلاص

أحمد: أحبك وا نتي بتفكري صح..يبقي انت لك يا علام 125 جنيه

-و طلع فلوس من جيبه و رماها لعلام-

أحمد: يلا..بره..ماشفش وشك تاني

علام: قبل ما امشي..القصة الجاية هتصحح صورتي فيها إزاى؟

أحمد: مفيش قصص جاية..من النهاردة مفيش علام بتاع الأفلام

علام بهلع: قصدك ايه..ازاى تنهي المغامرات فجأة كده..القراء مش هيسيبوك..إنكريدبل علام بقي أشهر من رفعت إسماعيل و أدهم صبري..انت ماتقدرش تلغيني

أحمد بثقة: قراء كلمتنا قالوا كلمتهم...سهير هي بطلتهم

من العدد الجاى يا سوسو انتي هتبقي بطلة مغامراتي..بس هتاخدي سكة تانية..خالد يوسف هيعملك بكرة تست كاميرا

و لو عجبتيه هيعملك تستات تانية مايصحش نتكلم فيها قدام الناس..بس انا واثق انك هتعدي

يا إبراهيم يا عبده يا سيد

-دخل السفرجية الصالون-

السفرجية في نفس واحد: تحت امرك يا احمد بيه

أحمد بصرامة: إرموا الحيوان ده بره

السفرجية و هم بيشدوا علام و سهير: و البت دي يا باشا؟

أحمد: يا اغبيا دي سوسو..سيبوها طبعآ

السفرجية: اسفين يا احمد بيه..اسفين يا سوسو..يلا يا حيوان

-و خرج السفرجية و هم بيسحلوا علام من رجليه-

أحمد: إستنوا

السفرجية: تحت امرك يا باشا

أحمد: سكوا علي النسكافيه و حضروا الشربات..خطوبتي علي سوسو الليلة

علام يصرخ و هو خارج: و كمان هتخطب البت..انا هوريك يا احمد يا مصري..مش هسيبك..و هروح لأحمد خالد توفيق يكتب قصصي من بكرة

سهير بكسوف: احمودي..انت.. انت.. فاجئتني

أحمد: كم اعشق المواقف التي تبدأ بنيران تشعل حربا و تنتهي بموقف يجعل القلب يرقص طربآ

سهير بتتنيح يغلب عليه البلاهة: يا حلاوتك..انت بتقول شعر كمان؟

أحمد بفخر: هوهوووه..انت لسه شفتي حاجة..ده انا بلعب بونجز كمان

سهير: ده انا امي داعية لي بقي

يالهوي..ده انا نسيت امي..هي ماتعرفش اننا هنتخطب

لا يا احمودي..كده ماينفعش..لازم تطلبني من اهلي

أحمد: بسيطة اوى يا روحي..انا هبعت السواق دلوقتي يجيب اهلك الجرابيع كلهم و نعمل الخطوبة هنا في القصر

سهير: مش ممكن..صدق اللي سماك ساحر النساء

أحمد: ده سلطان الوغد اللي أطلق عليا اللقب ده..صحيح اما اكلمه ييجي يحضر الخطوبة

سهير: لا..بلاش سلطان..هيقول إفيهاته السخيفة و ده يوم فرح بلاش نبوظه..الله يكرمك يا احمودي..كله الا سلطان

أحمد: علي رأيك..بلاش منه..مش هعزم حد اصلآ

سهير: يبقي احسن برضه..عشان نبقي علي راحتنا

أحمد: يا خبر أبيض..شفتي يا سوسو كنتي هتنسيني

سهير: أنسيك ايه؟

أحمد: فيلم نادية الجندي اللي علي القناة التانية..يلا نقوم نشوفه يا حبيبتي

سهير: يلا يا حبيبي

- يعلوا صوت كمانجات نهاية كل الافلام الابيض و اسود و تظهر كلمة النهاية علي الشاشة-

جميع الحقوق محفوظة لشركة سلتو للإنتاج الفني

© 2008

حقوق الملكية الفكرية لشخصيات علام و سهير محفوظة لأحمد المصري و مجلة كلمتنا
© 2008 برضه

العرض القادم - فيلم العيد

بما ان كان في مسلسل رومانسي في البلوج شغال في رمضان

طبيعي في العيد يكون في فيلم

و لازم يكون به كل مواصفات افلام العيد اللي ترضي جمهور شبعان داراما من رمضان

و لذلك انا مضيت عقد فيلم "الجميلة و الأوغاد" اللي بيقوم ببطولته أحمد المصري و علام و سهير

و اللي مايعرفش علام و سهير..فهم شخصيات المغامرات اللي أحمد بيكتبها في مجلة "كلمتنا" كل شهر

عشان الأخوة الصحفيين مايزعجوناش بالتليفونات احب اديلكم نبذة عن الفيلم

الفيلم منفذ إنتاجه مقاول من الباطن و لذلك بيغلب علي احداثه طابع افلام مقاولات التمانينات

الفيلم بيجمع بين السيكودراما و الخيال العلمي و الكوميديا السوداء مع بعض من الإغراء عشان كده هنحط عليه يافطة للكبار فقط

الفيلم إتصور و اتمنتج بالفعل بس بنحمضه في الهند و النسخ هتوصل خلال يومين

كل ما تردد عن ان منة شلبي كانت هتقوم بالبطولة ما هو الا أكاذيب

هدف شركة الإنتاج هو منافسة إيردات فيلم "كامب" رغم ان اكيد ميزانية فيلمنا اكبر

حاجة أخيرة..شركة الإنتاج بتدور علي فتيات موهوبات في التمثيل علي إستعداد تام للقيام بأدوار الإغراء و ذلك في إطار خطة الشركة للنهوض بصناعة السينما و علي من تتوافر فيهن تلك المؤهلات الإتصال بالشركة

أطيب تمنياتنا للجمهور بمشاهدة سعيدة عند عرض الفيلم

عيد الفطر

كل سنة و إنتم طيبين

عيد سعيد علي الجميع

...في إنتظار العيدية