الواحد لما يحب يكتب فيلم و يحط فيه راجل عجوز هيحط واحد من أربع نماذج مشفتش غيرهم في السينما لحد دلوقتي
(1)
الراجل اللي كان مسيطر علي العالم في شغله و بيطلع علي المعاش او بتجبره اصابة علي التقاعد
و يبدأ يتحول لوحش مفترس في البيت محول حياة اهله لجحيم
بيحاول يسيطر علي كل حاجة
اعتراض لمجرد فرض الرأى
غالبآ بيتهد في اخر الفيلم و يعقل و ده لما يضعفه المرض و يلاقي مراته اصيلة و ولاده بيهبوا لنجدته
او بعد ما يتعرض لمحاولة نصب و اولاده ينقذوه
(2)
العجوز الثري اللي اتجوز بنت قد احفاده و بيكون مهلهل الشخصية قصادها
و طبعآ مراته بتكون امرأة لعوب تخونه مع حبيبها اللي بتحبه من اول الفيلم
و الاتنين بيبعزقوا ثروة الراجل المغفل المغلوب علي امره
و نهاية الحدوتة بتكون ان ابن الراجل العجوز و هو غالبآ مهندس او دكتور بيتصدي للبنت و يكشف لابوه خيانتها و يخلص الفيلم بالاب قاعد وسط ولاده و كلهم بياكلوا فراخ
او البنت و عشيقها يقتلوا العجوز المتخلف و البوليس يقبض عليهم
(3)
العجوز العبقري اللي اعتزل الحياة و قاعد في بيت بعيد و بيروح له بطل الفيلم
فيطرده و بعد مطارادات يعجب بتصميم البطل علي مقابلته..فيقعد معاه و يسمع حكايته
و طبعآ يقول له كلام كله الغاز يفضل البطل يجري وراه
و غالبآ العجوز ده بيكون مازال محتفظ بوسامته و شبابه
نهاية الفيلم بتكون اما بإقناع الشاب للعجوز بالرجوع للحياة العامة..او بجواز البطل من بنت العجوز
(4)
الرجل العجوز التقليدي بتاع ربنا يوفقك يا ابني و اعمليلي فنجان قهوة يا انشراح
و في الفيلم هو بيلعب دور صديق حد من التلاتة اللي ذكرتهم قبل كده
او بيكتفي بدور الجد العادى..بس في الغالب هو دور ثانوي يسهل حذفه من الفيلم
حد شاف راجل عجوز ماجبتش سيرته؟
2 comments:
عمر الشريف في فيلم الأراجوز باين كان ايه ؟
عجوز أب ومضحي وحد كدة بيضحك
مش عارفة
أصلي ركزت مع عمر الشريف من ساعة مسلسل حنان وحنين بجد
..
هو عمر الشريف في فيلم الأراجوز كان عجوز وشاب صح
معرفش
بس هو ده يعني..نموذج خامس ولا واحد من دول
عمر الشريف في الاراجوز كان خلطة من النموذج التاني و التالت مع اضافة متميزة خلت الفيلم من اهم الافلام في تاريخ السينما المصرية
Post a Comment