قلبي علي ماذر بوردي انفطر

رجعت تاني بعد اسبوع من المعاناة مع الكمبيوتر

الماذر بورد كانت بتخرف

و كما قال المثل

"قلبي علي ماذر بوردي انفطر. و قلب الماذر بورد عليا حجر"

بعدين شكينا في الرامات

لحد ما توصلنا لراجل في مكان منعزل قدر يحل المعضلة...حاجة كده اشبه بانك تاخد المريض للحكيم الصيني فوق الجبل

الكمبيوتر كان فيه كمية حاجات متضايقة من بعضها كادت ان تحرق الرامات و الماذر بورد

و النتيجة ان الرامات ملسوعة..يعني لا محروقة ولا سليمة..و الكمبيوتر بقي بطيء شوية

و اشك ان الماذر بورد بتعاني من مشكلة لانني لما بفصل كابل النت الكمبيوتر بيهنج و بحتاج اعرف كارت النتورك تاني

و لما قلت للراجل عايز اغير الرامات نظر لي نظرة واعظة و قال لي كل الحلول المتاحة قدامنا و طلب مني افكر يومين و اختار الحل الانسب

بس المهم انني الحمدلله رجعت أخيرآ..الكتابة وحشتني بشدة

أجــازة

اصل انا ماليش مزاج أكتب حاجة اليومين دول

هعمل زي ما الزميل احمد رجب عمل في "نص كلمة" في جريدة الاخبار و استأذن قرائي اللي بالملايين في أجازة صيفية

فاصل إعلاني ثم نتواصل

أجمد 10 الساعة 8

(1)

سمية الخشاب صرحت ان فيلمها الجديد اجرأ من الإتنين اللي قبله

ده تالت فيلم في 2008

مرة عمرو سعد و مرة هاني سلامة و الفيلم الجديد عمرو سعد تانى

و هي لا تكل ولا تمل

(2)

خبر زعلني..بطلات مسلسل الدالي هيلبسوا هدوم ملونة في الجزء التاني

(3)

كنت قاعد مع الـ29,999 شخص اللي عايشين جوايا و اتفقنا علي ان نتحد تحت اسم واحد

و إخترنا الشخص رقم 2010 لكي يمثلنا

(4)

كل ما اقعد في حتة و اطلب كوكتيل الاقيهم حاطين نص الكوبايه عصير جوافه
و انا مابكرهش حاجة قد عصير الجوافه

بعدين هو في جوافه في الصيف اصلا؟

(5)

وائل بقي بيقعدهم بره..يا وقح

(6)

س: هل هيفاء وهبي مثيرة؟
ج: لا..هيفاء وهبي عارية

(7)

لازم يتم تعديل البطاقة الشخصية و إضافة إختيار "مزة" جنب ذكر و انثي
لان كل بنت بتوصل لمرحلة المراهقة و عندها إختيارين انها تبقي أنثي او تتحول لمزة

و يبدو ان بنات كتير ميالين لإنهم يبقوا مزز
و لتذهب الأنوثة إلي الجحيم

(8)

أخبار فنيه : موجة أفراح و زيجات تجتاح الوسط الفني في مصر السنة دي إن شاء الله

وحشيش حدد ميعاد فرحه أخيرآ

(9)

في تقرير علمي قريته كان بيقول إن سنة 2003 من 30 يوليو و حتي 29 سبتمبر يعني لمدة شهرين الشمس شرقت من الغرب علي المريخ

و ده نتيجة لإن الكوكب غير مسار دورانه و بقي يلف حوالين الشمس بالعكس طول الفترة دى

ده لينك التقرير

http://www.space.com/spacewatch/mars_retrograde_030725.html

(10)

الأهلي غلب الزمالك و الأمير اتجوز الأميرة..النهاية التقليدية لكل القصص المملة اللي حفظناها

أجمد 10 الساعة 6

(1)

خانك غباءك..يا غبي

(2)

من أسخف التعليقات اللي سمعتها عن المسلسل التركي "نور" اللي عامل هوس للبنات

جملة كتبتها بنت في احد المواقع

"زي ما الولاد عندهم هيفا احنا عندنا مهند"

ايه التفاهة دي؟

(3)

أحمد الشريف من القليلين اللي بحس و انا بسمعهم ان اللي بيغني رجل

(4)

أحمد حلمي هو الوحيد اللي بحس ان فيلمه فيلمي

أكتر ممثل بيحترم الجمهور في الوطن العربي

و أذكي ممثل في الوطن العربي

ذكاء و موهبة و إحترام للجمهور..طبيعي يبقي اكتر نجم محبوب

(5)

أرنب انور في منورنا و ارنبنا في منور أنور

حد يقدر يقولها 10 مرات؟

(6)

بالنسبة لي شيرين هي أحسن مطربة في تاريخ مصر

أحسن من أم كلثوم

أحسن من أنغام

(7)

محتاج مخرج سينما يقعد معايا ساعتين كل يوم

هيطلع من حياتي بمشاهد عالية اوى

يوجد لدينا جميع انواع الدراما..أسعار مميزة للرومانسية و الأكشن

(8)

It takes 2 to tango, But it takes 1 to balady

هوووبااا

(9)

فيروز في اغنية "أهواك" بتقول

و ورودك تغريني بشهيات القبل

جابلها ورد و عايزة تبوسه؟

دي بتتلكك بقي

(10)

سمعت البوم لطيفة كنوع من التضامن مع قضايا المرأة

ذكريات أولي الخطوات نحو سلم المجد

القصة دي انا لقيتها النهاردة و انا بدور في الكراكيب إستعدادآ للعزال..مكتوبة في مايو 1994 و عنوانها "الزوجة المسرفة" - قصة قصيرة

كتبتها و عمري 9 سنين و نص و مليانة غلطات عجيبة..واضح انني كنت متأثر وقتها بقصص محمود سالم و المغامرون الخمسة

مش عايزين تريقة..طفل موهوب و بيظهر إبداعاته

اسيبكم مع القصة المثيرة..الزوجة المسرفة

الأستاذ محسن هو رئيس مجلس إدارة احدي الشركات و كان مرتبه سخي. لكن زوجته كانت مسرفه فكانت تأخد مرتبه و تشتري اشياء غير مفيدة لهم و للمنزل. و بعد عدة أيام حصل الأستاذ محسن علي علاوة و لكن للأسف لم يتمتع بها فزوجته مسرفة

فعندما نام ليستريح اخذتهم و عندما لم يجد النقود أبلغ الشرطة بما حدث ففتشت الشرطة المنزل و لكن زوجة الاستاذ محسن كانت قد تركت له رسالة تقول فيها:

عزيزي محسن أاسف لتركي المنزل. لكن قد حدث لوالدتي حادث اليم فتم نقلها المستشفي التي في عمارة منزلها و لذلك سأتبيت معها في المستشفي لأسهر علي راحتها. فأرجو ان تهتم بابننا الصغير ولا تنس ان تغلق المنزل بالترباس

و إلي اللقاء

زوجتك فتحية

نعود الي الشرطة التي ظلت ثلاثة ايام تبحث عن دليل لكنها لم تعثر علي دليل واحده في اليوم التالي و بدت دليل بسيط لكنه هام. احدي مجوهرات زوجته في مكان النقود التي سرقت و ورقة مكتوب فيها:

أاسف لاخذ النقود

زوجتك ف.م

و تم القبض عليها ولا تستغربوا من القبض عليها . فالأستاذ محسن أراد ذلك ليكون جزاء لزوجته المسرفة و ايضأ لم تعد زوجته فقد طلقها لانها سرقته

محمد سلطان

مايو 94

أجمد 10 الساعة 4

(1)

هاني عبدالكريم اجدع شاعر يعبر عن احاسيس البنات

شغله مع شيرين اثبت ده..و توج الشغل ده باغنية "إنت مني" ليارا

الأغنية دي كتابتها صعبة جدآ لانه بيحكي إعتراف واحدة بمشاعر كتير جواها و الكلام لازم يكون موزون طبعآ

(2)


مرة 3 صعايدة دخلوا تحدي
مين يعدي البحر و يتسلق الجبل..يقتل الغوريلا و يتجوز الأميرة
الاول غرق في البحر
التاني عدي البحر و وقع من فوق الجبل
التالت عدي البحر و طلع الجبل..قتل الأميرة و اتجوز الغوريلا



(3)

hancock في فيلم
مشاهد المستشفي بين ويل سميث و تشارليز ثيرون اجدع من اي مشهد رومانسي في افلامنا
مع مراعاة انهم كانوا بيتكلموا عادى في مشهد و في المشاهد التانية ماكانوش في نفس المكان
بس ده اللي اسمه تمثيل



(4)

بافكر أطلع باسبور رغم انني معنديش النية أسافر
و بأفكر اتعلم السواقة رغم انني معنديش نية أطلع رخصة او أشتري عربية


(5)

صديقتي اللي زي العسل رفل عملت عملية و الحمدلله بقت كويسة
رب ضارة نافعة..أهي فرصة ترتاحي من ضغط الشغل يا ام الرفافيل

(6)

يا تري كام واحد من أصحابي إشتري العدد الأخير من مجلة كلمتنا عشان يقرا اللي كتبته؟


(7)

بمناسبة مجلة كلمتنا لازم أشكر 3 مواطنين مصريين من خيرة الـ80 مليون مصري رغم انني فاشل في موضوع الشكر ده

شكرآ لنانسي اللي إقتنعت انني بعرف اكتب و لازم أبطل كسل و اتحرك

شكرآ لأحمد المصري اللي إقتنع انني كسلان ولازم أبتدي أكتب و بعت اللي كتبته للمجلة و سهل الموضوع عليا لدرجة تخليني اتكسف اكسل

و شكر خاص لمروة عوض مدير تحرير المجلة اللي إثبتت ان نانسي و احمد كان عندهم حق و شجعتني اطور من اللي كتبته و اعيد المحاولة لحد ما الموضوع بقي صالح للنشر

و طبعآ شكر و إعتذار لكل اللي شجعوني زمان و قالوا لي انت كويس


(8)

يوسف الصياد إصطاد الفرصة و خلاني اوقع علي عقد جديد
الموسم التالت من برنامج "احلي الاوقات مع محمد سلطان" قريبآ إن شاءالله

(9)

و انا بتجول علي اليوتيوب بأكتشف كليبات مسخرة
ده إعادة عمل لإعلان روتانا سينما..عمله مجموعة شباب..اعتقد انه أحلي من الإعلان الأصلي


http://www.youtube.com/watch?v=QbTLhpfAWC8



(10)


يوم الجمعة اللي فات كان مميز الحمدلله و إستمتعت بكل لحظة في ليلته و حتي صباح السبت..يا تري إيه مصير يوم الجمعة الجاى إن شاء الله؟

و هل تحدث مفاجأة و ابطل كسل و اروح اجيب كارنيهات المنتزة في الوقت المناسب؟

تليفوني رن

صحيت من النوم لقيت ماما بتقولي مش هتصدق مين إتصل بك النهاردة
قلت لها مين؟
قالت لي واحد ماكلمتوش من سنين
علي طول جه في بالي..بس قلت اسألها عن اسمه يمكن تطلع الإجابة شخص أفضل و افرح
قلت لها مين؟
قالت لي زياد اللي كان معاك في المدرسة
و قبل ما ارد كملت و قالت..بيقول انه عزل و تليفونه اتغير
انا قلت له انك بتصحي متأخر و يكلمك احسن علي الساعة 5..بس هو ساب رقم التليفون عشان تكلمه
رجعت أوضتي و قعدت افكر
دول 6 سنين فاتوا من اخر مرة اتكلمنا انا و هو
كان تاني يوم ظهور نتيجة الثانوية العامة سنة 2002
بالتحديد 15 يوليو 2002
بالظبط 6 سنين
فكرت كتير..هو عايز ايه؟
حياتي إتشقلبت و بقت حياة تانية غير حياتي من 6 سنين
و رغم كده معنديش حاجة احكيهاله
مش عايز احكي له حاجة اصلا
يوم العزاء بتاع بابا واحد من اصحاب المدرسة ميل عليا و قال لي علي فكرة..انا كلمت زياد و بلغته..بس معرفش مجاش ليه
بعد الندالة دي..جاى تسأل عليا؟
طيب بأى عين بتعمل ده؟
قعدت اتكلم مع مارو..اكلمه ولا ما اكلموش
مارو سابتني اقول كل اللي في دماغي و طلعت اواى
فضلت مستني 10 دقايق..بس مارو مارجعتش
رحت لماما اديها التليفون و قلت لها خلاص مش هكلمه
دار بيننا نقاش..وسط حيرتي خلاني ارجع تاني و اقرر اكلمه و اللي يحصل يحصل
اخدت الورقة و مسكت التليفون و طلبت الرقم

محدش رد عليا

أجمد 10 الساعة 7

(1)

اسوآ انواع الإجهاد هو الإجهاد الذهني

و أحلي انواع الراحة هي راحة البال

(2)

طيب خلي الدنيا تضايقك يوم..و انا هفرح فيك اوى

(3)

كنت ماشي لوحدي علي البحر بافكر

لا

و لا كبيرة كمان

جنان ده ولا إيه؟

(4)

الأنوثة لا تكتسب ولا تورث

(5)

زمان كان الضغط يولد الإنفجار

دلوقتي الضغط بيخلي الإنسان يتفعص و ينبعج و يختل عقليآ..و اسأل مجرب

(6)

خلال الشهر اللي فات شفت 3 أفلام لخالد ابو النجا لأول مرة

و اداءه في الـ3 شخصيات كان رائع حتي لو تشابهت الشخصيات

خالد ابو النجا بيقدم سينما مختلفة متعتها في مشاهدتها التليفزيونية

(7)

محتاج أنام يومين بدون إزعاج ولا أحلام مقلقة

راحة البال و الروقان أشياء لا تقدر بثمن

(8)

ليس كل ما يلمع ذهبآ و ليس كل من تقلع مزة

(9)

و لما سكتت سألوني..حصل ايه؟

قلت لهم..تعبت قرفت زهقت

(10)

هم بتوع إتصالات مابيشوفوش إعلانات موبينيل و فودافون

ولا هم بيتعمدوا يعملوا إعلانات مملة عشان يتميزوا؟

أجمد 10 الساعة 5

(1)

عرفت بالصدفة خبر ضايقني و هو ان فنون عيانة و هتعمل عملية

الف سلامة عليكي يا فنون

إن شاءالله ترجعي قريب اوى و تكوني بصحة ممتازة علي طول

(2)

نفسي ابقي سمكة و اغوص جوه الميه..وسط الهدوء و الصمت

السمك عايش حياته في روقان و كل الدنيا حواليه شفافه

(3)

و انا صغير كنت بحب اركب العجله و امشي و انا سايب ايديا

إحساس طفولي بالحرية بيجسد نفس رغبتي في طريقة عيشي للحياة

عايز أعيش و انا سايب ايديا و مش هاممني حاجة

(4)

"انت قلت نص ديني..أحلامي..احققها..انت عايز تتجوزني؟"

دي كانت جملة حنان ترك في فيلم تيتو

بطلات أفلام محمد حفظي كلهم دماغهم متكلفة و رايقة

اتحدي حفظي لو جابلي بنت حقيقية بالروقان ده

مش تقليل لمصداقيته..بس عشان اتجوزها

(5)

مابحبش الكدب و التزييف
مابحبش اللي يغلط في حقي و مايقولش حتي أسف

فاتت شهور و انا لسه عند رأيي

!عيب عليكم بجد

(6)

صديقي..إنت غبي و بترتكب اكبر حماقة في حياتك

و ياريت اطلع غلطان

(7)

رغم ما يقال..بس اعتقد انني لست الصديق المثالي

انا مدي ناس زي الفل اقل مما يستاهلوا

لازم أصلح الخلل ده..و بسرعة

(8)

صديقتي الجدعة الرقيقة رفل..صديقي الطيب العنيف عمرو

رغم كل اللي عملتوه و اللي لسه بتعملوه عشاني عمركم ما استنيتوا مني كلمة شكر

و يوم ما بشكر حد فيكم بترفضوا الاعتراف انكم عملتوا لي حاجة

و رغم انني مقصر اوى معاكم..بس انتوا عمركم ما قصرتم

بحبكم بجد

(9)

مش هتكلم غير لما افهم

و مش هافهم دلوقتي..لان دلوقتي انا مش فاضي افهم

يبقي مش هتكلم دلوقتي..و يمكن ما اتكلمش بعدين

اصل خلقي ضيق و بزهق بسرعة

و انا من قبل ما افهم زهقت اصلا

بس برضه ناوى افهم ان شاء الله

(10)

إضحك للدنيا تضحك لك و تديك علي دماغك

صيع علي الدنيا هتعرف تعيشها

إتعودت أصيع علي الدنيا..و شكلي لازم أرجع للموضوع ده تانى

رجعت تانى

رجعت

بعد اسبوع طويل متعب و مرهق

النت اتقطع

سافرت القاهرة

رجعت من القاهرة

بدأت خطوات التعزيل الفعلية

تعبان ذهنيآ و عايز ارتاح شوية و ارجع احكي الحكايات و الحواديت إن شاءالله