في سؤال محيرني اوى
ليه لما بنقرر نسمع الاغاني القديمة لناس زي ام كلثوم و نجاة الصغيرة بيتقال اننا بننضف وداننا؟
هو اللي إحنا بنسمعه "قاذورات"؟ ما هي برضه مزيكا بتعجبنا
بس للحق..اغاني زمان فيها روقان بال مش موجود في جيلنا..يعني واضح ان الناس زمان حياتهم كانت حلوة و رايقة لدرجة إنهم يبقي عندهم وقت يقعدوا بالساعة يغنوا و يسمعوا بعض و هم فرحانين
ام كلثوم كانت بتعمل حفلة اول خميس من كل شهر..و الناس كانوا بييجوا بالطيارات يحضروها..متخيلين انكم تسافروا من بلد لبلد عشان تسمعوا اغنية؟
قد كده الناس زمان كانوا بيقدروا المزيكا؟
حسام حبيب بيقول انه ندمان انه مطرب في الزمن ده..ناس كتير قالوا يحمد ربنا اننا بنسمعه اصلا
بس الراجل عنده حق...هو قال انه كان نفسه يبقي مطرب ايام ام كلثوم و عبدالحليم..حتي لو مش بنفس شهرته دلوقتي..بس يحس انه بيقدم فن بجد
يعني الحكاية شكلها صح و إحنا بنسمع قاذورات..بس بتعجبنا!؟
ما اظنش احنا مجني علينا..عشان بنشوف كليبات عري علي ميلودي و بنسمع هيفاء و جاد شويري
إحنا جناة..لاننا لفترة طويلة رفضنا نسمع أنغام قبل ما تعمل نيولوك في لبنان و تبقي شبه المطربات اللي بنحب نشوفهم
يعني الحكاية بإيدنا..إحنا اللي هيصنا لروبي ودومينيك و إحنا اللي ماسمعناش البومات كتير كان فيها غنا بجد
!يظهر كان عندهم حق لما قالوا اننا بننضف وداننا لما نسمع القديم
No comments:
Post a Comment