bungee jumping عايز اجرب الـ
احساس التحليق بحرية و سرعة في الهواء اعتقد انه ممتع
اظن ان جنون العلماء و حبهم في اللعب في الجينات البشرية ممكن يوصلهم في يوم لتعديل جينات الانسان و تجريب حاجات تخليه يقدر يطير مع الزمن و توالي الاجيال يبقي عندنا بني ادمين بيطيروا
ما العصافير اللي شايفينها في السما دي كانت ديناصورات من ملايين السنين بس التغييرات المناخية خلتهم ينكمشوا و نبقي إحنا اللي بنطلع فيهم اللي عملوه في اجدادنا في العصور البدائية
بالنظرية دي إحنا وراد في المستقبل نطير
و يبقي ركوب الطيارات وقتها زي انك تاخد تاكسي بدل ما تمشي
و وقتها الجو بتاع افلام زمان و جمل "ولاد الناس يدخلوا البيوت من ابوابها مش من شبابيكها يا محترم" يبقي مالوش معني
لان الواحد هيخش البيت من الشباك و البيوت هتبقي مصممة بدون ابواب من جوه
و مش بعيد تلاقي شاب معاه ست عجوزة يوقفك و يقولك معلش تطير معايا بالحاجة عشان زي ما انت شايف ست كبيرة و ماتقدرش تطير للدور الـ15
و برضه مش بعيد تصحي الصبح علي صوت خناقة عشان ظبطوا الواد أشرف ابن الجيران طاير في الضلمة قدام شباك اوضة ساره بنت الجيران
و وقتها بوليس الاداب هيكبس علي الحبيبة فوق المقطم بانك تلاقي سرب عساكر طايرين و نازلين ع الهليكوبتر اللي الشاب و المزة قاعدين فيها
و يبقوا ينصحوا البنات مايطيروش في حتت ضلمة و يبعدوا عن السحاب الاسود عشان في ذئاب بشرية بتبقي قاعدة مستخبية وسط السحاب و بيخطفوا البنات المعديين جنب اي سحابه سوده
و طبعآ الاغنياء هيصيفوا في السحاب الابيض و مش بعيد تلاقيهم عملوا مارينا فوق السحاب و يسموها مارينا سكاى 1 و مارينا سكاى 2
هتقولوا لي و الناس ينزلوا البحر ازاي؟
اقولكم ان كقرية سياحية هيجيبوا اجهزة تسخن السحاب و بالتالي تنزل امطار المصيفين يقدروا يبلبطوا فيها
بس مش عارف وقتها هيبقي الدخول بالمايوه ولا بالليفه و الصابونه؟
7 comments:
حمد الله على السلامة يا ابو سلطان :)
وحشتنا والله
انا حلم حياتي الطيران
طول عمري نفسي اطير
وطول عمر اهلي بيجيبوني في اخر لحظة وانا بحاول انط من الشبابيك والبلكونات
بس تصدق دلوقتي حاسة اني اتغيرت اوي
دلوقتي بدوخ من الاماكن المرتفعه ..ومش ممكن انط من المنط العالي في حمام السباحة ابدا
بس لو نفذوا الفكرة بتاعتك ممكن احاول ارجع لامنيتي القديمة واطير انا كمان
الله يسلمك يا فاطمة..قلبي كان حاسس ان الكمبيوتر هيبوظ تاني يوم اكتب عن الاجازة :D
انا بعشق الطيران..و ده سبب من اسباب اختياري لاسم سوبرمان اللي بكتب به :D
سوبرمان يرفع ايده فوق ينطلق زي الصاروخ
ولا حتي ابقي زي دوق فليد و هو بينط من منور المختبر و يركب جريندايزر.. جريندايزر بيطير برضه و شغال باشعة الشمس يعني عمري ما هقف في بنزينة عشان احط 20-90
بجد حاسس ان هيجي يوم و نطير و مش بعيد وقتها يكون في متحف بيعرضوا فيه البلوجات و يقولوا احد مواطنين دولة مشمش -مصر قديمآ- توصل لنظرية مبدأية عن طيران الانسان
زي ما بيقولوا كده ان دافنشي اكتشف البسكلته ام 3 عجلات
و اديسون اكتشف اللمبة النيون
و وقتها أحفادنا هيرموا ولادهم من البلكونة عشان يلعبوا مع اصحابهم:D
I believe I can fly
انا عندى مفهوم الطيران و التحليق أنى أوصل لهدفى كل ما اوصل لهدف ورا هدف ورا هدف على ما اعتقد بكون طاير أحسن من الصقر :D
حمدا لله على السلامة يا سولتو
سولتو missed u
انا جايه اقولك اني اتوحشتك قوووي
بس بصراحه ما ليش مزاج اقرا الي كتبته لاني هقراه على تلات ايام :$:$
لو كنت كتبت فيا شعر كنت قريته :D:D
net without sulto
like this world without oxygen
العميل رقم 13..انت كده بتحلق بواقعية عجيبة
يا عم بقولك عصافير و شباك بنت الجيران تقولي اهداف و الكلام الجد ده؟ بقي ده الكلام اللي نعلمه لولادنا برضه؟؟:D
نغانيغو..و انا كمان اتوحشتك يا بنيتي
هبقي اكتب فيكي شعر بالفصحي عشان ماتفهميهوش و تتعذبي..شرير انا :D
خيالك خصب اوى يا اكسلانس ..
الطيران .. ذلك الحلم الابدى عند اى انسان عاقل وغير عاقل, لذة الطيران فالهروب من الواقع والتحليق فوق .. فوووق.
وتطبيق عملى للافيه الى اتقال في السفارة في العمارة..
انت مكانك مش هنا .. انت مكانك فوووق
من صغرى وانا نفسى اطلع طيار , وفي مرة تجرأت وروحت سألت مدرس الرياض في ثانوى عن امكانيات شاب زيي في انه يطلع طيار , الراجل دا كان اسمه ابو لزقه عشان كان بيلبس الكوشتى الى كان بيتلزق دا من فوق , المهم انه قعد يرغى كتير وفي الاخر قالى بس لو عايز تبقى طيار , احسنلك تكون فايتر
Fighter , طيار مقاتل يعنى في الجيش.
كان في مشكلة بسيطة ساعتها , ان الراجلد ا بيتفتف جامد وهوا بيتكلم , فا لك ان تتخيل كم اللعاب الى تطاير في وجه العبد لله من كلمة فايتر دى بس.
اعتقد ان هوا دا الموقف الى غير مجرى حياتى وخلانى اصرف نظر عن الطيران !
مونبيه..ده الواحد يدوخ لو بص من البلكونة :D
هو طبعآ حلمك انك تكون طيار ما انتهاش..انا سامع ان مؤمن طالب طيارين بيعرفوا يسوقوا موتسيكلات
Post a Comment